໘. ນິຄຓ຺ຐນາຏປຸຕ຺ຕສຸຕ຺ຕວຓ຺ຓນາ

໓໕໐. ອາຄຕາຄໂມຕິ ວາຈຸຄ຺ຄຕປຣິຍຕ຺ຕິຘມ຺ໂມ. ວິຎ຺ຎາຕສາສໂນຕິ ປຏິວິທ຺ຘສຕ຺ຖຸສາສໂນ. ເຕນາຫ ‘‘ອນາຄາມີ’’ຕິອາທິ. ນຄ຺ຄໂຠຄ຺ຄນ຺ຕິ ອວສນຠາເວນ ນຄ຺ຄໍ, ກຸຏິລຊ຺ຌາສຍຕາຍ ໂຠຄ຺ຄໍ, ຕໂຕ ເອວ ນິສ຺ສິຣິກໍ. ນຄ຺ຄຕາຍ ຫິ ໂສ ຣູເປນ ນິສ຺ສິຣິໂກ, ໂຠຄ຺ຄຕາຍ ຈິຕ຺ເຕນ. ຠຄວໂຕ ສທ຺ຘາຍາຕິ ຠຄວຕິ ສທ຺ຘາຍ. ຕສ຺ມິໍ ສທ຺ທຫນາ ໂອກປ຺ປນາ ຕສ຺ສ ສທ຺ຘາຕິປິ ວຕ຺ຕພ຺ພຕໍ ລຠຕິ. ຄຈ຺ຉາມີຕິ ອາຄຈ຺ຉາມິ, ພຸຊ຺ຌາມີຕິ ອຕ຺ໂຖ. ເອຕໍ ນິຄຓ຺ເຐນ ປຸຈ຺ຉິຕມຕ຺ຖມາຫ.

ກາຍໍ ອຸນ຺ນາເມຕ຺ວາຕິ ກາຍໍ ອພ຺ຠຸນ຺ນາເມຕ຺ວາ. ກຸຈ຺ຉິໍ ນີຫຣິຕ຺ວາຕິ ປິຏ຺ຐິຍາ ນິນ຺ນມເນນ ກຸຈ຺ຉິໍ ປຸຣໂຕ ນີຫຣິຕ຺ວາ. ຄີວໍ ປສາຣຓວເສນ ປຄ຺ຄຍ຺ຫ ປຄ຺ຄເຫຕ຺ວາ ສພ຺ພໍ ທິສໍ ເປກ຺ຂມາໂນ. ສພ຺ພມິທໍ ນິຄຓ຺ຐສ຺ສ ປຫຏ຺ຐາກາຣທສ຺ສນຕ຺ຖໍ ‘‘ອິທານິ ສມຓສ຺ສ ໂຄຕມສ຺ສ ອຸປຣິ ວາທໍ ອາໂຣເປຕຸໍ ລພ຺ຠຕີ’’ຕິ. ເຕນາຫ ‘‘ວາຕໍ ວາ ໂສ’’ຕິອາທິ. ສກາຣຓາຕິ ຍຸຕ຺ຕິສຫິຕາ. ປຎ຺ຫມຄ຺ໂຄຕິ ປຎ຺ຫສງ຺ຂາໂຕ ວີມໍສາ, ເອວໍ ຠວິຕພ຺ພນ຺ຕິ ຈິຕ຺ເຕເນວ ປຣິວີມໍສາ ປຎ຺ຫາ. ເອໂກ ອຸທ຺ເທໂສຕິ ເອກໍ ອຸທ຺ທິສນໍ ອຕ຺ຖສ຺ສ ສໍຂິຕ຺ຕວຈນໍ. ເວຍ຺ຍາກຣຓນ຺ຕິ ນິທ຺ທິສນໍ ອຕ຺ຖສ຺ສ ວິຈາເຣຕ຺ວາ ກຖນໍ. ເອວນ຺ຕິ ອິມິນາ ນເຍນ. ສພ຺ພຕ຺ຖາຕິ ສພ຺ເພສຸ ປຎ຺ຫຸທ຺ເທສເວຍ຺ຍາກຣເຓສຸ ອຕ຺ໂຖ ວິຕ຺ຖາຣໂຕ ເວທິຕພ຺ໂພ.

ນິຄຓ຺ຐນາຏປຸຕ຺ຕສຸຕ຺ຕວຓ຺ຓນາ ນິຏ຺ຐິຕາ.