໓. ນຄ຺ຄວຄ຺ຄວຓ຺ຓນາ

໑-໒. ປຐມທຸຕິຍສິກ຺ຂາປທວຓ຺ຓນາ

໘໘໓. ນຄ຺ຄວຄ຺ຄສ຺ສ ປຐມທຸຕິຍານິ ອຸຕ຺ຕານານິ. ປຐເມ ອຍໍ ວິເສໂສ – ຠິກ຺ຂຸສ຺ສ ຕຖາ ນ຺ຫາຍນ຺ຕສ຺ສ ທຸກ຺ກຏໍ ອຎ຺ຎຕ຺ຣ ຊນ຺ຕາຆຣອຸທກປຏິຈ຺ຉາທີຫິ. ນ ຈ ວິຄຣຫິ ຕຕ຺ຖ ຠຄວາ ອຕ຺ຕນາວ ອນນຸຎ຺ຎາຕຕ຺ຕາ ອຸທກສາຏິກາຍາຕິ ໂປຣາຓາ. ‘‘ເອກເມວ ນິວາເສຕ຺ວາ, ປາຣຸປິຕ຺ວາ ຈ ນຫາຍິຕຸໍ ນ ວຏ຺ຏຕີ’’ຕິ ໂປຣາຓຄຓ຺ຐິປເທ ວຸຕ຺ຕໍ.

ປຐມທຸຕິຍສິກ຺ຂາປທວຓ຺ຓນາ ນິຏ຺ຐິຕາ.

໓. ຕຕິຍສິກ຺ຂາປທວຓ຺ຓນາ

໘໙໔. ຕຕິເຍ ອນ຺ໂຕຈຕູຫປຎ຺ຈາຫໍ ຘຸຣໍ ນິກ຺ຂິປນ຺ຕິຍາປິ ອາປຕ຺ຕິ ເອວ. ລິງ຺ຄປຣິວຕ຺ເຕ ຘຸຣໍ ນິກ຺ຂິປນ຺ຕິຍາ ທຸກ຺ກຏໍ ຕິກທຸກ຺ກຏຕ຺ຕາ. ‘‘ສມ຺ພຫຸລາຫິ ຠິກ຺ຂຸນີຫິ ສທ຺ຘິນ຺ຕິ ເອຕ຺ຖ ຈຕສ຺ໂສປິ ສມ຺ພຫຸລາ’’ຕິ ໂປຣາຓຄຓ຺ຐິປເທ ວຸຕ຺ຕໍ.

ຕຕິຍສິກ຺ຂາປທວຓ຺ຓນາ ນິຏ຺ຐິຕາ.

໔. ຈຕຸຕ຺ຖສິກ຺ຂາປທວຓ຺ຓນາ

໘໙໘. ຈຕຸຕ຺ເຖ ສງ຺ຆາຏິຈາຣນ຺ຕິ ເອຕ຺ຖ ສງ຺ຆາຏິອາທິວເສນ ອຘິຏ຺ຐິຕານໍເຍວາຍໍ ວິຘິ, ເນຕຣາສໍ ກິຣ. ຕຕ຺ຖ ຕິຈີວເຣ ເອວ ວິປ຺ປວາສປຈ຺ຈຍາ ນິສ຺ສຄ຺ຄິຍໍ. ອນ຺ໂຕຈີວຣກາເລປິ ປຎ຺ຈາຫິກໍ ສງ຺ຆາຏິຈາຣໍ ອຕິກ຺ກາເມນ຺ຕິຍາ ອາປຕ຺ຕິເຍວ. ‘‘ວິນາ ເອເຕຫິ ຈີວເຣຫິ ອຸປສມ຺ປທໍ ກາຕຸໍ ນ ວຏ຺ຏຕີ’’ຕິ ໂປຣາຓຄຓ຺ຐິປເທ ວຸຕ຺ຕໍ.

ຈຕຸຕ຺ຖສິກ຺ຂາປທວຓ຺ຓນາ ນິຏ຺ຐິຕາ.

໕. ປຎ຺ຈມສິກ຺ຂາປທວຓ຺ຓນາ

໙໐໖. ປຎ຺ຈມສ຺ສ ອນາປຕ຺ຕິວາເຣ ຕາຍ ວາ ອວິປ຺ປວາສາຍາຕິ ອຕ຺ຖໂຕ ລພ຺ຠຕິ.

ປຎ຺ຈມສິກ຺ຂາປທວຓ຺ຓນາ ນິຏ຺ຐິຕາ.

໙໐໗-໙໑໑. ຉຏ຺ຐສຕ຺ຕມານິ ອຸຕ຺ຕານານິ.

໘. ອຏ຺ຐມສິກ຺ຂາປທວຓ຺ຓນາ

໙໑໖. ໂສກຊ຺ຌາຍິກາ ນາມ ກິຣ ມາຍາກາຣາ. ວິລຸມ຺ປກາ ຠຓ຺ຑກາຕິ ຈ ໂປຣາຓາ.

ອຏ຺ຐມສິກ຺ຂາປທວຓ຺ຓນາ ນິຏ຺ຐິຕາ.

໙. ນວມສິກ຺ຂາປທວຓ຺ຓນາ

໙໒໐. ‘‘ກຖຎ຺ຫິ ນາມ ອຕິກ຺ກາເມສ຺ສຕີ’’ຕິ ວຸຕ຺ຕຕ຺ຕາ ຖຸລ຺ລນນ຺ທາ ຈີວຣກາລສມຍໍ ອາຄເມຖາຕິ ອຕິກ຺ກມາເປສີຕິ ສິທ຺ຘໍ ໂຫຕິ.

ນວມສິກ຺ຂາປທວຓ຺ຓນາ ນິຏ຺ຐິຕາ.

໑໐. ທສມສິກ຺ຂາປທວຓ຺ຓນາ

໙໒໗. ທສເມ ເອກກຸລໍ ເອຕທໂວຈຸນ຺ຕິ ເອຕ຺ຖ ກຸລໍ ນາມ ຕສ຺ມິໍ ມນຸສ຺ສາ, ຕສ຺ມາ ພຫຸວຈນໍ.

ທສມສິກ຺ຂາປທວຓ຺ຓນາ ນິຏ຺ຐິຕາ.

ນຄ຺ຄວຄ຺ຄວຓ຺ຓນາ ນິຏ຺ຐິຕາ.