໗. ອິທ຺ຘິພລກຖາວຓ຺ຓນາ

໖໒໑-໖໒໔. ຍສ຺ມິໍ ອາຍຸກປ຺ເປ ກມ຺ມກ຺ຂເຍນ ມຣຓໍ ໂຫຕິ, ຕໍ ສນ຺ຘາຍ ວຸຕ຺ຕໍ ‘‘ກມ຺ມສ຺ສ ວິປາກວເສນາ’’ຕິ, ຍສ຺ມິໍ ປນ ອາຍຸກ຺ຂເຍນ ມຣຓໍ ໂຫຕິ, ຕໍ ສນ຺ຘາຍ ‘‘ວສ຺ສຄຓນາຍາ’’ຕິ. ຕຕ຺ຖ ‘‘ນ ຈ ຕາວ ກາລໍ ກໂຣຕິ, ຍາວ ນ ຕໍ ປາປກມ຺ມໍ ພ຺ຍນ຺ຕີ ໂຫຕີ’’ຕິ (ມ. ນິ. ໓.໒໕໐; ອ. ນິ. ໓.໓໖) ວຈນໂຕ ເຍຠຸຍ຺ເຍນ ນິຣເຍ ກມ຺ມກ຺ຂເຍນ ມຣຓໍ ໂຫຕີຕິ ອາຫ ‘‘ກມ຺ມສ຺ສ ວິປາກວເສນ ວາຕິ ນິຣຍໍວ ສນ຺ຘາຍ ວຸຕ຺ຕ’’ນ຺ຕິ. ‘‘ວສ຺ສສຕໍ ວສ຺ສສຫສ຺ສໍ ວສ຺ສສຕສຫສ຺ສານີ’’ຕິອາທິນາ ມນຸສ຺ສານໍ ເທວານຎ຺ຈ ອາຍຸປຣິຈ຺ເຉທວຈນໂຕ ເຍຠຸຍ຺ເຍນ ເຕສໍ ອາຍຸກ຺ຂເຍນ ມຣຓໍ ໂຫຕີຕິ ວຸຕ຺ຕໍ ‘‘ວສ຺ສຄຓນາຍ ວາຕິ ມນຸສ຺ເສ ຈາຕຸມຫາຣາຊິກາທິເທເວ ຈ ສນ຺ຘາຍາ’’ຕິ. ‘‘ວຸຕ຺ຕ’’ນ຺ຕິ ອາເນຕ຺ວາ ໂຍເຊຕພ຺ພໍ.

ອິທ຺ຘິພລກຖາວຓ຺ຓນາ ນິຏ຺ຐິຕາ.