໔. ທານກຖາວຓ຺ຓນາ

໔໗໙. ຜລທານຠາວທີປນຕ຺ຖນ຺ຕິ ຜລທານສພ຺ຠາວທີປນຕ຺ຖໍ. ຜລທານໍ ວຸຕ຺ຕໍ ວິຍ ໂຫຕີຕິ ຈິຕ຺ເຕນ ຜລທານໍ ປຘານຠາເວ ວຸຕ຺ຕໍ ວິຍ ໂຫຕີຕິ ອຕ຺ໂຖ. ອຎ຺ຎຖາ ທານຠາໂວຕິ ນ ສກ຺ກາ ວຕ຺ຕຸໍ. ທານຠາໂວປິ ຫິ ‘‘ທານໍ ອນິຏ຺ຐຜລ’’ນ຺ຕິອາທິນາ ວຸຕ຺ໂຕເຍວາຕິ. ຕນ຺ນິວາຣຓຕ຺ຖນ຺ຕິ ຜລທານນິວາຣຓຕ຺ຖໍ. ເອຕນ຺ຕິ ‘‘ທານໍ ອນິຏ຺ຐຜລ’’ນ຺ຕິອາທິວຈນໍ. ເຠສຊ຺ຊາທິວເສນ ອາພາຘານິຏ຺ຐຕາ ເທຍ຺ຍຘມ຺ມສ຺ສ ອນິຏ຺ຐຜລຕາປຣິຍາໂຍ ທຏ຺ຐພ຺ໂພ.

ກຖໍ ຕເຖວ ສຸຕ຺ຕໍ ສກວາທິປຣວາທິວາເທສຸ ຍຸຊ຺ຊຕີຕິ ໂຈທນາຍ ‘‘ນ ປນ ເອເກນຕ຺ເຖນາ’’ຕິ ວຸຕ຺ຕໍ ວິຠາເວຕຸໍ ‘‘ເທຍ຺ຍຘມ຺ໂມວ ທານ’’ນ຺ຕິອາທິ ວຸຕ຺ຕໍ. ຕຕ຺ຖ ນິວຕ຺ຕນປກ຺ເຂເຍວ ເອວ-ກາໂຣ ຍຸຕ຺ໂຕ, ນ ສາຘນປກ຺ເຂ ທ຺ວິນ຺ນມ຺ປິ ທານຠາວສ຺ສ ອິຈ຺ຉິຕຕ຺ຕາ. ເຕນາຫ ‘‘ເຈຕສິໂກວາຕິ ອຕ຺ໂຖ ທຏ຺ຐພ຺ໂພ, ເທຍ຺ຍຘມ຺ໂມວາ’’ຕິ ຈ. ເຕເນວາຫ ‘‘ທ຺ວິນ຺ນຎ຺ຫິ ທານານນ຺ຕິອາທິ. ສງ຺ກຣຠາວໂມຈນຕ຺ຖນ຺ຕິ ສຕິປິ ທານຠາເວ ສຠາວສງ຺ກຣໂມຈນຕ຺ຖໍ. ເຕນາຫ ‘‘ເຈຕສິກສ຺ສາ’’ຕິອາທິ.

ທານກຖາວຓ຺ຓນາ ນິຏ຺ຐິຕາ.