໑. ລສຸຓວຄ຺ຄວຓ຺ຓນາ

໗໙໓-໗໙໗. ປາຈິຕ຺ຕິເຍສຸ ລສຸຓວຄ຺ຄສ຺ສ ປຐເມ ຊາຕິໍ ສຣຕີຕິ ຊາຕິສ຺ສໂຣ. ສຠາເວເນວາຕິ ສູປສມ຺ປາກາທິໍ ວິນາວ. ພທຣສາຬວໍ ນາມ ພທຣຜລານິ ສຸກ຺ຂາເປຕ຺ວາ ຈຸຓ຺ເຓຕ຺ວາ ກຕ຺ຕພ຺ພາ ຂາທນີຍວິກຕິ. ເສສເມຕ຺ຖ ອຸຕ຺ຕານເມວ. ອາມກລສຸຓຎ຺ເຈວ ອຊ຺ໂຌຫຣຓຎ຺ຈາຕິ ອິມານິ ປເນຕ຺ຖ ທ຺ເວ ອງ຺ຄານິ.

໗໙໘-໘໐໒. ທຸຕິຍຕຕິຍຈຕຸຕ຺ຖານິ ອຸຕ຺ຕານຕ຺ຖາເນວ.

໘໑໒. ປຎ຺ຈເມ ທ຺ວິນ຺ນໍ ປພ຺ພານໍ ອຸປຣີຕິ ເອຕ຺ຖ ທ຺ວິນ຺ນໍ ອງ຺ຄຸລີນໍ ສຫ ປເວສເນ ເອເກກາຍ ອງ຺ຄຸລິຍາ ເອເກກໍ ປພ຺ພໍ ກຕ຺ວາ ທ຺ວິນ຺ນໍ ປພ຺ພານໍ ອຸປຣິ. ເອກງ຺ຄຸລິປເວສເນ ທ຺ວິນ຺ນໍ ປພ຺ພານໍ ອຸປຣິ ນ ວຏ຺ຏຕີຕິ ເວທິຕພ຺ພໍ. ມຫາປຈ຺ຈຣິຍມ຺ປິ ອຍເມວ ນໂຍ ທສ຺ສິໂຕ. ອຸທກສຸທ຺ຘິປຈ຺ຈເຍນ ປນ ສຕິປິ ຜສ຺ສສາທິຍເນ ຍຖາວຸຕ຺ຕປຣິຈ຺ເຉເທ ອນາປຕ຺ຕິ.

໘໑໕-໘໑໗. ຉຏ຺ເຐ ອາສຸມ຺ຠິຕ຺ວາຕິ ປາເຕຕ຺ວາ. ທຘິມຕ຺ຖູຕິ ທຘິມຓ຺ຑໍ ທຘິມ຺ຫິ ປສນ຺ໂນທກໍ. ຠຸຎ຺ຊນ຺ຕສ຺ສ ຠິກ຺ຂຸໂນ ຫຕ຺ຖປາເສ ຐານໍ, ປານີຍສ຺ສ ວາ ວິຘູປນສ຺ສ ວາ ຄຫຓນ຺ຕິ ອິມານິ ປເນຕ຺ຖ ທ຺ເວ ອງ຺ຄານິ.

໘໒໒. ສຕ຺ຕເມ ‘‘ປຏິຄ຺ຄຓ຺ຫາຕິ, ອາປຕ຺ຕິ ທຸກ຺ກຏສ຺ສາ’’ຕິ ອິທໍ ປຸພ຺ພປໂຍຄທຸກ຺ກຏສ຺ສ ນິທສ຺ສນມຕ຺ຕນ຺ຕິ ອາຫ ‘‘ນ ເກວລໍ ປຏິຄ຺ຄຫເຓເຍວ ໂຫຕີ’’ຕິອາທິ. ປມາຓນ຺ຕິ ປາຈິຕ຺ຕິຍາປຕ຺ຕິຍາ ປມາຓໍ. ອິເມຫິເຍວ ທ຺ວີຫິ ປາຈິຕ຺ຕິຍໍ ໂຫຕິ, ນາຎ຺ເຎຫິ ຠຊ຺ຊນາທີຫີຕິ ອຕ຺ໂຖ. ວຸຕ຺ຕເມວຕ຺ຖໍ ວິຕ຺ຖາຣໂຕ ທສ຺ເສຕຸໍ ‘‘ຕສ຺ມາ’’ຕິອາທິມາຫ. ຕໍ ປຸພ຺ພາປຣວິຣຸທ຺ຘນ຺ຕິ ປຸນປິ ວຸຕ຺ຕນ຺ຕິ ວຸຕ຺ຕວາທໍ ສນ຺ຘາຍາຫ. ອຎ຺ຎາຍ ວິຎ຺ຎຕ຺ຕິຍາ ລທ຺ຘມ຺ປິ ຫິ ອນາຓຕ຺ຕິຍາ ວິຎ຺ຎຕ຺ຕິຍາ ອິມິສ຺ສາ ອວິຎ຺ຎຕ຺ຕິຍາ ລທ຺ຘປກ຺ຂໍ ຠຊຕິ, ຕສ຺ມາ ເຫຏ຺ຐາ ອວິຎ຺ຎຕ຺ຕິຍາ ລທ຺ເຘ ກຣຓກາຣາປເນສຸ ວິເສສໍ ອວຕ຺ວາ ອິຘ ວິເສສວຈນໍ ປຸພ຺ພາປຣວິຣຸທ຺ຘໍ. ຍທິ ເຈຕ຺ຖ ກຣເຓ ປາຈິຕ຺ຕິຍໍ, ກາຣາປເນປິ ປາຈິຕ຺ຕິເຍເນວ ຠວິຕພ຺ພໍ. ອຖ ກາຣາປເນ ທຸກ຺ກຏໍ, ກຣເຓປິ ທຸກ຺ກເຏເນວ ຠວິຕພ຺ພໍ. ນ ຫິ ກຣເຓ ວາ ກາຣາປເນ ວາ ວິເສໂສ ອຕ຺ຖິ, ຕສ຺ມາ ອຎ຺ຎາຍ ວິຎ຺ຎຕ຺ຕິຍາ ລທ຺ຘໍ ສຍໍ ຠຊ຺ຊນາທີນິ ກຕ຺ວາປິ ກາຣາເປຕ຺ວາປິ ຠຸຎ຺ຊນ຺ຕິຍາ ທຸກ຺ກຏເມວາຕິ ອິທເມຕ຺ຖ ສນ຺ນິຏ຺ຐານໍ. ອວິເສເສນ ວຸຕ຺ຕນ຺ຕິ ກຣຓກາຣາປນານໍ ສາມຎ຺ຎໂຕ ວຸຕ຺ຕໍ. ເສສເມຕ຺ຖ ອຸຕ຺ຕານເມວ. ສຕ຺ຕນ຺ນໍ ຘຎ຺ຎານໍ ອຎ຺ຎຕຣສ຺ສ ວິຎ຺ຎາປນໍ ວາ ວິຎ຺ຎາປາປນໍ ວາ, ປຏິລາໂຠ, ຠຊ຺ຊນາທີນິ ກຕ຺ວາ ວາ ກາເຣຕ຺ວາ ວາ ອຊ຺ໂຌຫຣຓນ຺ຕິ ອິມານິ ປເນຕ຺ຖ ຕີຓິ ອງ຺ຄານິ.

໘໒໔. ອຏ຺ຐເມ ນິພ຺ພິຏ຺ໂຐຕິ ປຕິຏ຺ຐາປິໂຕ. ເກຓີຕິ ຣຎ຺ໂຎ ທາຕພ຺ພສ຺ສ ອາຍສ຺ເສຕໍ ອຘິວຈນໍ. ຐານນ຺ຕຣນ຺ຕິ ຄາມຊນປທາທິຐານນ຺ຕຣໍ. ເສສເມຕ຺ຖ ອຸຕ຺ຕານເມວ. ອຸຈ຺ຈາຣາທິຠາໂວ, ອນວໂລກນໍ, ວຬຎ຺ຊນຏ຺ຐານໍ, ຕິໂຣກຸຏ຺ຏປາກາຣຕາ, ຉຑ຺ຑນໍ ວາ ຉຑ຺ຑາປນໍ ວາຕິ ອິມານິ ປເນຕ຺ຖ ປຎ຺ຈ ອງ຺ຄານິ.

໘໓໐. ນວເມ ສພ຺ເພສນ຺ຕິ ຠິກ຺ຂຸສ຺ສ ຠິກ຺ຂຸນິຍາ ຈ. ອິຘ ເຂຕ຺ຕປາລກາ ອາຣາມາທິໂຄປກາ ຈ ສາມິກາ ເອວ.

໘໓໖. ທສເມ ເອກປໂຍເຄນາຕິ ເອກທິສາວໂລກນປໂຍເຄນ. ເຕສໍເຍວາຕິ ເຍສໍ ນຈ຺ຈໍ ປສ຺ສຕິ. ກິຎ຺ຈາປິ ສຍໍ ນຈ຺ຈນາທີສຸ ປາຈິຕ຺ຕິຍໍ ປາຬິຍໍ ນ ວຸຕ຺ຕໍ, ຕຖາປິ ອຏ຺ຐກຖາປມາເຓນ ຄເຫຕພ຺ພນ຺ຕິ ທສ຺ເສຕຸໍ ‘‘ສພ຺ພອຏ຺ຐກຖາສຸ ວຸຕ຺ຕ’’ນ຺ຕິ ອາຫ. ‘‘ອາຣາເມ ຐຕ຺ວາຕິ ນ ເກວລໍ ຐຕ຺ວາ, ຕໂຕ ຕໂຕ ຄນ຺ຕ຺ວາປິ ສພ຺ພິຣິຍາປເຖຫິ ລຠຕິ, ‘ອາຣາເມ ຐິຕາ’ຕິ ປນ ອາຣາມປຣິຍາປນ຺ນຠາວທສ຺ສນຕ຺ຖໍ ວຸຕ຺ຕໍ. ອິຕຣຖາ ນິສິນ຺ນາປິ ນ ລເຠຍ຺ຍາ’’ຕິ ຕີສຸປິ ຄຓ຺ຐິປເທສຸ ວຸຕ຺ຕໍ. ເສສເມຕ຺ຖ ອຸຕ຺ຕານເມວ. ນຈ຺ຈາທີນໍ ອຎ຺ຎຕຣຕາ, ອຎ຺ຎຕ຺ຣ ອນຸຎ຺ຎາຕກາຣຓາ ຄມນໍ, ທສ຺ສນໍ ວາ ສວນໍ ວາຕິ ອິມານິ ປເນຕ຺ຖ ຕີຓິ ອງ຺ຄານິ.

ລສຸຓວຄ຺ຄວຓ຺ຓນາ ນິຏ຺ຐິຕາ.