໔. ມຫກປາຏິຫາຣິຍສຸຕ຺ຕວຓ຺ຓນາ

໓໔໖. ເຕສໍ ອນຸຊານນ຺ໂຕຕິ ເຕສໍ ທາສກມ຺ມກຣານໍ ເສສເກ ຍຖາຣຸຈິ ວິຈາຣຓໍ ອນຸຊານນ຺ໂຕ. ກຸຘິຕນ຺ຕິ ພລວຕາ ສູຣິຍສນ຺ຕາເປນ ສງ຺ກຸຖິຕໍ. ເຕນາຫ ‘‘ເຫຏ຺ຐາ’’ຕິອາທິ. ອຕິຕິຂິຓນ຺ຕິ ອຕິວິຍ ຕິກ຺ຂຘາຕຸກໍ. ອສມ຺ຠິນ຺ນປທນ຺ຕິ ອຎ຺ຎຕ຺ຖ ອນາຄຕຕ຺ຕາ ຕິປິຏເກ ອໂວມິສ຺ສກປທໍ, ອິເຘວ ອາຄຕປທນ຺ຕິ ອຕ຺ໂຖ. ປຏິລີຍມາເນນາຕິ ປຏິກໍເສນ ວິເສສເນນ ວິລີຍມາເນນ ກາເຍນ.

ເອຕ຺ຖ ຈາຕິ ເອຕສ຺ມິໍ ອຘິຏ຺ຐານິທ຺ຘິກຣເຓ. ອພ຺ຠມຓ຺ຑປໍ ກຕ຺ວາຕິ ສມນ຺ຕໂຕ ຉາທນວເສນ ມຓ຺ຑປໍ ວິຍ ເມຆປຏລໍ ອຸປ຺ປາເທຕ຺ວາ. ເທໂວຕິ ເມໂຆ. ເອກເມກໍ ຜຸສິຕກໍ ຜຸສາຍຕຸ ຊາລວິນທ຺ຘໍ ວິຍ ວສ຺ສຕຸ. ເອວໍ ວຸຕ຺ຕປ຺ປກາເຣນ ນານາປຣິກມ຺ມໍ ນານາຘິຏ຺ຐານໍ ເອກໂຕ ປຣິກມ຺ມໍ ເອກໂຕ ອຘິຏ຺ຐານນ຺ຕິ ຈຕຸກ຺ກເມຕ຺ຖ ສມ຺ຠວຕີຕິ ທສ຺ເສຕິ ‘‘ເອຕ຺ຖ ຈາ’’ຕິອາທິນາ. ຍຖາ ຕຖາຕິ ຍຖາວຸຕ຺ເຕສຸ ຈຕູສຸ ປກາເຣສຸ ເຍນ ວາ ເຕນ ວາ ປກາເຣນ ກໂຣນ຺ຕສ຺ສ. ກຕປຣິກມ຺ມສ຺ສາຕິ ‘‘ເອວໍ ວາ ເອວໍ ວາ ໂຫຕູ’’ຕິ ປວຕ຺ຕິຕປຣິກມ຺ມຈິຕ຺ຕສ຺ສ. ‘‘ປຣິກມ຺ມານນ຺ຕເຣນາຕິ ອຘິຏ຺ຐານຈິຕ຺ຕຸປ຺ປາທນຕ຺ຖໍ ສມາປນ຺ນປາທກຊ຺ຌານໂຕ ວຸຏ຺ຐາຍ ອຘິຏ຺ຐານຈິຕ຺ຕສ຺ສ ເອກາວຊ຺ຊນວີຖິຍໍ ປວຕ຺ຕປຣິກມ຺ມໍ ສນ຺ຘາຍ ວຸຕ຺ຕ’’ນ຺ຕິ ວທນ຺ຕິ.

ມຫກປາຏິຫາຣິຍສຸຕ຺ຕວຓ຺ຓນາ ນິຏ຺ຐິຕາ.