໙. ກຸລສຸຕ຺ຕວຓ຺ຓນາ

໓໖໑. ເອວໍ ປວຕ຺ຕອີຫິຕິກາຕິ ເອວໍ ທ຺ວິຘາ ປວຕ຺ຕອີຫິຕິກາ. ທ຺ວີຫິຕິກາ ທຸກ຺ກຣຊີວິກປໂຍຄາ. ສລາກມຕ຺ຕໍ ວຸຕ຺ຕໍ ເອຕ຺ຖາຕິ ສລາກາ ວຸຕ຺ຕາ, ປຸຣິມປເທ ອຸຕ຺ຕຣປທໂລໂປ. ອຸຠໂຕໂກຏິກນ຺ຕິ ຍທິ ‘‘ກຸລານຸທຍໍ ນ ວຓ຺ເຓມີ’’ຕິ ວທຕິ, ‘‘ຠູຕາ ນິກ຺ກຣຸຓາ ສມຓ ຕຸມ຺ເຫ’’ຕິ ວາທໍ ອາໂຣເປຫິ. ອຖ ສພ຺ພທາປິ ‘‘ກຸລານຸທຍໍ ວຓ຺ເຓມີ’’ຕິ ວທຕິ. ເອວໍ ສນ຺ເຕ ‘‘ກສ຺ມາ ເອວໍ ທຸພ຺ຠິກ຺ເຂ ກາເລ ມຫຕິຍາ ປຣິສາຍ ປຣິວຸໂຕ ຊນປທຈາຣິກໍ ຈຣນ຺ຕາ ກຸລູປຈ຺ເຉທາຍ ປຏິປຊ຺ຊຖາ’’ຕິ ເອວໍ ອຸຠໂຕໂກຏິກໍ ວາທໍ ອາໂຣເປຫີຕິ ຄາມຓິໍ ອຸຍ຺ໂຍເຊສິ.

ທ຺ເວ ອນ຺ເຕຕິ ອຸໂຠ ໂກຏິໂຍ. ພຫິ ນີຫຣິຕຸນ຺ຕິ ນ ວຓ຺ເຓມິ ວຓ຺ເຓມີຕິ ທ຺ເວ ອນ຺ເຕ ໂມເຈນ຺ໂຕ ຕໍ ປຸຈ຺ຉິຕມຕ຺ຖໍ ພຫິ ນີຫຣຕິ ນາມ. ຕຕ຺ຖ ໂທສໍ ທຕ຺ວາ ໂຈເທນ຺ໂຕ ຕໍ ອປຸຈ຺ຉໍ ກໂຣນ຺ໂຕ ຄິລິຕ຺ວາ ວິຍ ອນ຺ໂຕ ປເວເສຕິ ນາມ.

ອິໂຕ ໂສ ຄາມຓີຕິອາທິ ອຕ຺ຕໂນ ຠິກ຺ຂູນໍ ອຎ຺ເຎສຎ຺ຈ ອຕ຺ຖກາມານໍ ຠິກ຺ຂປ຺ປທາເນນ ອນິຏ຺ຐປ຺ປຕ຺ຕິອຠາວທສ຺ສນຕ຺ຖໍ ອາຣທ຺ຘໍ. ທາເນນ ສມ຺ຠູຕານີຕິ ທານມເຍນ ປຸຎ຺ຎກິຣິຍວຕ຺ຖຸນາ ສມ຺ມເທວ ຠູຕິໍ ວຑ຺ຒິໍ ປຕ຺ຕານິ. ສຈ຺ເຈນ ອຣິຍໂວຫາເຣນ ສມ຺ມເທວ ຠູຕານິ ອຸປ຺ປນ຺ນານິ ສຈ຺ຈສມ຺ຠູຕານີຕິ ອາຫ ‘‘ສຈ຺ຈໍ ນາມ ສຈ຺ຈວາທິຕາ’’ຕິ. ເສສສີລນ຺ຕິ ອຏ຺ຐວິຘອຣິຍໂວຫາຣໂຕ ອຎ຺ຎສີລໍ. ນິຫິຕນ຺ຕິ ຕສ຺ມິໍ ກຸເລ ປຸພ຺ພປຸຣິເສຫິ ນິຘານຠາເວນ ນິຫິຕໍ. ທຸປ຺ປຍຸຕ຺ຕາຕິ ກສິວາຓິຊ຺ຊາທິວເສນ ທຸຏ຺ຐຸ ປຍຸຕ຺ຕາ ກມ຺ມນ຺ຕາ. ວິປຊ຺ຊນ຺ຕີຕິ ນສ຺ສນ຺ຕິ. ກຸລງ຺ຄາໂຣຕິ ກຸລສ຺ສ ອງ຺ຄາຣສທິໂສ ວິນາສກປຸຄ຺ຄໂລ. ອນິຈ຺ຈຕາຕິ ມຣຓໍ. ຕສ຺ມິໍ ກຸເລ ປຘານປຸຣິສານໍ ໂຠຄານໍ ວາ ສພ຺ພໂສ ວິນາໂສ. ເຕນາຫ ‘‘ຫຸຕ຺ວາ ອຠາໂວ’’ຕິອາທິ.

ກຸລສຸຕ຺ຕວຓ຺ຓນາ ນິຏ຺ຐິຕາ.