໑໑. ວລາຫກສໍຍຸຕ຺ຕວຓ຺ຓນາ

໕໕໐-໖໐໖. ໂລກໍ ວາເລນ຺ຕາ ສໍວຣນ຺ຕາ ຉາເທນ຺ຕາ ອຫນ຺ຕິ ປຣິເຍສນ຺ຕີຕິ ວລາຫາ, ເທວປຸຕ຺ຕາ. ເຕສໍ ສມູໂຫ ວລາຫກເທວກາໂຍຕິ ອາຫ ‘‘ວລາຫກກາຍິກາ’’ຕິອາທິ. ສີຕກຣຓວລາຫກາຕິ ສີຕຫຣຓວລາຫກາ. ເສສປເທສູຕິ ອຸຓ຺ຫວລາຫກາທິປເທສຸ. ເອເສວ ນໂຍຕິ ‘‘ອຸຓ຺ຫກຣຓວລາຫກາ’’ຕິອາທິນາ ອຕ຺ໂຖ ເວທິຕພ຺ໂພ. ຈິຕ຺ຕຏ຺ຐປນນ຺ຕິ ‘‘ສີຕໍ ໂຫຕູ’’ຕິ ເອວໍ ຈິຕ຺ຕສ຺ສ ອຸປ຺ປາທນໍ. ວສ຺ສາເນຕິ ວສ຺ສກາເລ. ອຸຕຸສມຸຏ຺ຐານເມວາຕິ ປາກຕິກສີຕເມວາຕິ ອຕ຺ໂຖ. ອຸຓ຺ເຫປີຕິ ອຸຓ຺ຫກາເລ. ອພ຺ຠມຓ຺ຑໂປຕິ ມຓ຺ຑປສທິສອພ຺ຠປຏລວິຕານມາຫ. ອພ຺ຠໍ ອຸປ຺ປຊ຺ຊຕີຕິ ຕຫໍ ຕຫໍ ປຏລໍ ອຸຏ຺ຐຫຕິ. ອພ຺ເຠເຍວາຕິ ອພ຺ຠກາເລ ເອວ, ວສ຺ສາເນຕິ ອຕ຺ໂຖ. ອຕິອພ຺ຠນ຺ຕິ ສຕປຏລສຫສ຺ສປຏລໍ ຫຸຕ຺ວາ ອພ຺ຠຸຏ຺ຐານໍ. ຈິຕ຺ຕເວສາຂມາເສສູຕິ ວສນ຺ຕກາລໍ ສນ຺ຘາຍາຫ. ຕທາ ຫິ ວິທ຺ໂຘ ວິຄຕວລາຫໂກ ເທໂວ ຠວິຕຸໍ ຍຸຕ຺ໂຕ. ອຸຕ຺ຕຣທກ຺ຂິຓາທີຕິ ອາທິ-ສທ຺ເທນ ປຈ຺ຉິມວາຕາທິໍ ສງ຺ຄຓ຺ຫາຕິ. ປກຕິວາໂຕຕິ ປກຕິຍາ ສຠາເວນ ວາຍນກວາໂຕ. ຕໍ ອຸຕຸສມຸຏ຺ຐານເມວາຕິ ອາຫາຣູປຊີວີນໍ ສຕ຺ຕານໍ ສາຘາຣຓກມ຺ມູປນິສ຺ສຍອຸຕຸສມຸຏ຺ຐານເມວ. ເອສ ນໂຍ ອຸຕຸສມຸຏ຺ຐານສີຕຸຓ຺ຫວາເຕສຸປິ. ຕມ຺ປິ ຫິ ອາຫາຣູປຊີວີນໍ ສຕ຺ຕານໍ ສາຘາຣຓກມ຺ມູປນິສ຺ສຍເມວາຕິ.

ຄີຕນ຺ຕິ ເມຆຄີຕໍ. ສຈ຺ຈກິຣິຍາຍາຕິ ຕາທິສານໍ ປຸຣິສວິເສສານໍ ສຈ຺ຈາຘິຏ຺ຐາເນນ. ອິທ຺ຘິພເລນາຕິ ອິທ຺ຘິມນ຺ຕານໍ ອິທ຺ຘິອານຸຠາເວນ. ວິນາສເມເຆນາຕິ ກປ຺ປວິນາສກເມເຆນ. ອຎ຺ເຎນປິ ກຓ຺ຫປາປິກສຕ຺ຕານໍ ປາປກມ຺ມປຈ຺ຈຍາ ອຸປ຺ປນ຺ນວິນາສເມເຆນ ວຸຏ຺ເຐນ ໂສ ໂສ ເທໂສ ວິນສ຺ສເຕວ.

ວລາຫກສໍຍຸຕ຺ຕວຓ຺ຓນາ ນິຏ຺ຐິຕາ.