໑໒. ໂລກກາມຄຸຓວຄ຺ໂຄ

໑-໒. ປຐມມາຣປາສສຸຕ຺ຕາທິວຓ຺ຓນາ

໑໑໔-໑໑໕. ອາວສຕິ ເອຕ຺ຖ ກິເລສມາໂຣຕິ ອາວາໂສ. ກາມຄຸຓອຊ຺ຌຕ຺ຕິກພາຫິຣານິ ອາຍຕນານິ. ກິເລສມາຣສ຺ສ ອາວາສໍ ຄໂຕ ວສໍ ຄໂຕ. ຕິວິຘສ຺ສາຕິ ປປຎ຺ຈສຎ຺ຎາສງ຺ຂາຕສ຺ສ ຕິວິຘສ຺ສປິ ມາຣສ຺ສ. ຕໂຕ ເອວ ເທວປຸຕ຺ຕມາຣສ຺ສປິ ວສໍ ຄໂຕຕິ ສກ຺ກາ ວິຎ຺ຎາຕຸໍ.

ປຐມມາຣປາສສຸຕ຺ຕາທິວຓ຺ຓນາ ນິຏ຺ຐິຕາ.

໓. ໂລກນ຺ຕຄມນສຸຕ຺ຕວຓ຺ຓນາ

໑໑໖. ໂລກິຍນ຺ຕິ ເອຕ຺ຖ ສຕ຺ຕກາຍຠູຕຄາມາທີຕິ ໂລໂກ, ຈກ຺ກວາໂຬ. ສງ຺ຂາໂຣ ປນ ລຸຊ຺ຊນປລຸຊ຺ຊນຏ຺ເຐນ ໂລໂກ. ອນ຺ຕນ຺ຕິ ໂອສານໍ. ສພ຺ພຎ຺ຎຸຕຎ຺ຎາເຓນ ສໍສນ຺ທິຕ຺ວາຕິ ສພ຺ພຎ຺ຎຸຕຎ຺ຎາຓຄຕິຍາ ສມາເນຕ຺ວາ ອວິໂຣເຘຕ຺ວາ. ໂຖເມສ຺ສາມີຕິ ປສໍສິສ຺ສາມິ.

ເອວໍສມ຺ປຕ຺ຕິກນ຺ຕິ ເອວໍສມ຺ປຊ຺ຊນກໍ ເອວໍປສ຺ສິຕພ຺ພໍ ອິທໍ ມມ ອຊ຺ເຌສນໍ. ເຕນາຫ ‘‘ອີທິສນ຺ຕິ ອຕ຺ໂຖ’’ຕິ. ຊານໍ ຊານາຕີຕິ ສພ຺ພຎ຺ຎຸຕຎ຺ຎາເຓນ ຊານິຕພ຺ພໍ ຊານາຕິ ເອວ. ນ ຫິ ປເທສຎ຺ຎາເຓ ຐິໂຕ ຊານິຕພ຺ພໍ ສພ຺ພໍ ຊານາຕິ. ອຸກ຺ກຏ຺ຐນິທ຺ເທເສນ ຫິ ອວິເສສຄ຺ຄຫເຓນ ຈ ‘‘ຊານ’’ນ຺ຕິ ອິມິນາ ນິຣວເສສໍ ເຎຍ຺ຍຊາຕໍ ປຣິຄ຺ຄຍ຺ຫຕີຕິ ຕພ຺ພິສຍາຍ ຊານນກິຣິຍາຍ ສພ຺ພຎ຺ຎຸຕຎ຺ຎາຓເມວ ກຣຓໍ ຠວິຕຸໍ ຍຸຕ຺ຕໍ. ປກຣຓວເສນ ‘‘ຠຄວາ’’ຕິ ປທສນ຺ນິຘາເນນ ຈ ອຍມຕ຺ໂຖ ວິຠາເວຕພ຺ໂພ. ປສ຺ສິຕພ຺ພເມວ ປສ຺ສຕີຕິ ທິພ຺ພຈກ຺ຂຸ-ປຎ຺ຎາຈກ຺ຂຸ-ຘມ຺ມຈກ຺ຂຸ-ພຸທ຺ຘຈກ຺ຂຸ-ສມນ຺ຕຈກ຺ຂຸ-ສງ຺ຂາເຕຫິ ຎາຓຈກ຺ຂູຫິ ປສ຺ສິຕພ຺ພໍ ປສ຺ສຕິ ເອວ. ອຖ ວາ ຊານໍ ຊານາຕີຕິ ຍຖາ ອຎ຺ເຎ ສວິປລ຺ລາສາ ກາມຣູປປຣິຎ຺ຎາວາທິໂນ ຊານນ຺ຕາປິ ວິປລ຺ລາສວເສນ ຊານນ຺ຕິ, ນ ເອວໍ ຠຄວາ. ຠຄວາ ປນ ປຫີນວິປລ຺ລາສຕ຺ຕາ ຊານນ຺ໂຕ ຊານາຕິ ເອວ, ທິຏ຺ຐິທສ຺ສນສ຺ສ ອຠາວາ ປສ຺ສນ຺ໂຕ ປສ຺ສຕິ ເອວາຕິ ອຕ຺ໂຖ.

ທສ຺ສນປຣິຓາຍກຏ຺ເຐນາຕິ ຍຖາ ຈກ຺ຂຸ ສຕ຺ຕານໍ ທສ຺ສນຕ຺ຖໍ ປຣິເຓຕິ ສາເຘຕິ, ເອວໍ ໂລກສ຺ສ ຍາຖາວທສ຺ສນສາຘນໂຕປິ ທສ຺ສນກິຈ຺ຈປຣິຓາຍກຏ຺ເຐນ ຈກ຺ຂຸຠູໂຕ, ປຎ຺ຎາຈກ຺ຂຸມຍຕ຺ຕາ ວາ ສຍມ຺ຠູຎາເຓນ ປຎ຺ຎາຈກ຺ຂຸໍ ຠູໂຕ ປຕ຺ໂຕຕິ ວາ ຈກ຺ຂຸຠູໂຕ. ຎາຓຠູໂຕຕິ ເອຕສ຺ສ ຈ ເອວເມວ ອຕ຺ໂຖ ທຏ຺ຐພ຺ໂພ. ຘມ຺ມາ ວາ ໂພຘິປກ຺ຂິຍາ, ເຕຫິ ອຸປ຺ປນ຺ນຕ຺ຕາ ໂລກສ຺ສ ຈ ຕທຸປ຺ປາທນໂຕ ອນຎ຺ຎສາຘາຣຓໍ ວາ ຘມ຺ມໍ ປຕ຺ໂຕ ອຘິຄໂຕຕິ ຘມ຺ມຠູໂຕ. ‘‘ພ຺ຣຫ຺ມາ’’ວຸຈ຺ຈຕິ ເສຏ຺ຐຏ຺ເຐນ ມຄ຺ຄຎາຓໍ, ເຕນ ອຸປ຺ປນ຺ນຕ຺ຕາ ໂລກສ຺ສ ຈ ຕທຸປ຺ປາທນໂຕ ຕຎ຺ຈ ສຍມ຺ຠູຎາເຓນ ປຕ຺ໂຕຕິ ພ຺ຣຫ຺ມຠູໂຕ. ຈຕຸສຈ຺ຈຘມ຺ມໍ ວທຕີຕິ ວຕ຺ຕາ. ຈິຣໍ ສຈ຺ຈປຏິເວຘໍ ປວຕ຺ເຕນ຺ໂຕ ວທຕີຕິ ປວຕ຺ຕາ. ອຕ຺ຖໍ ນີຫຣິຕ຺ວາຕິ ທຸກ຺ຂາທິອຕ຺ຖໍ ອຸທ຺ຘຣິຕ຺ວາ. ປຣມຕ຺ຖໍ ວາ ນິພ຺ພານໍ ປາປຍິຕາ. ອມຕສຈ຺ຉິກິຣິຍໍ ສຕ຺ເຕສຸ ອຸປ຺ປາເທນ຺ໂຕ ອມຕໍ ທທາຕີຕິ ອມຕສ຺ສ ທາຕາ. ໂພຘິປກ຺ຂິຍຘມ຺ມານໍ ຕທາຍຕ຺ຕຠາວໂຕ ຘມ຺ມສ຺ສາມີ. ປຸນປ຺ປຸນໍ ຍາຈາເປນ຺ໂຕ ຠາຣິຍໍ ກໂຣນ຺ໂຕ ຄຣຸໍ ກໂຣຕິ ນາມ, ຕຖາ ທຸວິຎ຺ເຎຍ຺ຍໍ ກຕ຺ວາ ກເຖນ຺ໂຕປິ.

ຈກ຺ຂຸນາ ວິຊ຺ຊມາເນນ ໂລກສຎ຺ຎີ ໂຫຕິ, ນ ຕສ຺ມິໍ ອສຕິ. ນ ຫິ ອຊ຺ຌຕ຺ຕິກາຍຕນວິຣເຫນ ໂລກສມຎ຺ຎາ ອຕ຺ຖິ. ເຕນາຫ ‘‘ຈກ຺ຂຸຎ຺ຫິ ໂລໂກ’’ຕິອາທິ. ອປ຺ປຫີນທິຏ຺ຐີຕິ ອສມູຫຕສກ຺ກາຍທິຏ຺ຐິໂກ ຆນວິນິພ຺ໂຠຄໍ ກາຕຸໍ ອສກ຺ໂກນ຺ໂຕ ສມຸທາຍໍ ວິຍ ອວຍວໍ ‘‘ໂລໂກ’’ຕິ ສຎ຺ຊານາຕິ ເຈວ ມຎ຺ຎຕິ ຈ. ຕຖາຕິ ອິມິນາ ‘‘ໂລໂກຕິ ສຎ຺ຊານາຕິ ເຈວ ມຎ຺ຎຕິ ຈາ’’ຕິ ປທຕ຺ຕຍໍ ອາກຑ຺ຒຕິ. ຕສ຺ສາຕິ ປຸຖຸຊ຺ຊນສ຺ສ, ຈກ຺ກວາຬໂລກສ຺ສ ວາ. ຈກ຺ຂາທິເມວ ຫິ ສໂຫກາເສນ ‘‘ຈກ຺ກວາໂຬ’’ຕິ ປຸຖຸຊ຺ຊໂນ ສຎ຺ຊານາຕິ. ຄມເນນາຕິ ປທສາ ຄມເນນ. ນ ສກ຺ກາ ເຕສໍ ອນນ຺ຕຕ຺ຕາ. ລຸຊ຺ຊນຏ຺ເຐນາຕິ ອຠິສງ຺ຂາຣໂລກວເສນ ໂລກສ຺ສ ອນ຺ຕໍ ທສ຺ເສຕຸໍ ວຸຕ຺ຕໍ. ຕສ຺ສ ອນ຺ໂຕ ນາມ ນິພ຺ພານໍ. ຕໍ ປຕ຺ຕຸໍ ສກ຺ກາ ສມ຺ມາປຏິປຕ຺ຕິຍາ ປຕ຺ຕພ຺ພຕ຺ຕາ. ຈກ຺ກວາຬໂລກສ຺ສ ປນ ອນ຺ໂຕ ນາມ, ນຕ຺ຖິ ຕສ຺ສ ຄມເນນ ອປ຺ປຕ຺ຕພ຺ພຕ຺ຕາ.

ອິເມຫິ ປເທຫີຕິ ອິເມຫິ ວາກ຺ຍວິຠາເຄຫິ ປເທຫິ. ຕານິ ປນ ອກ຺ຂຣສມຸທາຍລກ຺ຂຓານີຕິ ອາຫ ‘‘ອກ຺ຂຣສມ຺ປິຓ຺ຑເນຫີ’’ຕິ. ປາຏິເຍກ຺ກອກ຺ຂເຣຫີຕິ ຕສ຺ມິໍ ຕສ຺ມິໍ ປເທ ປຏິນິຍຕສນ຺ນິເວເສຫິ ວິສຸໍ ວິສຸໍ ຈິຕ຺ເຕນ ຄຍ຺ຫມາເນຫິ ອກ຺ຂເຣຫີຕິ ອຕ຺ໂຖ.

ຄມນຏ຺ເຐນ ‘‘ປຓ຺ຑາ’’ ວຸຈ຺ຈຕິ ປຎ຺ຎາ, ຕາຍ ອິໂຕ ຄໂຕ ປຕ຺ໂຕຕິ ປຓ຺ຑິໂຕ, ປຎ຺ຎວາ. ມຫາປຎ຺ຎຕາ ນາມ ປຏິສມ຺ຠິທາວເສນ ເວທິຕພ຺ພາຕິ ອາຫ ‘‘ມຫນ຺ເຕ ອຕ຺ເຖ’’ຕິອາທິ. ຍຖາ ຕນ຺ຕິ ເອຕ຺ຖ ຕນ຺ຕິ ນິປາຕມຕ຺ຕໍ ປຐມວິກປ຺ເປ, ທຸຕິຍວິກປ຺ເປ ປນ ປຈ຺ຈາມສນນ຺ຕິ ອາຫ ‘‘ຕໍ ພ຺ຍາກຕ’’ນ຺ຕິ.

ໂລກນ຺ຕຄມນສຸຕ຺ຕວຓ຺ຓນາ ນິຏ຺ຐິຕາ.

໔. ກາມຄຸຓສຸຕ຺ຕວຓ຺ຓນາ

໑໑໗. ເຈຕໂສຕິ ກຣເຓ ສາມິວຈນໍ. ຈິຕ຺ເຕນ ສໍຜຸສນໍ ນາມ ອນຸຠໂວຕິ ອາຫ ‘‘ຈິຕ຺ເຕນ ອນຸຠູຕປຸພ຺ພາ’’ຕິ. ອຸຕຸຕ຺ຕຍານຸຣູປຕາວເສນ ປາສາທຕ຺ຕຍໍ, ຕໍ ວເສນ ຕິວິຘນາຏກເຠໂທ. ມໂນຣມ຺ມຕາມຕ຺ເຕນ ກາມຄຸຓໍ ກຕ຺ວາ ທສ຺ສິຕໍ, ນ ກາມວເສນ. ນ ຫິ ອຠິນິກ຺ຂມນໂຕ ອຸທ຺ຘໍ ໂພຘິສຕ຺ຕສ຺ສ ກາມວິຕກ຺ກາ ຠູຕປຸພ຺ພາ. ເຕນາຫ ມາໂຣ ປາປິມາ –

‘‘ສຕ຺ຕ ວສ຺ສານິ ຠຄວນ຺ຕໍ, ອນຸພນ຺ຘິໍ ປທາປທໍ;

ໂອຕາຣໍ ນາຘິຄຈ຺ຉິສ຺ສໍ, ສມ຺ພຸທ຺ຘສ຺ສ ສຕີມໂຕ’’ຕິ. (ສຸ. ນິ. ໔໔໘);

ເມຕ຺ເຕຍ຺ໂຍ ນາມາຕິອາທິ ອນາຄຕາຣມ຺ມຓທສ຺ສນມຕ຺ຕໍ, ນ ໂພຘິສຕ຺ຕສ຺ສ ເອວໍ ອຸປ຺ປຊ຺ຊຕີຕິ. ອຕ຺ຕາ ປິຍາຍິຕພ຺ພຣູໂປ ເອຕສ຺ສາຕິ ອຕ຺ຕຣູໂປ, ອຸຕ຺ຕຣປເທ ປຸຣິມປທໂລເປນາຕິ ‘‘ອຕ຺ຕໂນ ຫິຕກາມຊາຕິເກນາ’’ຕິ ອຕ຺ໂຖ ວຸຕ຺ໂຕ. ອຕ຺ຕຣູເປນາຕິ ວາ ປີຕິໂສມນສ຺ເສຫິ ຄຫິຕສຠາເວນ ຕຸຏ຺ຐປຫຏ຺ເຐນ ອຸທຄ຺ຄຸທຄ຺ເຄນ. ອປ຺ປມາໂທຕິ ອປ຺ປມຊ຺ຊນໍ ກຸສລຘມ຺ເມສຸ ອຂຓ຺ຑກາຣິຕາຕິ ອາຫ ‘‘ສາຕຈ຺ຈກິຣິຍາ’’ຕິ. ອໂວສ຺ສຄ຺ໂຄຕິ ຈິຕ຺ຕສ຺ສ ກາມຄຸເຓສຸ ອໂວສ຺ສຊ຺ຊນໍ ປກ຺ຂນ຺ທິຕຸໍ ອປ຺ປທານໍ. ປຸຣິໂມ ວິກປ຺ໂປ ກຸສລານໍ ຘມ຺ມານໍ ກຣຓວເສນ ທສ຺ສິໂຕ, ປຈ຺ຉິໂມ ອກຸສລານໍ ອກຣຓວເສນ. ທ຺ເວ ຘມ຺ມາຕິ ອປ຺ປມາໂທ ສຕີຕິ ທ຺ເວ ຘມ຺ມາ. ອປ຺ປມາໂທ ສຕິ ຈ ຕຖາ ປວຕ຺ຕາ ຈຕ຺ຕາໂຣ ກຸສລຘມ຺ມກ຺ຂນ຺ຘາ ເວທິຕພ຺ພາ. ກຕ຺ຕພ຺ພາຕິ ປວຕ຺ເຕຕພ຺ພາ.

ຕສ຺ມິໍ ອາຍຕເນຕິ ຕສ຺ມິໍ ນິພ຺ພານສຎ຺ຎິເຕ ກາຣເຓ ປຏິເວເຘ. ຕໍ ກາຣຓນ຺ຕິ ຉນ຺ນໍ ອາຍຕນານໍ ກາຣຓໍ. ສຬາຍຕນໍ ນິຣຸຊ຺ຌຕິ ເອຕ຺ຖາຕິ ສຬາຍຕນນິໂຣໂຘ ວຸຈ຺ຈຕິ ນິພ຺ພານໍ. ເຕນາຫ ‘‘ນິພ຺ພານໍ. ຕໍ ສນ຺ຘາຍາ’’ຕິອາທິ. ນິພ຺ພານສ຺ມິນ຺ຕິ ນິພ຺ພານມ຺ຫິ.

ກາມຄຸຓສຸຕ຺ຕວຓ຺ຓນາ ນິຏ຺ຐິຕາ.

໕-໖. ສກ຺ກປຎ຺ຫສຸຕ຺ຕາທິວຓ຺ຓນາ

໑໑໘-໑໑໙. ທິຏ຺ເຐຕິ ປຈ຺ຈກ຺ຂຠູເຕ. ຘມ຺ເມຕິ ອຸປາທານກ຺ຂນ຺ຘຘມ຺ເມ. ຕຕ຺ຖ ຫິ ອຕ຺ຕາຕິ ຠວຕິ ສຎ຺ຎາ ທິຏ຺ຐິ ຈາຕິ ອຕ຺ຕຠາວສຎ຺ຎາ. ເຕນາຫ – ‘‘ທິຏ຺ເຐວ ຘມ຺ເມຕິ ອິມສ຺ມິໍເຍວ ອຕ຺ຕຠາເວ’’ຕິ. ‘‘ຕນ຺ນິສ຺ສິຕ’’ນ຺ຕິ ເອຕ຺ຖ ຕໍ-ສທ຺ເທນ ເຫຏ຺ຐາ ອຠິນນ຺ທນາທິປຣິຍາເຍນ ວຸຕ຺ຕາ ຕຓ຺ຫາ ປຈ຺ຈາມຏ຺ຐາຕິ ອາຫ – ‘‘ຕຓ຺ຫານິສ຺ສິຕ’’ນ຺ຕິ. ຕໍ ອຸປາທານໍ ເອຕສ຺ສາຕິ ຕທຸປາທານໍ. ເຕນາຫ – ‘‘ຕໍຄຫຓ’’ນ຺ຕິອາທິ. ຕຓ຺ຫຸປາທານສງ຺ຂາຕໍ ຄຫຓໍ ເອຕສ຺ສາຕິ ຕໍຄຫຓໍ. ຉຏ຺ຐໍ ອຸຕ຺ຕານເມວ ປຎ຺ຈເມ ວຸຕ຺ຕນຍຕ຺ຕາ.

ສກ຺ກປຎ຺ຫສຸຕ຺ຕາທິວຓ຺ຓນາ ນິຏ຺ຐິຕາ.

໗. ສາຣິປຸຕ຺ຕສທ຺ຘິວິຫາຣິກສຸຕ຺ຕວຓ຺ຓນາ

໑໒໐. ຆເຏສ຺ສຕີຕິ ປຸພ຺ເພນາປຣໍ ຆຏິຕໍ ສມ຺ພນ຺ຘໍ ກຣິສ຺ສຕິ. ວິຈ຺ເຉທນ຺ຕິ ພ຺ຣຫ຺ມຈຣິຍສ຺ສ ວິໂຣຘິປຈ຺ຈຍສມຸປ຺ປຕ຺ຕິຍາ ອຸຈ຺ເຉທໍ.

໘. ຣາຫຸໂລວາທສຸຕ຺ຕວຓ຺ຓນາ

໑໒໑. ເຍ ຘມ຺ມາ ສມ຺ມເທວ ຠາວິຕາ ພຫຸລີກຕາ ວິມຸຕ຺ຕິຍາ ອຣຫຕ຺ຕສ຺ສ ສຈ຺ຉິກິຣິຍາຍ ສໍວຕ຺ຕນ຺ຕິ, ເຕ ສທ຺ຘາທໂຍ ສມ຺ຠາຣາ ວິມຸຕ຺ຕິປຣິປາຈນິຍາຕິ ອຘິປ຺ເປຕາ. ປຣິປາເຈນ຺ຕີຕິ ປຣິປາກໍ ປຣິຓາມໍ ຄເມນ຺ຕິ. ຘມ຺ມາຕິ ກາຣຓຠູຕາ ຘມ຺ມາ. ວິສຸທ຺ຘິກາຣຓວເສນາຕິ ວິສຸທ຺ຘິກາຣຓຕາວເສນ, ສາ ປນ ສທ຺ຘິນ຺ທ຺ຣິຍາທີນໍ ກາຣຓໂຕ ວິສຸທ຺ຘິ. ຍຖາ ນາມ ຊາຕິສມ຺ປນ຺ນສ຺ສ ຂຕ຺ຕິຍກຸມາຣສ຺ສ ວິປກ຺ຂວິຄເມນ ປກ຺ຂສງ຺ຄເຫນ ປວຕ຺ຕິຏ຺ຐານສມ຺ປຕ຺ຕິຍາ ຈ ປຣິສຸທ຺ຘິ ໂຫຕິ, ເອວເມວໍ ທຏ຺ຐພ຺ພາຕິ ທສ຺ເສນ຺ໂຕ ‘‘ວຸຕ຺ຕໍ ເຫຕ’’ນ຺ຕິອາທິມາຫ.

ອສ຺ສທ຺ຘາທໂຍປິ ປຸຄ຺ຄລາ ສທ຺ຘາທີນໍ ຍາວເທວ ປຣິຫານາຍ ໂຫນ຺ຕິ, ສທ຺ຘາທໂຍ ປາຣິປູຣິຍາວ, ຕຖາ ປສາທນິຍສຸຕ຺ຕນ຺ຕາທິປຈ຺ຈເວກ຺ຂຓາ, ປສາທນິຍສຸຕ຺ຕນ຺ຕາ ນາມ ສມ຺ປສາທນີຍສຸຕ຺ຕາທໂຍ. ສມ຺ມປ຺ປຘາເນຕິ ສມ຺ມປ຺ປຘານສຸຕ຺ຕນ຺ເຕ. ສຕິປຏ຺ຐາເນຕິ ຈຕ຺ຕາໂຣ ສຕິປຏ຺ຐາເນ. ຌານວິໂມກ຺ເຂຕິ ຌານານິ ເຈວ ວິໂມກ຺ເຂ ຈ ອຸທ຺ທິສ຺ສ ປວຕ຺ຕສຸຕ຺ຕນ຺ເຕ. ຄມ຺ຠີຣຎາຓຈຣິເຍຕິ ຂນ຺ຘາຍຕນຘາຕຸປຏິຈ຺ຈສມຸປ຺ປາທປຏິສໍຍຸຕ຺ຕສຸຕ຺ຕນ຺ເຕ.

ກລ຺ຍາຓມິຕ຺ຕຕາທໂຍຕິ ກລ຺ຍາຓມິຕ຺ຕຕາ ສີລສໍວໂຣ ອຠິສລ຺ເລຂກຖາ ວີຣິຍາຣມ຺ໂຠ ນິພ຺ເພຘິກປຎ຺ຎາຕິ ອິເມ ກລ຺ຍາຓມິຕ຺ຕາທໂຍ ປຎ຺ຈ ຘມ຺ມາ, ເຍ ‘‘ອິຘ, ເມຆິຍ, ຠິກ຺ຂຸ ກລ຺ຍາຓມິຕ຺ໂຕ ໂຫຕີ’’ຕິອາທິນາ ອຸທາເນ (ອຸທາ. ໓໑) ກຖິຕາ. ໂລກໍ ໂວໂລເກນ຺ຕສ຺ສາຕິ ອາຍສ຺ມໂຕ ຣາຫຸລສ຺ສ ຕາສຎ຺ຈ ເທວຕານໍ ອິນ຺ທ຺ຣິຍປຣິປາກໍ ປສ຺ສນ຺ຕສ຺ສ. ຕໂຕ ເຍນ ອນ຺ຘວນໍ, ຕຕ຺ຖ ທິວາວິຫາຣາຍ ມຫາສມາຄໂມ ຠວິສ຺ສຕີຕິ. ຕຖາ ຫິ ວກ຺ຂຕິ ‘‘ເອຕ຺ຕກາຕິ ຄຓນາວເສນ ປຣິຈ຺ເຉໂທ ນຕ຺ຖີ’’ຕິ.

ຣຸກ຺ຂປພ຺ພຕນິສ຺ສິຕາ ຠູມຏ຺ຐກາ, ອາກາສຈາຣິວິມານວາສິໂນ ອນ຺ຕລິກ຺ຂຏ຺ຐກາ. ຘມ຺ມຈກ຺ຂຸນ຺ຕິ ເວທິຕພ຺ພານິ ຈຕຸສຈ຺ຈຘມ຺ມານໍ ທສ຺ສນຏ຺ເຐນ.

ຣາຫຸໂລວາທສຸຕ຺ຕວຓ຺ຓນາ ນິຏ຺ຐິຕາ.

ໂລກກາມຄຸຓວຄ຺ຄວຓ຺ຓນາ ນິຏ຺ຐິຕາ.