໖. ໂມຄ຺ຄລ຺ລານສໍຍຸຕ຺ຕໍ

໑-໘. ປຐມຊ຺ຌານປຎ຺ຫສຸຕ຺ຕາທິວຓ຺ຓນາ

໓໓໒-໓໓໙. ກາມສຫຄເຕສຸ ສຎ຺ຎາມນສິກາເຣສຸ ອຸປຏ຺ຐຫນ຺ເຕສຸ ພ຺ຍາປາທາທິສຫຄຕາປິ ສຎ຺ຎາມນສິກາຣາ ຍຖາປຈ຺ຈຍໍ ອຸປຏ຺ຐຫນ຺ຕິເຍວາຕິ ວຸຕ຺ຕໍ ‘‘ກາມສຫຄຕາຕິ ປຎ຺ຈນີວຣຓສຫຄຕາ’’ຕິ. ນີວຣຓານຎ຺ເຫຕ຺ຖ ນິທສ຺ສນມຕ຺ຕເມຕໍ, ຍທິທໍ ກາມຄ຺ຄຫຓໍ. ປຫີນາວເສສາ ເຈຕ຺ຖ ນີວຣຓາ ເວທິຕພ຺ພາ, ຕສ຺ມາ ປຎ຺ຈຄ຺ຄຫຓໍ ນ ກຕ຺ຕພ຺ພໍ. ຕສ຺ສາຕິ ມຫາໂມຄ຺ຄລ຺ລານຕ຺ເຖຣສ຺ສ ສນ຺ຕໂຕ ອຸປຏ຺ຐຫິໍສຸ ອຈິຓ຺ຓວສິຕາຍ. ເຕນາຫ ‘‘ຫານຠາຄິຍໍ ນາມ ອໂຫສີ’’ຕິ. ອາຣມ຺ມຓ…ເປ… ສຫຄຕນ຺ຕິ ວຸຕ຺ຕໍ ອິຕເຣສໍ ອຠາວໂຕ.

ປຐມຊ຺ຌານປຎ຺ຫສຸຕ຺ຕາທິວຓ຺ຓນາ ນິຏ຺ຐິຕາ.

໙. ອນິມິຕ຺ຕປຎ຺ຫສຸຕ຺ຕວຓ຺ຓນາ

໓໔໐. ວິປສ຺ສນາສມາຘິໍເຍວ, ນ ຜລສມາຘິໍ. ເຉຊ຺ຊກິຈ຺ຈໍ ນ ນິປ຺ຜຊ຺ຊຕິ ອວິຈ຺ເຉທວເສນ ອປ຺ປວຕ຺ຕນໂຕ. ນິກນ຺ຕີຕິ ວິປສ຺ສນໍ ອສ຺ສາເທນ຺ຕີ ປວຕ຺ຕຕຓ຺ຫາ. ສາເຘຕຸໍ ນາສກ຺ຂິ ອຸປກ຺ກິລິຏ຺ຐຕ຺ຕາ. ນິມິຕ຺ຕານຸສາຣີຕິ ນິຈ຺ຈສຸຂອຕ຺ຕນິມິຕ຺ຕານໍ ອປູຣຓໂຕ ຣາຄໂທສໂມຫນິມິຕ຺ຕານິເປຕ຺ຖ ນິມິຕ຺ຕາເນວ. ວຸຏ຺ຐານ…ເປ… ສມາຘິນ຺ຕິ ເອເຕນ ຍາວ ມຄ຺ໂຄ ນາຘິຄໂຕ, ຕາວ ວຸຏ຺ຐານຄາມິນິວິປສ຺ສນມນຸຍຸຎ຺ຊນ຺ໂຕປິ ຍຖາຣຫໍ ອນິມິຕ຺ຕໍ ອປ຺ປຓິຫິຕໍ ສຸຎ຺ຎຕໍ ເຈໂຕສມາຘິໍ ອນຸຍຸຕ຺ໂຕ ວິຫຣຕີຕິ ວຕ຺ຕພ຺ພຕໍ ອຣຫຕີຕິ ທສ຺ເສຕິ. ວິປສ຺ສນາສມ຺ປຍຸຕ຺ຕນ຺ຕິ ວິປສ຺ສນາສງ຺ຂາຕຎາຓສມ຺ປຍຸຕ຺ຕໍ. ເຈໂຕສມາຘິນ຺ຕິ ຈິຕ຺ຕສີເສນ ວິປສ຺ສນາສມາຘິມາຫ. ອຸປຣິມຄ຺ຄຜລສມາຘິນ຺ຕິ ປຐມມຄ຺ຄສມາຘິສ຺ສ ປເຄວ ອຘິຄຕຕ຺ຕາ.

ອນິມິຕ຺ຕປຎ຺ຫສຸຕ຺ຕວຓ຺ຓນາ ນິຏ຺ຐິຕາ.

໑໐-໑໑. ສກ຺ກສຸຕ຺ຕາທິວຓ຺ຓນາ

໓໔໑-໓໔໒. ອເວຈ຺ຈປ຺ປສາເທນາຕິ ວຕ຺ຖຸຕ຺ຕຍໍ ຍາຖາວໂຕ ຎຕ຺ວາ ອຸປ຺ປນ຺ນປສາເທນ, ມຄ຺ເຄນາຄຕປສາເທນາຕິ ອຕ຺ໂຖ. ໂສ ປນ ເກນຈິ ອສໍຫາຣິໂຍ ອສມ຺ປເວຘີຕິ ອາຫ ‘‘ອຈລປ຺ປສາເທນາ’’ຕິ. ອຠິຠວນ຺ຕິ ອຕ຺ຕໂນ ປຸຎ຺ຎານຸຠາເວນ.

ສກ຺ກສຸຕ຺ຕາທິວຓ຺ຓນາ ນິຏ຺ຐິຕາ.

ໂມຄ຺ຄລ຺ລານສໍຍຸຕ຺ຕວຓ຺ຓນາ ນິຏ຺ຐິຕາ.