໒. ອພ຺ຠນ຺ຕຣມາຕິກາວຓ຺ຓນາ

໒. ຕທຕ຺ຖານີຕິ ປຏິຈ຺ຈສມຸປ຺ປາທຕ຺ຖານິ. ປຏິຈ຺ຈ ສມຸປ຺ປຊ຺ຊຕິ ສງ຺ຂາຣາທິກໍ ເອຕສ຺ມາຕິ ຫິ ປຏິຈ຺ຈສມຸປ຺ປາໂທ, ປຈ຺ເຈກໍ ອວິຊ຺ຊາທິໂກ ປຈ຺ຈຍຘມ຺ໂມ. ຕຖາ ຫິ ວຸຕ຺ຕໍ ສງ຺ຂາຣປິຏເກ ‘‘ທ຺ວາທສ ປຈ຺ຈຍາ, ທ຺ວາທສ ປຏິຈ຺ຈສມຸປ຺ປາທາ’’ຕິ. ເຕສນ຺ຕິ ຂນ຺ຘາທີນໍ. ຕຖາທສ຺ສິຕານນ຺ຕິ ຄຓນຸທ຺ເທສວິຠາຄມຕ຺ເຕນ ທສ຺ສິຕານໍ. ກສ຺ມາ ປເນຕ຺ຖ ປຏິຈ຺ຈສມຸປ຺ປາໂທ ທ຺ວາທສຠາເວເນວ ຄຫິໂຕ, ນນຸ ຕຕ຺ຖ ຠໂວ ກມ຺ມຠວາທິເຠເທນ, ໂສກາທໂຍ ຈ ສຣູປໂຕເຍວ ອິຘ ປາຬິຍໍ ຄຫິຕາຕິ ໂຈທນໍ ສນ຺ຘາຍາຫ ‘‘ຕຕ຺ຖາ’’ຕິອາທິ. ຕຕ຺ຖ ຕຕ຺ຖາຕິ ຕສ຺ມິໍ ‘‘ປຎ຺ຈວີສາຘິເກນ ປທສເຕນາ’’ຕິ ເອວໍ ວຸຕ຺ເຕ ອຏ຺ຐກຖາວຈເນ. ກມ຺ມຠວສ຺ສ ຠາວນຠາເວນ, ອຸປປຕ຺ຕິຠວສ຺ສ ຠວນຠາເວນ. ປທຕ຺ຖໂຕ ປນ ກມ຺ມຠໂວ ຠວຕິ ເອຕສ຺ມາຕິ ຠໂວ, ອິຕໂຣ ຠວຕິ, ຠວນໍ ວາຕິ. ຕນ຺ນິທານທຸກ຺ຂຠາເວນາຕິ ຊຣາມຣຓນິທານທຸກ຺ຂຠາເວນ.

‘‘ສພ຺ພາປິ ຘມ຺ມສງ຺ຄຓີ ຘາຕຸກຖາຍ ມາຕິກາ’’ຕິ ອິທມ຺ປິ ຘາຕຸກຖາຍ ມາຕິກາກິຕ຺ຕນເມວາຕິ ‘‘ສພ຺ພາປິ…ເປ… ມາຕິກາຕິ ອຍໍ ຘາຕຸກຖາມາຕິກາໂຕ ພຫິທ຺ຘາ ວຸຕ຺ຕາ’’ຕິ ວຈນໍ ອສມ຺ຠາເວນ຺ໂຕ ‘‘ອຖ ວາ’’ຕິອາທິມາຫ. ປກຣຓນ຺ຕຣຄຕາ ວຸຕ຺ຕາ ຘາຕຸກຖາຍ ມາຕິກາຠາເວນາຕິ ອຕ຺ໂຖ. ກາມຎ຺ເຈຕ຺ຖ ມາຕິກາຠາເວນ ວຸຕ຺ຕາ, ປກຣຓນ຺ຕຣຄຕຕ຺ຕາ ປນ ອຎ຺ຎໂຕ ຄເຫຕພ຺ພຣູປາ ອິໂຕ ພຫິຠູຕາ ນາມ ໂຫນ຺ຕິ, ສຣູປໂຕ ຄຫິຕາວ ປຎ຺ຈກ຺ຂນ຺ຘາຕິອາທິກາ ອພ຺ຠນ຺ຕຣາ. ເຕນາຫ ‘‘ສຣູປໂຕ ທສ຺ເສຕ຺ວາ ຐປິຕຕ຺ຕາ’’ຕິ. ມາຕິກາຍ ອສງ຺ຄຫິຕຕ຺ຕາຕິ ມາຕິກາຍ ສຣູເປນ ອສງ຺ຄຫິຕຕ຺ຕາ, ນ ອຎ຺ຎຖາ. ນ ຫິ ມາຕິກາຍ ອສງ຺ຄຫິໂຕ ໂກຈິ ປທຕ຺ໂຖ ອຕ຺ຖິ. ວິກິຓ຺ຓຠາເວນາຕິ ຂນ຺ຘວິຠງ຺ຄາທີສຸ ວິສຸໍ ວິສຸໍ ກິຓ຺ຓຠາເວນ ວິສຏຠາເວນ.