໕. ຕລສຕ຺ຕິກສິກ຺ຂາປທວຓ຺ຓນາ

໔໕໗. ປຎ຺ຈເມ ນ ປຫຣິຕຸກາມຕາຍ ທິນ຺ນຕ຺ຕາ ທຸກ຺ກຏນ຺ຕິ ເອຕ຺ຖ ປຫຣິຕຸກາມຕາຍ ປຫເຏ ປຸຣິມສິກ຺ຂາປເທນ ປາຈິຕ຺ຕິຍໍ, ອຸຈ຺ຈາເຣຕຸກາມຕາຍ ເກວລໍ ອຸຄ຺ຄິຣຓມຕ຺ເຕ ກເຕ ອິມິນາ ປາຈິຕ຺ຕິຍໍ. ອິມິນາ ປນ ວິຣຊ຺ຌິຕ຺ວາ ປຫາໂຣ ທິນ຺ໂນ, ຕສ຺ມາ ທຸກ຺ກຏໍ. ກິມິທໍ ທຸກ຺ກຏໍ ປຫາຣປຈ຺ຈຍາ, ອຸທາຫຸ ອຸຄ຺ຄິຣຓປຈ຺ຈຍາຕິ? ຕຕ຺ຖ ເກຈິ ຕາວ ວທນ຺ຕິ ‘‘ປຫາຣປຈ຺ຈຍາ ເອວ ທຸກ຺ກຏໍ, ອຸຄ຺ຄິຣຓປຈ຺ຈຍາ ປາຈິຕ຺ຕິຍນ຺ຕິ ສທຸກ຺ກຏໍ ປາຈິຕ຺ຕິຍໍ ຍຸຊ຺ຊຕິ. ປຸຣິມຎ຺ຫິ ອຸຄ຺ຄິຣຓໍ, ປຈ຺ຉາ ປຫາໂຣ, ນ ຈ ປຈ຺ຉາ ປຫາຣໍ ນິສ຺ສາຍ ປຸຣິມໍ ອຸຄ຺ຄິຣຓໍ ອນາປຕ຺ຕິວຕ຺ຖຸກໍ ຠວິຕຸມຣຫຕີ’’ຕິ.

ມຍໍ ປເນຕ຺ຖ ເອວໍ ຕກ຺ກຍາມ ‘‘ອຸຄ຺ຄິຣຓສ຺ສ ອຕ຺ຕໂນ ສຠາເວເນວ ອສຓ຺ຐິຕຕ຺ຕາ ຕປ຺ປຈ຺ຈຍາ ປາຈິຕ຺ຕິເຍນ ນ ຠວິຕພ຺ພໍ, ອສຸທ຺ຘຈິຕ຺ເຕນ ກຕປໂຍຄຕ຺ຕາ ປນ ນ ສກ຺ກາ ເອຕ຺ຖ ອນາປຕ຺ຕິຍາ ຠວິຕຸນ຺ຕິ ທຸກ຺ກຏໍ ວຸຕ຺ຕໍ. ‘ນ ປຫຣິຕຸກາມຕາຍ ທິນ຺ນຕ຺ຕາ’ຕິ ອິມິນາ ຈ ປຫາຣປຈ຺ຈຍາ ປຸຣິມສິກ຺ຂາປເທນ ປາຈິຕ຺ຕິຍາສມ຺ຠເວ ກາຣຓໍ ວຸຕ຺ຕໍ, ນ ປນ ປຫາຣປຈ຺ຈຍາ ທຸກ຺ກຏສມ຺ຠເວ. ນ ຫິ ອປຫຣິຕຸກາມຕາຍ ປຫາເຣ ທິນ຺ເນ ປຸຣິມສິກ຺ຂາປເທນ ປຫາຣປຈ຺ຈຍາ ປາຈິຕ຺ຕິເຍນ ທຸກ຺ກເຏນ ວາ ຠວິຕຸໍ ຍຸຕ຺ຕ’’ນ຺ຕິ. ‘‘ຕິຣຈ຺ຉານາທີນໍ ອສຸຈິກຣຓາທິໍ ທິສ຺ວາ ກຸຊ຺ຌິຕ຺ວາປິ ອຸຄ຺ຄິຣນ຺ຕສ຺ສ ໂມກ຺ຂາຘິປ຺ປາໂຍ ເອວາ’’ຕິ ວທນ຺ຕິ. ເສສເມຕ຺ຖ ອຸຕ຺ຕານເມວ. ກຸປິຕຕາ, ນ ໂມກ຺ຂາຘິປ຺ປາຍຕາ, ອຸປສມ຺ປນ຺ນສ຺ສ ຕລສຕ຺ຕິອຸຄ຺ຄິຣຓນ຺ຕິ ອິມານິ ປເນຕ຺ຖ ຕີຓິ ອງ຺ຄານິ.

ຕລສຕ຺ຕິກສິກ຺ຂາປທວຓ຺ຓນາ ນິຏ຺ຐິຕາ.