໕. ສຕ຺ຕກ຺ຂຕ຺ຕຸປຣມກຖາວຓ຺ຓນາ

໖໔໑-໖໔໕. ອສ຺ສາຕິ ອິມສ຺ສ ສຕ຺ຕກ຺ຂຕ຺ຕຸປຣມສ຺ສ. ເຕນາຫ ‘‘ສຕ຺ຕກ຺ຂຕ຺ຕຸປຣມຠາເວ ຈ ນິຍາມໍ ອິຈ຺ຉສີ’’ຕິ. ເຍນ ອານນ຺ຕຣິຍກມ຺ເມນ. ອນ຺ຕຣາຕິ ສຕ຺ຕ ຠເວ ອນິພ຺ພຕ຺ເຕຕ຺ວາ ເຕສໍ ອນ຺ຕເຣເຍວ. ເກຈີຕິ ອຠຍຄິຣິວາສິໂນ. ອປເຣຕິ ປທກາຣາ. ຕສ຺ສາຕິ ໂຍ ສຕ຺ຕກ຺ຂຕ຺ຕຸປຣໂມຕິ ວາ, ໂກລໍໂກໂລຕິ ວາ, ເອກພີຊີຕິ ວາ ຠຄວຕາ ຎາເຓນ ປຣິຈ຺ຉິນ຺ທິຕ຺ວາ ພ຺ຍາກໂຕ, ຕສ຺ສ ຍຖາວຸຕ຺ຕປຣິຈ຺ເຉທາ ອນ຺ຕຣາ ອຸປຣິມຄ຺ຄາຘິຄໂມ ນຕ຺ຖິ ອວິຕຖເທສນຕ຺ຕາ. ຍຖາປຣິຈ຺ເຉທເມວ ຕສ຺ສ ອຠິສມໂຍ, ສ຺ວາຍໍ ວິຠາໂຄ ເຕສໍເຍວ ປຸຄ຺ຄລານໍ ອິນ຺ທ຺ຣິຍປໂຣປຣິຍຕ຺ເຕນ ເວທິຕພ຺ໂພ ຠວນິຍາເມນ ຕາທິສສ຺ສ ກສ຺ສຈິ ອຠາວໂຕ. ຍສ຺ມາ ກສ຺ສຈິ ມຸທຸການິປິ ອິນ຺ທ຺ຣິຍານິ ປຈ຺ຈຍວິເສເສນ ຕິກ຺ຂຠາວໍ ອາປຊ຺ເຊຍ຺ຍຸໍ, ຕສ຺ມາ ຕາທິສໍ ສນ຺ຘາຍ ‘‘ຠພ຺ໂພຕິ ວຸຈ຺ຈຕິ, ນ ໂສ ອຠພ຺ໂພ ນາມາ’’ຕິ ຈ ວຸຕ຺ຕໍ. ຍສ຺ມາ ປນ ຠຄວາ ນ ຕາທິສໍ ‘‘ສຕ຺ຕກ຺ຂຕ຺ຕຸປຣໂມ’’ຕິອາທິນາ ນິຍເມຕ຺ວາ ພ຺ຍາກໂຣຕິ, ຕສ຺ມາ ອາຫ ‘‘ນ ປນ ອນ຺ຕຣາ ອຠິສເມຕຸໍ ຠພ຺ພຕາ ວຸຕ຺ຕາ’’ຕິ. ອຍຎ຺ຈ ນໂຍ ເອກນ຺ເຕນ ອິຈ຺ຉິຕພ຺ໂພ. ອຎ຺ຎຖາ ປຸຄ຺ຄລສ຺ສ ສງ຺ກໂຣ ສິຍາຕິ ທສ຺ເສນ຺ໂຕ ‘‘ຍທິ ຈາ’’ຕິອາທິມາຫ.

ສຕ຺ຕກ຺ຂຕ຺ຕຸປຣມກຖາວຓ຺ຓນາ ນິຏ຺ຐິຕາ.

ທ຺ວາທສມວຄ຺ຄວຓ຺ຓນາ ນິຏ຺ຐິຕາ.