໙. ຉຕ຺ຕຸປາຫນວຄ຺ຄວຓ຺ຓນາ

໑໑. ເອກາທສມາທິສິກ຺ຂາປທວຓ຺ຓນາ

໑໒໑໔. ອຸປຈາຣໍ ສນ຺ຘາຍ ກຖິຕນ຺ຕິ ‘‘ທ຺ວາທສຫຕ຺ຖໍ ອຸປຈາໂຣ’’ຕິ ລິຂິຕໍ.

໑໒໒໑. ສຸຕ຺ຕນ຺ເຕ ໂອກາສໍ ກາຣາເປຕ຺ວາ ວິນຍໍ ວາ ອຠິຘມ຺ມໍ ວາ ປຸຈ຺ຉຕີຕິ ເອຕ຺ຖ ຈ ຕີຓິ ປິຏການິ ອຕ຺ຕໂນ ອຕ຺ຕໂນ ນາເມນ ວຸຕ຺ຕານີຕິ ກຕ຺ວາ ອຠິຘມ຺ໂມ ພຸທ຺ເຘນ ຠາສິໂຕ ເອວາຕິ ທີປິຕໍ ໂຫຕິ.

໑໒໒໔-໕. ຖໂນ ຈ ອຸທໂຣ ຈ ຖນຸທຣາ. ‘‘ສໍກຈ຺ຈິກາຍ ປມາຓໍ ຕິຣິຍໍ ທິຍຑ຺ຒຫຕ຺ຖາ’’ຕິ ໂປຣາຓຄຓ຺ຐິປເທ ວຸຕ຺ຕໍ. ‘‘ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣໍ ໂອກ຺ກມນ຺ຕິຍາ’’ຕິ ພຫູສຸ ໂປຕ຺ຖເກສຸ, ສງ຺ຆາທິເສສກຓ຺ເຑ ວິຍ ‘‘ອຸປຈາຣໍ ອຕິກ຺ກມນ຺ຕິຍາ’’ຕິ ປາໂຐ ອປ຺ປເກສຸ, ໂສວ ປາໂຐ. ອຏ຺ຐກຖາຍໍ ‘‘ປຣິກ຺ເຂປໍ ອຕິກ຺ກມນ຺ຕິຍາຕິ ເອເກນ ປາເທນ ອຕິກ຺ກນ຺ເຕ ທຸກ຺ກຏໍ, ທຸຕິເຍນ ປາຈິຕ຺ຕິຍໍ. ອຸປຈາເຣປິ ເອເສວ ນໂຍ’’ຕິ ວຈນມ຺ປິ ‘‘ອຸປຈາຣໍ ອຕິກ຺ກມນ຺ຕິຍາ’’ຕິ ປາໂຐຕິ ທີເປຕີຕິ ໂນ ຕກ຺ໂກຕິ ອາຈຣິໂຍ.

ເອກາທສມາທິສິກ຺ຂາປທວຓ຺ຓນາ ນິຏ຺ຐິຕາ.

ຉຕ຺ຕຸປາຫນວຄ຺ຄວຓ຺ຓນາ ນິຏ຺ຐິຕາ.

ນິຄມນວຓ຺ຓນາ

ຄິຣຄ຺ຄສມຊ຺ຊາທີນິ ‘‘ອຈິຕ຺ຕການິ ໂລກວຊ຺ຊານີ’’ຕິ ວຸຕ຺ຕຕ຺ຕາ ‘‘ນຈ຺ຈ’’ນ຺ຕິ ວາ ‘‘ຄນ຺ໂຘ’’ຕິ ວາ ອຊານິຕ຺ວາປິ ທສ຺ສເນນ, ວິລິມ຺ປເນນ ວາ ອາປຊ຺ຊນໂຕ ວຕ຺ຖຸອຊານນຈິຕ຺ເຕນ ອຈິຕ຺ຕການິ. ‘‘ນຈ຺ຈ’’ນ຺ຕິ ວາ ‘‘ຄນ຺ໂຘ’’ຕິ ວາ ຊານິຕ຺ວາ ປສ຺ສນ຺ຕິຍາ, ວິລິມ຺ປນ຺ຕິຍາ ຈ ອກຸສລຕ຺ຕາ ເອວ ໂລກວຊ຺ຊານິ. ໂຈຣິວຸຏ຺ຐາປນາທີນິ ‘‘ໂຈຣີ’’ຕິອາທິນາ ວຕ຺ຖຸໍ ຊານິຕ຺ວາ ກຣເຓ ເອວ ອາປຕ຺ຕິສພ຺ຠາວໂຕ ສຈິຕ຺ຕການິ. ອຸປສມ຺ປທາທີນໍ ເອກນ຺ເຕນ ອກຸສລຈິຕ຺ເຕເນວ ອກຕ຺ຕພ຺ພຕ຺ຕາ ປຓ຺ຓຕ຺ຕິວຊ຺ຊານິ. ‘‘ອິຘ ສຈິຕ຺ຕກາຈິຕ຺ຕກຕາ ປຓ຺ຓຕ຺ຕິຊານນາຊານນຕາຍ ອຄ຺ຄເຫຕ຺ວາ ວຕ຺ຖຸຊານນາຊານນຕາຍ ຄເຫຕພ຺ພາ’’ຕິ ລິຂິຕໍ. ອນຸຄຓ຺ຐິປເທ ປນ ‘‘ຄິຣຄ຺ຄສມຊ຺ຊາທີນິ ‘ອຈິຕ຺ຕການິ ໂລກວຊ຺ຊານີ’ຕິ ວຸຕ຺ຕຕ຺ຕາ ‘ນຈ຺ຈ’ນ຺ຕິ ວາ ‘ສງ຺ຆາຓີ’ຕິ ວາ ‘ຄນ຺ໂຘ’ຕິ ວາ ຕສ຺ສ ນາມວເສນ ອຊານິຕ຺ວາ ມາຍາກາຣສ຺ສ ມາຍານິ ສີສຏ຺ຐິອາທີນິ ປຏິສງ຺ຂາຍ ປສ຺ສນ຺ຕິຍາ, ອກ຺ຂມາລາທິອຕ຺ຖາຍ ສງ຺ຆາຓິໍ ກຏິຍາ ພນ຺ຘນ຺ຕິຍາ, ‘ເສທຄນ຺ຘໍ ອປເນຕ຺ວາ ພຸທ຺ຘປູຊໍ ກຣິສ຺ສາມີ’ຕິ ອຸປ຺ປນ຺ເນນ ຈິຕ຺ເຕນ ຄນ຺ຘໍ ວິລິມ຺ເປຕ຺ວາ ນຫາຍນ຺ຕິຍາ ຈ ອາປຕ຺ຕິສພ຺ຠາວໂຕ ນາເມນ ສທ຺ຘິໍ ນາມວເສນ ວາ ວຕ຺ຖຸສ຺ສ ອຊານນຈິຕ຺ເຕນ ອຈິຕ຺ຕການິ ນາມ. ນ ອນ຺ຘກາເຣ ‘ກຏິສຸຕ຺ຕມິທ’ນ຺ຕິ ສຎ຺ຎາຍ ສງ຺ຆາຓິໍ ຄເຫຕ຺ວາ ກຏິຍໍ ຘາຣຓກາເລ, ມຕ຺ຕິກາສຎ຺ຎາຍ ຈ ຄນ຺ຘໍ ຄເຫຕ຺ວາ ວິລິມ຺ປນກາເລ ອາປຕ຺ຕິສພ຺ຠາວໂຕ ‘ອຈິຕ຺ຕການີ’ຕິ ວຕ຺ຕພ຺ພານິ. ຕສ຺ມິໍ ກາເລ ອນາປຕ຺ຕິ, ເຕເນວ ສງ຺ຆາຓິຍາ ອສງ຺ຆາຓິສຎ຺ຎາວາເຣປິ ‘ອາປຕ຺ຕິ ປາຈິຕ຺ຕິຍສ຺ສາ’ຕິ ປາຬິ ນ ວຸຕ຺ຕາ. ຍຖາ ‘ເຂຕ຺ຕອາພາຘປຈ຺ຈຍາ, ກຏິສຸຕ຺ຕກໍ ຘາເຣຕີ’ຕິ ວຈນໂຕ ວິນາປິ ອກຸສເລນ ສງ຺ຆາຓິອາທີນິ ສກ຺ກາ ຘາເຣຕຸນ຺ຕິ ສິທ຺ຘໍ, ເອວໍ ອາພາຘປຈ຺ຈຍາ ວິນາປິ ອກຸສເລນ ນ ສກ຺ກາ ສຸຣໍ ປາຕຸນ຺ຕິ ສິທ຺ຘໍ ‘ອນາປຕ຺ຕິ ອາພາຘປຈ຺ຈຍາ ມຊ຺ຊໍ ປິວຕີ’ຕິ ປາຬິຍາ ອຠາວໂຕ. ອກຸສເລນ ວິນາ ມຘຸປຸຓ຺ຓມຸຏ຺ຐິຍໍ ປກ຺ຂິຕ຺ຕມຊ຺ຊສ຺ສ ອຊ຺ໂຌຫຣຓກາລາທີສຸ ສຸຣາປານາປຕ຺ຕິໍ ອາປຊ຺ຊຕີຕິ ຈ ສິທ຺ຘໍ ‘ມຊ຺ເຊ ອມຊ຺ຊສຎ຺ຎີ ປິວຕິ, ອາປຕ຺ຕິ ປາຈິຕ຺ຕິຍສ຺ສາ’ຕິ (ປາຈິ. ໓໒໘) ວຸຕ຺ຕຕ຺ຕາ. ກິໍພຫຸນາ, ກາມໂຠຄສຎ຺ຎາຍ ສທ຺ຘິໍ ‘ສງ຺ຆາຓີ’ຕິ ຈ ‘ຄນ຺ໂຘ’ຕິ ຈ ຊານິຕ຺ວາ ວິນາ ອນາປຕ຺ຕິກາຣເຓນ ຘາເຣນ຺ຕິຍາ ເອກນ຺ຕາກຸສລຕ຺ຕາ ໂລກວຊ຺ຊານິ ນາມ ວຸຈ຺ຈນ຺ຕິ. ອິມິນາ ອຸປາເຍນ ເສເສສຸປິ ນໂຍ ເນຕພ຺ໂພ. ເອຕ຺ຖ ສຸຣາປານາຘິກາເຣ ອຸປຕິສ຺ສຕ຺ເຖຣວາໂທ’’ຕິ ວຸຕ຺ຕໍ. ອສໍກຈ຺ຈິກສິກ຺ຂາປເທ ‘‘ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣໍ ໂອກ຺ກມນ຺ຕິຍາຕິ ປາໂຐ’’ຕິ ຈ ‘‘ປຓີຕໂຠຊນວິຎ຺ຎຕ຺ຕິ, ອເຈລກສິກ຺ຂາປທໍ, ນິມນ຺ຕິຕສ຺ສ ຈາຣິຕ຺ຕາປຊ຺ຊນໍ, ທຸຏ຺ຐຸລ຺ລປ຺ປຏິຈ຺ຉາທນໍ, ອູນວີສຕິວສ຺ສຸປສມ຺ປທໍ, ມາຕຸຄາເມນ ສທ຺ຘິໍ ສໍວິຘາຍ ອທ຺ຘານຄມນໍ, ຣາຊນ຺ເຕປຸຣປ຺ປເວສນໍ, ສນ຺ຕໍ ຠິກ຺ຂຸໍ ອນາປຸຈ຺ຉາ ວິກາເລ ຄາມປ຺ປເວສນໍ, ນິສີທນໍ, ວສ຺ສິກສາຏິກນ຺ຕິ ປາໂຐ’’ຕິ ຈ ວຸຕ຺ຕໍ.

ນິຄມນວຓ຺ຓນາ ນິຏ຺ຐິຕາ.

ປາຈິຕ຺ຕິຍກຓ຺ຑວຓ຺ຓນາ ນິຏ຺ຐິຕາ.

ອຸຠໂຕວິຠງ຺ຄຏ຺ຐກຖາວຓ຺ຓນາ ນິຏ຺ຐິຕາ.

ນໂມ ຕສ຺ສ ຠຄວໂຕ ອຣຫໂຕ ສມ຺ມາສມ຺ພຸທ຺ຘສ຺ສ