ມຫາວິຠງ຺ຄສງ຺ຄຫກຖາ

໔. ເມຖຸນໍ ປຏິເສວນ຺ໂຕ, ກຕິ ອາປຕ຺ຕິໂຍ ຜຸເສ;

ເມຖຸນໍ ປຏິເສວນ຺ໂຕ, ຕິສ຺ໂສ ອາປຕ຺ຕິໂຍ ຜຸເສ.

໕. ຠເວ ປາຣາຊິກໍ ເຂຕ຺ເຕ, ເຍຠຸຍ຺ຍກ຺ຂາຍິເຕ ປນ;

ຖຸລ຺ລຈ຺ຈຍໍ ມຸເຂ ວຏ຺ຏ-ກເຕ ວຸຕ຺ຕໍ ຕຸ ທຸກ຺ກຏໍ.

໖. ອທິນ຺ນໍ ອາທິຍນ຺ໂຕ ໂຍ;

ກຕິ ອາປຕ຺ຕິໂຍ ຜຸເສ;

ອທິນ຺ນໍ ອາທິຍນ຺ໂຕ ໂສ;

ຕິສ຺ໂສ ອາປຕ຺ຕິໂຍ ຜຸເສ.

໗. ປຎ຺ຈມາສຄ຺ຆເນ ວາປິ, ອຘິເກ ວາ ປຣາຊໂຍ;

ມາເສ ວາ ທຸກ຺ກຏໍ ອູເນ, ມຊ຺ເຌ ຖຸລ຺ລຈ຺ຈຍໍ ຕໂຕ.

໘. ມນຸສ຺ສຊາຕິໍ ມາເຣນ຺ໂຕ;

ກຕິ ອາປຕ຺ຕິໂຍ ຜຸເສ;

ມນຸສ຺ສຊາຕິໍ ມາເຣນ຺ໂຕ;

ຕິສ຺ໂສ ອາປຕ຺ຕິໂຍ ຜຸເສ.

໙. ມນຸສ຺ສມຸທ຺ທິສ຺ໂສປາຕໍ, ຂຓເນ ທຸກ຺ກຏໍ ສິຍາ;

ທຸກ຺ເຂ ຖຸລ຺ລຈ຺ຈຍໍ ຊາເຕ, ມເຕ ປາຣາຊິກໍ ສິຍາ.

໑໐. ອສນ຺ຕໍ ອຸຕ຺ຕຣິໍ ຘມ຺ມໍ, ວທມຕ຺ຕູປນາຍິກໍ;

ກຕິ ອາປຊ຺ຊຕາປຕ຺ຕີ? ຕິສ຺ໂສ ອາປຕ຺ຕິໂຍ ຜຸເສ.

໑໑. ອສນ຺ຕໍ ອຸຕ຺ຕຣິໍ ຘມ຺ມໍ, ຠຓນ຺ຕສ຺ສ ປຣາຊໂຍ;

ຖຸລ຺ລຈ຺ຈຍໍ ປຣິຍາເຍ, ຎາເຕ, ໂນ ເຈ ຕຸ ທຸກ຺ກຏໍ.

ປາຣາຊິກກຖາ.

໑໒. ຠຓ ສຸກ຺ກໍ ວິໂມເຈນ຺ໂຕ;

ກຕິ ອາປຕ຺ຕິໂຍ ຜຸເສ;

ສຸຓ ສຸກ຺ກໍ ວິໂມເຈນ຺ໂຕ;

ຕິສ຺ໂສ ອາປຕ຺ຕິໂຍ ຜຸເສ.

໑໓. ຄຣຸກໍ ຍທິ ເຈເຕຕິ, ອຸປກ຺ກມຕິ ມຸຈ຺ຈຕິ;

ທ຺ວງ຺ເຄ ຖຸລ຺ລຈ຺ຈຍໍ ວຸຕ຺ຕໍ, ປໂຍເຄ ທຸກ຺ກຏໍ ສິຍາ.

໑໔. ອິໂຕ ປຏ຺ຐາຍ ມຸຎ຺ຈິຕ຺ວາ, ປຎ຺ຫາປຸຈ຺ຉນມຕ຺ຕກໍ;

ວິສ຺ສຊ຺ຊນວເສເນວ, ໂຫຕິ ອຕ຺ຖວິນິຈ຺ຉໂຍ.

໑໕. ອິຕ຺ຖິຍາ ກາຍສໍສຄ຺ເຄ, ຕິສ຺ໂສ ອາປຕ຺ຕິໂຍ ຜຸເສ;

ອາມສນ຺ຕສ຺ສ ກາເຍນ, ກາຍໍ ຕຸ ຄຣຸກໍ ສິຍາ.

໑໖. ກາເຍນ ກາຍພທ຺ຘໍ ຕຸ, ຜຸສໍ ຖຸລ຺ລຈ຺ຈຍໍ ຜຸເສ;

ປຏິພທ຺ເຘນ ກາເຍນ, ປຏິພທ຺ເຘ ຕຸ ທຸກ຺ກຏໍ.

໑໗. ອິຕ຺ຖິໍ ທຸຏ຺ຐຸລ຺ລວາຈາຫິ, ຕິສ຺ໂສ ໂອຠາສໂຕ ສິຍຸໍ;

ວຓ຺ຓາວຓ຺ຓໍ ວທໍ ທ຺ວິນ຺ນໍ, ມຄ຺ຄານໍ ຄຣຸກໍ ຜຸເສ.

໑໘. ວຓ຺ຓາທິຠຎ຺ເຎ ອາທິສ຺ສ, ອຸພ຺ຠຊາຓຸມຘກ຺ຂກໍ;

ໂຫຕິ ຖຸລ຺ລຈ຺ຈຍໍ, ກາຍ-ປຏິພທ຺ເຘ ຕຸ ທຸກ຺ກຏໍ.

໑໙. ອຕ຺ຕກາມຈຣິຍາຍ, ວທໂຕ ວຓ຺ຓມິຕ຺ຖິຍາ;

ສນ຺ຕິເກ ຄຣຸກໍ ໂຫຕິ, ສເຈ ຊານາຕິ ສາ ປນ.

໒໐. ສນ຺ຕິເກ ປຓ຺ຑກສ຺ສາປິ, ຕສ຺ສ ຖຸລ຺ລຈ຺ຈຍໍ ສິຍາ;

ຕິຣຈ຺ຉານຄຕສ຺ສາປິ, ສນ຺ຕິເກ ທຸກ຺ກຏໍ ມຕໍ.

໒໑. ປຏິຄ຺ຄຓ຺ຫນວີມໍສາ, ປຈ຺ຈາຫຣຓກຕ຺ຕິເກ;

ສຎ຺ຈຣິຕ຺ຕໍ ສມາປນ຺ເນ, ຄຣຸກໍ ນິທ຺ທິເສ ພຸໂຘ.

໒໒. ຕສ຺ສ ທ຺ວງ຺ຄສມາໂຍເຄ, ໂຫຕິ ຖຸລ຺ລຈ຺ຈຍໍ ຕຖາ;

ອງ຺ເຄ ສຕິ ປເນກສ຺ມິໍ, ໂຫຕິ ອາປຕ຺ຕິ ທຸກ຺ກຏໍ.

໒໓. ສໍຍາຈິກາຍ ຈ ກຸຏິໍ;

ວິຫາຣຎ຺ຈ ມຫລ຺ລກໍ;

ກາຣາເປຕິ ສເຈ ຠິກ຺ຂຸ;

ຕິສ຺ໂສ ອາປຕ຺ຕິໂຍ ຜຸເສ.

໒໔. ປໂຍເຄ ທຸກ຺ກຏໍ ວຸຕ຺ຕໍ, ເອກປິຓ຺ເຑ ອນາຄເຕ;

ໂຫຕິ ຖຸລ຺ລຈ຺ຈຍໍ, ຕສ຺ມິໍ, ປິຓ຺ເຑ ຄຣຸກມາຄເຕ.

໒໕. ປາຣາຊິເກນ ຘມ຺ເມນ, ຠິກ຺ຂຸໍ ອມູລເກນິຘ;

ອນຸທ຺ຘໍເສຕິ ໂຍ ຕສ຺ສ, ຕິສ຺ໂສ ອາປຕ຺ຕິໂຍ ສິຍຸໍ.

໒໖. ໂອກາສໍ ນ ຈ ກາເຣຕ຺ວາ, ຫຸຕ຺ວາ ຈາວນເຈຕໂນ;

ສເຈ ໂຈເທຕິ ສງ຺ຆາທິ-ເສເສນ ສຫ ທຸກ຺ກຏໍ.

໒໗. ໂອກາສໍ ປນ ກາເຣຕ຺ວາ, ຫຸຕ຺ວາ ອກ຺ໂກສເຈຕໂນ;

ໂຈເທຕິ ໂອມສວາເທ, ປາຈິຕ຺ຕິໍ ປຣິທີປເຍ.

໒໘. ອນນ຺ຕຣສມາໂນວ, ນວເມ ອຎ຺ຎຠາຄິເຍ;

ສພ຺ໂພ ອາປຕ຺ຕິເຠໂທ ຫິ, ນຕ຺ຖິ ກາຈິ ວິເສສຕາ.

໒໙. ສງ຺ຆສ຺ສ ເຠທໂກ ຠິກ຺ຂຸ, ຍາວຕຕິຍກໍ ປນ;

ສມນຸຠາສນາເຍວ, ຄາຫໍ ນ ປຏິນິສ຺ສຊໍ.

໓໐. ຎຕ຺ຕິຍາ ທຸກ຺ກຏໍ, ທ຺ວີຫິ, ກມ຺ມວາຈາຫິ ຖຸລ຺ລຕໍ;

ກມ຺ມວາຈາຍ ໂອສາເນ, ອາປຕ຺ຕິ ຄຣຸກໍ ສິຍາ.

໓໑. ເຠທານຸວຕ຺ຕເກ ເຈວ, ທຸພ຺ພເຈ ກຸລທູສເກ;

ສງ຺ຆເຠທກຕຸລ຺ໂຍວ, ໂຫຕິ ອາປຕ຺ຕິນິຈ຺ຉໂຍ.

ສງ຺ຆາທິເສສກຖາ.

໓໒. ອຕິກ຺ກມນ຺ໂຕ ອຕິເຣກຈີວຣໍ;

ທສາຫມາປຊ຺ຊຕິ ເອກເມວ;

ນິສ຺ສຄ຺ຄິປາຈິຕ຺ຕິຍເມກຣຕ຺ຕິໍ;

ຕິຈີວເຣນາປິ ວິນາ ວສນ຺ໂຕ.

໓໓. ມາສໍ ອຕິກ຺ກມນ຺ໂຕ ຫິ, ຄເຫຕ຺ວາ ກາລຈີວຣໍ;

ເອກໍ ອາປຊ຺ຊຕາປຕ຺ຕິໍ, ນິສ຺ສຄ຺ຄິຍມຸທີຣິຕໍ.

໓໔. ອຎ຺ຎາຕິກາຍ ຍໍ ກິຎ຺ຈິ;

ປຸຣາຓຈີວຣໍ ປນ;

ໂຘວາເປຕິ ສເຈ ຕສ຺ສ;

ໂຫນ຺ຕິ ອາປຕ຺ຕິໂຍ ທຸເວ.

໓໕. ໂຘວາເປຕິ ປໂຍຄສ຺ມິໍ, ທຸກ຺ກຏໍ ສມຸທາຫຏໍ;

ນິສ຺ສຄ຺ຄິຍາວ ປາຈິຕ຺ຕິ, ໂຫຕິ ໂຘວາປິເຕ ປນ.

໓໖. ອຎ຺ຎາຕິກາຍ ຫຕ຺ຖມ຺ຫາ, ຈີວຣໍ ປຏິຄຓ຺ຫໂຕ;

ຄຫເຓ ທຸກ຺ກຏໍ ວຸຕ຺ຕໍ, ປາຈິຕ຺ຕິ ຄຫິເຕ ສິຍາ.

໓໗. ອຎ຺ຎາຕກໍ ຄຫປຕິໍ, ຄຫປຕານິເມວ ວາ;

ຈີວຣໍ ວິຎ຺ຎາເປນ຺ໂຕ ທ຺ເວ, ຠິກ຺ຂຸ ອາປຕ຺ຕິໂຍ ຜຸເສ.

໓໘. ວິຎ຺ຎາເປຕິ ປໂຍຄສ຺ມິໍ, ທຸກ຺ກຏໍ ປຣິກິຕ຺ຕິຕໍ;

ວິຎ຺ຎາປິເຕ ຈ ນິສ຺ສຄ຺ຄິ, ປາຈິຕ຺ຕິ ປຣິຍາປຸຕາ.

໓໙. ຠິກ຺ຂຸ ຈີວຣມຎ຺ຎາຕິໍ, ວິຎ຺ຎາເປນ຺ໂຕ ຕທຸຕ຺ຕຣິໍ;

ປໂຍເຄ ທຸກ຺ກຏໍ, ວິຎ຺ຎາ-ປິເຕ ນິສ຺ສຄ຺ຄິຍໍ ຜຸເສ.

໔໐. ອຎ຺ຎາຕກໍ ກຎ຺ຈິ ອຸປາສກໍ ວາ;

ອຸປາສິກໍ ວາ ອຸປສງ຺ກມິຕ຺ວາ;

ປຸພ຺ເພວ ຫຸຕ຺ວາ ປນ ອປ຺ປວາຣິໂຕ;

ວຕ຺ເຖ ວິກປ຺ປໍ ປຏິປຊ຺ຊມາໂນ.

໔໑. ທຸເວ ອາປຊ຺ຊຕາປຕ຺ຕີ, ປໂຍເຄ ທຸກ຺ກຏໍ ສິຍາ;

ວິກປ຺ປໍ ປນ ອາປນ຺ເນ, ນິສ຺ສຄ຺ຄິຍມຸທີຣິຕໍ.

໔໒. ອຎ຺ຎາຕິໍ ອຸປສງ຺ກມ຺ມ, ປຸພ຺ເພເຍວປ຺ປວາຣິໂຕ;

ວິກປ຺ປໍ ຈີວເຣ ຠິກ຺ຂຸ, ອາປຊ຺ຊນ຺ໂຕ ທຸເວ ຜຸເສ.

໔໓. ຕຖາຕິເຣກຕິກ຺ຂຕ຺ຕຸໍ, ໂຈທນາຍ ຈ ຠິກ຺ຂຸ ເຈ;

ຄນ຺ຕ຺ວາຕິເຣກຉກ຺ຂຕ຺ຕຸໍ, ຐາເນນປິ ຈ ຈີວຣໍ.

໔໔. ນິປ຺ຜາເທຕິ ສເຈ ຕສ຺ສ, ໂຫນ຺ຕິ ອາປຕ຺ຕິໂຍ ທຸເວ;

ປໂຍເຄ ທຸກ຺ກຏໍ, ຕສ຺ສ, ລາເຠ ນິສ຺ສຄ຺ຄິຍໍ ສິຍາ.

ກຖິນວຄ຺ໂຄ ປຐໂມ.

໔໕. ໂທສາ ໂກສິຍວຄ຺ຄສ຺ສ, ທ຺ເວທ຺ເວອາທີສຸ ປຎ຺ຈສຸ;

ປໂຍເຄ ທຸກ຺ກຏໍ ວຸຕ຺ຕໍ, ລາເຠ ນິສ຺ສຄ຺ຄິຍໍ ສິຍາ.

໔໖. ຄເຫຕ຺ເວຬກໂລມານິ, ຕິໂຍຊນມຕິກ຺ກມໍ;

ທຸກ຺ກຏໍ ປຐເມ ປາເທ, ນິສ຺ສຄ຺ຄິໍ ທຸຕິເຍ ຜຸເສ.

໔໗. ຠິກ຺ຂຸ ຠິກ຺ຂຸນິຍຎ຺ຎາຍ, ໂຘວາເປເຕຬໂລມກໍ;

ປໂຍເຄ ທຸກ຺ກຏໍ, ຕສ຺ສ, ໂຘເຕ ນິສ຺ສຄ຺ຄິຍໍ ສິຍາ.

໔໘. ຣູປິຍໍ ປຏິຄຓ຺ຫນ຺ໂຕ, ທ຺ເວ ປນາປຕ຺ຕິໂຍ ຜຸເສ;

ປໂຍເຄ ທຸກ຺ກຏໍ ວຸຕ຺ຕໍ, ນິສ຺ສຄ຺ຄິ ຄຫິເຕ ສິຍາ.

໔໙. ນານາກາຣໍ ສມາປຊ຺ຊໍ, ສໍໂວຫາຣຎ຺ຈ ຣູປິເຍ;

ສມາປນ຺ເນ ຈ ນິສ຺ສຄ຺ຄິໍ, ປໂຍເຄ ທຸກ຺ກຏໍ ຜຸເສ.

໕໐. ນານປ຺ປກາຣກໍ ຠິກ຺ຂຸ, ອາປຊ຺ເຊ ກຍວິກ຺ກຍໍ;

ປໂຍເຄ ທຸກ຺ກຏໍ, ຕສ຺ມິໍ, ກເຕ ນິສ຺ສຄ຺ຄິຍໍ ຜຸເສ.

ໂກສິຍວຄ຺ໂຄ ທຸຕິໂຍ.

໕໑. ປຕ຺ຕໍ ອຕິກ຺ກເມນ຺ຕສ຺ສ, ທສາຫມຕິເຣກກໍ;

ຕສ຺ສ ນິສ຺ສຄ຺ຄິຍາປຕ຺ຕິ, ໂຫຕິ ເອກາວ ຠິກ຺ຂຸໂນ.

໕໒. ອປຎ຺ຈພນ຺ຘເນ ປຕ຺ເຕ, ວິຊ຺ຊມາເນປິ ຠິກ຺ຂຸໂນ;

ອຎ຺ຎໍ ປນ ນວໍ ປຕ຺ຕໍ, ເຈຕາເປຕິ ສເຈ ປນ.

໕໓. ທ຺ເວ ປນາປຕ຺ຕິໂຍ ຠິກ຺ຂຸ, ອາປຊ຺ຊຕິ, ນ ສໍສໂຍ;

ປໂຍເຄ ທຸກ຺ກຏໍ, ຕສ຺ສ, ລາເຠ ນິສ຺ສຄ຺ຄິຍໍ ຜຸເສ.

໕໔. ປຏິຄ຺ຄເຫຕ຺ວາ ເຠສຊ຺ຊໍ, ສຕ຺ຕາຫໍ ໂຍ ອຕິກ຺ກເມ;

ເອກໍ ນິສ຺ສຄ຺ຄິຍາປຕ຺ຕິໍ, ອາປຊ຺ຊຕິ ຫິ ໂສ ປນ.

໕໕. ອກາເລ ປຣິເຍສນ຺ໂຕ, ວສ຺ສສາຏິກຈີວຣໍ;

ປໂຍເຄ ທຸກ຺ກຏໍ, ຕສ຺ສ, ລາເຠ ນິສ຺ສຄ຺ຄິຍໍ ຜຸເສ.

໕໖. ຠິກ຺ຂຸໂນ ຈີວຣໍ ທຕ຺ວາ, ອຈ຺ຉິນ຺ທນ຺ໂຕ ທຸເວ ຜຸເສ;

ປໂຍເຄ ທຸກ຺ກຏໍ ວຸຕ຺ຕໍ, ຫເຏ ນິສ຺ສຄ຺ຄິຍໍ ສິຍາ.

໕໗. ວິຎ຺ຎາເປຕ຺ວາ ສຍໍ ສຸຕ຺ຕໍ, ຕນ຺ຕວາເຍຫິ ຈີວຣໍ;

ວາຍາເປຕິ ສເຈ ຠິກ຺ຂຸ, ທ຺ເວ ປນາປຕ຺ຕິໂຍ ຜຸເສ.

໕໘. ໂຍ ປນຎ຺ຎາຕກສ຺ເສວ, ຕນ຺ຕວາເຍ ສເມຈ຺ຈ ເຈ;

ວິກປ຺ປໍ ຈີວເຣ ຠິກ຺ຂຸ, ອາປຊ຺ຊໍ ອປ຺ປວາຣິໂຕ.

໕໙. ທ຺ເວ ປນາປຕ຺ຕິໂຍ ໂສ ຫິ, ອາປຊ຺ຊຕິ, ນ ສໍສໂຍ;

ປໂຍເຄ ທຸກ຺ກຏໍ, ຕສ຺ສ, ລາເຠ ນິສ຺ສຄ຺ຄິຍໍ ສິຍາ.

໖໐. ປຏິຄ຺ຄເຫຕ຺ວາ ອຈ຺ເຈກ-ສຎ຺ຎິຕໍ ປນ ຈີວຣໍ;

ກາລໍ ອຕິກ຺ກເມນ຺ໂຕ ຕໍ, ເອກໍ ນິສ຺ສຄ຺ຄິຍໍ ຜຸເສ.

໖໑. ຕິຓ຺ຓມຎ຺ຎຕຣໍ ວຕ຺ຖໍ, ນິທຫິຕ຺ວາ ຆເຣຘິກໍ;

ຉາຣຕ຺ຕໂຕ ວິນາ ເຕນ, ວສໍ ນິສ຺ສຄ຺ຄິຍໍ ຜຸເສ.

໖໒. ຊານໍ ປຣິຓຕໍ ລາຠໍ, ສງ຺ຆິກໍ ອຕ຺ຕໂນ ປນ;

ປຣິຓາເມຕິ ເຈ ຠິກ຺ຂຸ, ທ຺ເວ ປນາປຕ຺ຕິໂຍ ຜຸເສ.

໖໓. ປໂຍເຄ ທຸກ຺ກຏໍ ໂຫຕິ, ນິສ຺ສຄ຺ຄິ ປຣິຓາມິເຕ;

ສພ຺ພຕ຺ຖ ອປ຺ປນາວາຣ-ປຣິຫານິ ກຕາ ມຍາ.

ປຕ຺ຕວຄ຺ໂຄ ຕຕິໂຍ.

ຕິໍສນິສ຺ສຄ຺ຄິຍກຖາ.

໖໔. ວທນ຺ຕສ຺ສ ມຸສາວາທໍ, ປຎ຺ຈ ອາປຕ຺ຕິໂຍ ສິຍຸໍ;

ມນຸສ຺ສຸຕ຺ຕຣິຘມ຺ເມ ຕຸ, ອຠູຕສ຺ມິໍ ປຣາຊໂຍ.

໖໕. ໂຈທນາຍ ຄຣຸໍ ຠິກ຺ຂຸໍ, ອມູລນ຺ຕິມວຕ຺ຖຸນາ;

ປຣິຍາຍວຈເນ ຎາເຕ, ຖຸລ຺ລຈ຺ຈຍມຸທີຣິຕໍ.

໖໖. ໂນ ເຈ ປຏິວິຊານາຕິ, ທຸກ຺ກຏໍ ສມຸທາຫຏໍ;

ສມ຺ປຊານມຸສາວາເທ, ປາຈິຕ຺ຕິ ປຣິທີປິຕາ.

໖໗. ອາປຕ຺ຕິໂຍ ທຸເວ ວຸຕ຺ຕາ, ຠິກ຺ຂຸສ຺ໂສມສໂຕ ປນ;

ປາຈິຕ຺ຕິ ອຸປສມ຺ປນ຺ນໍ, ທຸກ຺ກຏໍ ອິຕຣໍ ສິຍາ.

໖໘. ເປສຸຎ຺ຎຫຣເຓ ທ຺ເວປິ, ໂຫນ຺ຕິ, ປາຈິຕ຺ຕິຍໍ ປນ;