ອນ຺ຕຣເປຍ຺ຍາລໍ

ກຕິປຸຈ຺ຉາວາຣວຓ຺ຓນາ

໒໗໑. ປຏິນິທ຺ເທສນ຺ຕິ ປຸນປ຺ປຸນໍ ນິທ຺ທິສນໍ. ອາປຕ຺ຕິກ຺ຂນ຺ເຘຫິ ວິນີຕານິ ສໍວຣານີຕິ ອຕ຺ໂຖ. ເອເຕຫິ ອາປຕ຺ຕິກ຺ຂນ຺ເຘຫິ. ‘‘ອາຣກາ’’ຕິ ນິວຕ຺ຕິອຕ຺ເຖນ ວຸຕ຺ຕຕ຺ຕາ ຕໍ ປຸນ ສຣູເປນ ວຕ຺ຕຸກາໂມ ‘‘ຠຸສາ ວາ’’ຕິ ອາຫ. ‘‘ເຄຫໍ ຘູເມນ ປຸຓ຺ຓໍ ອາຘູມິຕ’’ນ຺ຕິອາທີສຸ ວິຍ ຣາຄາທິເວຣໍ ມຓຕິ ວິນາເສຕິ. ເອຕາຍາຕິ ວິຣຕິຍາ. ເວລ ຈລເນ. ນິຍ຺ຍານໍ ມຄ຺ຄໍ ສິໂນຕິ ພນ຺ຘຕີຕິ ເສຕຸ. ‘‘ເສຕຸຆາໂຕຕິ ວີຕິກ຺ກມປຏິປກ຺ຂຠູຕາ ວິຣຕິ, ຕທຕ຺ຖນິພ຺ພຕ຺ຕິກຣຈິຕ຺ຕຸປ຺ປາໂທ ວາ’’ຕິ ວຸຕ຺ຕໍ. ‘‘ຘມ຺ມສ຺ສວນຄ຺ຄນ຺ຕິ ຘມ຺ມໍ ສຸຓນ຺ຕານໍ ສມູຫ’’ນ຺ຕິ ລິຂິຕໍ. ສເຈ ນ ຄຈ຺ຉຕິ, ວິກ຺ຂິຕ຺ໂຕ ວາ ນິສີທຕິ. ກາຍປ຺ປາຄພ຺ຠິຍໍ ກາຍທຸຈ຺ຈຣິຕໍ. ‘‘ປມາເທ’’ຕິ ວຕ຺ວາ ຕທຕ຺ຖໍ ທສ຺ເສຕຸໍ ‘‘ສຕິວິປ຺ປວາເສ’’ຕິ ວຸຕ຺ຕໍ.

໒໗໒-໓. ສປຣສນ຺ຕາເນ ວາຕິ ສສນ຺ຕາເນ ວາ ປຣສນ຺ຕາເນ ວາ. ຕຖາ ວິວທນ຺ຕາ ປນາຕິ ເຠທກຣວຕ຺ຖູນິ ນິສ຺ສາຍ ວິວທນ຺ຕາ. ອຸຠເຍຫິປີຕິ ເຖຣນເວຫິ. ນນ຺ຕິ ເມຕ຺ຕໍ ກາຍກມ຺ມໍ. ເຍສໍ ປຸຄ຺ຄລານໍ ປິຍໍ ກໂຣຕິ, ເຕສໍ ເມຕ຺ຕາກາຍກມ຺ມສງ຺ຂາໂຕ ຘມ຺ໂມ. ເອຕ຺ຕກນ຺ຕິ ອາມິສວິຠຕ຺ຕິທສ຺ສນໍ. ອສຸກສ຺ສ ຈາຕິ ປຸຄ຺ຄລວິຠຕ຺ຕິທສ຺ສນໍ. ‘‘ທຸສ຺ສີລສ຺ສ ອທາຕຸມ຺ປິ ວຏ຺ຏຕີ’’ຕິ ວຸຕ຺ຕຕ຺ຕາ ເອວ ອລຊ຺ຊິປຣິໂຠໂຄ ວາຣິໂຕ. ສພ຺ເພສໍ ທາຕພ຺ພເມວາຕິ ສນ຺ນິຏ຺ຐາເນນ ອຊານນ຺ເຕນ ວິຠາຄໍ ອກຕ຺ວາ ທາຕພ຺ພຠາວໍ ທີເປຕີຕິ ເອເກ. ‘‘ສພ຺ເພສໍ ທາຕພ຺ພເມວາ’’ຕິ ວຸຕ຺ຕໍ ອຏ຺ຐກຖາສຸ. ຕຕ຺ຖ ‘‘ອລຊ຺ຊິອຸກ຺ຂິຕ຺ຕການໍ ປຣິໂຠຄສີເສນ ສຫຕ຺ຖາ ນ ທາຕພ຺ພໍ, ທາເປຕພ຺ພນ຺ຕິ ອປເຣ’’ຕິ ວຸຕ຺ຕໍ. ວິຈິນິຕ຺ວາ ທານໍ ວິເຈຍ຺ຍ ທານໍ. ຍສ຺ມາ ອຍໍ ວິເສໂສ ກາຕພ຺ໂພເຍວາຕິ ອຍໍ ກໂຣຕິ, ຕສ຺ມາ ປຸຄ຺ຄລວິຠາໂຄ ນ ກໂຕຕິ ສມ຺ພນ຺ໂຘ. ປກຕິວຓ຺ເຓນ ວິສຠາຄວຓ຺ເຓນ. ‘‘ອິທໍ ນາມ ອາປນ຺ໂນ’’ຕິ ປເຣຫິ ອປຣາມສິຕພ຺ພໂຕ ອປຣາມຏ຺ຐານິ. ອນຸໂລເມຫິ ຄຫິຕສງ຺ຂາຣາຣມ຺ມເຓຫິ ນິພ຺ພານາຣມ຺ມຓໍ ກຕ຺ວາ ນິຍ຺ຍາຕິ.

ຉອາປຕ຺ຕິສມຸຏ຺ຐານວາຣາທິວຓ຺ຓນາ

໒໗໖. ‘‘ປຐເມນ ອາປຕ຺ຕິສມຸຏ຺ຐາເນນ ທຸພ຺ຠາສິຕໍ ອາປຊ຺ເຊຍ຺ຍາຕິ ນ ຫີຕິ ວຕ຺ຕພ຺ພ’’ນ຺ຕິ ວຸຕ຺ຕໍ ວາຈາຈິຕ຺ຕວເສເນວາປຊ຺ຊິຕພ຺ພໂຕ.

໒໗໗. ກຸຏິໍ ກໂຣຕີຕິ ເອຕ຺ຖ ສຎ຺ຈຣິຕ຺ຕມວຕ຺ວາ ທຸກ຺ກຏຖຸລ຺ລຈ຺ຈຍສງ຺ຆາທິເສສານໍ ເອກສ຺ມິໍ ວຕ຺ຖຸສ຺ມິໍ ປຏິປາຏິຍາ ອຸປ຺ປຕ຺ຕິທສ຺ສນຕ຺ຖມິທໍ ວຸຕ຺ຕໍ. ນ ຫິ ສຎ຺ຈຣິຕ຺ເຕ ເອວ ອາປຊ຺ຊຕິ. ‘‘ອິມິນາ ປນ ນເຍນ ສພ຺ພຕ຺ຖ ປຏິປາຏິຍາ ອຄ຺ຄຫເຓ ກາຣຓໍ ເວທິຕພ຺ພ’’ນ຺ຕິ ວຸຕ຺ຕໍ.

໒໘໓. ວິເວກທສ຺ສິນາຕິ ຕທງ຺ຄວິເວກາທິປຎ຺ຈວິຘວິເວກທສ຺ສິນາ.

໒໘໔. ອຕ຺ຕໂນ ທຸຏ຺ຐຸລ຺ລນ຺ຕິ ສງ຺ຆາທິເສສໍ.

໒໘໘. ວິວາທາຘິກຣຓປຈ຺ຈຍາຕິ ອຎ຺ເຎຫິ, ອຕ຺ຕນາ ວາ ປຸພ຺ພຠາເຄ ອາປນ຺ນປຈ຺ຈຍາຕິ ອຕ຺ໂຖ. ໂອມສຕີຕິ ‘‘ອຍໍ ຘມ຺ໂມ, ອຍໍ ວິນໂຍ’’ຕິ ວິວທນ຺ໂຕ ‘‘ຕ຺ວໍ ກິໍ ຊານາສີ’’ຕິອາທິນາ ໂອມສຕິ. ຕີຫິ ສມເຖຫິ ສມ຺ມຸຂາວິນຍປຏິຎ຺ຎາຕກຣຓຕິຓວຕ຺ຖາຣເກຫິ. ‘‘ສມ຺ມຸຂາວິນຍຎ຺ເຈຕ຺ຖ ສພ຺ພຕ຺ຖ ອິຈ຺ຉິຕພ຺ພໂຕ ‘ສມ຺ມຸຂາວິນເຍນ ເຈວ ປຏິຎ຺ຎາຕກຣເຓນ ຈາ’ຕິອາທິນາ ທ຺ວີຫິປິ ໂຍຊິຕໍ. ເອສ ນໂຍ ສພ຺ພຕ຺ຖາ’’ຕິ ວຸຕ຺ຕໍ.

໒໙໑. ຐເປຕ຺ວາ ສຕ຺ຕ ອາປຕ຺ຕິໂຍຕິ ເອຕ຺ຖ ‘‘ກິຎ຺ຈາປິ ອວເສສາ ນຕ຺ຖິ, ຕຖາປິ ປຏິປາຏິຍາ ປາຏວຊນນຕ຺ຖໍ ປຸຈ຺ຉາ ກຕາ’’ຕິ ວຸຕ຺ຕໍ.

ອນ຺ຕຣເປຍ຺ຍາລໍ ນິຏ຺ຐິຕໍ.