໑. ນສຸຕ຺ຕສາຘນກຖາວຓ຺ຓນາ

໒໙໗. ‘‘ອຕີຕໍ ອນາຄຕໍ ປຈ຺ຈຸປ຺ປນ຺ນ’’ນ຺ຕິ ອຍໍ ກາລວິຠາຄປຣິຈ຺ຉິນ຺ໂນ ໂວຫາໂຣ ຘມ຺ມານໍ ຕໍ ຕໍ ອວຕ຺ຖາວິເສສໍ ອຸປາທາຍ ປຎ຺ຎຕ຺ໂຕ. ຘມ຺ໂມ ຫິ ສກິຈ຺ຈກ຺ຂເຓ ປຈ຺ຈຸປ຺ປນ຺ໂນ, ຕໂຕ ປຸພ຺ເພ ອນາຄໂຕ, ປຈ຺ຉາ ອຕີໂຕຕິ ວຸຕ຺ໂຕວາຍມຕ຺ໂຖ. ຕຕ຺ຖ ຍທິປິ ຘມ຺ມາ ອນິຈ຺ຈຕາຍ ອນວຏ຺ຐິຕາ, ອວຕ຺ຖາ ປນ ເຕສໍ ຍຖາວຸຕ຺ຕາ ວວຕ຺ຖິຕາຕິ ຕທຸປາທານາ ກາລປຎ຺ຎຕ຺ຕິປິ ວວຕ຺ຖິຕາ ເອວ. ນ ຫິ ອຕີຕາທິ ອນາຄຕາທິຠາເວນ ໂວຫຣີຍຕິ, ຂນ຺ຘາທິປຎ຺ຎຕ຺ຕິ ປນ ອນເປກ຺ຂິຕກາລວິເສສາ. ຕີສຸປິ ຫິ ກາເລສຸ ຣູປກ຺ຂນ຺ໂຘ ຣູປກ຺ຂນ຺ໂຘວ, ຕຖາ ເສສາ ຂນ຺ຘາ ອາຍຕນຘາຕຸໂຍ ຈ. ເອວມວຏ຺ຐິເຕ ຍສ຺ມາ ປຣວາທີ ‘‘ອຕ຺ຖີ’’ຕິ ອິມໍ ປຈ຺ຈຸປ຺ປນ຺ນນິຍຕໍ ໂວຫາຣໍ ອຕີຕານາຄເຕສຸປິ ອາໂຣເປຕິ, ຕສ຺ມາ ໂສ ອທ຺ຘສງ຺ກຣໍ ກໂຣຕິ. ປຣມຕ຺ຖໂຕ ອວິຊ຺ຊມາເນ ວິຊ຺ຊມາເນ ກຕ຺ວາ ໂວຫຣຕີຕິ ຕໂຕ ວິເວເຈຕຸໍ ‘‘ອຕີຕໍ ຂນ຺ຘາ’’ຕິອາທິກາ ອຍໍ ກຖາ ອາຣທ຺ຘາ.

ຍສ຺ມາ ປນ ຣຸປ຺ປນາທິສຠາເວ ອຕີຕາທິເຠທຠິນ຺ເນ ຘມ຺ເມ ເອກຊ຺ຌໍ ຄເຫຕ຺ວາ ຕຕ຺ຖ ຣາສຏ຺ຐໍ ອຸປາທາຍ ຂນ຺ຘປຎ຺ຎຕ຺ຕິ, ຈກ຺ຂຸຣູປາທີສຸ ກາຣຓາທິອຕ຺ຖໍ ສຸຎ຺ຎຕຏ຺ຐຎ຺ຈ ອຸປາທາຍ ອາຍຕນປຎ຺ຎຕ຺ຕິ ຘາຕຸປຎ຺ຎຕ຺ຕິ ຈ, ຕສ຺ມາ ສາ ອທ຺ຘຕ຺ຕຍສາຘາຣຓາ, ນ ອຕີຕາທິປຎ຺ຎຕ຺ຕິ ວິຍ ອທ຺ຘວິເສສາຘິຏ຺ຐານາຕິ ອາຫ ‘‘ຂນ຺ຘາທິຠາວາວິຊຫນໂຕ ອຕີຕານາຄຕານ’’ນ຺ຕິ. ເຕ ປເນເຕ ອຕີຕາທິເກ ຂນ຺ຘາທິເກ ວິຍ ສຠາວຘມ຺ມໂຕ ສຎ຺ຊານນ຺ໂຕ ປຣວາທີ ‘‘ອຕ຺ຖີ’’ຕິ ປຏິຊານາຕີຕິ ອາຫ ‘‘ອຕີຕານາຄຕານໍ ອຕ຺ຖິຕໍ ອິຈ຺ຉນ຺ຕສ຺ສາ’’ຕິ. ເສສເມຕ຺ຖ ຍໍ ວຕ຺ຕພ຺ພໍ, ຕໍ ເຫຏ຺ຐາ ວຸຕ຺ຕນຍເມວ.

‘‘ຕໂຍເມ, ຠິກ຺ຂເວ, ນິຣຸຕ຺ຕິປຖາ’’ຕິ ສຸຕ຺ຕໍ ນິຣຸຕ຺ຕິປຖສຸຕ຺ຕໍ. ຕຕ຺ຖ ຫິ ປຈ຺ຈຸປ຺ປນ຺ນສ຺ເສວ ອຕ຺ຖິຠາໂວ ວຸຕ຺ໂຕ, ນ ອຕີຕານາຄຕານໍ. ເຕນ ວຸຕ຺ຕໍ ‘‘ອຕ຺ຖິຕາຍ ວາຣິຕຕ຺ຕາ’’ຕິ. ຍທິ ເອວໍ ‘‘ອຕ຺ຖິ, ຠິກ຺ຂເວ, ນິພ຺ພານ’’ນ຺ຕິ ອິທໍ ກຖນ຺ຕິ? ຕໍ ສພ຺ພທາ ອຸປລທ຺ຘິໂຕ ວຸຕ຺ຕໍ ນິຈ຺ຈສຠາວຎາປນຕ຺ຖໍ ອສງ຺ຂຕຘມ຺ມສ຺ສ, ອິຘ ປນ ສງ຺ຂຕຘມ຺ມານໍ ຂຓຕ຺ຕຍສມງ຺ຄິຕາຍ ອຕ຺ຖິຠາໂວ ນ ຕໂຕ ປຸພ຺ເພ ປຈ຺ຉາ ຈາຕິ ປຎ຺ຎາປນຕ຺ຖໍ ‘‘ຍໍ, ຠິກ຺ຂເວ, ຣູປໍ…ເປ… ນ ຕສ຺ສ ສງ຺ຂາ ຠວິສ຺ສຕີ’’ຕິ ວຸຕ຺ຕໍ. ເອເຕນ ‘‘ອຕ຺ຖີ’’ຕິ ສມຎ຺ຎາຍ ອນຸປາທານໂຕ ອຕີຕໍ ອນາຄຕໍ ປຣມຕ຺ຖໂຕ ນຕ຺ຖີຕິ ທສ຺ສິຕໍ ໂຫຕິ. ອິມິນາວູປາເຍນາຕິ ‘‘ຂນ຺ຘາທິຠາວາວິຊຫນໂຕ’’ຕິ ເອວໍ ວຸຕ຺ເຕນ ເຫຕຸນາ. ອຸປປຕ຺ຕິສາຘນຍຸຕ຺ຕິ ຫິ ອິຘ ‘‘ອຸປາໂຍ’’ຕິ ວຸຕ຺ຕາ.

ນສຸຕ຺ຕສາຘນກຖາວຓ຺ຓນາ ນິຏ຺ຐິຕາ.