໑໙. ປຏິເວຘານຸໂຍຄາທິວຓ຺ຓນາ

໒໑໘. ປຊານນໍ ນາມ ນ ໂຫຕິ ນິພ຺ພິທາທີນໍ ອປ຺ປຈ຺ຈຍຕ຺ຕາ. ປຣິຈ຺ເຉທນສມຕ຺ຖຕຎ຺ຈ ທສ຺ເສຕີຕິ ສມ຺ພນ຺ໂຘ.

໒໒໘. ສຫຣູປຠາໂວ ຣູເປນ ສມງ຺ຄິຕາ, ວິນາຣູປຠາໂວ ຕໂຕ ວິນິສ຺ສຏຕາຕິ ຕທຸຠຍໍ ຣູປສ຺ສ ອພ຺ຠນ຺ຕຣຄມນໍ ພຫິນິກ຺ຂມນຎ຺ຈ ໂຫຕິ. ຕສ຺ມາ ຕໍ ທ຺ວຍໍ ສຫຣູປຠາວວິນາຣູປຠາວານໍ ລກ຺ຂຓວຈນນ຺ຕິ ວຸຕ຺ຕໍ.

໒໓໗. ໂອຬາຣິໂກຕິ ຖູໂລ. ອາຫິໂຕ ອຫໍ ມາໂນ ເອຕ຺ຖາຕິ ອຕ຺ຕາ, ອຕ຺ຕຠາໂວ. ໂສ ເອວ ຍຖາສກໍ ກມ຺ມຸນາ ປຏິລຠິຕພ຺ພໂຕ ປຏິລາໂຠ. ປທທ຺ວເຍນປິ ກາມາວຈຣຕ຺ຕຠາໂວ ກຖິໂຕ. ມໂນມໂຍ ອຕ຺ຕປຏິລາໂຠ ຣູປາວຈຣຕ຺ຕຠາໂວ. ໂສ ຫິ ຌານມເນນ ນິພ຺ພຕ຺ຕຕ຺ຕາ ມໂນມໂຍ. ອຣູໂປ ອຕ຺ຕປຏິລາໂຠຕິ ອຣູປາວຈຣຕ຺ຕຠາໂວ. ໂສ ຫິ ຣູເປນ ອມິສ຺ສິຕຕ຺ຕາ ອຣູໂປຕິ ເອວເມຕ຺ຖ ອຕ຺ໂຖ ເວທິຕພ຺ໂພ. ‘‘ອຕ຺ຕາ’’ຕິ ປນ ຊີເວ ໂລກໂວຫາໂຣ ນິຣຸຬ຺ໂຫ, ອສຕິປິ ຊີເວ ຕຖານິຣຸຬ຺ຫໍ ໂລກໂວຫາຣໍ ຄເຫຕ຺ວາ ສມ຺ມາສມ຺ພຸທ຺ຘາປິ ໂວຫຣນ຺ຕີຕິ ທສ຺ເສນ຺ໂຕ ‘‘ອິຕິ ອິມາ ໂລກສ຺ສ ສມຎ຺ຎາ, ຍາຫິ ຕຖາຄໂຕ ໂວຫຣຕີ’’ຕິ ວຕ຺ວາ ອິທານິ ຍຖາ ໂວຫຣນ຺ຕິ, ຕໍ ປກາຣໍ ວິຠາເວນ຺ໂຕ ‘‘ອປຣາມສ’’ນ຺ຕິອາທິມາຫ.

ປຈ຺ຈຕ຺ຕສາມຎ຺ຎລກ຺ຂຓວເສນາຕິ ກກ຺ຂຬຜຸສນາທິສລກ຺ຂຓວເສນ ອນິຈ຺ຈຕາທິສາມຎ຺ຎລກ຺ຂຓວເສນ ຈ. ອິມິນາຕິ ‘‘ປຈ຺ຈຕ຺ຕສາມຎ຺ຎລກ຺ຂຓວເສນາ’’ຕິອາທິນາ ວຸຕ຺ເຕນ ປຣມຕ຺ຖໂຕ ປຸຄ຺ຄລາຠາວວຈເນນ. ອິໂຕ ປຸຣິມາຕິ ຕຕ຺ຖ ຕຕ຺ຖ ສກວາທິປຏິກ຺ເຂປາທິວິຠາວນວເສນ ປວຕ຺ຕາ ອິໂຕ ອຕ຺ຖສໍວຓ຺ຓນໂຕ ປຸຣິມາ. ອິມິນາຕິ ວາ ‘‘ຍຖາ ຣູປາທໂຍ ຘມ຺ມາ’’ຕິອາທິນາ ອຏ຺ຐກຖາຍໍ ວຸຕ຺ຕວຈເນນ. ຍຖາ ຈາຕິ ເອຕ຺ຖ ຈ-ສທ຺ໂທ ສມຸຈ຺ຈຍຕ຺ໂຖ. ເຕນ ສມຎ຺ຎານຕິຘາວນໍ ສມ຺ປິຓ຺ເຑຕິ. ອິທໍ ວຸຕ຺ຕໍ ໂຫຕິ – ຍຖາ ປຣາມາໂສ ຈ ນ ໂຫຕິ ຊນປທນິຣຸຕ຺ຕິຍາ ອຠິນິວິສິຕພ຺ພໂຕ, ຍຖາ ຈ ສມຎ຺ຎາຕິຘາວນໍ ນ ໂຫຕິ, ເອວໍ ອິໂຕ ປຸຣິມາ ຈ ອຕ຺ຖວຓ຺ຓນາ ໂຍເຊຕພ຺ພາ. ສມຎ຺ຎາຕິຘາວເນ ຫິ ສຕິ ສພ຺ພໂລກໂວຫາຣູປຈ຺ເຉໂທ ສິຍາຕິ.

ຕສ຺ມາ ສຈ຺ຈນ຺ຕິ ຍສ຺ມາ ຕຕ຺ຖ ປຣມຕ຺ຖາກາຣໍ ອນາໂຣເປຕ຺ວາ ສມຎ຺ຎໍ ນາຕິຘາວນ຺ໂຕ ເກວລໍ ໂລກສມ຺ມຸຕິຍາວ ໂວຫຣຕິ, ຕສ຺ມາ ສຈ຺ຈໍ ປເຣສໍ ອວິສໍວາທນໂຕ. ຕຖກາຣຓນ຺ຕິ ຕໂຖ ອວິຕໂຖ ຘມ຺ມສຠາໂວ ກາຣຓໍ ປວຕ຺ຕິເຫຕຸ ເອຕສ຺ສາຕິ ຕຖກາຣຓໍ, ປຣມຕ຺ຖວຈນໍ, ອວິປຣີຕຘມ຺ມສຠາວວິສຍນ຺ຕິ ອຕ຺ໂຖ. ເຕນາຫ ‘‘ຘມ຺ມານໍ ຕຖຕາຍ ປວຕ຺ຕ’’ນ຺ຕິ.

ປຏິເວຘານຸໂຍຄາທິວຓ຺ຓນາ ນິຏ຺ຐິຕາ.

ປຸຄ຺ຄລກຖາວຓ຺ຓນາ ນິຏ຺ຐິຕາ.