໗. ສຕ຺ຕກນິທ຺ເທສວຓ຺ຓນາ

໒໐໓. ກຸສເລສຸ ຘມ຺ເມສູຕິ ອາຘາເຣ ຠຸມ຺ມໍ, ນ ວິສເຍຕິ ທສ຺ເສນ຺ໂຕ ‘‘ກຸສເລສຸ ຘມ຺ເມສຸ ອນ຺ໂຕຄຘາ’’ຕິ ອາຫ. ອິທານິ ວິສຍລກ຺ຂຓໍ ເອຕໍ ຠຸມ຺ມນ຺ຕິ ທສ຺ເສນ຺ໂຕ ‘‘ໂພຘິປກ຺ຂິຍຘມ຺ເມສຸ ວາ’’ຕິອາທິມາຫ. ‘‘ຕທຸປກາຣຕາຍາ’’ຕິ ອິທໍ ກຸສເລສຸ ຘມ຺ເມສຸ ສາເຘຕພ຺ເພສູຕິ ອິມມຕ຺ຖໍ ສນ຺ຘາຍ ວຸຕ຺ຕໍ. ອຸມ຺ມຸຊ຺ຊນປຎ຺ຎາຍາຕິ ອຸມ຺ມຸຊ຺ຊາປນປຎ຺ຎາຍ, ອຸມ຺ມຸຊ຺ຊນາກາເຣນ ວາ ປວຕ຺ຕປຎ຺ຎາຍ. ເຕເນວາຕິ ອຸມ຺ມຸຊ຺ຊນມຕ຺ຕຕ຺ຕາ ເອວ. ຍຖາ ຫິ ຎາຓຸປ຺ປາໂທ ສໍກິເລສປກ຺ຂໂຕ ອຸມ຺ມຸຊ຺ຊນໍ, ເອວໍ ສທ຺ຘຸປ຺ປາໂທປີຕິ ອາຫ ‘‘ສທ຺ຘາສງ຺ຂາຕເມວ ອຸມ຺ມຸຊ຺ຊນ’’ນ຺ຕິ. ຈິຕ຺ຕວາໂຣຕິ ຈິຕ຺ຕປ຺ປພນ຺ຘວາໂຣ. ປຈ຺ເຈກໍ ຐານວິປສ຺ສນາປຕຣຓປຕິຄາຘປ຺ປຕ຺ຕິນິຏ຺ຐຕ຺ຕາ ເຕສໍ ປຸຄ຺ຄລານໍ ‘‘ອເນເກ ປຸຄ຺ຄລາ’’ຕິ ວຸຕ຺ຕໍ. ກສ຺ມາ? ເຕນຕ຺ຕຠາເວນ ອຣຫຕ຺ຕສ຺ສ ອຄ຺ຄຫຓໂຕ. ຕຕິຍປຸຄ຺ຄລາທິຠາວນ຺ຕິ ອຸມ຺ມຸຊ຺ຊິຕ຺ວາ ຐິຕປຸຄ຺ຄລາທິຠາວໍ.

ສຕ຺ຕກນິທ຺ເທສວຓ຺ຓນາ ນິຏ຺ຐິຕາ.