໗. ສຕ຺ຕມນໂຍ ສມ຺ປຍຸຕ຺ເຕນວິປ຺ປຍຸຕ຺ຕປທວຓ຺ຓນາ

໓໐໖. ເຕຫິ ສມຸທຍສຈ຺ຈາທີຫິ ຂນ຺ຘຕ຺ຕຍຂນ຺ເຘກເທສາທິເກ ສມ຺ປຍຸຕ຺ເຕ ສຕິປິ, ສມ຺ປຍຸຕ຺ເຕຫິ ຈ ວິປ຺ປຍຸຕ຺ເຕ ຣູປນິພ຺ພານາທິເກ ຕທຎ຺ຎຘມ຺ເມ ສຕິປິ ວິປ຺ປໂຍຄາຠາວໂຕ. ສງ຺ເຂເປນ ວຸຕ຺ຕມຕ຺ຖໍ ວິຕ຺ຖາເຣນ ທສ຺ເສຕຸໍ ‘‘ນ ຫີ’’ຕິອາທິ ວຸຕ຺ຕໍ. ຕໂຕ ໂລຠສຫຄຕຈິຕ຺ຕຸປ຺ປາທໂຕ ອຎ຺ຎຘມ຺ມານໍ ອວສິຏ຺ຐານໍ ກຸສລາກຸສລາພ຺ຍາກຕຘມ຺ມານໍ ຂນ຺ຘາທີສຸ ເກນຈິ ວິປ຺ປໂຍໂຄ ນ ຫິ ອຕ຺ຖິ ຂນ຺ຘປຎ຺ຈກາທີນໍ ສງ຺ຄຓ຺ຫນໂຕ ເຕສໍ. ເຕ ເອວ ຈິຕ຺ຕຸປ຺ປາທາຕິ ເຕ ໂລຠສຫຄຕຈິຕ຺ຕຸປ຺ປາທາ ເອວ. ຕທຎ຺ຎຘມ຺ມານນ຺ຕິ ຕທຎ຺ຎຘມ຺ມານມ຺ປີຕິ ປິ-ສທ຺ທໂລໂປ ທຏ຺ຐພ຺ໂພ. ຕຖາຕິ ອິມິນາ ນ ຈ ເຕ ເອວ ຘມ຺ມາ ອຑ຺ຒທຸຕິຍາຍຕນຘາຕຸໂຍ, ອຖ ໂຂ ເຕ ຈ ຕໂຕ ອຎ຺ເຎ ຈາຕິ ອິມມຕ຺ຖໍ ອຸປສໍຫຣຕິ.

ນນຸ ຕທຎ຺ຎຠາວໂຕ ເອວ ເຕຫິ ອິຕເຣສໍ ວິປ຺ປໂຍໂຄ ສິທ຺ໂຘຕິ ອາຫ ‘‘ນ ຈາ’’ຕິອາທິ. ຕທຎ຺ຎສມຸທາເຍຫີຕິ ຕໂຕ ໂລຠສຫຄຕຈິຕ຺ຕຸປ຺ປາທໂຕ ອຎ຺ຎສມຸທາເຍຫິ ອຎ຺ເຎ ໂລຠສຫຄຕາ ຘມ຺ມາ ວິປ຺ປຍຸຕ຺ຕາ ນ ໂຫນ຺ຕິ. ກສ຺ມາ? ສມຸທາເຍ…ເປ… ວິປ຺ປໂຍຄາຠາວໂຕ. ຕສ຺ສຕ຺ໂຖ – ສມຸທາເຍນ ໂລຠສຫຄຕຕທຎ຺ຎຘມ຺ມຣາສິນາ ເອກເທສານໍ ໂລຠສຫຄຕຘມ຺ມານໍ ວິປ຺ປໂຍຄາຠາວໂຕ, ຕຖາ ເຍ ເອກເທສາ ຫຸຕ຺ວາ ອຎ຺ເຎສໍ ອວຍວານໍ ສມຸທາຍຠູຕາ, ເຕສຎ຺ຈ ສມຸທາເຍນ ວິປ຺ປໂຍຄາຠາວໂຕຕິ. ອເນນ ສມຸທາເຍນ ອວຍວສ຺ສ ສມຸທາຍສ຺ສ ອວຍເວນ ຈ ຕສ຺ສ ນ ວິປ຺ປໂຍໂຄ, ອວຍວສ຺ເສວ ປນ ອວຍເວນາຕິ ທສ຺ເສຕິ. ເອສ ນໂຍຕິ ຍ຺ວາຍໍ ສມຸທຍສຈ຺ເຈ ວຸຕ຺ໂຕ ວິຘິ, ເອເສວ ມຄ຺ຄສຈ຺ຈສຸຂິນ຺ທ຺ຣິຍາທີສຸ ອຣູປກ຺ຂນ຺ເຘກເທສຕ຺ຕາ ເຕສນ຺ຕິ ທສ຺ເສຕິ. ນິຣວເສເສສູຕິ ອພຫິກຕວິຕກ຺ເກສຸ. ວິຕກ຺ໂກ ຫິ ສມຸທາຍໂຕ ອພຫິກໂຕ. ‘‘ໂສ ຫິ ສມຸທາໂຍ’’ຕິອາທິໂກ ວຸຕ຺ຕນໂຍ ລພ຺ຠຕີຕິ ອາຫ ‘‘ອຄ຺ຄຫເຓ ກາຣຓໍ ນ ທິສ຺ສຕີ’’ຕິ.

ອຎ຺ເຎສຸປິ ສມຸທຍສຈ຺ຈາທີສຸ ວິສ຺ສຊ຺ຊນສ຺ສ…ເປ… ທຏ຺ຐພ຺ພໍ, ຍໂຕ ສມຸທຍສຈ຺ຈາທິ ອິຘ ນ ຄຫິຕນ຺ຕິ ອຘິປ຺ປາໂຍ. ສມ຺ປຍຸຕ຺ຕາຘິກາຣໂຕ ‘‘ອຎ຺ເຎນາ’’ຕິ ປທໍ ສມ຺ປຍຸຕ຺ຕໂຕ ອຎ຺ຎໍ ວທຕີຕິ ອາຫ ‘‘ອສມ຺ປຍຸຕ຺ເຕນ ອສມ຺ມິສ຺ສນ຺ຕິ ອຕ຺ໂຖ’’ຕິ. ອິທານິ ພ຺ຍຕິເຣເກນປິ ຕມຕ຺ຖໍ ປຕິຏ຺ຐາເປຕຸໍ ‘‘ອທຸກ຺ຂມສຸຂາ…ເປ… ຄຫິຕານີ’’ຕິ ວຸຕ຺ຕໍ. ເອເຕນ ລກ຺ຂເຓນາຕິ ‘‘ອສມ຺ປຍຸຕ຺ເຕນ ອສມ຺ມິສ຺ສ’’ນ຺ຕິ ວຸຕ຺ຕລກ຺ຂເຓນ. ຈິຕ຺ຕນ຺ຕິ ‘‘ຈິຕ຺ເຕຫິ ຘມ຺ເມຫິ ເຍ ຘມ຺ມາ’’ຕິ ປຎ຺ຫໍ ອຸປລກ຺ເຂຕິ. ສຫຍຸຕ຺ຕປເທຫິ ສຕ຺ຕາຕິ ‘‘ເຈຕສິເກຫິ ຘມ຺ເມຫິ ເຍ ຘມ຺ມາ’’ຕິອາທິນາ ຈິຕ຺ເຕນ ສຫຍຸຕ຺ເຕ ຘມ຺ເມ ທີເປນ຺ເຕຫິ ປເທຫິ ອາຄຕາ ສຕ຺ຕ ປຎ຺ຫາ. ຕິຓ຺ຓໍ ຕິກປທານມຄ຺ຄຫເຓນ ອູໂນຕິ ກຕ຺ວາ. ເຍ ສນ຺ຘາຍ ‘‘ຕິເກ ຕໂຍ’’ຕິ ວຸຕ຺ຕໍ. ຕໍ ປນ ເວທນາປີຕິຕ຺ຕິເກສຸ ປຈ຺ຉິມໍ, ວິຕກ຺ກຕ຺ຕິເກ ປຐມນ຺ຕິ ປທຕ຺ຕຍໍ ເວທິຕພ຺ພໍ.

໓໐໙. ອຸທ຺ຘຏປເທນ ປກາສິຍມານາ ອຕ຺ຖາ ອເຠໂທປຈາເຣນ ‘‘ອຸທ຺ຘຏປທ’’ນ຺ຕິ ວຸຕ຺ຕາຕິ ອາຫ ‘‘ອຸທ຺ຘຏປເທນ ສມ຺ປຍຸຕ຺ເຕຫີ’’ຕິ. ເຕນ ຈ ຍຖາວຸຕ຺ເຕນ ອຸທ຺ຘຏປເທນ. ມເນນ ຍຸຕ຺ຕາຕິ ເອຕ຺ຖ ມນນມຕ຺ຕຕ຺ຕາ ມໂນຘາຕຸ ‘‘ມໂນ’’ຕິ ວຸຕ຺ຕາຕິ ອາຫ ‘‘ມໂນຘາຕຸຍາ ເອກນ຺ຕສມ຺ປຍຸຕ຺ຕາ’’ຕິ.

ສຕ຺ຕມນຍສມ຺ປຍຸຕ຺ເຕນວິປ຺ປຍຸຕ຺ຕປທວຓ຺ຓນາ ນິຏ຺ຐິຕາ.