໗. ທິພ຺ພຈກ຺ຂຸກຖາວຓ຺ຓນາ

໓໗໓. ວິສິໂນຕິ ວິເສເສນ ພນ຺ຘຕິ ວິສຍີນໍ ອຕ຺ຕປຏິພນ຺ຘໍ ກໂຣຕີຕິ ວິສໂຍ, ອາຣມ຺ມຓໍ, ອນຸຠວຕິ ເອເຕນາຕິ ອານຸຠາໂວ, ສາມຕ຺ຖິຍໍ, ພລນ຺ຕິ ອຕ຺ໂຖ, ໂຄຈຣກຣຓໍ ໂຄຈໂຣ, ວິສເຍ ອານຸຠາວໂຄຈຣາ ວິສຍ…ເປ… ຈຣາຕິ. ເຕຫິ ຍຖາ ວິສິຏ຺ຐໍ ວິເສສໍ ໂຫຕິ, ຕຖາ ປຈ຺ຈຍຠູເຕນ ຌານຘມ຺ເມນ ອາຫິຕພລໍ ກຕພລາຘານໍ. ວິສຍຄ຺ຄຫຓຎ຺ເຈຕ຺ຖ ອານຸຠາວໂຄຈຣກຣຓານໍ ປວຕ຺ຕິຏ຺ຐານທສ຺ສນໍ ຍຕ຺ຖສ຺ສ ເຕຫິ ອຸປຕ຺ຖທ຺ຘຕ຺ຕາ ພລາຘານໍ ປາກຏໍ ໂຫຕິ. ເຕນາຫ ‘‘ຍາທິເສ ວິສເຍ’’ຕິອາທິ. ພລາຘານຎ຺ຈ ອຸຕ຺ຕຣິມນຸສ຺ສຘມ຺ມໂຕ ມຫຄ຺ຄຕຘມ຺ມວິເສສໂຕ ອຸປ຺ປນ຺ເນຫິ ປຓີເຕຫິ ຈິຕ຺ຕຊຣູເປຫິ ວິເສສາປຕ຺ຕິ. ຍໍ ນິສ຺ສາຍ ປຣາວຸຕ຺ຕີຕິ ເອເກ ວທນ຺ຕິ. ປຸຣິມໍ ມໍສຈກ຺ຂຸມຕ຺ຕເມວາຕິ ຍຖາວຸຕ຺ຕພລາຘານໂຕ ປຸຣິມໍ ມໍສຈກ຺ຂຸມຕ຺ຕເມວ. ວທນ຺ໂຕ ສງ຺ຄຫກາໂຣ. ວິສຍຄ຺ຄຫຓໍ ປາຬິຍໍ ກຕໍ. ນ ວິສຍວິເສສທສ຺ສນຕ຺ຖນ຺ຕິ ນ ວິສຍສ຺ສ ວິເສສທສ຺ສນຕ຺ຖໍ. ຍໂຕ ອຸຠິນ຺ນມ຺ປິ ຣູປາຍຕນເມວ ວິສໂຍຕິ ວິສຍສ຺ສ ສທິສຕໍ ອວິເສສໍ ອາຫ, ສທິສສ຺ສ ວາ ວິເສສໍ ທີເປຕີຕິ ໂຍຊນາ.

ຘມ຺ມຸປຕ຺ຖທ຺ຘ …ເປ… ອຘິປ຺ປາໂຍ, ອຎ຺ຎຖາ ລທ຺ຘິເຍວ ນ ສິຍາຕິ ຠາໂວ. ມຄ຺ໂຄຕິ ອຸປາໂຍ, ກາຣຓນ຺ຕິ ອຕ຺ໂຖ. ປກຕິຈກ຺ຂຸມໂຕ ເອວ ຫິ ທິພ຺ພຈກ຺ຂຸ ອຸປ຺ປຊ຺ຊຕິ. ກສ຺ມາ? ກສິຓາໂລກໍ ວຑ຺ເຒຕ຺ວາ ທິພ຺ພຈກ຺ຂຸຎາຓສ຺ສ ອຸປ຺ປາທນໍ, ໂສ ຈ ກສິຓມຓ຺ຑເລ ອຸຄ຺ຄຫນິມິຕ຺ເຕນ ວິນາ ນຕ຺ຖິ, ຕສ຺ມາ ວຸຕ຺ຕໍ ‘‘ມໍສຈກ຺ຂຸປຈ຺ຈຍຕາທສ຺ສນຕ຺ຖເມວ ວຸຕ຺ຕ’’ນ຺ຕິ. ເຕນາຕິ ‘‘ມຄ຺ໂຄ’’ຕິ ວຈເນນ. ຣູປາວຈຣຊ຺ຌານປຈ຺ຈເຍນາຕິ ຣູປາວຈຣຊ຺ຌາເນນ ປຈ຺ຈຍຠູເຕນ ອຸປ຺ປນ຺ນານິ ຣູປາວຈຣຊ຺ຌານຈິຕ຺ຕສມຸຏ຺ຐິຕານິ. ຌານກມ຺ມສມຸຏ຺ຐິເຕສຸ ວຕ຺ຕພ຺ພເມວ ນຕ຺ຖິ. ຕສ຺ສ ເຫສາ ລທ຺ຘິ.

໓໗໔. ເຍນ ທິພ຺ພຈກ຺ຂຸໂນ ປຎ຺ຎາຈກ຺ຂຸຠາວສ຺ສ ອິຈ຺ຉເນນ ປຏິຊານເນນ. ຕີຓິ ຈກ຺ຂູນິ ມໍສທິພ຺ພປຎ຺ຎາຈກ຺ຂູນິ ຈກ຺ຂຸນ຺ຕຣຠາວໍ ວທໂຕ ຠເວຍ຺ຍຸໍ, ຕສ຺ມາ ຕໍ ນ ອິຈ຺ຉຕີຕິ ອຕ຺ໂຖ.

ທິພ຺ພຈກ຺ຂຸກຖາວຓ຺ຓນາ ນິຏ຺ຐິຕາ.