໗. ມິຄຊາລວຄ຺ໂຄ

໑. ປຐມມິຄຊາລສຸຕ຺ຕວຓ຺ຓນາ

໖໓. ຈກ຺ຂຸວິຎ຺ຎາຓໍ ທສ຺ສນກິຈ຺ຈນ຺ຕິ ວຸຕ຺ຕຈກ຺ຂຸວິຎ຺ຎາເຓນ ປສ຺ສິຕພ຺ພນ຺ຕິ ອາຫ ‘‘ອິຏ຺ຐາຣມ຺ມຓຠູຕາ’’ຕິ. ກມນີຍາຕິ ກາເມຕພ຺ພາ. ມນໍ ອປ຺ປາຍນ຺ຕີຕິ ມນາປາຕິ ອາຫ ‘‘ມນວຑ຺ຒນກາ’’ຕິ. ປິຍາຍິຕພ຺ພສຠາວາ ປິຍຣູປາ. ກາມູປສໍຫິຕາຕິ ກາມປຏິສໍຍຸຕ຺ຕາ. ອາລມ຺ພິຕພ຺ພຕາ ເອວ ເຈຕ຺ຖ ອຸປສໍຫິຕຕາຕິ ‘‘ອາຣມ຺ມຓໍ ກຕ຺ວາ’’ຕິອາທິມາຫ. ຕຓ຺ຫາສງ຺ຂາຕາ ນນ຺ທີ ຕຓ຺ຫານນ຺ທີ, ນ ຕຸຏ຺ຐິນນ຺ທີເຍວ ‘‘ນນ຺ທິໍ ຈຣຕີ’’ຕິອາທີສຸ ວິຍ. ຄາມນ຺ຕນ຺ຕິ ຄາມສມີປໍ. ‘‘ອນຸປຈາຣຏ຺ຐານ’’ນ຺ຕິ ວຕ຺ວາ ຕໍ ທສ຺ເສຕິ ‘‘ຍຕ຺ຖາ’’ຕິອາທິນາ.

ເອຕ຺ຖາຕິ ຍຖານີຫເຕ ປາເຐ. ‘‘ອິມໍ ເອກໍ ປຣິຍາຍໍ ຐເປຕ຺ວາ’’ຕິ ວຸຕ຺ຕໍ ຕສ຺ສ ‘‘ປນ຺ຕານີ’’ຕິປເທນ ສງ຺ຄຫິຕຕ຺ຕາ. ອປ຺ປສທ຺ທານິ ອປ຺ປນິຄ຺ໂຆສານີຕິ ເອຕ຺ຖ ອປ຺ປ-ສທ຺ໂທ ອຠາວຕ຺ໂຖ.

ປຐມມິຄຊາລສຸຕ຺ຕວຓ຺ຓນາ ນິຏ຺ຐິຕາ.

໖. ສມິທ຺ຘິໂລກປຎ຺ຫາສຸຕ຺ຕວຓ຺ຓນາ

໖໘. ອາຍາຈນສຸຕ຺ຕໂຕ ປຏ຺ຐາຍາຕິ ມິຄຊາລວຄ຺ເຄ ທຸຕິຍສຸຕ຺ຕໂຕ ປຏ຺ຐາຍ. ປຐມສຸຕ຺ເຕ ປນ ທຸຕິຍກວິຫາຣາທິຠາໂວ ວຸຕ຺ໂຕຕິ.

ສມິທ຺ຘິໂລກປຎ຺ຫາສຸຕ຺ຕວຓ຺ຓນາ ນິຏ຺ຐິຕາ.

໗. ອຸປເສນອາສີວິສສຸຕ຺ຕວຓ຺ຓນາ

໖໙. ຄເຫຕ຺ວາຕິ ປາຣຸປນສ຺ສ ສິຖິລກຣເຓນ ວີມໍສໂຕ ໂມເຈຕ຺ວາ. ເລຓຈ຺ຉາຍາຍາຕິ ປຸຣິມທິສາຍ ເລຓຈ຺ຉາຍາຍໍ. ປຕິຕ຺ວາຕິ ເລຓຈ຺ຉທນໂຕ ຠສ຺ສິຕ຺ວາ. ຜຸຏ຺ຐວິໂສຕິ ຈຕູສຸ ອາສີວິເສສຸ ໂສ ຜຸຏ຺ຐວິໂສ. ເຕນາຫ ‘‘ຕສ຺ມາ’’ຕິອາທິ. ປຣິຍາທິຍມານເມວາຕິ ເຂເປນ຺ຕເມວ, ວິນາເສນ຺ຕເມວາຕິ ອຕ຺ໂຖ. ຍຖາປຣິຈ຺ເຉເທນາຕິ ອຕ຺ຕໂນ ວິສປຣິຈ຺ເຉທານຸຣູປໍ. ອຎ຺ຎຖາຠາວນ຺ຕິ ວຑ຺ຒຠາວາທິປກຕິຊຫນໍ. ສຠາວວິຄໂມຕິ ວິນາໂສ.

ອຸປເສນອາສີວິສສຸຕ຺ຕວຓ຺ຓນາ ນິຏ຺ຐິຕາ.

໘. ອຸປວາຓສນ຺ທິຏ຺ຐິກສຸຕ຺ຕວຓ຺ຓນາ

໗໐. ຣູປໍ ປຏິສໍວິທິຕໍ ກໂຣຕິ ຎາຕປຣິຎ຺ຎາວເສນ. ຣູປຣາຄນ຺ຕິ ນີລາທິເຠເທ ຣູປຘມ຺ເມ ຣາຄໍ. ປຏິສໍວິທິຕໍ ກໂຣຕິ ‘‘ອຍໍ ເມ ຣາໂຄ ອປ຺ປຫີໂນ’’ຕິ. ເອເຕນ ເສກ຺ຂານໍ ປຈ຺ຈເວກ຺ຂຓາ ກຖິຕາ. ເຕນ ວຸຕ຺ຕໍ ‘‘ເອວມ຺ປິ ໂຂ, ອຸປວາຓ, ສນ຺ທິຏ຺ຐິໂກ ຘມ຺ໂມ ໂຫຕີ’’ຕິອາທິ. ຣູປຣາຄໍ ປຏິສໍວິທິຕໍ ກໂຣຕິ ‘‘ນຕ຺ຖິ ເມ ອຊ຺ຌຕ຺ຕໍ ຣູເປສຸ ຣາໂຄ’’ຕິ ປຊານາຕິ. ອເສກ຺ຂານໍ ຫາຍໍ ປຈ຺ຈເວກ຺ຂຓາ.

ອຸປວາຓສນ຺ທິຏ຺ຐິກສຸຕ຺ຕວຓ຺ຓນາ ນິຏ຺ຐິຕາ.

໙. ປຐມຉຜສ຺ສາຍຕນສຸຕ຺ຕວຓ຺ຓນາ

໗໑. ຜສ຺ສາກຣານນ຺ຕິ ຉນ຺ນໍ ຜສ຺ສານໍ ອາກຣານໍ ອຸປ຺ປຕ຺ຕິຏ຺ຐານານໍ, ຈກ຺ຂາທີນນ຺ຕິ ອຕ຺ໂຖ. ນຏ຺ໂຐ ນາມ ອຫນ຺ຕິ ວທຕິ, ໂຍ ຉນ຺ນໍ ຜສ຺ສາຍຕນານໍ ສມຸທຍາທິໍ ຍຖາຠູຕໍ ປຊານາຕິ, ໂສ ວຸສິຕວາ, ອິຕໂຣ ອວຸສິຕວາ ອຫຎ຺ຈ ຕາທິໂສຕິ. ອຍເມວາຕິ ອຍໍ ຈກ຺ຂຸສ຺ມິໍ ‘‘ເນຕໍ ມມາ’’ຕິອາທິນາ ຕິຓ຺ຓໍ ຄາຫານໍ ອຠາໂວ ເອວ.

ປຐມຉຜສ຺ສາຍຕນສຸຕ຺ຕວຓ຺ຓນາ ນິຏ຺ຐິຕາ.

໑໐. ທຸຕິຍຉຜສ຺ສາຍຕນສຸຕ຺ຕວຓ຺ຓນາ

໗໒. ອປຸນພ຺ຠໂວຕິ ປຸນພ຺ຠວາຠາໂວ.

໑໑. ຕຕິຍຉຜສ຺ສາຍຕນສຸຕ຺ຕວຓ຺ຓນາ

໗໓. ປນສ຺ສສນ຺ຕິ ເອກໍເສນ ນຏ຺ໂຐຕິ ອຍເມຕ຺ຖ ອຕ຺ໂຖຕິ ອາຫ ‘‘ອຕິນຏ຺ໂຐ’’ຕິ, ຘຸຣໂຕ ເອວ ນຏ຺ໂຐຕິ ອຕ຺ໂຖ.

ຕຕິຍຉຜສ຺ສາຍຕນສຸຕ຺ຕວຓ຺ຓນາ ນິຏ຺ຐິຕາ.

ມິຄຊາລວຄ຺ຄວຓ຺ຓນາ ນິຏ຺ຐິຕາ.