໑໐. ສໍວຣກຖາວຓ຺ຓນາ

໓໗໙. ອາຏານາຏິຍສຸຕ຺ເຕ ‘‘ສນ຺ຕິ, ຠິກ຺ຂເວ, ຍກ຺ຂາ ເຍຠຸຍ຺ເຍນ ປາຓາຕິປາຕາ ອປ຺ປຏິວິຣຕາ’’ຕິ (ທີ. ນິ. ໓.໒໗໖, ໒໘໖) ອາຄຕຕ຺ຕາ ຈາຕຸມຫາຣາຊິການໍ ສໍວຣາສໍວຣສພ຺ຠາໂວ ອວິວາທສິທ຺ໂຘ. ຍຕ຺ຖ ປນ ວິວາໂທ, ຕເມວ ທສ຺ເສນ຺ເຕນ ຕາວຕິໍສາທໂຍ ຄຫິຕາຕິ ອິມມຕ຺ຖໍ ທສ຺ເສຕຸໍ ‘‘ຈາຕຸມຫາຣາຊິການ’’ນ຺ຕິ ວຸຕ຺ຕໍ. ເອວໍ ສຕີຕິ ຍທິ ຕາວຕິໍເສສຸ ສໍວຣາສໍວໂຣ ນຕ຺ຖິ, ເອວໍ ສນ຺ເຕ. ສຸຣາປານນ຺ຕິ ເອຕ຺ຖາປິ ‘‘ສຸຍ຺ຍຕີ’’ຕິ ປທໍ ອາເນຕ຺ວາ ສມ຺ພນ຺ຘິຕພ຺ພໍ. ກຖໍ ສຸຍ຺ຍຕີຕິ? ວຸຕ຺ຕຎ຺ເຫຕໍ ກຸມ຺ຠຊາຕເກ –

‘‘ຍໍ ເວ ປິວິຕ຺ວາ ປຸພ຺ພເທວາ ປມຕ຺ຕາ,

ຕິທິວາ ຈຸຕາ ສສ຺ສຕິຍາ ສມາຍາ;

ຕໍ ຕາທິສໍ ມຊ຺ຊມິມໍ ນິຣຕ຺ຖໍ,

ຊານໍ ມຫາຣາຊ ກຖໍ ປິເວຍ຺ຍາ’’ຕິ. (ຊາ. ໑.໑໖.໕໘);

ຕຕ຺ຖ ປຸພ຺ພເທວາ ນາມ ອສຸຣາ. ເຕ ຫິ ຕາວຕິໍສານໍ ອຸປ຺ປຕ຺ຕິໂຕ ປຸພ຺ພເທວາຕິ ປຎ຺ຎາຍິໍສຸ. ປມຕ຺ຕາຕິ ສຸຣາປາເນນ ປມາທໍ ອາປນ຺ນາ. ຕິທິວາຕິ ມນຸສ຺ສຈາຕຸມຫາຣາຊິກໂລເກ ອຸປາທາຍ ຕຕິຍໂລກຠູຕາ ເທວຏ຺ຐານາ, ນາມເມວ ວາ ເອຕໍ ຕສ຺ສ ເທວຏ຺ຐານສ຺ສ. ສສ຺ສຕິຍາຕິ ເກວລໍ ທີຆາຍຸກຕໍ ສນ຺ຘາຍ ວທຕິ. ສມາຍາ ສຫ ອຕ຺ຕໂນ ອສຸຣມາຍາຍ, ອສຸຣມນ຺ເຕຫິ ສທ຺ຘິໍ ຈຸຕາຕິ ອຕ຺ໂຖ. ອຏ຺ຐກຖາຍຎ຺ຈ ວຸຕ຺ຕໍ ‘‘ອາຄນ຺ຕຸກເທວປຸຕ຺ຕາ ອາຄຕາຕິ ເນວາສິກາ ຄນ຺ຘປານໍ ສຊ຺ຊຍິໍສຸ. ສກ຺ໂກ ສກປຣິສາຍ ສຎ຺ຎມທາສີ’’ຕິ. ເຕນາຫ ‘‘ເຕສໍ ສຸຣາປານໍ ອສໍວໂຣ ນ ໂຫຕີຕິ ວຕ຺ຕພ຺ພໍ ໂຫຕີ’’ຕິ. ເອຕ຺ຖ ຈ ຕາວຕິໍສານໍ ປາຕຸຠາວໂຕ ປຏ຺ຐາຍ ສຸຣາປານມ຺ປິ ຕຕ຺ຖ ນາໂຫສິ, ປເຄວ ປາຓາຕິປາຕາທໂຍຕິ ວິຣມິຕພ຺ພາຠາວໂຕ ເອວ ຕາວຕິໍສໂຕ ປຏ຺ຐາຍ ອຸປຣິ ເທວໂລເກສຸ ສມາທານສມ຺ປຕ຺ຕວິຣຕິວເສນ ປຸເຣຕພ຺ພາ ສໍວຣາ ນ ສນ຺ຕິ, ໂລກຸຕ຺ຕຣາ ປນ ສນ຺ຕິເຍວ. ຕຖາ ເຕຫິ ປຫາຕພ຺ພາ ອສໍວຣາ. ນ ຫິ ອປ຺ປຫີນານຸສຍານໍ ມຄ຺ຄວຊ຺ຌາ ກິເລສາ ນ ສນ຺ຕີຕິ.

ສໍວຣກຖາວຓ຺ຓນາ ນິຏ຺ຐິຕາ.

ຕຕິຍວຄ຺ຄວຓ຺ຓນາ ນິຏ຺ຐິຕາ.