໑໐. ຄນ຺ຘພ຺ພກາຍສໍຍຸຕ຺ຕວຓ຺ຓນາ

໔໓໘-໕໔໙. ມູລຄນ຺ຘາທິເຠທໍ ຄນ຺ຘໍ ອວນ຺ຕິ ອປຍຸຎ຺ຊນ຺ຕີຕິ ຄນ຺ຘພ຺ພາ, ເຕສໍ ກາໂຍ ສມູໂຫ ຄນ຺ຘພ຺ພກາໂຍ, ຄນ຺ຘພ຺ພເທວນິກາໂຍ. ຈາຕຸມຫາຣາຊິເກສຸ ເອກິຍາວ ເຕ ທຏ຺ຐພ຺ພາ, ຕປ຺ປຣິຍາປນ຺ນຕາຍ ຕຕ຺ຖ ວາ ນິຍຸຕ຺ຕາຕິ ຄນ຺ຘພ຺ພກາຍິກາ. ເຕສໍ ເຕສໍ ຣຸກ຺ຂຄຈ຺ຉລຕານໍ ມູລໍ ປຏິຈ຺ຈ ປວຕ຺ໂຕ ຄນ຺ໂຘ ມູລຄນ຺ໂຘ, ຕສ຺ມິໍ ມູລຄນ຺ເຘ. ອຘິວຕ຺ຖາຕິ ມູລຄນ຺ຘໍ ອຘິຏ຺ຐາຍ, ອຠິຠຸຍ຺ຍ ວາ ວສນ຺ຕາ. ເອສ ນໂຍ ເສເສສຸປິ. ຕໍ ນິສ຺ສາຍາຕິ ຕໍ ມູລຄນ຺ຘໍ ຣຸກ຺ຂໍ ປຈ຺ຈຍໍ ກຕ຺ວາ ນິພ຺ພຕ຺ຕາ. ນ ເກວລໍ ຕຕ຺ຖ ຄນ຺ໂຘ ເອວ, ມູລເມວ ວາ ເຕສໍ ປຈ຺ຈໂຍຕິ ທສ຺ເສນ຺ໂຕ ‘‘ໂສ ຫີ’’ຕິອາທິມາຫ. ອຸປກປ຺ປຕີຕິ ນິວາສຏ຺ຐານຠາເວນ ວິນິຍຸຎ຺ຊຕິ. ຄນ຺ຘຄນ຺ເຘຕິ ຄນ຺ຘານໍ ຄນ຺ຘສມຸທາເຍ. ມູລາທິຄນ຺ຘານໍ ຄນ຺ເຘຕິ ມູລາທິຄຕອວຍວຄນ຺ຘານໍ ຄນ຺ເຘ, ຕິມູລາທິຄຕສມຸທາຍຠູເຕຕິ ອຕ຺ໂຖ. ປຸພ຺ເພ ຫິ ‘‘ມູລຄນ຺ເຘ’’ຕິອາທິນາ ຣຸກ຺ຂານໍ ອວຍວຄນ຺ໂຘ ຄຫິໂຕ, ອິຘ ປນ ສພ຺ພໂສ ຄຫິຕຕ຺ຕາ ສມຸທາຍຄນ຺ໂຘ ເວທິຕພ຺ໂພ. ເຕນາຫ ‘‘ຍສ຺ສ ຫິ ຣຸກ຺ຂສ຺ສາ’’ຕິອາທິ. ໂສຕິ ໂສ ສພ຺ໂພ ມູລາທິຄໂຕ ຄນ຺ໂຘ ຄນ຺ຘສມຸທາໂຍ ອິຘ ຄນ຺ຘຄນ຺ໂຘ ນາມ. ຕສ຺ສ ຄນ຺ຘສ຺ສ ຄນ຺ເຘຕິ ຕສ຺ສ ສມຸທາຍຄນ຺ຘສ຺ສ ຕຖາຠູເຕ ຄນ຺ເຘ. ສຣິກ຺ຂໍ ສທິສໍ ປຏິທານໍ ເອຕິສ຺ສາຕິ ສຣິກ຺ຂທານໍ, ປຕ຺ຖນາ. ຍຖາຘິປ຺ເປຕຜລານິ ສຣິກ຺ຂທານຕ຺ຕາວ ອຘິປ຺ເປຕຜລໍ ເທນ຺ຕຸ, ອສຣິກ຺ຂທານໍ ກຖນ຺ຕິ? ຕມ຺ປິ ເທຕິເຍວ ປຸຎ຺ຎສ຺ສ ສພ຺ພກາມທທຕ຺ຕາຕິ ອາຫ ‘‘ອສຣິກ຺ຂທານມ຺ປີ’’ຕິອາທິ.

ຄນ຺ຘພ຺ພກາຍສໍຍຸຕ຺ຕວຓ຺ຓນາ ນິຏ຺ຐິຕາ.