໗. ສີລໍອເຈຕສິກນ຺ຕິກຖາວຓ຺ຓນາ

໕໙໐-໕໙໔. ຐິເຕນ ອວິນຏ຺ເຐນ. ອຸປຈເຍນາຕິ ສີລຠູເຕນ ກມ຺ມູປຈເຍນ. ‘‘ທານໍ ອເຈຕສິກ’’ນ຺ຕິ ກຖາຍໍ ວຸຕ຺ຕນເຍນາຕິ ຍຖາ ‘‘ນ ວຕ຺ຕພ຺ພໍ ເຈຕສິໂກ ຘມ຺ໂມ ທານນ຺ຕິ? ອາມນ຺ຕາ. ທານໍ ອນິຏ຺ຐຜລນ຺ຕິ…ເປ… ເຕນ ຫິ ເຈຕສິໂກ ຘມ຺ໂມ ທານ’’ນ຺ຕິ ປາຬິ ປວຕ຺ຕາ, ເອວໍ ຕທນຸສາເຣນ ‘‘ນ ວຕ຺ຕພ຺ພໍ ເຈຕສິກໍ ສີລນ຺ຕິ? ອາມນ຺ຕາ. ສີລໍ ອນິຏ຺ຐຜລ’’ນ຺ຕິອາທິນາ ສີລສ຺ສ ເຈຕສິກຠາວສາຘການິ ສຸຕ຺ຕປທານິ ຈ ອາເນຕ຺ວາ ຕທຕ຺ຖທສ຺ສນວເສນ ອເຈຕສິໂກ ຣູປາທິຘມ຺ໂມ ອາຍຕິໍ ວິປາກໍ ເທຕິ. ຍທິ ໂສ ສີລໍ ຠເວຍ຺ຍ, ວິນາ ສໍວຣສມາທາເນນ ວິນາ ວິຣຕິຍາ ສີລວາ ນາມ ສິຍາ. ຍສ຺ມາ ປນ ສມາທານເຈຕນາ ວິຣຕິ ສໍວໂຣ ສີລໍ, ຕສ຺ມາ ‘‘ສີລໍ ອິຏ຺ຐຜລໍ ກນ຺ຕຜລ’’ນ຺ຕິອາທິນາ ໂຍຊນາ ກາຕພ຺ພາຕິ ອິມມຕ຺ຖໍ ສນ຺ຘາຍ ວຸຕ຺ຕໍ ‘‘ວຸຕ຺ຕນເຍນາ’’ຕິ, ວຸຕ຺ຕນຍານຸສາເຣນາຕິ ອຕ຺ໂຖ. ຍສ຺ມາ ປນ ປາຬິຍໍ ຍຖາ ‘‘ສີລໍ ອເຈຕສິກ’’ນ຺ຕິ ກຖາ ອາຄຕາ, ຕຖາ ‘‘ທານໍ ອເຈຕສິກ’’ນ຺ຕິ ວິສຸໍ ອາຄຕາ ກຖາ ນຕ຺ຖິ, ຕສ຺ມາ ‘‘ສາ ປນ ກຖາ ມຄ຺ຄິຕພ຺ພາ’’ຕິ ວຸຕ຺ຕໍ.

ສີລໍອເຈຕສິກນ຺ຕິກຖາວຓ຺ຓນາ ນິຏ຺ຐິຕາ.