໕. ອູນວີສຕິວສ຺ສສິກ຺ຂາປທວຓ຺ຓນາ

໔໐໒. ປຎ຺ຈເມ ຣູປສຸຕ຺ຕນ຺ຕິ ເຫຣຎ຺ຎິການໍ ສຸຕ຺ຕໍ. ທຸຣຸຕ຺ຕານນ຺ຕິ ອກ຺ໂກສວເສນ ທຸຣຸຕ຺ຕານໍ, ທຸຣຸຕ຺ຕຕ຺ຕາເຍວ ທຸຣາຄຕານໍ. ວຈນປຖານນ຺ຕິ ເອຕ຺ຖ ວຈນເມວ ຕທຕ຺ຖໍ ຎາຕຸກາມານໍ ຎາເປຕຸກາມານຎ຺ຈ ປໂຖຕິ ວຈນປໂຖ. ທຸກ຺ຂມານນ຺ຕິ ທຸກ຺ເຂນ ຂມິຕພ຺ພານໍ.

໔໐໔. ຄພ຺ເຠ ສຍິຕກາເລນ ສທ຺ຘິໍ ວີສຕິມໍ ວສ຺ສໍ ອສ຺ສາຕິ ຄພ຺ຠວີໂສ. ຫາຍນວຑ຺ຒນນ຺ຕິ ຄພ຺ຠມາເສສຸ ອຘິເກສຸ ອຸຕ຺ຕຣິຫາຍນໍ, ອູເນສຸ ວຑ຺ຒນນ຺ຕິ ເວທິຕພ຺ພໍ. ເອກູນວີສຕິວສ຺ສນ຺ຕິ ທ຺ວາທສມາເສ ມາຕຸກຸຈ຺ຉິສ຺ມິໍ ວສິຕ຺ວາ ມຫາປວາຣຓາຍ ຊາຕກາລໂຕ ປຏ຺ຐາຍ ເອກູນວີສຕິວສ຺ສໍ. ປາຏິປທທິວເສຕິ ປຈ຺ຉິມິກາຍ ວສ຺ສູປຄມນທິວເສ. ‘‘ຕິໍສຣຕ຺ຕິທິໂວ ມາໂສ’’ຕິ (ອ. ນິ. ໓.໗໑; ໘.໔໓; ວິຠ. ໑໐໒໓) ວຈນໂຕ ‘‘ຈຕ຺ຕາໂຣ ມາສາ ປຣິຫາຍນ຺ຕີ’’ຕິ ວຸຕ຺ຕໍ. ວສ຺ສໍ ອຸກ຺ກຑ຺ຒນ຺ຕີຕິ ວສ຺ສໍ ອຸທ຺ຘໍ ກຑ຺ຒນ຺ຕິ, ຕຕິເຍ ສໍວຈ຺ຉເຣ ເອກມາສໍ ອຘິກມາສວເສນ ປຣິຈ຺ຈຊນ຺ຕາ ວສ຺ສໍ ອຸທ຺ຘໍ ກຑ຺ຒນ຺ຕີຕິ ອຕ຺ໂຖ, ຕສ຺ມາ ຕຕິໂຍ ສໍວຈ຺ຉໂຣ ເຕຣສມາສິໂກ ໂຫຕິ, ສໍວຈ຺ຉຣສ຺ສ ປນ ທ຺ວາທສມາສິກຕ຺ຕາ ອຏ຺ຐາຣສສຸ ວສ຺ເສສຸ ອຘິກມາເສ ວິສຸໍ ຄເຫຕ຺ວາ ‘‘ຉ ມາສາ ວຑ຺ຒນ຺ຕີ’’ຕິ ວຸຕ຺ຕໍ. ຕໂຕຕິ ຉມາສໂຕ. ນິກ຺ກງ຺ຂາ ຫຸຕ຺ວາຕິ ອຘິກມາເສຫິ ສທ຺ຘິໍ ປຣິປຸຓ຺ຓວີສຕິວສ຺ສຕ຺ຕາ ນິພ຺ເພມຕິກາ ຫຸຕ຺ວາ. ຍໍ ປນ ວຸຕ຺ຕໍ ຕີສຸ ຄຓ຺ຐິປເທສຸ ‘‘ອຏ຺ຐາຣສນ຺ນໍເຍວ ວສ຺ສານໍ ອຘິກມາເສ ຄເຫຕ຺ວາ ຄຓິຕຕ຺ຕາ ເສສວສ຺ສທ຺ວຍສ຺ສປິ ອຘິການິ ທິວສານິ ໂຫນ຺ເຕວ, ຕານິ ອຘິກທິວສານິ ສນ຺ຘາຍ ‘ນິກ຺ກງ຺ຂາ ຫຸຕ຺ວາ’ຕິ ວຸຕ຺ຕ’’ນ຺ຕິ, ຕໍ ນ ຄເຫຕພ຺ພໍ. ນ ຫິ ທ຺ວີສຸ ວສ຺ເສສຸ ອຘິກທິວສານິ ນາມ ວິສຸໍ ອຸປລພ຺ຠນ຺ຕິ ຕຕິເຍ ວສ຺ເສ ວສ຺ສຸກ຺ກຑ຺ຒນວເສນ ອຘິກມາເສ ປຣິຈ຺ຈຕ຺ເຕເຍວ ອຕິເຣກມາສສມ຺ຠວໂຕ. ຕສ຺ມາ ທ຺ວີສຸ ວສ຺ເສສຸ ອຕິເຣກທິວສານິ ນາມ ວິສຸໍ ນ ສມ຺ຠວນ຺ຕິ.

ນນຸ ຈ ‘‘ເຕ ທ຺ເວ ມາເສ ຄເຫຕ຺ວາ ວີສຕິວສ຺ສານິ ປຣິປຸຓ຺ຓານິ ໂຫນ຺ຕີ’’ຕິ ກສ຺ມາ ວຸຕ຺ຕໍ, ເອກູນວີສຕິວສ຺ສມ຺ຫິ ປຸນ ອປຣສ຺ມິໍ ວສ຺ເສ ປກ຺ຂິຕ຺ເຕ ວີສຕິວສ຺ສານິ ປຣິປຸຓ຺ຓານິ ໂຫນ຺ຕີຕິ ອາຫ ‘‘ເອຕ຺ຖ ປນ…ເປ… ວຸຕ຺ຕ’’ນ຺ຕິ. ອເນກຕ຺ຖຕ຺ຕາ ນິປາຕານໍ ປນ-ສທ຺ໂທ ຫິ-ສທ຺ທຕ຺ເຖ, ເອຕ຺ຖ ຫີຕິ ວຸຕ຺ຕໍ ໂຫຕິ. ອິທຎ຺ຫິ ວຸຕ຺ຕສ຺ເສວຕ຺ຖສ຺ສ ສມຕ຺ຖນວເສນ ວຸຕ຺ຕໍ. ອິມິນາ ຈ ອິມໍ ທີເປຕິ ‘‘ຍໍ ວຸຕ຺ຕໍ ‘ເອກູນວີສຕິວສ຺ສໍ ສາມເຓຣໍ ນິກ຺ຂມນີຍປຸຓ຺ຓມາສິໍ ອຕິກ຺ກມ຺ມ ປາຏິປທທິວເສ ອຸປສມ຺ປາເທນ຺ຕີ’ຕິ, ຕຕ຺ຖ ຄພ຺ຠມາເສປິ ອຄ຺ຄເຫຕ຺ວາ ທ຺ວີຫິ ມາເສຫິ ອປຣິປຸຓ຺ຓວີສຕິວສ຺ສໍ ສນ຺ຘາຍ ‘ເອກູນວີສຕິວສ຺ສ’ນ຺ຕິ ວຸຕ຺ຕໍ, ຕສ຺ມາ ອຘິກມາເສສຸ ທ຺ວີສຸ ຄຫິເຕສຸ ວີສຕິວສ຺ສານິ ປຣິປຸຓ຺ຓານິ ນາມ ໂຫນ຺ຕີ’’ຕິ. ຕສ຺ມາຕິ ຍສ຺ມາ ຄພ຺ຠມາສາປິ ຄຓນູປຄາ ໂຫນ຺ຕິ, ຕສ຺ມາ. ເອກວີສຕິວສ຺ໂສ ໂຫຕີຕິ ຊາຕທິວສໂຕ ປຏ຺ຐາຍ ວີສຕິວສ຺ໂສ ສມາໂນ ຄພ຺ຠມາເສຫິ ສທ຺ຘິໍ ເອກວີສຕິວສ຺ໂສ ໂຫຕິ.

໔໐໖. ອຎ຺ຎໍ ອຸປສມ຺ປາເທຕີຕິ ອຸປຊ຺ຌາໂຍ ກມ຺ມວາຈາຈຣິໂຍ ວາ ຫຸຕ຺ວາ ອຸປສມ຺ປາເທຕິ. ເສສເມຕ຺ຖ ອຸຕ຺ຕານເມວ. ອູນວີສຕິວສ຺ສຕາ, ອູນກສຎ຺ຎິຕາ, ອຸປສມ຺ປາທນນ຺ຕິ ອິມານິ ປເນຕ຺ຖ ຕີຓິ ອງ຺ຄານິ.

ອູນວີສຕິວສ຺ສສິກ຺ຂາປທວຓ຺ຓນາ ນິຏ຺ຐິຕາ.