໙. ສຸປຓ຺ຓສໍຍຸຕ຺ຕວຓ຺ຓນາ

໓໙໒-໔໓໗. ປຕ຺ຕານນ຺ຕິ ອຸໂຠສຸ ປກ຺ເຂສຸ ປຕ຺ຕານໍ. ວຓ຺ຓວນ຺ຕຕາຍາຕິ ອຕິສເຍນ ວິຈິຕ຺ຕວຓ຺ຓຕາຍ. ອຕິສຍຕ຺ໂຖ ຫິ ອຍໍ ວນ຺ຕ-ສທ຺ໂທ. ປຸຣິມນເຍນາຕິ ນາຄສໍຍຸຕ຺ເຕ ປຐມສຸຕ຺ເຕ ວຸຕ຺ຕນເຍນ. ອຸທ຺ຘຣນ຺ຕີຕິ ສມຸທ຺ທໂຕ ອຸທ຺ຘຣນ຺ຕິ, ປຖວນ຺ຕຣປພ຺ພຕນ຺ຕຣໂຕ ປນ ເຕສໍ ອຸທ຺ຘຣຓໍ ທຸກ຺ກຣເມວ. ປຓີຕຕເຣຕິ ພເລນ ປຓີຕຕເຣ, ພລວນ຺ເຕຕິ ອຕ຺ໂຖ. ອນຸທ຺ຘຣຓີຍນາຄາຕິ ອານຸຠາວມຫນ຺ຕຕາຍ ຈ ວສນຏ຺ຐານວິທຸຄ຺ຄຕາຍ ຈ ອຸທ຺ຘຣິຕຸໍ ອສກ຺ກຸເຓຍ຺ຍາ ນາຄາ. ເຕ ‘‘ສຕ຺ຕວິຘາ’’ຕິ ວຕ຺ວາ ສຣູປໂຕ ວສນຏ຺ຐານໂຕ ຈ ທສ຺ເສນ຺ໂຕ ‘‘ກມ຺ພລສ຺ສຕຣາ’’ຕິອາທິມາຫ. ຕຕ຺ຖ ກມ຺ພລສ຺ສຕຣາ ຘຕຣຏ຺ຐາຕິ ອິເມ ຊາຕິວເສນ ວຸຕ຺ຕາ. ສຕ຺ຕສີທນ຺ຕຣວາສິໂນຕິ ສຕ຺ຕວິຘສີທສມຸທ຺ທວາສິໂນ. ປຖວິຏ຺ຐກາຕິ ປຖວນ຺ຕຣວາສິໂນ, ຕຖາ ປພ຺ພຕຏ຺ຐກາ. ເຕ ຈ ວິມານວາສິໂນ. ເຕ ນາເຄ ໂກຈິ ສຸປຓ຺ໂຓ ອຸທ຺ຘຣິຕຸໍ ນ ສກ຺ໂກຕີຕິ ສມ຺ພນ຺ໂຘ. ເສສນ຺ຕິ ‘‘ກາເຍນ ທ຺ວຍກາຣິໂນ’’ຕິອາທີສຸ ຍໍ ວຕ຺ຕພ຺ພໍ, ຕໍ ສພ຺ພໍ ນາຄສໍຍຸຕ຺ເຕ ວຸຕ຺ຕນຍເມວ, ຕຕ຺ຖ ຈ ວຸຕ຺ຕນເຍເນວ ອຕ຺ໂຖ ເວທິຕພ຺ໂພຕິ ອຘິປ຺ປາໂຍ.

ສຸປຓ຺ຓສໍຍຸຕ຺ຕວຓ຺ຓນາ ນິຏ຺ຐິຕາ.