໖. ມຈ຺ຉມໍສວິນິຈ຺ຉຍກຖາ

໓໘. ເອວໍ ກຸລສງ຺ຄຫວິນິຈ຺ຉຍໍ ກເຖຕ຺ວາ ອິທານິ ມຈ຺ຉມໍສວິນິຈ຺ຉຍໍ ກເຖຕຸໍ ‘‘ມຈ຺ຉມໍເສສຸ ປນາ’’ຕິອາທິ ວຸຕ຺ຕໍ. ຕຕ຺ຖ ຖເລ ຐປິຕມຕ຺ເຕ ມຣຕິ, ເກວຏ຺ຏາທີຫິ ວາ ມາຣິຍຕີຕິ ມຈ຺ໂຉ. ມຈ຺ຉສ຺ສ ອິທນ຺ຕິ ມຈ຺ຉໍ, ມສິຍເຕ ອາມສິຍເຕຕິ ມໍສໍ, ມຈ຺ຉຎ຺ຈ ມໍສຎ຺ຈ ມຈ຺ຉມໍສານິ, ເຕສຸ. ມຈ຺ຉມໍເສສຸ ປນ ວິນິຈ຺ຉໂຍ ເອວໍ ເວທິຕພ຺ໂພຕິ ໂຍຊນາ. ມຈ຺ຉຄ຺ຄຫເຓນາຕິ ເອຕ຺ຖ ນິທ຺ຘາຣຓໍ ນ ກາຕພ຺ພໍ. ປນ-ສທ຺ໂທ ປກ຺ຂນ຺ຕຣຕ຺ໂຖ, ທິວາເສຍ຺ຍາທີສຸ ວິນິຈ຺ຉຍໂຕ ອປໂຣ ມຈ຺ຉມໍເສສຸ ວິນິຈ຺ຉໂຍ ເວທິຕພ຺ໂພຕິ ອຕ຺ໂຖ. ຄຍ຺ຫເຕ ອເນນາຕິ ຄຫຓໍ. ກິໍ ຕໍ? ສທ຺ໂທ, ມຈ຺ຉອິຕິ ຄຫຓໍ ມຈ຺ຉຄ຺ຄຫຓໍ, ເຕນ ມຈ຺ຉຄ຺ຄຫເຓນ, ມຈ຺ຉສທ຺ເທນາຕິ ອຕ຺ໂຖ. ມໍເສສຸ ປນ…ເປ… ອກປ຺ປິຍານີຕິ ເອຕ຺ຖ ມນຸສ຺ສມໍສໍ ສມານຊາຕິມໍສໂຕ ປຏິກ຺ຂິຕ຺ຕໍ. ຫຕ຺ຖິອສ຺ສານໍ ມໍສານິ ຣາຊງ຺ຄໂຕ, ສຸນຂອຫີນໍ ເຊຄຸຈ຺ຉຠາວໂຕ, ເສສານໍ ວາຬມິຄຕ຺ຕາ ຠິກ຺ຂູນໍ ປຣິພນ຺ຘວິໂມຈນຕ຺ຖໍ ປຏິກ຺ຂິຕ຺ຕນ຺ຕິ ທຏ຺ຐພ຺ພໍ.

ຕິໂກຏິປຣິສຸທ຺ຘນ຺ຕິ ທິຏ຺ຐສຸຕປຣິສງ຺ກິຕສງ຺ຂາຕາຫິ ຕີຫິ ໂກຏີຫິ ຕີຫິ ອາກາເຣຫິ ຕີຫິ ກາຣເຓຫິ ປຣິສຸທ຺ຘໍ, ວິມຸຕ຺ຕນ຺ຕິ ອຕ຺ໂຖ. ຕຕ຺ຖ ອທິຏ຺ຐອສຸຕານິ ຈກ຺ຂຸວິຎ຺ຎາຓໂສຕວິຎ຺ຎາຓານໍ ອນາຣມ຺ມຓຠາວໂຕ ຊານິຕພ຺ພານິ. ອປຣິສງ຺ກິຕໍ ປນ ກຖໍ ຊານິຕພ຺ພນ຺ຕິ ອາຫ ‘‘ອປຣິສງ຺ກິຕໍ ປນາ’’ຕິອາທິ, ຕີຓິ ປຣິສງ຺ກິຕານິ ຎຕ຺ວາ ເຕສໍ ປຏິປກ຺ຂວເສນ ອປຣິສງ຺ກິຕໍ ຊານິຕພ຺ພນ຺ຕິ ອຕ຺ໂຖ. ອິທານິ ຕານິ ຕີຓິ ປຣິສງ຺ກິຕານິ ຈ ເອວໍ ປຣິສງ຺ກິເຕ ສຕິ ຠິກ຺ຂູຫິ ກຕ຺ຕພ຺ພວິຘິຎ຺ຈ ເຕນ ວິຘິນາ ອປຣິສງ຺ກິເຕ ສຕິ ກຕ຺ຕພ຺ພຠາວຎ຺ຈ ວິຕ຺ຖາຣໂຕ ທສ຺ເສຕຸໍ ‘‘ກຖ’’ນ຺ຕິອາທິມາຫ. ຕຕ຺ຖ ທິສ຺ວາ ປຣິສງ຺ກິຕໍ ທິຏ຺ຐປຣິສງ຺ກິຕໍ ນາມ. ສຸຕ຺ວາ ປຣິສງ຺ກິຕໍ ສຸຕປຣິສງ຺ກິຕໍ ນາມ. ອທິສ຺ວາ ອສຸຕ຺ວາ ຕກ຺ເກນ ອນຸມາເນນ ປຣິສງ຺ກິຕໍ ຕທຸຠຍວິນິມຸຕ຺ຕປຣິສງ຺ກິຕໍ ນາມ. ຕໍ ຕິວິຘມ຺ປິ ປຣິສງ຺ກິຕສາມຎ຺ເຎນ ເອກາ ໂກຏິ ໂຫຕິ, ຕໂຕ ວິມຸຕ຺ຕໍ ອປຣິສງ຺ກິຕໍ ນາມ. ເອວໍ ອທິຏ຺ຐໍ ອສຸຕໍ ອປຣິສງ຺ກິຕໍ ມຈ຺ຉມໍສໍ ຕິໂກຏິປຣິສຸທ຺ຘໍ ໂຫຕິ.

ຊາລໍ ມຈ຺ຉພນ຺ຘນໍ. ວາຄຸຣາ ມິຄພນ຺ຘິນີ. ກປ຺ປຕີຕິ ຍທິ ເຕສໍ ວຈເນນ ສງ຺ກາ ນິວຕ຺ຕຕິ, ວຏ຺ຏຕິ, ນ ຕໍ ວຈນໍ ເລສກປ຺ປໍ ກາຕຸໍ ວຏ຺ຏຕິ. ເຕເນວ ວກ຺ຂຕິ ‘‘ຍຕ຺ຖ ຈ ນິພ຺ເພມຕິໂກ ໂຫຕິ, ຕໍ ສພ຺ພໍ ກປ຺ປຕີ’’ຕິ. ປວຕ຺ຕມໍສນ຺ຕິ ອາປຓາທີສຸ ປວຕ຺ຕໍ ວິກ຺ກາຍິກໍ ວາ ມຕມໍສໍ ວາ. ມງ຺ຄລາທີນນ຺ຕິ ອາທິ-ສທ຺ເທນ ອາຫຸນປາຫຸນາທິເກ ສງ຺ຄຓ຺ຫາຕິ. ຠິກ຺ຂູນໍເຍວ ອຕ຺ຖາຍ ອກຕນ຺ຕິ ເອຕ຺ຖ ອຏ຺ຐານປ຺ປຍຸຕ຺ໂຕ ເອວ-ສທ຺ໂທ, ຠິກ຺ຂູນໍ ອຕ຺ຖາຍ ອກຕເມວາຕິ ສມ຺ພນ຺ຘິຕພ຺ພໍ, ຕສ຺ມາ ຠິກ຺ຂູນຎ຺ຈ ມງ຺ຄລາທີນຎ຺ຈາຕິ ມິສ຺ເສຕ຺ວາ ກຕມ຺ປິ ນ ວຕ຺ຕຕີຕິ ເວທິຕພ຺ພໍ. ເກຈິ ປນ ‘‘ຍຖາຐິຕວເສນ ອວຘາຣຓໍ ຄເຫຕ຺ວາ ວຏ຺ຏຕີ’’ຕິ ວທນ຺ຕິ, ຕໍ ນ ສຸນ຺ທຣໍ. ຍຕ຺ຖ ຈ ນິພ຺ເພມຕິໂກ ໂຫຕີຕິ ຠິກ຺ຂູນໍ ອຕ຺ຖາຍ ກເຕປິ ສພ຺ເພນ ສພ຺ພໍ ປຣິສງ຺ກິຕາຠາວມາຫ.

໓໙. ຕເມວຕ຺ຖໍ ອາວິກາຕຸໍ ‘‘ສເຈ ປນາ’’ຕິອາທິ ວຸຕ຺ຕໍ. ອິຕເຣສໍ ວຏ຺ຏຕີຕິ ອຊານນ຺ຕານໍ ວຏ຺ຏຕິ, ຊານໂຕເວຕ຺ຖ ອາປຕ຺ຕິ ໂຫຕີຕິ. ເຕເຍວາຕິ ເຍ ອຸທ຺ທິສ຺ສ ກຕໍ, ເຕເຍວ. ອຸທ຺ທິສ຺ສ ກຕມໍສປຣິໂຠຄໂຕ ອກປ຺ປິຍມໍສປຣິໂຠເຄ ວິເສສໍ ທສ຺ເສຕຸໍ ‘‘ອກປ຺ປິຍມໍສໍ ປນາ’’ຕິອາທິ ວຸຕ຺ຕໍ. ປຸຣິມສ຺ມິໍ ສຈິຕ຺ຕກາປຕ຺ຕິ, ອິຕຣສ຺ມິໍ ອຈິຕ຺ຕກາ. ເຕນາຫ ‘‘ອກປ຺ປິຍມໍສໍ ອຊານິຕ຺ວາ ຠຸຎ຺ຊນ຺ຕສ຺ສປິ ອາປຕ຺ຕິເຍວາ’’ຕິ. ‘‘ປຣິໂຠຄກາເລ ປຸຈ຺ຉິຕ຺ວາ ປຣິຠຸຎ຺ຊິສ຺ສາມີຕິ ວາ ຄເຫຕ຺ວາ ປຸຈ຺ຉິຕ຺ວາວ ປຣິຠຸຎ຺ຊິຕພ຺ພ’’ນ຺ຕິ (ວິ. ສງ຺ຄ. ອຏ຺ຐ. ໓໙) ວຈນໂຕ ອກປ຺ປິຍມໍສໍ ອຊານິຕ຺ວາ ປຏິຄ຺ຄຓ຺ຫນ຺ຕສ຺ສ ປຏິຄ຺ຄຫເຓ ອນາປຕ຺ຕິ ສິທ຺ຘາ. ອຊານິຕ຺ວາ ປຣິຠຸຎ຺ຊນ຺ຕສ຺ເສວ ຫິ ອາປຕ຺ຕິ ວຸຕ຺ຕາ. ວຕ຺ຕນ຺ຕິ ວທນ຺ຕີຕິ ອິມິນາ ອາປຕ຺ຕິ ນຕ຺ຖີຕິ ທສ຺ເສຕິ.

ອິຕິ ວິນຍສງ຺ຄຫສໍວຓ຺ຓນາຠູເຕ ວິນຍາລງ຺ກາເຣ

ມຈ຺ຉມໍສວິນິຈ຺ຉຍກຖາລງ຺ກາໂຣ ນາມ

ຉຏ຺ໂຐ ປຣິຈ຺ເຉໂທ.