໓. ໂອຘິໂສກຖາວຓ຺ຓນາ

໒໗໔. ໂອຘິໂສຕິ ຠາຄໂສ, ຠາເຄນາຕິ ອຕ຺ໂຖ. ຠາໂຄ ນາມ ຍສ຺ມາ ເອກເທໂສ ໂຫຕິ, ຕສ຺ມາ ‘‘ເອກເທເສນ ເອກເທເສນາ’’ຕິ ວຸຕ຺ຕໍ. ຕຕ຺ຖ ຍທິ ຈຕຸນ຺ນໍ ມຄ຺ຄານໍ ວເສນ ສມຸທຍປກ຺ຂິກສ຺ສ ກິເລສຄຓສ຺ສ ຈຕຸຠາເຄຫິ ປຫານໍ ‘‘ໂອຘິໂສ ປຫານ’’ນ຺ຕິ ອຘິປ຺ເປຕໍ, ອິຈ຺ຉິຕເມເວຕໍ ສກວາທິສ຺ສ ‘‘ຕິຓ຺ຓໍ ສໍໂຍຊນານໍ ປຣິກ຺ຂຍາ ທິຏ຺ຐິຄຕານໍ ປຫານາຍາ’’ຕິ ຈ ອາທິວຈນໂຕ. ຍສ຺ມາ ປນ ມຄ຺ໂຄ ຈຕູສຸ ສຈ຺ເຈສຸ ນານາຠິສມຍວເສນ ກິຈ຺ຈກໂຣ, ນ ເອກາຠິສມຍວເສນາຕິ ປຣວາທິໂນ ລທ຺ຘິ, ຕສ຺ມາ ຍຖາ ‘‘ມຄ຺ໂຄ ກາເລນ ທຸກ຺ຂໍ ປຣິຊານາຕິ, ກາເລນ ສມຸທຍໍ ປຊຫຕີ’’ຕິອາທິນາ ນານກ຺ຂຓວເສນ ສຈ຺ເຈສຸ ປວຕ຺ຕຕີຕິ ອິຈ຺ຉິໂຕ, ເອວໍ ປຈ຺ເຈກມ຺ປິ ນານກ຺ຂຓວເສນ ປວຕ຺ເຕຍ຺ຍ. ຕຖາ ສຕິ ທຸກ຺ຂາທີນໍ ເອກເທສເອກເທສເມວ ປຣິຊານາຕິ ປຊຫຕີຕິ ທສ຺ເສຕຸໍ ປາຬິຍໍ ‘‘ໂສຕາປຕ຺ຕິ…ເປ… ເອກເທເສ ປຊຫຕີ’’ຕິອາທິ ວຸຕ຺ຕໍ. ສຕິ ຫິ ນານາຠິສມເຍ ປຐມມຄ຺ຄາທີຫິ ປຫາຕພ຺ພານໍ ສໍໂຍຊນຕ຺ຕຍາທີນໍ ທຸກ຺ຂທສ຺ສນາທີຫິ ເອກເທສເອກເທສປ຺ປຫານໍ ສິຍາຕິ ເອກເທສໂສຕາປຕ຺ຕິມຄ຺ຄຏ຺ຐາທິຕາ, ຕໂຕ ເອວ ເອກເທສໂສຕາປນ຺ນາທິຕາ ຈ ອາປຊ຺ຊຕິ ອນນ຺ຕຣຜລຕ຺ຕາ ໂລກຸຕ຺ຕຣກຸສລານໍ, ນ ຈ ຕໍ ຍຸຕ຺ຕໍ. ນ ຫິ ກາລເຠເທນ ວິນາ ໂສ ເອວ ໂສຕາປນ຺ໂນ, ອໂສຕາປນ຺ໂນ ຈາຕິ ສກ຺ກາ ວິຎ຺ຎາຕຸໍ. ເຕນາຫ ‘‘ເອກເທສໍ ໂສຕາປນ຺ໂນ, ເອກເທສໍ ນ ໂສຕາປນ຺ໂນ’’ຕິອາທິ.

ອປິຈາຍໍ ນານາຠິສມຍວາທີ ເອວໍ ປຸຈ຺ຉິຕພ຺ໂພ ‘‘ມຄ຺ຄຎາຓໍ ສຈ຺ຈານິ ປຏິວິຊ຺ຌນ຺ຕໍ ກິໍ ອາຣມ຺ມຓໂຕ ປຏິວິຊ຺ຌຕິ, ອຸທາຫຸ ກິຈ຺ຈໂຕ’’ຕິ. ຍທິ ອາຣມ຺ມຓໂຕຕິ ວເທຍ຺ຍ, ຕສ຺ສ ວິປສ຺ສນາຎາຓສ຺ສ ວິຍ ທຸກ຺ຂສມຸທຍານໍ ອຈ຺ຈນ຺ຕປຣິຈ຺ເຉທສມຸຈ຺ເຉທາ ນ ຍຸຕ຺ຕາ ຕໂຕ ອນິສ຺ສຏຕ຺ຕາ, ຕຖາ ມຄ຺ຄທສ຺ສນໍ. ນ ຫິ ສຍເມວ ອຕ຺ຕານໍ ອາຣພ຺ຠ ປວຕ຺ຕຕີຕິ ຍຸຕ຺ຕໍ, ມຄ຺ຄນ຺ຕຣປຣິກປ຺ປນາຍໍ ອນວຏ຺ຐານໍ ອາປຊ຺ຊຕີຕິ, ຕສ຺ມາ ຕີຓິ ສຈ຺ຈານິ ກິຈ຺ຈໂຕ, ນິໂຣຘໍ ກິຈ຺ຈໂຕ ອາຣມ຺ມຓໂຕ ຈ ປຏິວິຊ຺ຌຕີຕິ ເອວມສມ຺ໂມຫໂຕ ປຏິວິຊ຺ຌນ຺ຕສ຺ສ ມຄ຺ຄຎາຓສ຺ສ ນຕ຺ເຖວ ນານາຠິສມໂຍ. ວຸຕ຺ຕຎ຺ເຫຕໍ ‘‘ໂຍ, ຠິກ຺ຂເວ, ທຸກ຺ຂໍ ປສ຺ສຕິ, ທຸກ຺ຂສມຸທຍມ຺ປິ ໂສ ປສ຺ສຕີ’’ຕິອາທິ. ນ ເຈຕໍ ກາລນ຺ຕຣທສ຺ສນໍ ສນ຺ຘາຍ ວຸຕ຺ຕໍ. ‘‘ໂຍ ນຸ ໂຂ, ອາວຸໂສ, ທຸກ຺ຂໍ ປສ຺ສຕິ, ທຸກ຺ຂສມຸທຍມ຺ປິ ໂສ ປສ຺ສຕິ, ທຸກ຺ຂນິໂຣຘມ຺ປິ…ເປ… ທຸກ຺ຂນິໂຣຘຄາມິນິປຏິປທມ຺ປິ ໂສ ປສ຺ສຕີ’’ຕິ (ສໍ. ນິ. ໕.໑໑໐໐) ເອກສຈ຺ຈທສ຺ສນສມງ຺ຄິໂນ ອຎ຺ຎສຈ຺ຈທສ຺ສນສມງ຺ຄິຠາວວິຈາຣຓາຍໍ ຕທຕ຺ຖສາຘນຕ຺ຖໍ ອາຍສ຺ມຕາ ຄວໍປຕິຕ຺ເຖເຣນ ອາຠຕຕ຺ຕາ ປຈ຺ເຈກຎ຺ຈ ສຈ຺ຈຕ຺ຕຍທສ຺ສນສ຺ສ ໂຍຊິຕຕ຺ຕາ. ອຎ຺ຎຖາ ປຸຣິມທິຏ຺ຐສ຺ສ ປຸນ ອທສ຺ສນໂຕ ສມຸທຍາທິທສ຺ສເນ ທຸກ຺ຂາທິທສ຺ສນມໂຍຊນີຍໍ ສິຍາ. ນ ຫິ ໂລກຸຕ຺ຕຣມຄ຺ໂຄ ໂລກິຍມຄ຺ໂຄ ວິຍ ກຕກາຣິຠາເວນ ປວຕ຺ຕຕິ ສມຸຈ຺ເຉທກຕ຺ຕາ. ຕຖາ ໂຍຊເນ ຈ ສພ຺ພໍ ທສ຺ສນໍ ທສ຺ສນນ຺ຕຣປຣນ຺ຕິ ທສ຺ສນານຸປຣໂມ ສິຍາ. ເອວໍ ອາຄມໂຕ ຍຸຕ຺ຕິໂຕ ຈ ນານາຠິສມຍສ຺ສ ອສມ຺ຠວໂຕ ປຈ຺ເຈກໍ ມຄ຺ຄານໍ ໂອຘິໂສ ປຫານໍ ນຕ຺ຖີຕິ ນິຏ຺ຐເມຕ຺ຖ ຄນ຺ຕພ຺ພໍ.

ໂອຘິໂສກຖາວຓ຺ຓນາ ນິຏ຺ຐິຕາ.