໑. ນສຸຕ຺ຕາຫຣຓກຖາວຓ຺ຓນາ

໒໘໐. ຍທິປິ ປາຬິຍໍ ‘‘ຕໂຍ ມຄ຺ເຄ ຠາເວຕີ’’ຕິ ວຸຕ຺ຕໍ, ມຄ຺ຄຠາວນາ ປນ ຍາວເທວ ກິເລສສມຸຈ຺ຉິນ຺ທນຕ຺ຖາຕິ ຎຕ຺ວາ ‘‘ກິຈ຺ຈສພ຺ຠາວນ຺ຕິ ຕີຫິ ປຫາຕພ຺ພສ຺ສ ປຫີນຕ’’ນ຺ຕິ ອາຫ. ຕຕ຺ຖ ຕີຫີຕິ ເຫຏ຺ຐິເມຫິ ຕີຫິ ອຣິຍມຄ຺ເຄຫິ ປຫາຕພ຺ພສ຺ສ ອຊ຺ຌຕ຺ຕສໍໂຍຊນສ຺ສ ປຫີນຕໍ ສມຸຈ຺ຉິນ຺ທນນ຺ຕິ ອຕ຺ໂຖ. ຕໍ ປນ ກິຈ຺ຈນ຺ຕິ ອໂຘຠາຄິຍສໍໂຍຊເນສຸ ມຄ຺ຄສ຺ສ ປຫານາຠິສມຍກິຈ຺ຈໍ. ເຕເນວ ມຄ຺ເຄນາຕິ ອນາຄາມິມຄ຺ເຄເນວ. ເອຕໍ ນ ສເມຕີຕິ ເອວໍ ມຄ຺ຄຸປ຺ປາທໂຕ ປເຄວ ກາມຣາຄພ຺ຍາປາທາ ປຫີຍນ຺ຕີຕິ ລທ຺ຘິກິຕ຺ຕນໍ ອິມິນາ ມຄ຺ຄສ຺ສ ກິຈ຺ຈສພ຺ຠາວກຖເນນ ນ ສເມຕິ ນ ຍຸຊ຺ຊຕິ. ຕສ຺ມາຕິ ອິມິນາ ຍຖາວຸຕ຺ຕເມວ ວິໂຣຘໍ ປຈ຺ຈາມສຕິ. ປຫີນານນ຺ຕິ ວິກ຺ຂມ຺ຠິຕານໍ. ໂຍ ຫິ ຌານລາຠີ ຌາເນນ ຍຖາວິກ຺ຂມ຺ຠິເຕ ກິເລເສ ມຄ຺ເຄນ ສມຸຈ຺ຉິນ຺ທຕິ, ໂສ ອິຘາຘິປ຺ເປໂຕ. ເຕນາຫ ‘‘ທສ຺ສນມຄ຺ເຄ…ເປ… ອຘິປ຺ປາໂຍ’’ຕິ.

ຊຫຕິກຖາວຓ຺ຓນາ ນິຏ຺ຐິຕາ.