໑໐. ອພ຺ຍາກຕສໍຍຸຕ຺ຕໍ

໑. ເຂມາສຸຕ຺ຕວຓ຺ຓນາ

໔໑໐. ພິມ຺ພິສາຣສ຺ສ ອຸປາສິກາຕິ ພິມ຺ພິສາຣສ຺ສ ໂອໂຣຘຠູຕາ ອຸປາສິກາ. ປຓ຺ຑິຈ຺ຈໍ ສິກ຺ຂິຕຠາເວນ. ເວຍ຺ຍຕ຺ຕິຍໍ ວິສາຣທຠາເວນ. ວິສາຣທາ ນາມ ຕິເຫຕຸກປຏິສນ຺ຘິສິທ຺ຘສາຠາວິກປຎ຺ຎາ, ຕາຍ ສມນ຺ນາຄຕາ.

ອຈ຺ຉິທ຺ທກຄຓນາຍ ກຸສໂລຕິ ນວນ຺ຕຄຓນາຍ ກຸສໂລ. ອງ຺ຄຸລິມຸທ຺ທາຍ ຄຓນາຍ ກຸສໂລຕິ ອງ຺ຄຸລິກາຍ ເອວ ຄຓນາຍ ກຸສໂລ ເສຍ຺ຍຖາປິ ປາທສິກາ. ປິຓ຺ຑຄຓນາຍາຕິ ສງ຺ກລນປຏຸປ຺ປນ຺ນກາຣິໂນ ປິຓ຺ຑວເສນ ຄຓນາ. ຕຖາຄໂຕຕິ ຂີຓາສໂວ, ຕຖາຄຕໍ ສນ຺ຘາຍ ປຸຈ຺ຉຕີຕິ ຂີຓາສໂວຕິ ຈສ຺ສ ອຣຫຕ຺ຕຜລວສິຠາວິຕຂນ຺ເຘ ອຸປາທາຍ ອຍໍ ປຎ຺ຎຕ຺ຕິ ໂຫຕິ. ເຕສຸ ຂນ຺ເຘສຸ ສຕິ ຂີຓາສວາ ສຕ຺ຕສງ຺ຂາຕາ ໂຫນ຺ຕີຕິ ໂວຫາເຣນ ປຎ຺ຎເປຕຸໍ ສກ຺ກາ ຠເວຍ຺ຍ, ອສນ຺ເຕສຸ ນ ສກ຺ກາ, ຕສ຺ມາ ປຣໍ ມຣຓາຕິ ວຸຕ຺ຕຕ຺ຕາ ເຕສໍ ອຠາວາ ‘‘ອພ຺ຍາກຕເມຕ’’ນ຺ຕິ ວຸຕ຺ຕໍ. ຍທິ ເອວໍ ເຕສໍ ອຠາວໂຕ ‘‘ນ ໂຫຕິ ຕຖາຄໂຕ ປຣໍ ມຣຓາ’’ຕິ ປຸຏ຺ຐາຍ ‘‘ອາມາ’’ຕິ ປຏິຊານິຕພ຺ພາ ສິຍາ, ຕໍ ປນ ສຕ຺ຕສງ຺ຂາຕສ຺ສ ປຸຈ຺ຉິຕຕ຺ຕາ ນ ປຏິຎ຺ຎາຕນ຺ຕິ ທຏ຺ຐພ຺ພໍ. ເຍນ ຣູເປນາຕິ ສຕ຺ຕຕຖາຄເຕ ວຸຕ຺ຕຣູປໍ ສພ຺ພຎ຺ຎຸຕຖາຄເຕ ປຏິກ຺ຂິປິຕຸໍ ‘‘ຕໍ ຣູປ’’ນ຺ຕິອາທິ ວຸຕ຺ຕໍ. ຍໍ ອຸປາທາຍາຕິ ຍໍ ຂນ຺ຘປຎ຺ຈກໍ ອຸປາທາຍ. ຕທຠາເວນາຕິ ຕສ຺ສ ຂນ຺ຘປຎ຺ຈກສ຺ສ ອຠາເວນ. ຕສ຺ສາ ປຎ຺ຎຕ຺ຕິຍາຕິ ສຕ຺ຕປຎ຺ຎຕ຺ຕິຍາ ອຠາວໍ. ນິຣຸທ຺ຘໍ ນ ນິທສ຺ເສຕິ.

ເຂມາຍ ເຖຣິຍາ ວຸຕ຺ຕໍ ປຐມໍ ສຸຕ຺ຕໍ ຠຄວໂຕ ເສຏ຺ຐຕ຺ຖທີປນໂຕ ອຄ຺ຄປທາວຈຣໍວ ໂຫຕີຕິ ວຸຕ຺ຕໍ ‘‘ອຄ຺ຄປທສ຺ມິ’’ນ຺ຕິ.

ເຂມາສຸຕ຺ຕວຓ຺ຓນາ ນິຏ຺ຐິຕາ.

໒. ອນຸຣາຘສຸຕ຺ຕວຓ຺ຓນາ

໔໑໑. ອິຘ ສຬາຍຕນວຄ຺ເຄ ສງ຺ຄາຍນວເສນ ສງ຺ຄີຕິກາເຣຫິ ວຸຕ຺ຕໍ.

໓-໘. ປຐມສາຣິປຸຕ຺ຕໂກຏ຺ຐິກສຸຕ຺ຕາທິວຓ຺ຓນາ

໔໑໒-໔໑໗. ຣູປມຕ຺ຕນ຺ຕິ ເອຕ຺ຖ ມຕ຺ຕ-ສທ຺ໂທ ວິເສສນິວຕ຺ຕິອຕ຺ໂຖ. ໂກ ປນ ໂສ ວິເສໂສຕິ? ໂຍ ພາຫິຣປຣິກປ຺ປິໂຕ ອິຘ ຕຖາຄໂຕຕິ ວຸຈ຺ຈມາໂນ ອຕ຺ຕາ. ອນຸປລພ຺ຠິຍສຠາໂວຕິ ອນຸປລພ຺ຠິຍຕ຺ຕາ.

ປຐມສາຣິປຸຕ຺ຕໂກຏ຺ຐິກສຸຕ຺ຕາທິວຓ຺ຓນາ ນິຏ຺ຐິຕາ.

໙. ກຸຕູຫລສາລາສຸຕ຺ຕວຓ຺ຓນາ

໔໑໘. ນານາວິຘນ຺ຕິ ຕໍຕໍທິຏ຺ຐິວາທປຏິສໍຍຸຕ຺ຕໍ ອຎ຺ຎມ຺ປິ ວາ ນານາວິຘໍ ຕິຣຈ຺ຉານກຖໍ. ພຫູນໍ ກຸຕູຫລຸປ຺ປຕ຺ຕິຏ຺ຐານໂຕຕິ ໂຍຊນາ. ຍາວ ອາຠສ຺ສຣພ຺ຣຫ຺ມໂລກາ ຄຈ຺ຉຕີຕິ ອຄ຺ຄິນາ ກປ຺ປວຸຏ຺ຐານກາເລ ຄຈ຺ຉຕິ, ຕໍ ສນ຺ຘາຍ ວຸຕ຺ຕໍ. ອິມຎ຺ຈ ກາຍນ຺ຕິ ອິມໍ ຣູປກາຍໍ. ຈຸຕິຈິຕ຺ເຕນ ນິກ຺ຂິປຕີຕິ ຈຸຕິຈິຕ຺ເຕນ ຠິຊ຺ຊມາເນນ ນິກ຺ຂິປຕິ. ຈຸຕິຈິຕ຺ຕສ຺ສ ຫິ ໂອຣໍ ສຕ຺ຕຣສມສ຺ສ ຈິຕ຺ຕສ຺ສ ອຸປ຺ປາທກ຺ຂເຓ ອຸປ຺ປນ຺ນໍ ກມ຺ມຊຣູປໍ ຈຸຕິຈິຕ຺ເຕນ ສທ຺ຘິໍ ນິຣຸຊ຺ຌຕິ, ຕໂຕ ປຣໍ ກມ຺ມຊຣູປໍ ນ ອຸປ຺ປຊ຺ຊຕິ. ຍທິ ອຸປ຺ປຊ຺ເຊຍ຺ຍ, ມຣຓໍ ນ ສິຍາ, ຈຸຕິຈິຕ຺ຕໍ ຣູປໍ ນ ສມຸຏ຺ຐາເປຕິ, ອາຫາຣຊສ຺ສ ຈ ອສມ຺ຠໂວ ເອວ, ອຸຕຸຊໍ ປນ ວຕ຺ຕເຕວ. ຍສ຺ມາ ປຏິສນ຺ຘິກ຺ຂເຓ ສຕ຺ໂຕ ອຎ຺ຎຕຣຓາຍ ອຸປປຊ຺ຊຕິ ນາມ, ຈຸຕິກ຺ຂເຓ ປຏິສນ຺ຘິຈິຕ຺ຕໍ ອລທ຺ຘໍ ອຎ຺ຎຕຣຓາຍ, ຕສ຺ມາ ວຸຕ຺ຕໍ ‘‘ຈຸຕິກ຺ຂເຓ…ເປ… ໂຫຕີ’’ຕິ.

ກຸຕູຫລສາລາສຸຕ຺ຕວຓ຺ຓນາ ນິຏ຺ຐິຕາ.

໑໐. ອານນ຺ທສຸຕ຺ຕວຓ຺ຓນາ

໔໑໙. ເຕສໍ ລທ຺ຘິຍາຕິ ເຕສໍ ສສ຺ສຕວາທານໍ ລທ຺ຘິຍາ ສທ຺ຘິໍ ເອຕໍ ‘‘ອຕ຺ຖຕ຺ຕາ’’ຕິ ວຈນໍ ເອກໍ ອຠວິສ຺ສ. ຕໂຕ ເອວ ອນຸໂລມໍ ຕໍ ນາຠວິສ຺ສ ຎາຓສ຺ສາຕິ ອສາຣໍ ເອຕນ຺ຕິ ອຘິປ຺ປາໂຍ. ອປິ ນຸ ເມຕສ຺ສາຕິ ເມ ເອຕສ຺ສ ອນຕ຺ຕາຕິ ວິປສ຺ສນາຎາຓສ຺ສ ອນຸໂລມໍ ອປິ ນຸ ອຠວິສ຺ສ, ວິໂລມກເມວ ຕສ຺ສ ສິຍາຕິ ອຕ຺ໂຖ.

ອານນ຺ທສຸຕ຺ຕວຓ຺ຓນາ ນິຏ຺ຐິຕາ.

໑໑. ສຠິຍກຈ຺ຈານສຸຕ຺ຕວຓ຺ຓນາ

໔໒໐. ຍສ຺ສປ’ສ຺ສາຕິ ປາຐສ຺ສ ອຍໍ ປິຓ຺ຑຕ຺ໂຖ ‘‘ອາວຸໂສ’’ຕິອາທິ. ຕຕ຺ຖາຍໍ ສມ຺ພນ຺ໂຘ – ອາວຸໂສ, ຍສ຺ສປິ ປຸຄ຺ຄລສ຺ສ ຕີຓິ ວສ຺ສານິ ວຸຏ຺ໂຐ, ເອຕ຺ຕເກນ ກາເລນ ‘‘ເຫຕຸມ຺ຫິ ສຕິ ຣູປີຕິອາທິປຎ຺ຎາປນາ ໂຫຕິ, ອສຕິ ນ ໂຫຕີ’’ຕິ ເອຕ຺ຕກໍ ພ຺ຍາກຣຓໍ ຠເວຍ຺ຍ, ຕສ຺ສ ປຸຄ຺ຄລສ຺ສ ເອຕ຺ຕກເມວ ພຫຸ, ໂກ ປນ ວາໂທ ອຕິກ຺ກນ຺ເຕ! ອິໂຕ ອຕິກ຺ກນ຺ເຕ ຘມ຺ມເທສນານເຍ ວາໂທເຍວ ວຕ຺ຕພ຺ພເມວ ນຕ຺ຖີຕິ ເຖຣສ຺ສ ປຎ຺ຫພ຺ຍາກຣຓໍ ສຸຕ຺ວາ ປຣິພ຺ພາຊໂກ ປີຕິໂສມນສ຺ສໍ ປເວເທສິ.

ສຠິຍກຈ຺ຈານສຸຕ຺ຕວຓ຺ຓນາ ນິຏ຺ຐິຕາ.

ອພ຺ຍາກຕສໍຍຸຕ຺ຕວຓ຺ຓນາ ນິຏ຺ຐິຕາ.