໗. ຈຕຸກ຺ກນຍສໍສນ຺ທນວຓ຺ຓນາ

໔໖-໕໒. ເອກຘມ຺ມໂຕປີຕິ ສຕ຺ຕປຎ຺ຎາສາຍ ສຈ຺ຈິກຏ຺ເຐສຸ ເອກຘມ຺ມໂຕປິ. ເອເຕນ ຕໂຕ ສພ຺ພໂຕປິ ປຸຄ຺ຄລສ຺ສ ອຎ຺ຎຕ຺ຕານນຸຊານນໍ ທສ຺ເສຕິ. ເຕນາຫ ອຏ຺ຐກຖາຍໍ ‘‘ສກລໍ ປຣມຕ຺ຖສຈ຺ຈໍ ສນ຺ຘາຍາ’’ຕິ. ຣູປາທິເອເກກຘມ຺ມວເສນ ນານຸຍຸຎ຺ຊິຕພ຺ໂພ ອວຍວພ຺ຍຕິເຣເກນ ສມຸທາຍສ຺ສ ອຠາວໂຕ. ຍສ຺ມາ ປນ ສມຸທາຍາວຍວາ ຠິນ຺ນສຠາວາ, ຕສ຺ມາ ‘‘ສມຸທາຍໂຕ…ເປ… ນິຄ຺ຄຫາຣໂຫ ສິຍາ’’ຕິ ປຣວາທິໂນ ອາສງ຺ກມາຫ. ເອຕໍ ວຈໂນກາສນ຺ຕິ ຍທິປິ ສຕ຺ຕປຎ຺ຎາສຘມ຺ມສມຸທາຍໂຕ ປຸຄ຺ຄລສ຺ສ ອຎ຺ຎຕ຺ຕໍ ນ ອິຈ຺ຉຕິ ຕພ຺ພິນິມຸຕ຺ຕສ຺ສ ສຈ຺ຈິກຏ຺ຐສ຺ສ ອຠາວໂຕ, ຕເທກເທສໂຕ ປນສ຺ສ ອນຎ຺ຎຕ຺ຕມ຺ປິ ນ ອິຈ຺ຉເຕວ. ນ ຫິ ສມຸທາໂຍ ອວຍໂວ ໂຫຕີຕິ. ຕສ຺ມາ ‘‘ຕໍ ປຏິກ຺ຂິປໂຕ ກິໍ ນິຄ຺ຄຫຏ຺ຐານນ຺ຕິ ວຕ຺ຕຸໍ ມາ ລພ຺ເຠຖາ’’ຕິ ທສ຺ເສຕຸໍ ‘‘ອຍຎ຺ຈາ’’ຕິອາທິ ວຸຕ຺ຕໍ. ຣູປາທິຘມ຺ມປ຺ປເຠທວິຠາຄມຸເຂເນວ ອນວເສສໂຕ ປຸຄ຺ຄໂລຕິ ຄຫຓາກາຣທສ຺ສນວເສນ ປວຕ຺ໂຕ ປຐມວິກປ຺ໂປ, ທຸຕິໂຍ ປນ ອວິຠາຄໂຕ ປຣມຕ຺ຖສຈ຺ຈຠາວສາມຎ຺ເຎນາຕິ ອຍໍ ອິເມສໍ ທ຺ວິນ຺ນໍ ວິກປ຺ປານໍ ວິເສໂສ. ອິຕີຕິ ວຸຕ຺ຕປ຺ປກາຣປຣາມສນນ຺ຕິ ອາຫ ‘‘ເອວ’’ນ຺ຕິ.

ສຠາວວິນິພ຺ໂຠຄໂຕຕິ ສຠາເວນ ວິນິພ຺ຠຸຊ຺ຊິຕພ຺ພໂຕ. ສຠາວຠິນ຺ໂນ ຫິ ຘມ຺ໂມ ຕທຎ຺ຎຘມ຺ມໂຕ ວິນິພ຺ໂຠຄໍ ລຠຕິ. ເຕນາຫ ‘‘ຣູປໂຕ ອຎ຺ຎສຠາຄຕ຺ຕາ’’ຕິ. ຣູປວຊ຺ເຊຕິ ຣູປຘມ຺ມວຊ຺ເຊ. ຕີສຸປີຕິ ‘‘ຣູປສ຺ມິໍ ປຸຄ຺ຄໂລ, ອຎ຺ຎຕ຺ຣ ຣູປາ, ປຸຄ຺ຄລສ຺ມິໍ ຣູປ’’ນ຺ຕິ ອິເມສຸ ເອວໍ ປວຕ຺ເຕສຸ ຕີສຸປິ ອນຸໂຍເຄສຸ. ສາສນິໂກ ເອວາຍໍ ປຸຄ຺ຄລວາທີຕິ ກຕ຺ວາ ອາຫ ‘‘ນ ຫິ ໂສ ສກ຺ກາຍທິຏ຺ຐິໍ ອິຈ຺ຉຕີ’’ຕິ. ‘‘ຣູປວາ’’ຕິ ອິມິນາ ຣູເປນ ສກິຎ຺ຈນຕາວ ຎາປີຍຕິ, ນ ຣູປາຍຕ຺ຕວຸຕ຺ຕິຕາຕິ ອາຫ ‘‘ອຎ຺ຎຕ຺ຣ ຣູປາຕິ ເອຕ຺ຖ ຈ ຣູປວາ ປຸຄ຺ຄໂລຕິ ອຍມຕ຺ໂຖ ສງ຺ຄຫິໂຕ’’ຕິ.

ຈຕຸກ຺ກນຍສໍສນ຺ທນວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ສໍສນ຺ທນກຖາວຓ຺ຓນາ.