໑໑. ຄຕິອນຸໂຍຄວຓ຺ຓນາ

໖໙-໗໒. ຍານິສ຺ສ ສຸຕ຺ຕານິ ນິສ຺ສາຍ ລທ຺ຘິ ອຸປ຺ປນ຺ນາ, ເຕສໍ ທສ຺ສນໂຕ ປຣໂຕ ‘‘ເຕນ ຫິ ປຸຄ຺ຄໂລ ສນ຺ຘາວຕີ’’ຕິອາທິນາ ປາຬິ ອາຄຕາ, ປຸຣໂຕ ປນ ‘‘ນ ວຕ຺ຕພ຺ພໍ ປຸຄ຺ຄໂລ ສນ຺ຘາວຕີ’’ຕິອາທິນາ, ຕສ຺ມາ ວຸຕ຺ຕໍ ‘‘ທສ຺ເສນ຺ໂຕ…ເປ… ຠວິຕພ຺ພ’’ນ຺ຕິ. ທສ຺ເສຕ຺ວາຕິ ວາ ວຕ຺ຕພ຺ພນ຺ຕິ ‘‘ຍານິສ຺ສ…ເປ… ຕານິ ທສ຺ເສຕ຺ວາ ‘ເຕນ ຫິ ປຸຄ຺ຄໂລ ສນ຺ຘາວຕີ’ຕິອາທິມາຫາ’’ຕິ ວຕ຺ຕພ຺ພນ຺ຕິ ອຕ຺ໂຖ. ທສ຺ເສນ຺ໂຕຕິ ວາ ອິທໍ ທສ຺ສນກິຣິຍາຍ ນ ວຕ຺ຕມານຕາມຕ຺ຕວຈນໍ, ອຖ ໂຂ ຕສ຺ສາ ລກ຺ຂຓຕ຺ຖວຈນໍ, ເຫຕຸຠາວວຈນໍ ວາຕິ ນ ໂກຈິ ໂທໂສ.

໙໑. ໂສ ວຕ຺ຕພ຺ໂພຕິ ໂສ ຊີວສຣີຣານໍ ອນຎ຺ຎຕາປຊ຺ຊນາກາໂຣ ວຕ຺ຕພ຺ໂພ, ນຕ຺ຖີຕິ ອຘິປ຺ປາໂຍ. ‘‘ຣູປີ ອຕ຺ຕາ’’ຕິ ອິມິສ຺ສາ ລທ຺ຘິຍາ ວເສນ ‘‘ເຍນ ຣູປສງ຺ຂາເຕນ ອຕ຺ຕໂນ ສຠາວຠູເຕນ ສຣີເຣນ ສທ຺ຘິໍ ຄຈ຺ຉຕີ’’ຕິ ເອວໍ ປນ ອຕ຺ເຖ ສຕິ ໂສ ອາກາໂຣ ວຸຕ຺ໂຕ ເອວ ໂຫຕິ, ຕຖາ ຈ ສຕິ ‘‘ຣູປໍ ປຸຄ຺ຄໂລຕິ ອນນຸຎ຺ຎາຕຕ຺ຕາ’’ຕິ ເອວມ຺ປິ ວຕ຺ຕຸໍ ນ ສກ຺ກາ. ຍສ຺ມາ ປນ ‘‘ອິຘ ສຣີຣນິກ຺ເຂປາ’’ຕິ ອນນ຺ຕຣໍ ວກ຺ຂຕິ, ຕສ຺ມາ ‘‘ໂສ ວຕ຺ຕພ຺ໂພ’’ຕິ ວຸຕ຺ຕໍ. ນິຣຍູປຄສ຺ສ ປຸຄ຺ຄລສ຺ສ ອນ຺ຕຣາຠວໍ ນ ອິຈ຺ຉຕີຕິ ອິທໍ ປຸຣາຕນານໍ ອນ຺ຕຣາຠວວາທີນໍ ວເສນ ວຸຕ຺ຕໍ. ອຘຸນາຕນາ ປນ ‘‘ອຸທ຺ຘໍປາໂທ ຕຸ ນາຣໂກ’’ຕິ ວທນ຺ຕາ ຕສ຺ສປິ ອນ຺ຕຣາຠວໍ ອິຈ຺ຉນ຺ເຕວ, ເກຈິ ປນ ອສຎ຺ຎູປຄານໍ. ອຣູປູປຄານໍ ປນ ສພ຺ເພປິ ນ ອິຈ຺ຉນ຺ຕິ. ຕຕ຺ຖ ເຍ ‘‘ສຎ຺ຎຸປ຺ປາທາ ຈ ປນ ເຕ ເທວາ ຕມ຺ຫາ ກາຍາ ຈວນ຺ຕີ’’ຕິ ສຸຕ຺ຕສ຺ສ ອຕ຺ຖໍ ມິຈ຺ຉາ ຄເຫຕ຺ວາ ຈຸຕູປປາຕກາເລສຸ ອສຎ຺ຎີນໍ ສຎ຺ຎາ ອຕ຺ຖີຕິ ອນ຺ຕຣາຠວໂຕວ ອສຎ຺ຎູປປຕ຺ຕິໍ ອິຈ຺ຉນ຺ຕິ, ຕທຎ຺ເຎສໍ ວເສນ ‘‘ສເວທໂນ…ເປ… ປຏິກ຺ຂິປຕີ’’ຕິ ທສ຺ເສນ຺ໂຕ ‘‘ເຍ ປນາ’’ຕິອາທິມາຫ. ເກ ປເນວໍ ອິຈ຺ຉນ຺ຕິ? ສພ຺ພຕ຺ຖິວາທີສຸ ເອກຈ຺ເຈ.

໙໒. ເນວສຎ຺ຎານາສຎ຺ຎາຍຕເນຕິ ເນວສຎ຺ຎານາສຎ຺ຎາຍຕເນ ຠເວ, ອຈິຕ຺ຕຸປ຺ປາເທ ວາ ສຎ຺ຎາ ອຕ຺ຖີຕິ ອິຈ຺ຉນ຺ຕີຕິ ນ ວຕ຺ຕພ຺ພນ຺ຕິ ສມ຺ພນ຺ໂຘ. ຍໂຕ ໂສ ສຎ຺ຎາຠເວນ ອສງ຺ຄຫິໂຕ, ຠວນ຺ຕຣຠາເວນ ຈ ສງ຺ຄຫິໂຕ.

໙໓. ອິນ຺ຘນຸປາທາໂນ ອຄ຺ຄິ ວິຍ ອິນ຺ຘເນນ ຣູປາທິອຸປາທາໂນ ປຸຄ຺ຄໂລ ຣູປາທິນາ ວິນາ ນຕ຺ຖີຕິ ເອຕ຺ຖ ອຍມຘິປ຺ປາຍວິຠາວນາ – ຍຖາ ນ ວິນາ ອິນ຺ຘເນນ ອຄ຺ຄິ ປຎ຺ຎາປີຍຕິ, ນ ຈ ຕໍ ອຎ຺ຎໍ ອິນ຺ຘນໂຕ ສກ຺ກາ ປຏິຊານິຕຸໍ, ນາປິ ອນຎ຺ຎໍ. ຍທິ ຫິ ອຎ຺ຎໍ ສິຍາ, ນ ອຸຓ຺ຫໍ ອິນ຺ຘນໍ ສິຍາ, ອຖ ອນຎ຺ຎໍ, ນິທຫິຕພ຺ພໍເຍວ ທາຫກໍ ສິຍາ, ເອວໍ ນ ວິນາ ຣູປາທີຫິ ປຸຄ຺ຄໂລ ປຎ຺ຎາປີຍຕິ, ນ ຈ ເຕຫິ ອຎ຺ໂຎ, ນາປິ ອນຎ຺ໂຎ ສສ຺ສຕຸຈ຺ເຉທຠາວປ຺ປສງ຺ຄໂຕຕິ ປຣວາທິໂນ ອຘິປ຺ປາໂຍ. ຕຕ຺ຖ ຍທິ ອຄ຺ຄິນ຺ຘໂນປມາ ໂລກໂວຫາເຣນ ວຸຕ຺ຕາ, ອປຬິຕ຺ຕໍ ກຏ຺ຐາທິອິນ຺ຘນໍ ນິທຫິຕພ຺ພຎ຺ຈ, ປຬິຕ຺ຕໍ ຠາສຸຣຸຓ຺ຫໍ ອຄ຺ຄິທາຫກຎ຺ຈ, ຕຎ຺ຈ ໂອຊຏ຺ຐມກຣູປໍ ປພນ຺ຘວເສນ ປວຕ຺ຕໍ ອນິຈ຺ຈໍ ສງ຺ຂຕໍ ປຏິຈ຺ຈສມຸປ຺ປນ຺ນໍ. ຍທິ ເອວໍ ປຸຄ຺ຄໂລ ຣູປາທີຫິ ອຎ຺ໂຎ ອນິຈ຺ໂຈ ຈ ອາປນ຺ໂນ, ອຖ ປຣມຕ຺ຖໂຕ ຈ, ຕສ຺ມິໍເຍວ ກຏ຺ຐາທິສຎ຺ຎິເຕ ຣູປສງ຺ຂາຕປຬິຕ຺ເຕ ຍໍ ອຸສຸມໍ ໂສ ອຄ຺ຄິ ຕໍສຫຊາຕານິ ຕີຓິຠູຕານິ ອິນ຺ຘນໍ. ເອວມ຺ປິ ສິທ຺ຘໍ ລກ຺ຂຓເຠທໂຕ ອຄ຺ຄິນ຺ຘນານໍ ອຎ຺ຎຕ຺ຕນ຺ຕິ ອຄ຺ຄິ ວິຍ ອິນ຺ຘນໂຕ ຣູປາທີຫິ ອຎ຺ໂຎ ປຸຄ຺ຄໂລ ອນິຈ຺ໂຈ ຈ ອາປຊ຺ຊຕີຕິ.

ຄຕິອນຸໂຍຄວຓ຺ຓນາ ນິຏ຺ຐິຕາ.