໖. ອາຣາມວຄ຺ຄວຓ຺ຓນາ

໑໐໒໑. ປຐມສິກ຺ຂາປທໍ ອຸຕ຺ຕານຕ຺ຖເມວ.

໒. ທຸຕິຍສິກ຺ຂາປທວຓ຺ຓນາ

໑໐໓໐. ຠິກ຺ຂຸນີ ເຈ ຠິກ຺ຂຸໍ ອກ຺ໂກສຕິ, ອິມິນາ ສິກ຺ຂາປເທນ ປາຈິຕ຺ຕິຍໍ. ຠິກ຺ຂຸນິໍ ເຈ ອກ຺ໂກສຕິ, ໂອມສວາເທນ ອາປຊ຺ຊຕິ. ໂອມສວາເທ ສມ຺ມຸຂາວ ຣຸຫຕິ, ອິຘ ປນ ປຣມ຺ມຸຂາປິ.

ຕຕ຺ຣາຍໍ ວິຈາຣຓາ – ຠິກ຺ຂຸວິຠງ຺ເຄ ໂອສມວາທສິກ຺ຂາປເທ ຠິກ຺ຂຸນີ ອນຸປສມ຺ປນ຺ນຏ຺ຐາເນ ຕິຏ຺ຐຕີຕິ ກຕ຺ວາ ຠິກ຺ຂຸນິວິຠງ຺ເຄປິ ໂອມສວາທສິກ຺ຂາປເທ ຠິກ຺ຂຸ ຠິກ຺ຂຸນິຍາ ອນຸປສມ຺ປນ຺ນຏ຺ຐາເນ ຕິຏ຺ຐຕີຕິ ສິທ຺ຘໍ. ອິຘ ຈ ອນຸປສມ຺ປນ຺ນສ຺ສ ອກ຺ໂກສເນ ທຸກ຺ກຏໍ ວຸຕ຺ຕໍ, ຠິກ຺ຂຸສ຺ສ ອຸປສມ຺ປນ຺ນສ຺ສ ອກ຺ໂກສເນ ປາຈິຕ຺ຕິຍໍ ວຸຕ຺ຕໍ, ຕສ຺ມາ ອິມານິ ທ຺ເວ ສິກ຺ຂາປທານິ ຠິກ຺ຂຸມ຺ຫິ ສໍສນ຺ທິຍມານານິ ອຎ຺ຎມຎ຺ຎໍ ນ ສເມນ຺ຕິ. ຍຖາ ສເມນ຺ຕິ, ຕຖາ ຊານິຕພ຺ພໍ. ຕຕ຺ຖ ໂປຣາຓຄຓ຺ຐິປເທ ວຸຕ຺ຕນເຍນ ຠິກ຺ຂຸນີນໍ ໂອມສວາທສິກ຺ຂາປເທ ອນຸປສມ຺ປນ຺ໂນຕິ ນ ຄເຫຕພ຺ໂພ, ອິທເມຕ຺ຖ ຍຸຕ຺ຕໍ. ປຣິຠາເສຍ຺ຍາຕິ ອຎ຺ຎຕ຺ຣ ອກ຺ໂກສວຕ຺ຖູຫິ. ເຕສຸ ຫິ ອຎ຺ຎຕຣສ຺ມິໍ ສຕິ ໂອມສວາທປາຈິຕ຺ຕິຍເມວາຕິ ເອເກ, ຕໍ ນ ຍຸຕ຺ຕໍ. ໂອມສວາເທ ປາຬິມຸຕ຺ຕກອກ຺ໂກເສ ຫິ ທຸກ຺ກຏໍ ໂຫຕີຕິ. ທຸກ຺ກໂຏກາເສ ອິທໍ ປາຈິຕ຺ຕິຍໍ ເຕຫິ ນິທ຺ທິຏ຺ຐໍ ໂຫຕິ, ຕສ຺ມາ ‘‘ພາລາ ເອຕາ’’ຕິ ປາຬິຍໍ ອິຘ ອາຄຕປທານໍເຍວ ວເສນ ປຣິຠາສນໍ ເວທິຕພ຺ພໍ.

ທຸຕິຍສິກ຺ຂາປທວຓ຺ຓນາ ນິຏ຺ຐິຕາ.

໑໐໓໓. ຕຕິຍສິກ຺ຂາປທໍ ອຸຕ຺ຕານຕ຺ຖເມວ.

໔. ຈຕຸຕ຺ຖສິກ຺ຂາປທວຓ຺ຓນາ

໑໐໓໘. ນິມນ຺ຕິຕາ ວາ ປວາຣິຕາ ວາຕິ ເອຕ຺ຖ ໂປຣາຓຄຓ຺ຐິປເທ ຕາວ ເອວໍ ວຸຕ຺ຕໍ ‘‘ປວາຣິຕາປິ ຍາຄຸໍ ປາຕຸໍ ລຠຕິ, ໂຠຊ຺ຊຍາຄຸໍ ນ ລຠຕິ. ຍາຄຸ ປເນຕ຺ຖ ຂາທນີຍໂຠຊນີຍສງ຺ຂ຺ຍໍ ນ ຄຈ຺ຉຕິ. ນິມນ຺ຕິຕາ ຠິກ຺ຂຸນີ ປິຓ຺ຑາຍ ຈຣິຕ຺ວາ ຠຸຎ຺ຊິຕຸກາມາ ສາມິເກ ອປໂລເກຕ຺ວາວ ຠຸຎ຺ຊິຕຸໍ ລຠຕິ. ປຣມ຺ປຣໂຠຊນາປຕ຺ຕິ ຠິກ຺ຂຸນີນໍ ນຕ຺ຖິ. ນິມນ຺ຕິຕາ ຕໍ ຠຕ຺ຕໍ ຠຸຎ຺ຊິຕ຺ວາ ວາ ອຠຸຎ຺ຊິຕ຺ວາ ວາ ປວາຣິຕາ ກປ຺ປິຍໍ ກາຣາເປຕ຺ວາ ຠຸຎ຺ຊິຕຸໍ ນ ລຠຕິ, ອກປ຺ປິຍນິມນ຺ຕເນນ ນິມນ຺ຕິຍມານາ ທ຺ເວ ນິມນ຺ຕນານິ ສມ຺ປຏິຈ຺ຉິຕຸຎ຺ຈ ນ ລຠຕີ’’ຕິ. ຕຕ຺ຖ ‘‘ປວາຣິຕາປິ ຍາຄຸໍ ປາຕຸໍ ລຠຕີ’’ຕິ ວຸຕ຺ຕໍ ປາຬິຍໍ, ອຏ຺ຐກຖາຍຎ຺ຈ ອນຸຎ຺ຎາຕຕ຺ຕາ. ‘‘ນິມນ຺ຕິຕາ ອປ຺ປວາຣິຕາ ຍາຄຸໍ ປິວຕີ’’ຕິ ຫິ ປາຬິຍໍ ວຸຕ຺ຕໍ. ຕຕ຺ຣິທໍ ສິກ຺ຂາປທວຓ຺ຓນາປຸພ຺ພງ຺ຄມສນ຺ນິຏ຺ຐານໍ – ນິມນ຺ຕິຕາ ວາ ປວາຣິຕາ ວາຕິ ເອຕ຺ຖ ວາສທ຺ເທນ ອກປ຺ປິຍນິມນ຺ຕເນນ ນິມນ຺ຕິຕາ ອປ຺ປວາຣິຕາ ຐເປຕ຺ວາ ຍາຄຸໍ ອຎ຺ຎໍ ຂາທນີຍໍ ວາ ໂຠຊນີຍໍ ວາ ຂາເທຍ຺ຍ ວາ ຠຸຎ຺ເຊຍ຺ຍ ວາ, ປາຈິຕ຺ຕິຍໍ ອຎ຺ຎຕ຺ຣ ສາມິການໍ ອປໂລກນາ. ປຣມ຺ປຣໂຠຊນາຠາເວນ ຠິກ຺ຂຸນີນໍ ໂກ ຄຸໂຓ ຊາໂຕຕິ? ນ ເອຕາສໍ ຄຸຓລາໂຠ, ເກວລໍ ປາກຏຕຣໍ ຊາຕໍ. ຠິກ຺ຂູປິ ວິກປ຺ເປຕ຺ວາ ມິສ຺ເສຕ຺ວາວ ຠຸຎ຺ຊິຕຸໍ ລຠນ຺ຕິ. ສມເຍ ຍຖາສຸຂໍ ລຠນ຺ຕິ. ອິມິນາ ອປໂລກເນນ ກິນ຺ຕິ? ປວາຣິຕາ ວາ ອນິມນ຺ຕິຕາ ວາ ນ ກິຎ຺ຈິ ກປ຺ປິຍໍ ກາຣາເປຕ຺ວາ ຄິລານາຕິຣິຕ຺ຕມ຺ປິ ລຠນ຺ຕິ, ນິມນ຺ຕິຕາ ຈ ປວາຣິຕາ ຈ ຍາຄຸມ຺ປິ ນ ລຠນ຺ຕິ, ອປໂລເກຕ຺ວາປິ ນ ລຠນ຺ຕີຕິ.

ຈຕຸຕ຺ຖສິກ຺ຂາປທວຓ຺ຓນາ ນິຏ຺ຐິຕາ.

ອາຣາມວຄ຺ຄວຓ຺ຓນາ ນິຏ຺ຐິຕາ.