ອຘິກຣຓເຠທວຓ຺ຓນາ

ອຸກ຺ໂກຏນເຠທາທິວຓ຺ຓນາ

໓໔໐. ອຘິກຣຓອຸກ຺ໂກເຏນ ສມຖານໍ ອຸກ຺ໂກຏໍ ທສ຺ເສຕຸນ຺ຕິ ອຘິກຣຓານິ ສຕ຺ຕຫິ ສມເຖຫິ ສມ຺ມນ຺ຕິ, ຕານິ ອຸກ຺ໂກເຏນ຺ໂຕ ສຕ຺ຕ ສມເຖ ອຸກ຺ໂກເຏຕິ ນາມາຕິ ອຘິປ຺ປາໂຍ. ປສວຕີຕິ ສມ຺ຠວຕິ. ‘‘ອນຸວາທາຘິກຣເຓ ລພ຺ຠນ຺ຕີ’ຕິອາທີນິ ‘ຘມ຺ໂມ ອຘມ຺ໂມ’ຕິອາທີນໍ ສມານຕ຺ຕາ ເຕສຸ ວິເສສໂຕ ລພ຺ຠນ຺ຕີ’’ຕິ ວຸຕ຺ຕໍ. ອນິຫຕນ຺ຕິ ສຸຕ຺ຕາທິນາ. ອວິນິຈ຺ຉິຕນ຺ຕິ ‘‘ອາປຕ຺ຕິອນາປຕ຺ຕີ’’ຕິອາທິນາ. ‘‘ຕຕ຺ຖ ຊາຕກໍ ອຘິກຣຓໍ ອຸກ຺ໂກເຏຕິ…ເປ… ຕິຓວຕ຺ຖາຣກໍ ອຸກ຺ໂກເຏຕີ’’ຕິ ທເສວ ວຸຕ຺ຕາ. ‘‘ສມ຺ມຸຂາວິນຍປຏິຎ຺ຎາຕກຣຓເຍຠຸຍ຺ຍສິກາ ອວຸຕ຺ຕຕ຺ຕາ ອຸກ຺ໂກເຏຕຸໍ ນ ສກ຺ກາ, ກມ຺ມວາຈາປິ ເຕສໍ ນຕ຺ຖິ. ຕສ຺ມາ ເຕ ອຸກ຺ໂກເຏຕຸໍ ນ ສກ຺ກາຕິ ວທນ຺ຕີ’’ຕິ ລິຂິຕໍ. ປາຬິມຸຕ຺ຕກວິນິຈ຺ຉເຍເນວາຕິ ວິນຍລກ຺ຂຓໍ ວິນາ ເກວລໍ ຘມ຺ມເທສນາມຕ຺ຕວເສເນວາຕິ ອຕ຺ໂຖ. ຂນ຺ຘກໂຕ ວາ ປຣິວາຣໂຕ ວາ ອານີຕສຸຕ຺ເຕນ. ນິຊ຺ຌາເປນ຺ຕິ ທສ຺ເສນ຺ຕິ. ປຸພ຺ເພ ຘມ຺ມວິນເຍນ ວິນິຈ຺ຉິຕໍ ອຘິກຣຓໍ ອຸປຊ຺ຌາຍາທີນໍ ອຕ຺ຖາຍ ‘‘ອຘມ຺ມໍ ຘມ຺ໂມ’’ຕິອາທີນິ ທີເປຕ຺ວາຕິ ອຕ຺ໂຖ. ວິສມານິ ກາຍກມ຺ມາທີນິ ນິສ຺ສິຕຕ຺ຕາ ວິສມນິສ຺ສິໂຕ. ເອວໍ ເສເສສຸ.

ອຘິກຣຓນິທານາທິວຓ຺ຓນາ

໓໔໒-໓. ກິໍສມ຺ຠາຣນ຺ຕິ ກິໍປຣິກ຺ຂາຣໍ, ເອຕ຺ຖ ກິນ຺ຕິ ລິງ຺ຄສາມຎ຺ຎມພ຺ຍຍໍ. ປຸພ຺ເພ ອຸປ຺ປນ຺ນວິວາທໍ ນິສ຺ສາຍ ປຈ຺ຉາ ອຸປ຺ປຊ຺ຊນກວິວາໂທ ວິວາທນິທານໍ ນາມ. ອາປຕ຺ຕາຘິກຣຓປຈ຺ຈຍາ ຈຕສ຺ໂສ ອາປຕ຺ຕິໂຍ ອາປຊ຺ຊຕີຕິ ຠິກ຺ຂຸນີ ຊານໍ ປາຣາຊິກໍ ຘມ຺ມໍ ປຏິຈ຺ຉາເທຕິ ປາຣາຊິກໍ, ເວມຕິກາ ປຏິຈ຺ຉາເທຕິ ຖຸລ຺ລຈ຺ຈຍໍ, ຠິກ຺ຂຸ ສງ຺ຆາທິເສສໍ ປຏິຈ຺ຉາເທຕິ ປາຈິຕ຺ຕິຍໍ, ອາຈາຣວິປຕ຺ຕິໍ ປຏິຈ຺ຉາເທຕິ ທຸກ຺ກຏໍ. ປຸພ຺ເພ ກຕອຸກ຺ເຂປນິຍາທິກິຈ຺ຈໍ ນິສ຺ສາຍ ອຸປ຺ປຊ຺ຊນກກິຈ຺ຈານໍ. ກີທິສານໍ? ສມນຸຠາສນາທີນໍ ວເສນ. ຕໍ ຫີຕິ ອຘິກຣຓໍ.

໓໔໔. ອຘິກຣເຓສຸ ເຍນ ອຘິກຣເຓນ ສມ຺ມນ຺ຕິ, ຕໍ ທສ຺ເສຕຸນ຺ຕິ ຍທາ ອຘິກຣເຓຫິ ສມ຺ມນ຺ຕິ, ຕທາ ກິຈ຺ຈາຘິກຣເຓເນວ ສມ຺ມນ຺ຕິ, ນ ອຎ຺ເຎຫີຕິ ທສ຺ສນຕ຺ຖໍ ວຸຕ຺ຕໍ, ນ ເອກນ຺ຕໂຕ ອຘິກຣເຓເນວ ສມ຺ມນ຺ຕີຕິ ທສ຺ສນຕ຺ຖໍ.

໓໔໘. ອາປຕ຺ຕາຘິກຣເຓ ສງ຺ໂຆ ວິວທຕີຕິ ອາປຕ຺ຕານາປຕ຺ຕີຕິ ເອວໍ.

໓໕໓. ສມຸຏ຺ຐານາຠາວໂຕ ສມ຺ມຸຂາວິນເຍ ກມ຺ມສ຺ສ ກິຣິຍາກຣຓມິຈ຺ຈາທິນາ ອວິຠຊິຕ຺ວາວ ສຕິວິນຍາທີນໍ ຉນ຺ນໍເຍວ ຉ ສມຸຏ຺ຐານານິ ວິຠຕ຺ຕານິ. ຕໍ ກສ຺ມາ? ກມ຺ມສງ຺ຄຫາຠາເວນ, ສຕິວິນຍາທີນໍ ວິຍ ສງ຺ຆສມ຺ມຸຂຕາທີນໍ ກິຈ຺ຈຍຕາ ນາມ ນຕ຺ຖີຕິ ອຘິປ຺ປາໂຍ.

ອຘິກຣຓເຠທວຓ຺ຓນາ ນິຏ຺ຐິຕາ.