໒. ທຸຕິຍວຄ຺ໂຄ

໒໓-໓໓. ອສງ຺ຂຕສຸຕ຺ຕາທິວຓ຺ຓນາ

໓໗໗-໔໐໙. ຕຕ຺ຖ ຈ ນຕ຺ຖິ ເອຕ຺ຖ ຕຓ຺ຫາສງ຺ຂາຕໍ ນຕໍ, ນຕ຺ຖິ ເອຕສ຺ມິໍ ວາ ອຘິຄເຕ ປຸຄ຺ຄລຠາໂວຕິ ອນຕໍ. ອນາສວນ຺ຕິ ເອຕ຺ຖາປິ ເອເສວ ນໂຍ. ສຈ຺ຈຘມ຺ມຕາຍ ສຈ຺ຈໍ. ວຏ຺ຏທຸກ຺ຂໂຕ ປາຣເມຕີຕິ ປາຣໍ. ສຓ຺ຫຏ຺ເຐນາຕິ ສຸຂຸມຏ຺ເຐນ ນິປຸຓໍ. ຕໂຕ ເອວ ທຸທ຺ທສຕາຍ. ອຊຊ຺ຊຣໍ ນິຈ຺ຈສຠາວຕ຺ຕາ. ນຕ຺ຖິ ເອຕສ຺ສ ນິທສ຺ສນນ຺ຕິ ວາ ອນິທສ຺ສນໍ. ເອຕສ຺ມິໍ ອຘິຄເຕ ນຕ຺ຖິ ສໍສາເຣ. ປປຎ຺ຈນ຺ຕິ ວາ ນິປ຺ປປຎ຺ຈໍ.

ເອຕສ຺ມິໍ ອຘິຄເຕ ປຸຄ຺ຄລສ຺ສ ມຣຓໍ ນຕ຺ຖີຕິ ວາ ອມຕໍ. ອຕປ຺ປກຏ຺ເຐນ ວາ ປຓີຕໍ. ສຸຂເຫຕຸຕາຍ ວາ ສິວໍ. ຕຓ຺ຫາ ຂີຍນ຺ຕິ ເອຕ຺ຖາຕິ ຕຓ຺ຫກ຺ຂຍໍ.

ອຎ຺ຎສ຺ສ ຕາທິສສ຺ສ ອຠາວໂຕ ວິມ຺ຫາປນີຍຕາຍ ອຠູຕເມວາຕິ. ກຸໂຕຈິ ປຈ຺ຈຍໂຕ ອນິພ຺ພຕ຺ຕເມວ ຫຸຕ຺ວາ ຠູຕໍ ວິຊ຺ຊມານໍ. ເຕນາຫ ‘‘ອຊາຕໍ ຫຸຕ຺ວາ ອຕ຺ຖີ’’ຕິ. ນຕ຺ຖິ ເອຕ຺ຖ ທຸກ຺ຂນ຺ຕິ ນິທ຺ທຸກ຺ຂໍ, ຕສ຺ສ ຠາໂວ ນິທ຺ທຸກ຺ຂຕ຺ຕໍ. ຕສ຺ມາ ອນີຕິກໍ ອີຕິຣຫິຕໍ. ວານໍ ວຸຈ຺ຈຕິ ຕຓ຺ຫາ, ຕທຠາເວນ ນິພ຺ພານໍ. ພ຺ຍາພຊ຺ຌໍ ວຸຈ຺ຈຕິ ທຸກ຺ຂໍ, ຕທຠາເວນ ອພ຺ຍາພຊ຺ຌໍ. ປຣມຕ຺ຖໂຕ ສຈ຺ຈໂຕ ສຸທ຺ຘິຠາເວນ. ກາມາ ເອວ ປຸຖຸຊ຺ຊເນຫິ ອລ຺ລີຍິຕພ຺ພໂຕ ອາລຍາ. ເອສ ນໂຍ ເສເສສຸປິ. ປຕິຏ຺ຐຏ຺ເຐນາຕິ ປຕິຏ຺ຐາຠາເວນ ວຏ຺ຏທຸກ຺ຂໂຕ ມຸຈ຺ຈິຕຸກາມານໍ ທີປສທິສໍ ໂອເຆຫິ ອນຊ຺ໂຌຕ຺ຖຣຓີຍຕ຺ຕາ. ອລ຺ລີຍິຕພ຺ພຍຸຕ຺ຕຏ຺ເຐນາຕິ ອລ຺ລີຍິຕຸໍ ອຣຫຠາວໂຕ. ຕາຍນຏ຺ເຐນາຕິ ສປຣຕາຍນຏ຺ເຐນ. ຠຍສຣຓຏ຺ເຐນາຕິ ຠຍສ຺ສ ຫິໍສນຏ຺ເຐນ. ເສຏ຺ຐໍ ອຸຕ຺ຕມໍ. ຄຕີຕິ ຄນ຺ຘພ຺ພຏ຺ຐານໍ.

ອສງ຺ຂຕສຸຕ຺ຕາທິວຓ຺ຓນາ ນິຏ຺ຐິຕາ.

ອສງ຺ຂຕສໍຍຸຕ຺ຕວຓ຺ຓນາ ນິຏ຺ຐິຕາ.