ສງ຺ຆາທິເສສກຖາ

໓໒໕. ໂມເຈຕຸກາມຕາຈິຕ຺ຕໍ, ວາຍາໂມ ສຸກ຺ກໂມຈນໍ;

ອຎ຺ຎຕ຺ຣ ສຸປິນນ຺ເຕນ, ໂຫຕິ ສງ຺ຆາທິເສສຕາ.

໓໒໖. ປເຣນຸປກ຺ກມາເປຕ຺ວາ, ອງ຺ຄຊາຕໍ ປນຕ຺ຕໂນ;

ສຸກ຺ກໍ ຍທິ ວິໂມເຈຕິ, ຄຣຸກໍ ຕສ຺ສ ນິທ຺ທິເສ.

໓໒໗. ສຎ຺ຈິຈ຺ຈຸປກ຺ກມນ຺ຕສ຺ສ, ອງ຺ຄຊາຕໍ ປນຕ຺ຕໂນ;

ຖຸລ຺ລຈ຺ຈຍໍ ສມຸທ຺ທິຏ຺ຐໍ, ສເຈ ສຸກ຺ກໍ ນ ມຸຈ຺ຈຕິ.

໓໒໘. ສຎ຺ຈິຈ຺ຈຸປກ຺ກມນ຺ຕສ຺ສ, ອາກາເສ ກມ຺ປເນນປິ;

ໂຫຕິ ຖຸລ຺ລຈ຺ຈຍໍ ຕສ຺ສ, ຍທິ ສຸກ຺ກໍ ນ ມຸຈ຺ຈຕິ.

໓໒໙. ວຕ຺ຖິໍ ກີຬາຍ ປູເຣຕ຺ວາ, ປສ຺ສາເວຕຸໍ ນ ວຏ຺ຏຕິ;

ນິມິຕ຺ຕໍ ປນ ຫຕ຺ເຖນ, ກີຬາເປນ຺ຕສ຺ສ ທຸກ຺ກຏໍ.

໓໓໐. ຕິສ຺ສນ຺ນໍ ປນ ອິຕ຺ຖີນໍ, ນິມິຕ຺ຕໍ ຣຕ຺ຕເຈຕສາ;

ປຸຣໂຕ ປຈ຺ຉໂຕ ວາປິ, ໂອໂລເກນ຺ຕສ຺ສ ທຸກ຺ກຏໍ.

໓໓໑. ເອເກເນກໍ ປໂຍເຄນ, ທິວສມ຺ປິ ຈ ປສ຺ສໂຕ;

ນາປຕ຺ຕິຍາ ຠເວ ອງ຺ຄໍ, ອຸມ຺ມີລນນິມີລນໍ.

໓໓໒. ອໂມຈນາຘິປ຺ປາຍສ຺ສ, ອນຸປກ຺ກມໂຕປິ ຈ;

ສຸປິນນ຺ເຕນ ມຸຕ຺ຕສ຺ມິໍ, ອນາປຕ຺ຕິ ປກາສິຕາ.

ສຸກ຺ກວິສຏ຺ຐິກຖາ.

໓໓໓. ອາມສນ຺ໂຕ ມນຸສ຺ສິຕ຺ຖິໍ, ກາຍສໍສຄ຺ຄຣາຄໂຕ;

‘‘ມນຸສ຺ສິຕ຺ຖີ’’ຕິ ສຎ຺ຎາຍ, ໂຫຕິ ສງ຺ຆາທິເສສິໂກ.

໓໓໔. ໂລເມນນ຺ຕມໂສ ໂລມໍ, ຜຸສນ຺ຕສ຺ສາປິ ອິຕ຺ຖິຍາ;

ກາຍສໍສຄ຺ຄຣາເຄນ, ໂຫຕິ ອາປຕ຺ຕິ ຠິກ຺ຂຸໂນ.

໓໓໕. ອິຕ຺ຖິຍາ ຍທິ ສມ຺ຜຸຏ຺ໂຐ, ຜສ຺ສໍ ເສວນເຈຕໂນ;

ວາຍມິຕ຺ວາຘິວາເສຕິ, ໂຫຕິ ສງ຺ຆາທິເສສຕາ.

໓໓໖. ເອເກນ ປນ ຫຕ຺ເຖນ, ຄເຫຕ຺ວາ ທຸຕິເຍນ ວາ;

ຕຕ຺ຖ ຕຕ຺ຖ ຜຸສນ຺ຕສ຺ສ, ເອກາວາປຕ຺ຕິ ທີປິຕາ.

໓໓໗. ອຄ຺ຄເຫຕ຺ວາ ຜຸສນ຺ຕສ຺ສ, ຍາວ ປາທຎ຺ຈ ສີສໂຕ;

ກາຍາ ຫຕ຺ຖມໂມເຈຕ຺ວາ, ເອກາວ ທິວສມ຺ປິ ຈ.

໓໓໘. ອງ຺ຄຸລີນໍ ຕຸ ປຎ຺ຈນ຺ນໍ, ຄຫເຓ ເອກໂຕ ປນ;

ເອກາເຍວ ສິຍາປຕ຺ຕິ, ນ ຫິ ໂກຏ຺ຐາສໂຕ ສິຍາ.

໓໓໙. ນານິຕ຺ຖີນໍ ສເຈ ປຎ຺ຈ, ຄຓ຺ຫາຕ຺ຍງ຺ຄຸລິໂຍ ປນ;

ເອກໂຕ ປຎ຺ຈ ສງ຺ຆາທິ-ເສສາ ໂຫນ຺ຕິສ຺ສ ຠິກ຺ຂຸໂນ.

໓໔໐. ອິຕ຺ຖິຍາ ວິມຕິສ຺ສາປິ, ປຓ຺ຑກາທິກສຎ຺ຎິໂນ;

ກາເຍນ ອິຕ຺ຖິຍາ ກາຍ-ສມ຺ພທ຺ຘໍ ຜຸສໂຕປິ ວາ.

໓໔໑. ປຓ຺ຑເກ ຍກ຺ຂິເປຕີສຸ, ຕສ຺ສ ຖຸລ຺ລຈ຺ຈຍໍ ສິຍາ;

ທຸກ຺ກຏໍ ກາຍສໍສຄ຺ເຄ, ຕິຣຈ຺ຉານຄຕິຕ຺ຖິຍາ.

໓໔໒. ຠິກ຺ຂຸໂນ ປຏິພທ຺ເຘນ, ກາເຍນ ປນ ອິຕ຺ຖິຍາ;

ກາເຍນ ປຏິພທ຺ຘຎ຺ຈ, ຜຸສນ຺ຕສ຺ສປິ ທຸກ຺ກຏໍ.

໓໔໓. ອິຕ຺ຖີນໍ ອິຕ຺ຖິຣູປຎ຺ຈ, ທາຣຸໂລຫມຍາທິກໍ;

ຕາສໍ ວຕ຺ຖມລງ຺ກາຣໍ, ອາມສນ຺ຕສ຺ສ ທຸກ຺ກຏໍ.

໓໔໔. ຕຕ຺ຖຊາຕຜລໍ ຂຊ຺ຊໍ, ມຸຄ຺ຄາທິໍ ຕຕ຺ຖຊາຕກໍ;

ຘຎ຺ຎານິ ປນ ສພ຺ພານິ, ອາມສນ຺ຕສ຺ສ ທຸກ຺ກຏໍ.

໓໔໕. ສພ຺ພໍ ຘມນສງ຺ຂາທິໍ, ປຎ຺ຈງ຺ຄຕຸຣິຍມ຺ປິ ຈ;

ຣຕນານິ ຈ ສພ຺ພານິ, ອາມສນ຺ຕສ຺ສ ທຸກ຺ກຏໍ.

໓໔໖. ສພ຺ພມາວຸຘຠຓ຺ຑຎ຺ຈ, ຊິຍາ ຈ ຘນຸທຓ຺ຑໂກ;

ອນາມາສມິທໍ ສພ຺ພໍ, ຊາລຎ຺ຈ ສຣວາຣຓໍ.

໓໔໗. ສຸວຓ຺ຓປຏິພິມ຺ພາທິ, ເຈຕິຍໍ ອາຣກູຏກໍ;

ອນາມາສນ຺ຕິ ນິທ຺ທິຏ຺ຐໍ, ກຸຣຸນ຺ທຏ຺ຐກຖາຍ ຫິ.

໓໔໘. ສພ຺ພໍ ໂອນຫິຕຸໍ ວາປິ, ໂອນຫາເປຕຸເມວ ວາ;

ວາທາເປຕຸຎ຺ຈ ວາເທຕຸໍ, ວາທິຕໍ ນ ຈ ວຏ຺ຏຕິ.

໓໔໙. ‘‘ກຣິສ຺ສາມຸປຫາຣ’’ນ຺ຕິ, ວຸຕ຺ເຕນ ປນ ຠິກ຺ຂຸນາ;

ປູຊາ ພຸທ຺ຘສ຺ສ ກາຕພ຺ພາ, ວຕ຺ຕພ຺ພາຕິ ຈ ວິຎ຺ຎຸນາ.

໓໕໐. ສຍໍ ຜຸສິຍມານສ຺ສ, ອິຕ຺ຖິຍາ ປນ ຘຸຕ຺ຕິຍາ;

ອວາຍມິຕ຺ວາ ກາເຍນ, ຜສ຺ສໍ ປຏິວິຊານໂຕ.

໓໕໑. ອນາປຕ຺ຕິ ອສຎ຺ຈິຈ຺ຈ, ອຊານນ຺ຕສ຺ສ ຠິກ຺ຂຸໂນ;

ໂມກ຺ຂາຘິປ຺ປາຍິໂນ ເຈວ, ຕຖາ ອຸມ຺ມຕ຺ຕກາທິໂນ.

໓໕໒. ປຐເມນ ສມານາວ, ສມຸຏ຺ຐານາທໂຍ ປນ;

ກາຍສໍສຄ຺ຄຣາຄສ຺ສ, ຕຖາ ສຸກ຺ກວິສຏ຺ຐິຍາ.

ກາຍສໍສຄ຺ຄກຖາ.

໓໕໓. ທຸຏ຺ຐຸລ຺ລວາຈສ຺ສາເທນ, ອິຕ຺ຖິຍາ ອິຕ຺ຖິສຎ຺ຎິໂນ;

ທ຺ວິນ຺ນຎ຺ຈ ປນ ມຄ຺ຄານໍ, ວຓ຺ຓາວຓ຺ຓວເສນ ຈ.

໓໕໔. ເມຖຸນຍາຈນາທີຫິ, ໂອຠາສນ຺ຕສ຺ສ ຠິກ຺ຂຸໂນ;

ວິຎ຺ຎຸໍ ອນ຺ຕມໂສ ຫຕ຺ຖ-ມຸທ຺ທາຍປິ ຄຣຸໍ ສິຍາ.

໓໕໕. ‘‘ສິຂຣຓີສິ, ສມ຺ຠິນ຺ນາ, ອຸຠໂຕພ຺ຍຎ຺ຊນາ’’ຕິ ຈ;

ອກ຺ໂກສວຈເນນາປິ, ຄຣຸກໍ ຕຸ ສຸຓນ຺ຕິຍາ.

໓໕໖. ປຸນປ຺ປຸໂນຠາສນ຺ຕສ຺ສ, ເອກວາຈາຍ ວາ ພຫູ;

ຄຓນາຍ ຈ ວາຈານໍ, ອິຕ຺ຖີນໍ ຄຣຸກາ ສິຍຸໍ.

໓໕໗. ສາ ເຈ ນປ຺ປຏິຊານາຕິ, ຕສ຺ສ ຖຸລ຺ລຈ຺ຈຍໍ ສິຍາ;

ອາທິສ຺ສ ຠຓເນ ຈາປິ, ອຸພ຺ຠຊາຓຸມຘກ຺ຂກໍ.

໓໕໘. ອຸພ຺ຠກ຺ຂກມໂຘຊາຓຸ-ມຓ຺ຑລໍ ປນ ອຸທ຺ທິສໍ;

ວຓ຺ຓາທິຠຓເນ ກາຍ-ປຏິພທ຺ເຘ ຈ ທຸກ຺ກຏໍ.

໓໕໙. ຖຸລ຺ລຈ຺ຈຍໍ ຠເວ ຕສ຺ສ, ປຓ຺ຑເກ ຍກ຺ຂິເປຕິສຸ;

ອຘກ຺ຂໂກພ຺ຠຊາຓຸມ຺ຫິ, ທຸກ຺ກຏໍ ປຓ຺ຑກາທິສຸ.

໓໖໐. ອຸພ຺ຠກ຺ຂກມໂຘຊາຓຸ-ມຓ຺ຑເລປິ ອຍໍ ນໂຍ;

ສພ຺ພຕ຺ຖ ທຸກ຺ກຏໍ ວຸຕ຺ຕໍ, ຕິຣຈ຺ຉານຄຕິຕ຺ຖິຍາ.

໓໖໑. ອຕ຺ຖຘມ຺ມປຸເຣກ຺ຂາຣໍ, ກຕ຺ວາ ໂອຠາສໂຕປິ ຈ;

ວທໂຕປິ ອນາປຕ຺ຕິ, ປຸຣກ຺ຂຕ຺ວານຸສາສນິໍ.

໓໖໒. ຕຖາ ອຸມ຺ມຕ຺ຕກາທີນໍ, ສມຸຏ຺ຐານາທໂຍ ນຍາ;

ອທິນ຺ນາທານຕຸລ຺ຍາວ, ເວທເນຕ຺ຖ ທ຺ວິຘາ ມຕາ.

ທຸຏ຺ຐຸລ຺ລວາຈາກຖາ.

໓໖໓. ວຓ຺ຓໍ ປນຕ຺ຕໂນ ກາມ-ປາຣິຈຣິຍາຍ ຠາສໂຕ;

ຕສ຺ມິໍເຍວ ຂເຓ ສາ ເຈ, ຊານາຕິ ຄຣຸກໍ ສິຍາ.

໓໖໔. ໂນ ເຈ ຊານາຕິ ສາ ຍກ຺ຂິ-ເປຕິເທວີສຸ ປຓ຺ຑເກ;

ໂຫຕິ ຖຸລ຺ລຈ຺ຈຍໍ ຕສ຺ສ, ເສເສ ອາປຕ຺ຕິ ທຸກ຺ກຏໍ.

໓໖໕. ຈີວຣາທີຫິ ອຎ຺ເຎຫິ, ວຕ຺ຖຸກາເມຫິ ອຕ຺ຕໂນ;

ນຕ຺ຖິ ໂທໂສ ຠຓນ຺ຕສ຺ສ, ປາຣິຈຣິຍາຍ ວຓ຺ຓນໍ.

໓໖໖. ອິຕ຺ຖິສຎ຺ຎາ ມນຸສ຺ສິຕ຺ຖີ, ປາຣິຈຣິຍາຍ ຣາຄິຕາ;

ໂອຠາໂສ ເຕນ ຣາເຄນ, ຂເຓ ຕສ຺ມິໍ ວິຊານນໍ.

໓໖໗. ປຎ຺ຈງ຺ຄານິ ອິມາເນຕ຺ຖ, ເວທິຕພ຺ພານິ ວິຎ຺ຎຸນາ;

ສມຸຏ຺ຐານາທໂຍປ຺ຍສ຺ສ, ອນນ຺ຕຣສມາ ມຕາ.

ອຕ຺ຕກາມປາຣິຈຣິຍກຖາ.

໓໖໘. ປຏິຄ຺ຄຓ຺ຫາຕິ ສນ຺ເທສໍ, ປຸຣິສສ຺ສິຕ຺ຖິຍາປິ ວາ;

ວີມໍສຕິ ຄຣຸ ໂຫຕິ, ປຈ຺ຈາຫຣຕິ ເຈ ປນ.

໓໖໙. ‘‘ຍສ຺ສາ ຫິ ສນ຺ຕິກໍ ຄນ຺ຕ຺ວາ, ອາໂຣເຈຫີ’’ຕິ ເປສິໂຕ;

ຕມທິສ຺ວາ ຕທຎ຺ຎສ຺ສ, ອວສ຺ສາໂຣຈກສ຺ສ ໂສ.

໓໗໐. ‘‘ອາໂຣເຈຫີ’’ຕິ ວຕ຺ວາ ຕໍ, ປຈ຺ຈາຫຣຕິ ເຈ ປນ;

ຠິກ຺ຂຸ ສງ຺ຆາທິເສສມ຺ຫາ, ສຎ຺ຈຣິຕ຺ຕາ ນ ມຸຈ຺ຈຕິ.

໓໗໑. ‘‘ມາຕຣາ ຣກ຺ຂິຕໍ ອິຕ຺ຖິໍ, ຄຈ຺ຉ ພ຺ຣູຫີ’’ຕິ ເປສິໂຕ;

ປິຕຸຣກ຺ຂິຕມຎ຺ຎໍ ວາ, ວິສງ຺ເກໂຕວ ຠາສໂຕ.

໓໗໒. ປຏິຄ຺ຄຓ຺ຫນຕາທີຫິ, ຕີຫິ ອງ຺ເຄຫິ ສໍຍຸເຕ;

ສຎ຺ຈຣິຕ຺ເຕ ສມາປນ຺ເນ, ຄຣຸກາປຕ຺ຕິມາທິເສ.

໓໗໓. ທ຺ວີຫິ ຖຸລ຺ລຈ຺ຈຍໍ ວຸຕ຺ຕໍ, ປຓ຺ຑກາທີສຸ ຕີຫິປິ;

ເອເກເນວ ຈ ສພ຺ພຕ຺ຖ, ໂຫຕິ ອາປຕ຺ຕິ ທຸກ຺ກຏໍ.

໓໗໔. ເຈຕິຍສ຺ສ ຈ ສງ຺ຆສ຺ສ, ຄິລານສ຺ສ ຈ ຠິກ຺ຂຸໂນ;

ຄຈ຺ຉໂຕ ປນ ກິຈ຺ເຈນ, ອນາປຕ຺ຕິ ປກາສິຕາ.

໓໗໕. ມນຸສ຺ສຕ຺ຕໍ ຕຖາ ຕສ຺ສາ, ນນາລໍວຈນີຍຕາ;

ປຏິຄ຺ຄຓ຺ຫນຕາທີນໍ, ວສາ ປຎ຺ຈງ຺ຄິກໍ ມຕໍ.

໓໗໖. ອິທຎ຺ຫິ ຉສມຸຏ຺ຐານໍ, ອຈິຕ຺ຕກມຸທີຣິຕໍ;

ອລໍວຈນີຍຕ຺ຕໍ ວາ, ປຓ຺ຓຕ຺ຕິໍ ວາ ອຊານໂຕ.

໓໗໗. ຄເຫຕ຺ວາ ສາສນໍ ກາຍ-ວິກາເຣນູປຄມ຺ມ ຕໍ;

ວີມໍສິຕ຺ວາ ຫຣນ຺ຕສ຺ສ, ຄຣຸກໍ ກາຍໂຕ ສິຍາ.

໓໗໘. ສຸຕ຺ວາ ຍຖານິສິນ຺ໂນວ, ວຈນໍ ອິຕ຺ຖິຍາ ປຸນ;

ຕໍ ຕຕ຺ເຖວາຄຕສ຺ເສວ, ອາໂຣເຈນ຺ຕສ຺ສ ວາຈໂຕ.

໓໗໙. ອຊານນ຺ຕສ຺ສ ປຓ຺ຓຕ຺ຕິໍ, ກາຍວາຈາຫິ ຕໍ ວິຘິໍ;

ກໂຣໂຕ ຫຣໂຕ ວາປິ, ຄຣຸກໍ ກາຍວາຈໂຕ.

໓໘໐. ຊານິຕ຺ວາປິ ກໂຣນ຺ຕສ຺ສ, ຄຣຸກາປຕ຺ຕິໂຍ ຕຖາ;

ສຈິຕ຺ຕເກຫິ ຕີເຫວ, ສມຸຏ຺ຐາເນຫິ ຊາຍເຣ.

ສຎ຺ຈຣິຕ຺ຕກຖາ.

໓໘໑. ສຍໍຍາຈິຕເກເຫວ, ກຸຏິກໍ ອປ຺ປມາຓິກໍ;

ອຕ຺ຕຸທ຺ເທສໍ ກໂຣນ຺ຕສ຺ສ, ຕຖາເທສິຕວຕ຺ຖຸກໍ.

໓໘໒. ໂຫນ຺ຕິ ສງ຺ຆາທິເສສາ ທ຺ເວ, ສາຣມ຺ຠາທີສຸ ທຸກ຺ກຏໍ;

ສເຈ ເອກວິປນ຺ນາ ສາ, ຄຣຸກໍ ເອກກໍ ສິຍາ.

໓໘໓. ປຸຣິສໍ ຍາຈິຕຸໍ ກມ຺ມ-ສຫາຍຕ຺ຖາຍ ວຏ຺ຏຕິ;

ມູລຈ຺ເຉຊ຺ຊວເສເນວ, ຍາຈມານສ຺ສ ທຸກ຺ກຏໍ.

໓໘໔. ອວຊ຺ຊໍ ຫຕ຺ຖກມ຺ມມ຺ປິ, ຍາຈິຕຸໍ ປນ ວຏ຺ຏຕິ;

ຫຕ຺ຖກມ຺ມມ຺ປິ ນາເມຕໍ, ກິຎ຺ຈິ ວຕ຺ຖຸ ນ ໂຫຕິ ຫິ.

໓໘໕. ໂຄຓມາຍາຈມານສ຺ສ, ຐເປຕ຺ວາ ຎາຕກາທິເກ;

ທຸກ຺ກຏໍ ຕສ຺ສ ນິທ຺ທິຏ຺ຐໍ, ມູລຈ຺ເຉຊ຺ເຊນ ເຕສຸປິ.

໓໘໖. ‘‘ໂຄຓໍ ເທມາ’’ຕິ ວຸຕ຺ເຕປິ, ຄເຫຕຸໍ ນ ຈ ວຏ຺ຏຕິ;

ສກຏໍ ທາຣຸຠຓ຺ຑຕ຺ຕາ, ຄເຫຕຸໍ ປນ ວຏ຺ຏຕິ.

໓໘໗. ວາສິຜຣສຸກຸທ຺ທາລ-ກຸຐາຣາທີສ຺ວຍໍ ນໂຍ;

ອນຊ຺ຌາວຸຕ຺ຖກໍ ສພ຺ພໍ, ຫຣາເປຕຸມ຺ປິ ວຏ຺ຏຕິ.

໓໘໘. ວລ຺ລິອາທິມ຺ຫິ ສພ຺ພສ຺ມິໍ, ຄຣຸຠຓ຺ຑປ຺ປໂຫນເກ;

ປເຣສໍ ສນ຺ຕເກເຍວ, ໂຫຕິ ອາປຕ຺ຕິ ທຸກ຺ກຏໍ.

໓໘໙. ປຈ຺ຈເຍສຸ ຫິ ຕີສ຺ເວວ, ວິຎ຺ຎຕ຺ຕິ ນ ຈ ວຏ຺ຏຕິ;

ຕຕິເຍ ປຣິກໂຖຠາສ-ນິມິຕ຺ຕານິ ຈ ລພ຺ຠເຣ.

໓໙໐. ‘‘ອເທສິເຕ ຈ ວຕ຺ຖຸສ຺ມິໍ, ປມາເຓນາຘິກໍ ກຸຏິໍ;

ກຣິສ຺ສາມີ’’ຕິ ຈິນ຺ເຕຕ຺ວາ, ອຣຎ຺ຎໍ ຄຈ຺ຉໂຕປິ ຈ.

໓໙໑. ຜຣສຸໍ ວາປິ ວາສິໍ ວາ, ນິເສນ຺ຕສ຺ສາປິ ທຸກ຺ກຏໍ;

ຉິນ຺ທໂຕ ທຸກ຺ກຏໍ ຣຸກ຺ຂໍ, ຕສ຺ສ ປາຈິຕ຺ຕິຍາ ສຫ.

໓໙໒. ເອວໍ ປຸພ຺ພປໂຍຄສ຺ມິໍ, ກຸຏິກາຣກຠິກ຺ຂຸໂນ;

ຍຖາປໂຍຄມາປຕ຺ຕິໍ, ວິນຍຎ຺ຎູ ວິນິທ຺ທິເສ.

໓໙໓. ຍາ ປນ ທ຺ວີຫິ ປິຓ຺ເຑຫິ, ນິຏ຺ຐານໍ ຕຸ ຄມິສ຺ສຕິ;

ໂຫຕິ ຖຸລ຺ລຈ຺ຈຍໍ ເຕສຸ, ປຐເມ ທຸຕິເຍ ຄຣຸ.

໓໙໔. ອນາປຕ຺ຕິ ສຈຎ຺ຎສ຺ສ, ເທຕິ ວິປ຺ປກຕໍ ກຸຏິໍ;

ຕຖາ ຠູມິໍ ສມໍ ກຕ຺ວາ, ຠິນ຺ທໂຕປິ ຈ ຕໍ ກຸຏິໍ.

໓໙໕. ຄຸຫໍ ເລຓໍ ກໂຣນ຺ຕສ຺ສ, ຕິຓປຓ຺ຓຈ຺ຉທມ຺ປິ ວາ;

ວາສາຄາຣໍ ຐເປຕ຺ວານ, ອຎ຺ຎສ຺ສຕ຺ຖາຍ ວາ ຕຖາ.

໓໙໖. ເທສາເປຕ຺ວາວ ຠິກ຺ຂູຫິ, ວຕ຺ຖຸໍ ປນ ຈ ຠິກ຺ຂຸໂນ;

ກ຺ຣິຍໂຕວ ສມຸຏ຺ຐາຕິ, ກໂຣໂຕ ອປ຺ປມາຓິກໍ.