໓. ວສ຺ສູປນາຍິກກ຺ຂນ຺ຘກໍ

ວສ຺ສູປນາຍິການຸຊານນກຖາວຓ຺ຓນາ

໑໘໔. ວສ຺ສູປນາຍິກກ຺ຂນ຺ຘເກ ອິຘ-ສທ຺ໂທ ນິປາຕມຕ຺ໂຕຕິ ໂອກາສປຣິທີປນສ຺ສປິ ອສມ຺ຠວໂຕ ອຕ຺ຖນ຺ຕຣສ຺ສ ອໂພຘນໂຕ ວຸຕ຺ຕໍ. ອປຣຊ຺ຊຸຄຕາຍ ອສ຺ສາຕິ ອິມິນາ ອສມານາຘິກຣຓວິສໂຍ ພາຫິຣຕ຺ຖສມາໂສຍນ຺ຕິ ທສ຺ເສຕິ. ອປຣຊ຺ຊູຕິ ອາສາຬ຺ຫີປຸຓ຺ຓມິໂຕ ອປຣໍ ທິນໍ, ປາຏິປທນ຺ຕິ ອຕ຺ໂຖ. ອສ຺ສາຕິ ອາສາຬ຺ຫີປຸຓ຺ຓມິຍາ.

ວສ຺ສາເນ ຈາຣິກາປຏິກ຺ເຂປາທິກຖາວຓ຺ຓນາ

໑໘໕. ອນເປກ຺ຂຄມເນນ ວາ ອຎ຺ຎຕ຺ຖ ອຣຸຓໍ ອຸຏ຺ຐາປເນນ ວາ ອາປຕ຺ຕິ ເວທິຕພ຺ພາຕິ ເອຕ຺ຖ ອນເປກ຺ຂຄມເນນ ອຸປຈາຣາຕິກ຺ກເມ ອາປຕ຺ຕິ ເວທິຕພ຺ພາ, ສາເປກ຺ຂຄມເນນ ອຎ຺ຎຕ຺ຖ ອຣຸຓຸຏ຺ຐາປເນນ ອາປຕ຺ຕິ ເວທິຕພ຺ພາ.

ສຕ຺ຕາຫກຣຓີຍານຸຊານນກຖາວຓ຺ຓນາ

໑໘໗-໑໘໙. ຕີຓິ ປຣິຫີນານີຕິ ຠິກ຺ຂຸນີນໍ ວຈ຺ຈກຸຏິອາທີນໍ ປຏິກ຺ຂິຕ຺ຕຕ຺ຕາ ປຫີນານິ. ວາເຣຍ຺ຍນ຺ຕິ ອາວາຫວິວາຫມງ຺ຄລໍ. ສຸຕ຺ຕນ຺ໂຕຕິ ອຕ຺ຕໂນ ປຄຸຓສຸຕ຺ຕນ຺ໂຕ. ນ ປລຸຊ຺ຊຕີຕິ ນ ວິນສ຺ສຕິ ນ ອນ຺ຕຣຘາຍຕິ.

ປຫິເຕເຍວ ອນຸຊານນກຖາວຓ຺ຓນາ

໑໙໙. ຠິກ຺ຂຸຄຕິໂກຕິ ຠິກ຺ຂຸນິສ຺ສິຕໂກ. ໂສ ປນ ຍສ຺ມາ ຠິກ຺ຂູຫິ ສທ຺ຘິໍ ວສຕິ, ຕສ຺ມາ ວຸຕ຺ຕໍ ‘‘ຠິກ຺ຂູຫິ ສທ຺ຘິໍ ວສນກປຸຣິໂສ’’ຕິ. ສຕ຺ຕາຫກຣຓີເຍນ ຄນ຺ຕ຺ວາ ພຫິທ຺ຘາ ອຣຸຓຸຏ຺ຐາປນໍ ຣຕ຺ຕິຈ຺ເຉໂທ. ອນິມນ຺ຕິເຕນ ຄນ຺ຕຸໍ ນ ວຏ຺ຏຕີຕິ ເອຕ຺ຖ ອນິມນ຺ຕິຕຕ຺ຕາ ສຕ຺ຕາຫກິຈ຺ຈໍ ອຘິຏ຺ຐຫິຕ຺ວາ ຄຈ຺ຉນ຺ຕສ຺ສປິ ວສ຺ສຈ຺ເຉໂທ ເຈວ ທຸກ຺ກຏຎ຺ຈ ໂຫຕີຕິ ເວທິຕພ຺ພໍ. ຍຖາວຸຕ຺ຕຎ຺ຫິ ຣຕ຺ຕິຈ຺ເຉທກາຣຓໍ ວິນາ ຕິໂຣວິຫາເຣ ວສິຕ຺ວາ ອາຄຈ຺ຉິສ຺ສາມີຕິ ຄຈ຺ຉໂຕປິ ວສ຺ສຈ຺ເຉທໍ ວທນ຺ຕິ. ຄນ຺ຕຸໍ ວຏ຺ຏຕີຕິ ສຕ຺ຕາຫກຣຓີເຍນ ຄນ຺ຕຸໍ ວຏ຺ຏຕິ. ເອວໍ ຄຈ຺ຉນ຺ເຕນ ຈ ອນ຺ໂຕອຸປຈາຣສີມາຍໍ ຐິເຕເນວ ‘‘ອນ຺ໂຕສຕ຺ຕາເຫ ອາຄຈ຺ຉິສ຺ສາມີ’’ຕິ ອາໂຠຄໍ ກຕ຺ວາ ຄນ຺ຕພ຺ພໍ. ສເຈ ອາໂຠຄໍ ອກຕ຺ວາ ອຸປຈາຣສີມໍ ອຕິກ຺ກມຕິ, ຉິນ຺ນວສ຺ໂສວ ໂຫຕີຕິ ວທນ຺ຕິ. ຠຓ຺ຑກນ຺ຕິ ຈີວຣໍ ສນ຺ຘາຍ ວຸຕ຺ຕໍ. ປຫິຓນ຺ຕີຕິ ຈີວຣໂຘວນາທິກມ຺ເມນ ປຫິຓນ຺ຕິ. ສມ຺ປາປຸຓິຕຸໍ ນ ສກ຺ໂກຕິ, ວຏ຺ຏຕີຕິ ເອຕ຺ຖ ‘‘ອຊ຺ເຊວ ອາຄມິສ຺ສາມີ’’ຕິ ສາມນ຺ຕວິຫາຣໍ ຄນ຺ຕ຺ວາ ປຸນ ອາຄຈ຺ຉນ຺ຕສ຺ສ ອນ຺ຕຣາມຄ຺ເຄ ສເຈ ອຣຸຓຸຄ຺ຄມນໍ ໂຫຕິ, ວສ຺ສຈ຺ເຉໂທປິ ນ ໂຫຕິ, ຣຕ຺ຕິຈ຺ເຉທທຸກ຺ກຏຎ຺ຈ ນຕ຺ຖີຕິ ວທນ຺ຕິ. ‘‘ອາຈຣິຍໍ ປສ຺ສິສ຺ສາມີ’’ຕິ ປນ ຄນ຺ຕຸໍ ລຠຕີຕິ ‘‘ອຄິລານມ຺ປິ ອາຈຣິຍໍ ອຸປຊ຺ຌາຍໍ ວາ ປສ຺ສິສ຺ສາມີ’’ຕິ ສຕ຺ຕາຫກຣຓີເຍນ ຄນ຺ຕຸໍ ລຠຕິ. ສເຈ ປນ ນໍ ອາຈຣິໂຍ ‘‘ອຊ຺ຊ ມາ ຄຈ຺ຉາ’’ຕິ ວທຕິ, ວຏ຺ຏຕີຕິ ເອວໍ ສຕ຺ຕາຫກຣຓີເຍນ ຄຕໍ ອນ຺ໂຕສຕ຺ຕາເຫເຍວ ປຸນ ອາຄຈ຺ຉນ຺ຕໍ ສເຈ ອາຈຣິໂຍ ອຸປຊ຺ຌາໂຍ ວາ ‘‘ອຊ຺ຊ ມາ ຄຈ຺ຉາ’’ຕິ ວທຕິ, ວຏ຺ຏຕິ, ສຕ຺ຕາຫາຕິກ຺ກເມປິ ອນາປຕ຺ຕີຕິ ອຘິປ຺ປາໂຍ, ວສ຺ສຈ຺ເຉໂທ ປນ ໂຫຕິເຍວາຕິ ທຏ຺ຐພ຺ພໍ ສຕ຺ຕາຫສ຺ສ ພຫິທ຺ຘາ ວີຕິນາມິຕຕ຺ຕາ.

ອນ຺ຕຣາເຍ ອນາປຕ຺ຕິວສ຺ສຈ຺ເຉທກຖາວຓ຺ຓນາ

໒໐໑. ສເຈ ທູຣໍ ຄໂຕ ໂຫຕິ, ສຕ຺ຕາຫວາເຣນ ອຣຸໂຓ ອຸຏ຺ຐາເປຕພ຺ໂພຕິ ອິມິນາ ວສ຺ສຈ຺ເຉທກາຣເຓ ສຕິ ສຕ຺ຕາຫກຣຓີເຍນ ຄນ຺ຕຸໍ ວຏ຺ຏຕີຕິ ທີເປຕິ.

ວຊາທີສຸ ວສ຺ສູປຄມນກຖາວຓ຺ຓນາ

໒໐໓. ‘‘ອິຘ ວສ຺ສໍ ອຸເປມີ’’ຕິ ຕິກ຺ຂຕ຺ຕຸໍ ວຕ຺ຕພ຺ພນ຺ຕິ ສຕ຺ຖສ຺ສາວິຫາຣຕ຺ຕາ ‘‘ອິມສ຺ມິໍ ວິຫາເຣ’’ຕິ ອວຕ຺ວາ ‘‘ອິຘ ວສ຺ສໍ ອຸເປມີ’’ຕິ ເອຕ຺ຕກເມວ ວຕ຺ຕພ຺ພໍ. ສຕ຺ເຖ ປນ ວສ຺ສໍ ອຸປຄນ຺ຕຸໍ ນ ວຏ຺ຏຕີຕິ ກຸຏິກາທີນໍ ອຠາເວ ‘‘ອິຘ ວສ຺ສໍ ອຸເປມີ’’ຕິ ວຈີເຠທໍ ກຕ຺ວາ ອຸປຄນ຺ຕຸໍ ນ ວຏ຺ຏຕິ, ອາລຍກຣຓມຕ຺ເຕເນວ ວຏ຺ຏຕີຕິ ອຘິປ຺ປາໂຍ. ວິປ຺ປກິຣຕີຕິ ວິສຸໍ ວິສຸໍ ຄຈ຺ຉຕິ. ຕີສຸ ຐາເນສຸ ນຕ຺ຖິ ວສ຺ສຈ຺ເຉເທ ອາປຕ຺ຕີຕິ ເຕຫິ ສທ຺ຘິໍ ຄຈ຺ຉນ຺ຕສ຺ເສວ ນຕ຺ຖິ ອາປຕ຺ຕິ, ເຕຫິ ວິຍຸຊ຺ຊິຕ຺ວາ ຄມເນ ປນ ອາປຕ຺ຕິເຍວ, ປວາເຣຕຸຎ຺ຈ ນ ລຠຕິ.

ວສ຺ສໍ ອນຸປຄນ຺ຕພ຺ພຏ຺ຐານກຖາວຓ຺ຓນາ

໒໐໔. ເສຍ຺ຍຖາປິ ປິສາຈິລ຺ລິກາຕິ ເອຕ຺ຖ ປິສາຈາ ເອວ ປິສາຈິລ຺ລິກາ, ປິສາຈທາຣກາຕິປິ ວທນ຺ຕິ. ປວິສນທ຺ວາຣໍ ໂຍເຊຕ຺ວາຕິ ສກວາຏພທ຺ຘເມວ ໂຍເຊຕ຺ວາ. ປຎ຺ຈນ຺ນໍ ຉທນານນ຺ຕິ ຕິຓປຓ຺ຓອິຏ຺ຐກສິລາສຸຘາສງ຺ຂາຕານໍ ປຎ຺ຈນ຺ນໍ ຉທນານໍ. ອິທຎ຺ຈ ເຍຠຸຍ຺ເຍນ ວຸຕ຺ຕນ຺ຕິ ເວທິຕພ຺ພໍ ຣຸກ຺ຂາທີສຸ ປທຣຈ຺ຉທນາຍປິ ກຸຏິກາຍ ວສ຺ສູປຄມນສ຺ສ ວຸຕ຺ຕຕ຺ຕາ. ນ, ຠິກ຺ຂເວ, ອເສນາສນິເກນ ວສ຺ສໍ ອຸປຄນ຺ຕພ຺ພນ຺ຕິ ວຈີເຠທໍ ກຕ຺ວາ ວສ຺ສູປຄມນໍ ສນ຺ຘາເຍວ ປຏິກ຺ເຂໂປ, ນ ອາລຍກຣຓວເສນ ອຸປຄມນໍ ສນ຺ຘາຍາຕິ ວທນ຺ຕິ. ປາຬິຍໍ ປນ ອວິເສເສນ ວຸຕ຺ຕຕ຺ຕາ ອຏ຺ຐກຖາຍຎ຺ຈ ທຸຕິຍປາຣາຊິກສໍວຓ຺ຓນາຍໍ (ປາຣາ. ອຏ຺ຐ. ໑.໘໔) ‘‘ວສ຺ສໍ ອຸປຄຈ຺ຉນ຺ເຕນ ຫິ ນາລກປຏິປທໍ ປຏິປນ຺ເນນປິ ປຎ຺ຈນ຺ນໍ ຉທນານໍ ອຎ຺ຎຕເຣນ ຉນ຺ເນເຍວ ສທ຺ວາຣພນ຺ເຘ ເສນາສເນ ອຸປຄນ຺ຕພ຺ພໍ. ຕສ຺ມາ ວສ຺ສກາເລ ສເຈ ເສນາສນໍ ລຠຕິ, ອິຈ຺ເຈຕໍ ກຸສລໍ. ໂນ ເຈ ລຠຕິ, ຫຕ຺ຖກມ຺ມໍ ປຣິເຍສິຕ຺ວາປິ ກາຕພ຺ພໍ. ຫຕ຺ຖກມ຺ມໍ ອລຠນ຺ເຕນ ສາມມ຺ປິ ກາຕພ຺ພໍ, ນ ຕ຺ເວວ ອເສນາສນິເກນ ວສ຺ສໍ ອຸປຄນ຺ຕພ຺ພ’’ນ຺ຕິ ທຬ຺ຫໍ ກຕ຺ວາ ວຸຕ຺ຕຕ຺ຕາ ອເສນາສນິກສ຺ສ ນາວາທິໍ ວິນາ ອຎ຺ຎຕ຺ຖ ອາລໂຍ ນ ວຏ຺ຏຕີຕິ ອມ຺ຫາກໍ ຂນ຺ຕິ. ນາວາສຕ຺ຖວເຊສຸເຍວ ຫິ ‘‘ອນຸຊານາມິ, ຠິກ຺ຂເວ, ນາວາຍ ວສ຺ສໍ ອຸປຄນ຺ຕຸ’’ນ຺ຕິອາທິນາ ສຕິ ອສຕິ ວາ ເສນາສເນ ວສ຺ສູປຄມນສ຺ສ ວິສຸໍ ອນຸຎ຺ຎາຕຕ຺ຕາ ‘‘ນ, ຠິກ຺ຂເວ, ອເສນາສນິເກນ ວສ຺ສໍ ອຸປຄນ຺ຕພ຺ພ’’ນ຺ຕິ ອຍໍ ປຏິກ຺ເຂໂປ ຕຕ຺ຖ ນ ລພ຺ຠຕີຕິ ອສຕິ ເສນາສເນ ອາລຍວເສນປິ ນາວາທີສຸ ອຸປຄມນໍ ວຸຕ຺ຕໍ. ຏງ຺ກິຕມຎ຺ໂຈ ນາມ ທີເຆ ມຎ຺ຈປາເທ ມຊ຺ເຌ ວິຊ຺ຌິຕ຺ວາ ອຏນິໂຍ ປເວເສຕ຺ວາ ກໂຕ ມຎ຺ໂຈ. ຕສ຺ສ ອິທໍ ອຸປຣິ ອິທໍ ເຫຏ຺ຐາຕິ ນຕ຺ຖິ, ປຣິວຕ຺ເຕຕ຺ວາ ອຕ຺ຖໂຕປິ ຕາທິໂສວ ໂຫຕິ, ຕໍ ສຸສາເນ ເທວຏ຺ຐາເນ ຈ ຐເປນ຺ຕິ, ຈຕຸນ຺ນໍ ປາສາຓານໍ ອຸປຣິ ປາສາຓໍ ອຕ຺ຖຣິຕ຺ວາ ກຕໍ ເຄຫມ຺ປິ ‘‘ຏງ຺ກິຕມຎ຺ໂຈ’’ຕິ ວຸຈ຺ຈຕິ.

ວສ຺ສໍ ອນຸປຄນ຺ຕພ຺ພຏ຺ຐານກຖາວຓ຺ຓນາ ນິຏ຺ຐິຕາ.

ອຘມ຺ມິກກຕິກກຖາວຓ຺ຓນາ

໒໐໕. ຕສ຺ສາ ລກ຺ຂຓໍ ມຫາວິຠງ຺ເຄ ວຸຕ຺ຕນ຺ຕິ ຈຕຸຕ຺ຖປາຣາຊິກສໍວຓ຺ຓນາຍໍ ‘‘ໂຍ ອິມມ຺ຫາ ອາວາສາ ປຐມໍ ປກ຺ກມິສ຺ສຕິ, ຕໍ ມຍໍ ອຣຫາຕິ ຊານິສ຺ສາມາ’’ຕິ (ປາຣາ. ໒໒໘) ເອຕ຺ຖ ທສ຺ສິຕໍ ອຘມ຺ມິກກຕິກວຕ຺ຕລກ຺ຂຓໍ ສນ຺ຘາຍ ວທຕິ, ປຣໂຕປິ ເສນາສນກ຺ຂນ຺ຘກວຓ຺ຓນາຍໍ ອຘມ຺ມິກໍ ກຕິກວຕ຺ຕໍ ອາວິ ຠວິສ຺ສຕິເຍວ.

ປຏິສ຺ສວທຸກ຺ກຏາປຕ຺ຕິກຖາວຓ຺ຓນາ

໒໐໗. ຍສ຺ມາ ນານາສີມາຍໍ ທ຺ວີສຸ ອາວາເສສຸ ວສ຺ສໍ ວສນ຺ຕສ຺ສ ທຸຕິເຍ ‘‘ວສາມີ’’ຕິ ຈິຕ຺ເຕ ອຸປ຺ປນ຺ເນ ປຐມເສນາສນຄ຺ຄາໂຫ ປຏິປ຺ປສ຺ສມ຺ຠຕິ, ປຸນ ປຐເມເຍວ ‘‘ວສາມີ’’ຕິ ຈິຕ຺ເຕ ອຸປ຺ປນ຺ເນ ທຸຕິໂຍ ປຏິປ຺ປສ຺ສມ຺ຠຕິ, ຕສ຺ມາ ‘‘ຕສ຺ສ, ຠິກ຺ຂເວ, ຠິກ຺ຂຸໂນ ປຸຣິມິກາ ຈ ນ ປຎ຺ຎາຍຕີ’’ຕິ ວຸຕ຺ຕໍ. ປຏິສ຺ສວສ຺ສ ວິສໍວາທນປຈ຺ຈຍາ ໂຫນ຺ຕມ຺ປິ ທຸກ຺ກຏໍ ສຕິເຍວ ປຏິສ຺ສເວ ໂຫຕີຕິ ອາຫ ‘‘ຕສ຺ສ ຕສ຺ສ ປຏິສ຺ສເວ ທຸກ຺ກຏ’’ນ຺ຕິ. ເຕເນວາຫ ‘‘ຕຎ຺ຈ ໂຂ…ເປ… ປຈ຺ຉາ ວິສໍວາທນປຈ຺ຈຍາ’’ຕິ.

ອກຣຓີໂຍຕິ ສຕ຺ຕາຫກຣຓີເຍນ ອກຣຓີໂຍ. ສກຣຓີໂຍຕິ ສຕ຺ຕາຫກຣຓີເຍເນວ ສກຣຓີໂຍ. ຍທິ ເອວໍ ‘‘ສຕ຺ຕາຫກຣຓີເຍນ ອກຣຓີໂຍ ສກຣຓີໂຍ’’ຕິ ຈ ກສ຺ມາ ນ ວຸຕ຺ຕນ຺ຕິ? ‘‘ອກຣຓີໂຍ’’ຕິ ວຸຕ຺ເຕປິ ສຕ຺ຕາຫກຣຓີເຍນ ສກຣຓີຍາກຣຓີຍຕາ ວິຎ຺ຎາຍຕີຕິ ກຕ຺ວາ ນ ວຸຕ຺ຕໍ. ຍທິ ເອວໍ ປຣໂຕ ‘‘ສຕ຺ຕາຫກຣຓີເຍນ ປກ຺ກມຕີ’’ຕິ ວາຣທ຺ວເຍປິ ‘‘ສກຣຓີໂຍ ປກ຺ກມຕີ’’ຕິ ເອຕ຺ຕກເມວ ກສ຺ມາ ນ ວຸຕ຺ຕນ຺ຕິ? ວຸຈ຺ຈເຕ – ຕຕ຺ຖ ‘‘ສຕ຺ຕາຫກຣຓີເຍນາ’’ຕິ ອວຕ຺ວາ ‘‘ສກຣຓີໂຍ ປກ຺ກມຕີ’’ຕິ ວຸຕ຺ເຕ ໂສ ຕໍ ສຕ຺ຕາຫໍ ພຫິທ຺ຘາ ວີຕິນາເມຕີຕິ ນ ສກ຺ກາ ວຕ຺ຕຸນ຺ຕິ ‘‘ສຕ຺ຕາຫກຣຓີເຍນ ປກ຺ກມຕີ’’ຕິ ວຸຕ຺ຕໍ. ເອວຎ຺ຫິ ວຸຕ຺ເຕ ສຕ຺ຕາຫສ຺ສ ອຘິກຕຕ຺ຕາ ໂສ ຕໍ ສຕ຺ຕາຫໍ ພຫິ ວີຕິນາເມຕີຕິ ສກ຺ກາ ວຕ຺ຕຸໍ.

ເອຕ຺ຖ ຈ ອາທິມ຺ຫິ ຈຕ຺ຕາໂຣ ວາຣາ ນິຣເປກ຺ຂຄມນໍ ສນ຺ຘາຍ ວຸຕ຺ຕາ, ຕຕ຺ຖາປິ ປຸຣິມາ ທ຺ເວ ວາຣາ ວສ຺ສໍ ອນຸປຄຕສ຺ສ ວເສນ ວຸຕ຺ຕາ, ປຈ຺ຉິມາ ປນ ທ຺ເວ ວາຣາ ວສ຺ສໍ ອຸປຄຕສ຺ສ ວເສນ, ຕໂຕ ປຣໍ ທ຺ເວ ວາຣາ ສາເປກ຺ຂຄມນໍ ສນ຺ຘາຍ ວຸຕ຺ຕາ, ຕຕ຺ຖາປິ ປຐມວາໂຣ ສາເປກ຺ຂສ຺ສປິ ສຕ຺ຕາຫກຣຓີເຍນ ຄນ຺ຕ຺ວາ ຕໍ ສຕ຺ຕາຫໍ ພຫິທ຺ຘາ ວີຕິນາເມນ຺ຕສ຺ສ ວສ຺ສຈ຺ເຉທທສ຺ສນຕ຺ຖໍ ວຸຕ຺ໂຕ, ອິຕໂຣ ວຸຕ຺ຕນເຍເນວ ຄນ຺ຕ຺ວາ ອນ຺ໂຕສຕ຺ຕາເຫ ນິວຕ຺ຕນ຺ຕສ຺ສ ວສ຺ສຈ຺ເຉທາຠາວທສ຺ສນຕ຺ຖໍ. ‘‘ໂສ ສຕ຺ຕາຫໍ ອນາຄຕາຍ ປວາຣຓາຍ ສກຣຓີໂຍ ປກ຺ກມຕີ’’ຕິ ອຍໍ ປນ ວາໂຣ ນວມິໂຕ ປຏ຺ຐາຍ ຄນ຺ຕ຺ວາ ສຕ຺ຕາຫໍ ພຫິທ຺ຘາ ວີຕິນາເມນ຺ຕສ຺ສປິ ວສ຺ສຈ຺ເຉທາຠາວທສ຺ສນຕ຺ຖໍ ວຸຕ຺ໂຕ. ເອຕ຺ຖ ຈ ‘‘ອກຣຓີໂຍ ປກ຺ກມຕີ’’ຕິ ທຸຕິຍວາຣສ຺ສ ອນາຄຕຕ຺ຕາ ນວມິໂຕ ປຏ຺ຐາຍ ຄຈ຺ຉນ຺ເຕນປິ ສຕິເຍວ ກຣຓີເຍ ຄນ຺ຕພ຺ພໍ, ນາສຕີຕິ ທຏ຺ຐພ຺ພໍ. ອິເມ ຈ ສຕ຺ຕ ວາຣາ ພຫິທ຺ຘາ ກຕອຸໂປສຖິກສ຺ສ ວເສນ ອາຄຕາ, ອປເຣ ສຕ຺ຕ ອນ຺ໂຕວິຫາຣໍ ຄນ຺ຕ຺ວາ ກຕອຸໂປສຖສ຺ສ ວເສນາຕິ ເອວໍ ປຸຣິມິກາຍ ວເສນ ຈຸທ຺ທສ ວາຣາ ວຸຕ຺ຕາ, ຕໂຕ ປຣໍ ປຈ຺ຉິມິກາຍ ວເສນ ເຕເຍວ ຈຸທ຺ທສ ວາຣາ ວຸຕ຺ຕາຕິ ເອວເມເຕສໍ ນານາກຣຓໍ ເວທິຕພ຺ພໍ.

ອິເມຫິ ປນ ສພ຺ພວາເຣຫິ ວຸຕ຺ຕມຕ຺ຖໍ ສມ຺ປິຓ຺ເຑຕ຺ວາ ທສ຺ເສຕຸໍ ‘‘ໂສ ຕທເຫວ ອກຣຓີໂຍຕິອາທີສູ’’ຕິອາທິ ອາຣທ຺ຘໍ. ໂກ ປນ ວາໂທ ທ຺ວີຫຕີຫໍ ວສິຕ຺ວາ ອນ຺ໂຕສຕ຺ຕາເຫ ນິວຕ຺ຕນ຺ຕສ຺ສາຕິ ວສ຺ສໍ ອຸປຄນ຺ຕ຺ວາ ທ຺ວີຫຕີຫໍ ວສິຕ຺ວາ ສຕ຺ຕາຫກຣຓີເຍນ ຄນ຺ຕ຺ວາ ອນ຺ໂຕສຕ຺ຕາເຫ ນິວຕ຺ຕນ຺ຕສ຺ສ ໂກ ປນ ວາໂທ, ກຖາ ເອວ ນຕ຺ຖີຕິ ອຘິປ຺ປາໂຍ. ອສຕິຍາ ປນ ວສ຺ສໍ ນ ອຸເປຕີຕິ ‘‘ອິມສ຺ມິໍ ວິຫາເຣ ອິມໍ ເຕມາສໍ ວສ຺ສໍ ອຸເປມີ’’ຕິ ວຈີເຠທໍ ກຕ຺ວາ ນ ອຸເປຕິ.

ໂກມຸທິຍາ ຈາຕຸມາສິນິຍາຕິ ປຈ຺ຉິມກຕ຺ຕິກປຸຓ຺ຓມາຍໍ. ສາ ຫິ ກຸມຸທານໍ ອຕ຺ຖິຕາຍ ໂກມຸທີ, ຈຕຸນ຺ນໍ ວສ຺ສິການໍ ມາສານໍ ປຣິໂຍສານຕ຺ຕາ ‘‘ຈາຕຸມາສິນີ’’ຕິ ວຸຈ຺ຈຕິ. ຕທາ ຫິ ກຸມຸທານິ ສຸປຸປ຺ຜິຕານິ ໂຫນ຺ຕິ, ຕສ຺ມາ ກຸມຸທານໍ ສມູໂຫ, ກຸມຸທານິ ເອວ ວາ ໂກມຸທາ, ເຕ ເອຕ຺ຖ ອຕ຺ຖີຕິ ‘‘ໂກມຸທີ’’ຕິ ວຸຈ຺ຈຕິ, ກຸມຸທວຕີຕິ ວຸຕ຺ຕໍ ໂຫຕິ. ເສສເມຕ຺ຖ ອຸຕ຺ຕານເມວ.

ປຏິສ຺ສວທຸກ຺ກຏາປຕ຺ຕິກຖາວຓ຺ຓນາ ນິຏ຺ຐິຕາ.

ວສ຺ສູປນາຍິກກ຺ຂນ຺ຘກວຓ຺ຓນາ ນິຏ຺ຐິຕາ.