໘. ນາຄສໍຍຸຕ຺ຕໍ

໑. ສຸທ຺ຘິກສຸຕ຺ຕວຓ຺ຓນາ

໓໔໒. ອຓ຺ຑຊາຕິ ອຓ຺ເຑ ຊາຕາ. ວຕ຺ຖິໂກເສຕິ ວຕ຺ຖິໂກສສຎ຺ຎິເຕ ຊຣາຍຸປຸເຏ ຊາຕາ. ສໍເສເທຕິ ສໍສິນ຺ເນ ກິລິນ຺ນຏ຺ຐາເນ ອຸປ຺ປນ຺ນາ. ອຸປປຕິຕ຺ວາ ວິຍາຕິ ກຸໂຕຈິປິ ອວປຕິຕ຺ວາ ວິຍ ນິພ຺ພຕ຺ຕາ. ປຸຄ຺ຄລານນ຺ຕິ ຕຖາ ວິເນຕພ຺ພປຸຄ຺ຄລານໍ.

ສຸທ຺ຘິກສຸຕ຺ຕວຓ຺ຓນາ ນິຏ຺ຐິຕາ.

໒-໕໐. ປຓີຕຕຣສຸຕ຺ຕາທິວຓ຺ຓນາ

໓໔໓-໓໙໑. ວິສ຺ສຏ຺ຐກາຍາຕິ ‘‘ເຍ ຈມ຺ເມນ ວາ ຣຸຘິເຣນ ວາ ອຏ຺ຐິນາ ວາ ອຕ຺ຖິກາ, ເຕ ສພ຺ພໍ ຄຓ຺ຫນ຺ຕູ’’ຕິ ຕຕ຺ຖ ນິຣເປກ຺ຂຈິຕ຺ຕຕາຍ ອຘິຏ຺ຐິຕສີລຕາຍ ປຣິຈ຺ຈຕ຺ຕສຣີຣາ. ທຸວິຘກາຣິໂນຕິ ‘‘ກາເລນ ກຸສລໍ, ກາເລນ ອກຸສລ’’ນ຺ຕິ ເອວໍ ກຸສລາກຸສລກາຣິໂນ. ສຫ ພ຺ຍຍຕິ ປວຕ຺ຕຕີຕິ ສຫພ຺ໂຍ, ສຫຈາໂຣ. ຕສ຺ສ ຠາໂວ ສຫພ຺ຍຕາ, ຕໍ ສຫພ຺ຍຕໍ. ອທນີຍໂຕ ອນ຺ນໍ. ຂາທນີຍໂຕ ຂຊ຺ຊໍ. ປາຕພ຺ພໂຕ ປານໍ. ນິວສນີຍໂຕ ວຕ຺ຖໍ. ນິວສິຕພ຺ພໍ ນິວາສນໍ. ປຣິວຣິຕພ຺ພໍ ປາວຸຣຓໍ. ຍານ຺ຕິ ເຕນາຕິ ຍານໍ, ອຸປາຫນາທິຍານານິ. ອາທິສທ຺ເທນ ວຍ຺ຫສິວິກາທີນໍ ສງ຺ຄໂຫ. ຉຕ຺ຕມ຺ປິ ປຣິສ຺ສຍາຕປທຸກ຺ຂປຣິຣກ຺ຂເຓນ ມຄ຺ຄຄມນສາຘນນ຺ຕິ ກຕ຺ວາ ‘‘ຉຕ຺ຕຸປາຫນ’’ນ຺ຕິອາທິ ວຸຕ຺ຕໍ. ເຕນ ວຸຕ຺ຕໍ ‘‘ຍໍ ກິຎ຺ຈິ ຄມນປຈ຺ຈຍ’’ນ຺ຕິ. ປຕ຺ຖນໍ ກຕ຺ວາ…ເປ… ຕຕ຺ຖ ນິພ຺ພຕ຺ຕນ຺ຕິ ຈມ຺ເປຍ຺ຍນາຄຣາຊາ ວິຍາຕິ ທຏ຺ຐພ຺ພໍ.

ປຓີຕຕຣສຸຕ຺ຕາທິວຓ຺ຓນາ ນິຏ຺ຐິຕາ.

ນາຄສໍຍຸຕ຺ຕວຓ຺ຓນາ ນິຏ຺ຐິຕາ.