໙. ວຈນໂສຘນວຓ຺ຓນາ

໕໕-໕໙. ປທທ຺ວຍສ຺ສ ອຕ຺ຖໂຕ ເອກຕ຺ເຕຕິ ປທທ຺ວຍສ຺ສ ເອກຕ຺ຕຕ຺ເຖ ສຕີຕິ ອຕ຺ໂຖ. ປຣິກປ຺ປວຈນຎ຺ເຫຕໍ ໂທສທສ຺ສນຕ຺ຖໍ ‘‘ເອວໍ ສນ຺ເຕ ອຍໍ ໂທໂສ’’ຕິ. ຕຍິທໍ ເອກຕ຺ຕໍ ອຸປລພ຺ຠຕິ ເອວາຕິ ປຈ຺ຉິມປທາວຘາຣຓໍ ເວທິຕພ຺ພໍ. ‘‘ເກຫິຈິ ປຸຄ຺ຄໂລ ເກຫິຈິ ນ ປຸຄ຺ຄໂລ’’ຕິ ພ຺ຍຠິຈາຣທສ຺ສນໂຕ ປເຣນ ນ ສມ຺ປຏິຈ຺ຉິຕນ຺ຕິ ກຕ຺ວາ ຕເມວ ອສມ຺ປຏິຈ຺ຉິຕຕ຺ຕໍ ວິຠາເວນ຺ໂຕ ‘‘ປຸຄ຺ຄລສ຺ສ ຫີ’’ຕິອາທິມາຫ. ຕຕ຺ຖ ອວິຠຊິຕພ຺ພຕນ຺ຕິ ‘‘ອຸປລພ຺ຠຕິ ຈາ’’ຕິ ເອວໍ ອວິຠຊິຕພ຺ພຕໍ. ວິຠຊິຕພ຺ພຕນ຺ຕິ ‘‘ປຸຄ຺ຄໂລ ຈ ຕທຎ຺ຎຎ຺ຈ ອຸປລພ຺ຠຕີ’’ຕິ ເອວໍ ວິຠຊິຕພ຺ພຕໍ. ເອເຕນ ‘‘ປຸຄ຺ຄໂລ ອຸປລພ຺ຠຕິ ເອວາ’’ຕິ ປຈ຺ຉິມປທາວຘາຣຓໍ ເວທິຕພ຺ພໍ, ນ ‘‘ປຸຄ຺ຄໂລ ເອວ ອຸປລພ຺ຠຕີ’’ຕິ ອິມມຕ຺ຖໍ ທສ຺ເສຕິ. ຕໍ ວິຠາຄນ຺ຕິ ຍຖາວຸຕ຺ຕໍ ວິຠຊິຕພ຺ພາວິຠຊິຕພ຺ພໍ ວິຠາຄໍ ວທໂຕ ສກວາທິໂນ, ອຎ຺ຎສ຺ສ ວາ ກສ຺ສຈິ. ເອຕສ຺ສາຕິ ປຣວາທິໂນ. ຍຖາວຸຕ຺ຕວິຠາຄນ຺ຕິ ‘‘ປຸຄ຺ຄໂລ ອຸປລພ຺ຠຕິ…ເປ… ເກຫິຈິ ນ ປຸຄ຺ຄໂລ’’ຕິ ເອວໍ ປາຬິຍໍ ວຸຕ຺ຕປ຺ປກາຣໍ ວິຠາຄໍ. ຍຖາອາປາທິເຕນາຕິ ‘‘ປຸຄ຺ຄໂລ ອຸປລພ຺ຠຕີຕິ ປທທ຺ວຍສ຺ສ ອຕ຺ຖໂຕ ເອກຕ຺ເຕ’’ຕິອາທິນາ ອາປາທິຕປ຺ປກາເຣນ. ນ ຠວິຕພ຺ພນ຺ຕິ ຍທິປິ ເຕນ ປຸຄ຺ຄໂລ ອຸປລພ຺ຠຕິ ເອວ ວຸຈ຺ຈຕິ, ອຸປລພ຺ຠຕີຕິ ປນ ປຸຄ຺ຄໂລ ເອວ ນ ວຸຈ຺ຈຕິ, ອຖ ໂຂ ອຎ຺ໂຎປິ, ຕສ຺ມາ ຍຖາວຸຕ຺ເຕນ ປສງ຺ເຄນ ນ ຠວິຕພ຺ພໍ. ເຕນາຫ ‘‘ມຄ຺ຄິຕພ຺ໂພ ເອຕ຺ຖ ອຘິປ຺ປາໂຍ’’ຕິ.

໖໐. ອຕ຺ຖໂຕ ປຸຄ຺ຄໂລ ນຕ຺ຖີຕິ ວຸຕ຺ຕໍ ໂຫຕິ ອຕ຺ຕສຸຎ຺ຎຕາທສ຺ສເນນ ອນຕ຺ຕລກ຺ຂຓສ຺ສ ວິຫິຕຕ຺ຕາ.

ວຈນໂສຘນວຓ຺ຓນາ ນິຏ຺ຐິຕາ.