໕. ສຸທ຺ຘິກສໍສນ຺ທນວຓ຺ຓນາ

໑໗-໒໗. ສຈ຺ຈິກຏ຺ຐສ຺ສ, ສຈ຺ຈິກຏ຺ເຐ ວາ ສໍສນ຺ທນໍ ສຈ຺ຈິກຏ຺ຐສໍສນ຺ທນນ຺ຕິ ສມາສທ຺ວຍໍ ຠວຕີຕິ ທສ຺ເສນ຺ໂຕ ‘‘ສຈ຺ຈິກຏ຺ຐສ຺ສາ’’ຕິອາທິມາຫ. ຕຕ຺ຖ ສຈ຺ຈິກຏ຺ຐສ຺ສ ປຸຄ຺ຄລສ຺ສາຕິ ສຈ຺ຈິກຏ຺ຐສຠາວສ຺ສ ປຣມຕ຺ຖໂຕ ວິຊ຺ຊມານສຠາວສ຺ສ ປຸຄ຺ຄລສ຺ສ. ຣູປາທີຫິ ສທ຺ຘິໍ ສໍສນ຺ທນນ຺ຕິ ສຈ຺ຈິກຏ຺ຐຕາສາມຎ຺ເຎນ ຣູປາທີຫິ ສມີກຣຓໍ. ສຈ຺ຈິກຏ຺ເຐຕິ ສຈ຺ຈິກຏ຺ຐເຫຕຸ, ຕຕ຺ຖ ວາ ຕໍ ອຘິຏ຺ຐານໍ ກຕ຺ວາ. ‘‘ຕຸລ຺ຍໂຍເຄ ສມຸຈ຺ຈໂຍ’’ຕິ ສມຸຈ຺ຈຍຕ຺ຖຕ຺ຕາ ເອວ ຈ-ກາຣສ຺ສ ສຈ຺ຈິກຏ຺ເຐນ ອຸປລທ຺ຘິສາມຎ຺ເຎນ ອິຘ ຣູປມາຫຏນ຺ຕິ ຕສ຺ສ ອຸທາຫຏຠາໂວ ຍຸຕ຺ໂຕຕິ ‘‘ຍຖາຣູປ’’ນ຺ຕິ ນິທສ຺ສນວເສນ ອຕ຺ໂຖ ວຸຕ຺ໂຕ, ອຎ຺ຎຖາ ອິຘ ຣູປສ຺ສ ອາຫຣຓເມວ ກິມຕ຺ຖິຍໍ. ເອວໍ ເສສຘມ຺ເມສຸປິ. ຍາ ປເນຕ຺ຖ ອຎ຺ຎຕ຺ຕປຸຈ຺ຉາ, ສາປິ ນິທສ຺ສນຕ຺ຖໍ ອຸປພ຺ຣູເຫຕິ ອຎ຺ຎຕ຺ຕນິພນ຺ຘນຕ຺ຕາ ຕສ຺ສ. ໂອປມ຺ມສໍສນ຺ທເນ ປນ ນິທສ຺ສນຕ຺ໂຖ ຄາຫີຍຕີຕິ ອິມສ຺ມິໍ ສຸທ຺ຘິກສໍສນ຺ທເນ ເກວລໍ ສມຸຈ຺ຈຍວເສເນວ ອຕ຺ຖທສ຺ສນໍ ຍຸຕ຺ຕນ຺ຕິ ອຘິປ຺ປາໂຍ. ຣູປາທີນິ ອຸປາທາປຎ຺ຎຕ຺ຕິມຕ຺ຕຕ຺ຕາ ປຸຄ຺ຄລສ຺ສ ໂສ ເຕຫິ ອຎ຺ໂຎ, ອນຎ຺ໂຎ ຈາຕິ ນ ວຕ຺ຕພ຺ໂພຕິ ອຍໍ ສາສນກ຺ກໂມຕິ ອາຫ ‘‘ຣູປາທີຫິ…ເປ… ສມໂຍ’’ຕິ. ອນຸຎ຺ຎາຍມາເນຕິ ຕສ຺ມິໍ ສມເຍ ສຸຕ຺ເຕ ຈ ອປ຺ປຏິກ຺ຂິປິຍມາເນ. ອຍຎ຺ຈ ອຕ຺ໂຖ ສາສນິກສ຺ສ ປຣວາທິໂນ ວເສນ ວຸຕ຺ໂຕຕິ ເວທິຕພ຺ພໍ.

‘‘ອາຊານາຫິ ນິຄ຺ຄຫ’’ນ຺ຕິ ປາໂຐ ທິຏ຺ໂຐ ຠວິສ຺ສຕິ, ອຎ຺ຎຖາ ‘‘ປຏິໂລມປຎ຺ຈການິ ທສ຺ສິຕານິ, ປຏິກມ຺ມຈຕຸກ຺ກາທີນິ ສໍຂິຕ຺ຕານີ’’ຕິ ນ ສກ຺ກາ ວຕ຺ຕຸນ຺ຕິ ອຘິປ຺ປາໂຍ. ໂຈທນາຍ ວິນາ ປຣວາທິໂນ ປຏິຊານາປນໍ ນຕ຺ຖີຕິ ວຸຕ຺ຕໍ ‘‘ປຏິຊານາປນຕ຺ຖນ຺ຕິ…ເປ… ໂຈທນຕ຺ຖ’’ນ຺ຕິ. ໂຈທນາປຸພ຺ພກຎ຺ຫິ ຕສ຺ສ ປຏິຊານາປນໍ. ເຕນ ຜລໂວຫາເຣນ ກາຣຓໍ ວຸຕ຺ຕນ຺ຕິ ທສ຺ເສຕິ. ອພ຺ຍາກຕຕ຺ຕາຕິ ອພ຺ຍາກຣຓີຍຕ຺ຕາ, ຠຄວຕາ ວາ ນ ພ຺ຍາກຕຕ຺ຕາ. ຍທິ ຐປນີຍຕ຺ຕາ ປຏິກ຺ຂິປິຕພ຺ພນ຺ຕິ ອິມສ຺ມິໍ ປຈ຺ຈນີກນເຍ ຐປນີຍຕ຺ຕາ ປຎ຺ຫສ຺ສ ສກວາທິນາ ປຏິກ຺ຂິປິຕພ຺ພໍ. ປເຣນປີຕິ ປຣວາທິນາປິ ຐປນີຍຕ຺ຕາ ລທ຺ຘິເມວ ນິສ຺ສາຍ ອນຸໂລມນເຍ ປຏິກ຺ເຂໂປ ກໂຕຕິ ອຍເມຕ຺ຖ ສຸທ຺ຘິກສໍສນ຺ທນາຍ ອຘິປ຺ປາໂຍ ຍຸຕ຺ໂຕ ອນຸໂລເມປິ ຣູປາທີຫິ ອຎ຺ຎຕ຺ຕໂຈທນາຍເມວ ປຣວາທິນາ ປຏິກ຺ເຂປສ຺ສ ກຕຕ຺ຕາຕິ ອຘິປ຺ປາໂຍ.

ສຸທ຺ຘິກສໍສນ຺ທນວຓ຺ຓນາ ນິຏ຺ຐິຕາ.