ຠິກ຺ຂຸນີວິຠງ຺ໂຄ

໑໗໐. ຠິກ຺ຂູນໍ ປາຏວຕ຺ຖາຍ, ວິນຍສ຺ສ ວິນິຈ຺ຉເຍ;

ຠິກ຺ຂຸນີນໍ ວິຠງ຺ໂຄປິ, ກິຎ຺ຈິມຕ຺ຕໍ ຠຓາມຫໍ.

໑໗໑. ອວສ຺ສຸຕສ຺ສ ໂປສສ຺ສ, ຠິກ຺ຂຸນີປິ ອວສ຺ສຸຕາ;

ນນ຺ທນ຺ຕີ ກາຍສໍສຄ຺ຄໍ, ກຕິ ອາປຕ຺ຕິໂຍ ຜຸເສ;

໑໗໒. ຕິສ຺ໂສ ອາປຕ຺ຕິໂຍ ອຸພ຺ຠ-ຊາຓຸສ຺ສາຘກ຺ຂກສ຺ສ ຈ;

ໂຫຕິ ປາຣາຊິກໍ ຕສ຺ສາ, ຄຫຓໍ ສາທິຍນ຺ຕິຍາ.

໑໗໓. ອຸພ຺ຠກ຺ຂກໍ ອໂຘຊາຓຸ-ຄຫຓໍ ສາທິຍນ຺ຕິຍາ;

ຖຸລ຺ລຈ຺ຈຍໍ ສິຍາ, ກາຍ-ປຏິພທ຺ເຘ ຕຸ ທຸກ຺ກຏໍ.

໑໗໔. ຉາເທນ຺ຕີ ຠິກ຺ຂຸນີ ວຊ຺ຊໍ, ຕິສ຺ໂສ ອາປຕ຺ຕິໂຍ ຜຸເສ;

ຊານໍ ປາຣາຊິກໍ ຘມ຺ມໍ, ຉາເທນ຺ຕີ ສາ ປຣາຊິກາ.

໑໗໕. ຖຸລ຺ລຈ຺ຈຍໍ ເວມຕິກາ, ປຏິຈ຺ຉາເທຕິ ເຈ ປນ;

ອຖາຈາຣວິປຕ຺ຕິໍ ເຈ, ປຏິຈ຺ຉາເທຕິ ທຸກ຺ກຏໍ.

໑໗໖. ນິສ຺ສຊ຺ຊນ຺ຕີ ນ ຕໍ ລທ຺ຘິໍ, ອຸກ຺ຂິຕ຺ຕສ຺ສານຸວຕ຺ຕິກາ;

ສມນຸຠາສນາເຍວ, ຕິສ຺ໂສ ອາປຕ຺ຕິໂຍ ຜຸເສ.

໑໗໗. ຎຕ຺ຕິຍາ ທຸກ຺ກຏໍ, ທ຺ວີຫິ, ກມ຺ມວາຈາຫິ ຖຸລ຺ລຕາ;

ກມ຺ມວາຈາຍ ໂອສາເນ, ປາຣາຊິກມຸທີຣິຕໍ.

໑໗໘. ປູເຣນ຺ຕີ ອຏ຺ຐມໍ ວຕ຺ຖຸໍ, ຕິສ຺ໂສ ອາປຕ຺ຕິໂຍ ຜຸເສ;

ປຸຣິເສນິຘາຄຈ຺ຉາຕິ, ວຸຕ຺ຕາຄຈ຺ຉຕິ ທຸກ຺ກຏໍ.

໑໗໙. ຖຸລ຺ລຈ຺ຈຍໍ ຕຸ ໂປສສ຺ສ, ຫຕ຺ຖປາສປ຺ປເວສເນ;

ປູເຣນ຺ຕີ ອຏ຺ຐມໍ ວຕ຺ຖຸໍ, ສມຓີ ສາ ປຣາຊິຕາ.

ປາຣາຊິກກຖາ.

໑໘໐. ອຸສ຺ສຍວາທິກາ ອຏ຺ຏໍ, ກໂຣນ຺ຕີ ຕິວິຘໍ ຜຸເສ;

ເອກສ຺ສາໂຣຈເນ ຕສ຺ສາ, ໂຫຕິ ອາປຕ຺ຕິ ທຸກ຺ກຏໍ.

໑໘໑. ທຸຕິຍາໂຣຈເນ ຕສ຺ສາ, ຖຸລ຺ລຈ຺ຈຍມຸທີຣິຕໍ;

ອຏ຺ຏສ຺ສ ປຣິໂຍສາເນ, ໂຫຕິ ສງ຺ຆາທິເສສຕາ.

໑໘໒. ໂຈຣິວຸຏ຺ຐາປິກາ ວາປິ, ຎຕ຺ຕິຍາ ທຸກ຺ກຏໍ ຜຸເສ;

ທ຺ວີຫິ ຖຸລ຺ລຈ຺ຈຍໍ ກມ຺ມ-ວາໂຈສາເນ ຄຣຸໍ ສິຍາ.

໑໘໓. ເອກາ ຄາມນ຺ຕຣໍ ຄຈ຺ເຉ, ຄມເນ ທຸກ຺ກຏໍ ສິຍາ;

ປຣິກ຺ເຂເປ ອຕິກ຺ກນ຺ເຕ, ປາເທນ ປຐເມນ ຕຸ.

໑໘໔. ໂຫຕິ ຖຸລ຺ລຈ຺ຈຍາປຕ຺ຕິ, ຕສ຺ສາ ສມຓິຍາ ປນ;

ທຸຕິເຍນ ອຕິກ຺ກນ຺ເຕ, ຄຣຸເກ ປນ ຕິຏ຺ຐຕິ.

໑໘໕. ຈຕຸຕ຺ເຖ ທຸຕິເຍ ວຸຕ຺ຕ-ສທິໂສວ ວິນິຈ຺ຉໂຍ;

ອາປຕ຺ຕີນໍ ປເຠເທ ຕຸ, ກາຈິ ນຕ຺ຖິ ວິເສສຕາ.

໑໘໖. ອວສ຺ສຸຕາ ສຍໍ ຫຸຕ຺ວາ, ຕາທິສສ຺ເສວ ຫຕ຺ຖໂຕ;

ຄເຫຕ຺ວາ ປນ ຠຸຎ຺ຊນ຺ຕີ, ໂຠຊນາທີສຸ ກິຎ຺ຈິປິ.

໑໘໗. ຜຸເສ ອາປຕ຺ຕິໂຍ ຕິສ຺ໂສ, ໂຠຊນາທີສຸ ກິຎ຺ຈິປິ;

ປຏິຄ຺ຄຓ຺ຫນ຺ຕິຍາ ຕສ຺ສາ, ໂຫຕິ ຖຸລ຺ລຈ຺ຈຍໍ ປນ.

໑໘໘. ອຊ຺ໂຌຫາເຣສຸ ສພ຺ເພສຸ, ໂຫຕິ ສງ຺ຆາທິເສສຕາ;

ອຸທກໍ ທນ຺ຕໂປນໍ ວາ, ປຏິຄ຺ຄຓ຺ຫາຕິ ທຸກ຺ກຏໍ.

໑໘໙. ‘‘ສຫຕ຺ເຖນ ຄເຫຕ຺ວາ ຕ຺ວໍ, ຂາທ ວາ ຠຸຎ຺ຊ ວາ’’ຕິປິ;

ອຸຍ຺ໂຍເຊນ຺ຕີ ປເນວໍ ຕຸ, ຕິສ຺ໂສ ອາປຕ຺ຕິໂຍ ຜຸເສ.

໑໙໐. ທຸກ຺ກຏໍ ວຈເນ ຕສ຺ສາ, ‘‘ຠຸຎ຺ຊິສ຺ສາມີ’’ຕິ ຄຓ຺ຫຕິ;

ອຊ຺ໂຌຫາເຣສຸ ສພ຺ເພສຸ, ຕສ຺ສາ ຖຸລ຺ລຈ຺ຈຍໍ ສິຍາ.

໑໙໑. ໂຠຊນສ຺ສ ປໂນສາເນ, ໂຫຕິ ສງ຺ຆາທິເສສຕາ;

ອຸຍ຺ໂຍເຊຕິ ຈ ຍາ ຕສ຺ສາ, ອິມາ ຕິສ຺ໂສຕິ ທີປເຍ.

໑໙໒. ສຕ຺ຕເມ ອຏ຺ຐເມ ຈາປິ, ນວເມ ທສເມປິ ຈ;

ໂຈຣິວຸຏ຺ຐາປເນເນວ, ສມາໂນວ ວິນິຈ຺ຉໂຍ.

ສງ຺ຆາທິເສສກຖາ.

໑໙໓. ປຕ຺ຕສນ຺ນິຈຍໍ ຍິຫ, ກໂຣນ຺ຕີ ຠິກ຺ຂຸນີ ປນ;

ເອກໍ ນິສ຺ສຄ຺ຄິຍໍເຍວ, ຜຸເສ ປາຈິຕ຺ຕິຍໍ ຕຸ ສາ.

໑໙໔. ອກາລຈີວຣໍ ກາລ-ຈີວຣໍ ຠາຊາເປນ຺ຕິຍາ;

ປໂຍເຄ ທຸກ຺ກຏໍ ວຸຕ຺ຕໍ, ລາເຠ ນິສ຺ສຄ຺ຄິຍໍ ສິຍາ.

໑໙໕. ຈີວຣໍ ປຣິວຕ຺ເຕຕ຺ວາ, ອຈ຺ຉິນ຺ທຕິ ສເຈ ປນ;

ປໂຍເຄ ທຸກ຺ກຏໍ, ຉິນ຺ເນ, ຕສ຺ສາ ນິສ຺ສຄ຺ຄິຍໍ ສິຍາ.

໑໙໖. ວິຎ຺ຎາເປຕ຺ວາວ ອຎ຺ຎໍ ເຈ, ວິຎ຺ຎາເປຕິ ຕໂຕ ປຣໍ;

ປໂຍເຄ ທຸກ຺ກຏໍ, ວິຎ຺ຎາ-ປິເຕ ນິສ຺ສຄ຺ຄິຍໍ ສິຍາ.

໑໙໗. ເຈຕາເປຕ຺ວາ ຫິ ອຎ຺ຎໍ ເຈ, ເຈຕາເປຕິ ຕໂຕ ປຣໍ;

ປໂຍເຄ ທຸກ຺ກຏໍ, ເຈຕາ-ປິເຕ ນິສ຺ສຄ຺ຄິຍໍ ສິຍາ.

໑໙໘. ເອວເມວ ຈ ເສເສສຸ, ຉຏ຺ຐາທີສຸ ຈ ສຕ຺ຕສຸ;

ອນນ຺ຕຣສມາໂນວ, ອາປຕ຺ຕີນໍ ວິນິຈ຺ຉໂຍ.

ນິສ຺ສຄ຺ຄິຍກຖາ.

໑໙໙. ລສຸຓໍ ຂາທຕິ ທ຺ເວ ເຈ, ທຸກ຺ກຏໍ ຄຫເຓ ສິຍາ;

ອຊ຺ໂຌຫາຣປໂຍເຄສຸ, ປາຈິຕ຺ຕິ ປຣິຍາປຸຕາ.

໒໐໐. ສໍຫຣາເປນ຺ຕິຍາ ໂລມໍ, ສມ຺ພາເຘ ທ຺ເວວ ໂຫນ຺ຕິ ຫິ;

ປໂຍເຄ ທຸກ຺ກຏໍ ວຸຕ຺ຕໍ, ໂຫຕິ ປາຈິຕ຺ຕິ ສໍຫເຏ.

໒໐໑. ກໂຣນ຺ຕີ ຕລຆາຕໍ ຕຸ, ທ຺ເວ ປນາປຕ຺ຕິໂຍ ຜຸເສ;

ປໂຍເຄ ທຸກ຺ກຏໍ ໂຫຕິ, ກເຕ ປາຈິຕ຺ຕິຍໍ ສິຍາ.

໒໐໒. ຊຕຸນາ ມຏ຺ຐກໍ ກິຎ຺ຈິ, ສາທິຍນ຺ຕີ ທຸເວ ຜຸເສ;

ປໂຍເຄ ທຸກ຺ກຏາທິນ຺ເນ, ຕສ຺ສາ ປາຈິຕ຺ຕິຍໍ ສິຍາ.

໒໐໓. ປຎ຺ຈມໍ ຕຸ ຈຕຸຕ຺ເຖນ, ສມານມິຕິ ທີປເຍ;

ອາປຕ຺ຕີນໍ ວິຠາຄສ຺ມິໍ, ວິເສໂສ ນຕ຺ຖິ ໂກຈິປິ.

໒໐໔. ຠິກ຺ຂຸສ຺ສ ຠຸຎ຺ຊມານສ຺ສ, ປານີເຍນຸປຕິຏ຺ຐຕິ;

ຫຕ຺ຖປາເສ ຕຸ ປາຈິຕ຺ຕິ, ຫິຕ຺ວາ ຕິຏ຺ຐຕິ ທຸກ຺ກຏໍ.

໒໐໕. ວິຎ຺ຎາເປຕ຺ວາມກໍ ຘຎ຺ຎໍ, ‘‘ຠຸຎ຺ຊິສ຺ສາມີ’’ຕິ ຄຓ຺ຫຕິ;

ທຸກ຺ກຏໍ ໂຫຕິ ປາຈິຕ຺ຕິ, ອຊ຺ໂຌຫາເຣສຸ ທີປເຍ.

໒໐໖. ອຸຈ຺ຈາຣາທິໍ ຕິໂຣກຸຏ຺ເຏ, ຉຑ຺ເຑນ຺ຕີ ທ຺ເວ ຜຸເສ ຫເວ;

ປໂຍເຄ ທຸກ຺ກຏໍ ວຸຕ຺ຕໍ, ປາຈິຕ຺ຕິ ຉຑ຺ຑິເຕ ສິຍາ.

໒໐໗. ອຸຈ຺ຈາຣາທິຈຕຸກ຺ກໍ ຕຸ, ຉຑ຺ເຑຕິ ຫຣິເຕ ສເຈ;

ປໂຍເຄ ທຸກ຺ກຏໍ ຕສ຺ສາ, ປາຈິຕ຺ຕິ ຉຑ຺ຑິເຕ ສິຍາ.

໒໐໘. ນຈ຺ຈາທິໍ ທສ຺ສນຕ຺ຖາຍ, ສເຈ ຄຈ຺ຉຕິ ທຸກ຺ກຏໍ;

ປສ຺ສນ຺ຕິຍາປິ ປາຈິຕ຺ຕິ, ຕເຖວ ຈ ສຸຓນ຺ຕິຍາ.

ລສຸຓວຄ຺ໂຄ ປຐໂມ.

໒໐໙. ປຐເມ ທຸຕິເຍ ເຈວ, ຕຕິເຍ ຈ ຈຕຸຕ຺ຖເກ;

ຕຸລ຺ໂຍ ລສຸຓວຄ຺ຄສ຺ສ, ຉຏ຺ເຐນິຘ ວິນິຈ຺ຉໂຍ.

໒໑໐. ກຸລານິ ອຸປສງ຺ກມ຺ມ, ນິສີທິຕ຺ວາ ປນາສເນ;

ສາມິເກ ຕຸ ອນາປຸຈ຺ຉາ, ປກ຺ກມນ຺ຕີ ທຸເວ ຜຸເສ.

໒໑໑. ປຐເມນ ຈ ປາເທນ, ອໂນວສ຺ສມຕິກ຺ກເມ;

ທຸກ຺ກຏໍ ໂຫຕິ, ປາຈິຕ຺ຕິ, ທຸຕິຍາຕິກ຺ກເມ ສິຍາ.

໒໑໒. ສາມິເກ ຕຸ ອນາປຸຈ຺ຉາ, ອາສເນ ເຈ ນິສີທຕິ;

ປໂຍເຄ ທຸກ຺ກຏໍ ໂຫຕິ, ປາຈິຕ຺ຕິ ຈ ນິສີທິເຕ.

໒໑໓. ຉຏ຺ເຐນ ສຕ຺ຕມໍ ສພ຺ພໍ, ສມານໍ ອຏ຺ຐເມ ປນ;

ປໂຍເຄ ທຸກ຺ກຏໍ, ອຸຊ຺ຌາ-ປິເຕ ປາຈິຕ຺ຕິຍໍ ສິຍາ.

໒໑໔. ອຕ຺ຕານໍ ຈາຠິສປ຺ເປນ຺ຕີ, ທ຺ເວ ຜຸເສ ນິຣຍາທິນາ;

ປໂຍເຄ ທຸກ຺ກຏໍ ວຸຕ຺ຕໍ, ປາຈິຕ຺ຕິ ອຠິສປ຺ປິເຕ.

໒໑໕. ວຘິຕ຺ວາ ປນ ອຕ຺ຕານໍ, ໂຣທນ຺ຕີ ຕຸ ທຸເວ ຜຸເສ;

ວຘຕິ ໂຣທຕິ ປາຈິຕ຺ຕິ, ກໂຣເຕກໍ ຕຸ ທຸກ຺ກຏໍ.

ຣຕ຺ຕນ຺ຘກາຣວຄ຺ໂຄ ທຸຕິໂຍ.

໒໑໖. ນຄ຺ຄາ ນ຺ຫາຍຕິ ທ຺ເວ ເຈວ, ປໂຍເຄ ທຸກ຺ກຏໍ ສິຍາ;

ນ຺ຫານສ຺ສ ປຣິໂຍສາເນ, ຕສ຺ສາ ປາຈິຕ຺ຕິຍໍ ສິຍາ.

໒໑໗. ກາຣາເປຕິ ປມາຓາຕິ-ກ຺ກນ຺ຕໍ ອຸທກສາຏິກໍ;

ປໂຍເຄ ທຸກ຺ກຏໍ, ກາຣາ-ປິເຕ ປາຈິຕ຺ຕິຍໍ ສິຍາ.

໒໑໘. ຈີວຣໍ ຕຸ ວິສິພ຺ເພຕ຺ວາ, ວິສິພ຺ພາເປຕ຺ວ ວາ ປນ;

ເນວ ສິພ຺ພນ຺ຕິຍາ ວຸຕ຺ຕ-ເມກໍ ປາຈິຕ຺ຕິຍໍ ປນ.

໒໑໙. ປຎ຺ຈາຫິກໍ ຕຸ ສງ຺ຆາຏິ-ຈາຣໍ ປນ ອຕິກ຺ກເມ;

ເອກາວສ຺ສາ ປນາປຕ຺ຕິ, ປາຈິຕ຺ຕິ ປຣິທີປິຕາ.

໒໒໐. ສເຈ ສງ຺ກມນີຍໍ ຕຸ, ຘາເຣຕິ ປນ ຈີວຣໍ;

ປໂຍເຄ ທຸກ຺ກຏໍ ວຸຕ຺ຕໍ, ປາຈິຕ຺ຕິ ປນ ຘາຣິເຕ.

໒໒໑. ຄຓຈີວຣລາຠສ຺ສ, ອນ຺ຕຣາຍໍ ກໂຣຕິ ເຈ;

ປໂຍເຄ ທຸກ຺ກຏໍ ໂຫຕິ, ກເຕ ປາຈິຕ຺ຕິຍໍ ສິຍາ.

໒໒໒. ວິຠງ຺ຄໍ ປຏິພາຫນ຺ຕີ, ຈີວຣານໍ ຕຸ ຘມ຺ມິກໍ;

ປໂຍເຄ ທຸກ຺ກຏໍ ວຸຕ຺ຕໍ, ປາຈິຕ຺ຕິ ປຏິພາຫິເຕ.

໒໒໓. ອຄາຣິກາທິໂນ ເທຕິ, ສເຈ ສມຓຈີວຣໍ;

ປໂຍເຄ ທຸກ຺ກຏໍ, ທິນ຺ເນ, ປາຈິຕ຺ຕິ ປຣິຍາປຸຕາ.

໒໒໔. ຈີວເຣ ທຸພ຺ພລາສາຍ, ກາລໍ ເຈ ສມຕິກ຺ກເມ;

ປໂຍເຄ ທຸກ຺ກຏໍ ວຸຕ຺ຕໍ, ປາຈິຕ຺ຕິ ສມຕິກ຺ກເມ.

໒໒໕. ຘມ຺ມິກໍ ກຖິນຸທ຺ຘາຣໍ, ປຏິພາຫນ຺ຕິຍາ ທຸເວ;

ປໂຍເຄ ທຸກ຺ກຏໍ ໂຫຕິ, ປາຈິຕ຺ຕິ ປຏິພາຫິເຕ.

ນ຺ຫານວຄ຺ໂຄ ຕຕິໂຍ.

໒໒໖. ທຸເວ ຠິກ຺ຂຸນິໂຍ ເອກ-ມຎ຺ຈສ຺ມິໍ ເຈ ຕຸວຏ຺ເຏຍ຺ຍຸໍ;

ປໂຍເຄ ທຸກ຺ກຏໍ ຕາສໍ, ນິປນ຺ເນ ອິຕຣໍ ສິຍາ.

໒໒໗. ທຸຕິຍໍ ປຐເມເນວ, ສທິສໍ ຕຕິເຍ ປນ;

ປໂຍເຄ ທຸກ຺ກຏໍ ໂຫຕິ, ກເຕ ປາຈິຕ຺ຕິຍໍ ສິຍາ.

໒໒໘. ນຸປຏ຺ຐາເປນ຺ຕິຍາ ວາປິ, ທຸກ຺ຂິຕໍ ສຫຊີວິນິໍ;

ເອກາເຍວ ປນາປຕ຺ຕິ, ປາຈິຕ຺ຕິ ປຣິທີປິຕາ.

໒໒໙. ສເຈ ອຸປສ຺ສຍໍ ທຕ຺ວາ, ນິກ຺ກຑ຺ຒຕິ ຈ ຠິກ຺ຂຸນິໍ;

ປໂຍເຄ ທຸກ຺ກຏໍ ຕສ຺ສາ, ໂຫຕິ ປາຈິຕ຺ຕິ ກຑ຺ຒິເຕ.

໒໓໐. ຉຏ຺ເຐ ປນ ຈ ສໍສຏ຺ຐາ, ຎຕ຺ຕິຍາ ທຸກ຺ກຏໍ ຜຸເສ;

ກມ຺ມວາຈາຍ ໂອສາເນ, ປາຈິຕ຺ຕິ ປຣິທີປິຕາ.

໒໓໑. ອນ຺ໂຕຣຏ຺ເຐ ຕຸ ສາສງ຺ເກ, ຈາຣິກໍ ຕຸ ຈຣນ຺ຕິຍາ;

ປໂຍເຄ ທຸກ຺ກຏໍ ວຸຕ຺ຕໍ, ປຏິປນ຺ນາຍ ເສສກໍ.

໒໓໒. ອຏ຺ຐມໍ ນວມຎ຺ເຈວ, ສຕ຺ຕເມນ ສມໍ ມຕໍ;

ທສເມ ປນ ເອກາວ, ປາຈິຕ຺ຕິ ປຣິທີປິຕາ.

ຕຸວຏ຺ຏວຄ຺ໂຄ ຈຕຸຕ຺ໂຖ.

໒໓໓. ຣາຊາຄາຣາທິກໍ ສພ຺ພໍ, ທສ຺ສນຕ຺ຖາຍ ຄຈ຺ຉຕິ;

ປໂຍເຄ ທຸກ຺ກຏໍ ຕສ຺ສາ, ປາຈິຕ຺ຕິ ຍທິ ປສ຺ສຕິ.

໒໓໔. ອາສນ຺ທິໍ ວາປິ ປລ຺ລງ຺ກໍ, ປຣິຠຸຎ຺ຊນ຺ຕິຍາ ທຸເວ;

ປໂຍເຄ ທຸກ຺ກຏໍ ວຸຕ຺ຕໍ, ຠຸຕ຺ເຕ ປາຈິຕ຺ຕິຍໍ ສິຍາ.

໒໓໕. ສຸຕ຺ຕໍ ກນ຺ຕນ຺ຕິຍາ ທ຺ເວວ, ປໂຍເຄ ທຸກ຺ກຏໍ ມຕໍ;

ອຸຊ຺ຊວຸຊ຺ຊວເນ ຕສ຺ສາ, ປາຈິຕ຺ຕິ ສມຸທາຫເຣ.

໒໓໖. ເວຍ຺ຍາວຈ຺ຈໍ ຄິຫີນໍ ຕຸ, ທ຺ເວວ ໂຫນ຺ຕິ ກໂຣນ຺ຕິຍາ;

ປໂຍເຄ ທຸກ຺ກຏໍ ວຸຕ຺ຕໍ, ກເຕ ປາຈິຕ຺ຕິຍໍ ສິຍາ.

໒໓໗. ປຎ຺ຈເມ ປນ ເອກາວ, ປາຈິຕ຺ຕິ ປຣິທີປິຕາ;

ປໂຍເຄ ທຸກ຺ກຏໍ ຉຏ຺ເຐ, ທິນ຺ເນ ປາຈິຕ຺ຕິຍໍ ສິຍາ.

໒໓໘. ສຕ຺ຕມໍ ທຸຕິເຍເນວ, ສມາປຕ຺ຕິປເຠທໂຕ;

ອຏ຺ຐມໍ ທຸຕິເຍ ວຄ຺ເຄ, ປຎ຺ຈເມນ ສມໍ ມຕໍ.

໒໓໙. ຕິຣຈ຺ຉານຄຕໍ ວິຊ຺ຊໍ, ທ຺ເວວ ໂຫນ຺ຕິ ປຐນ຺ຕິຍາ;

ປໂຍເຄ ທຸກ຺ກຏໍ ໂຫຕິ, ປາຈິຕ຺ຕິ ຫິ ປເທ ປເທ.

໒໔໐. ທສມໍ ນວເມເນວ, ສມານໍ ສພ຺ພຖາ ປນ;

‘‘ປຣິຍາປຸຓາຕິ, ວາເຈຕິ’’, ປທມຕ຺ຕໍ ວິເສສກໍ.