໗. ສາຣິປຸຕ຺ຕສໍຍຸຕ຺ຕໍ

໑-໙. ວິເວກຊສຸຕ຺ຕາທິວຓ຺ຓນາ

໓໓໒-໓໔໐. ນ ເອວໍ ໂຫຕີຕິ ເອຕ຺ຖ ‘‘ອຫໍ ສມາປຊ຺ຊາມີ’’ຕິ ວາ, ‘‘ອຫໍ ສມາປນ຺ໂນ’’ຕິ ວາ ມາ ໂຫຕຸ ຕທາ ຕາທິສາໂຠຄາຠາວໂຕ. ‘‘ອຫໍ ວຸຏ຺ຐິໂຕ’’ຕິ ປນ ກສ຺ມາ ນ ໂຫຕີຕິ? ສພ຺ພຖາປິ ນ ໂຫຕ຺ເວວ ອຫງ຺ກາຣສ຺ສ ສພ຺ພໂສ ປຫີນຕ຺ຕາ.

ວິເວກຊສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ສູຈິມຸຂີສຸຕ຺ຕວຓ຺ຓນາ

໓໔໑. ຕສ຺ມິໍ ວຈເນ ປຏິກ຺ຂິຕ຺ເຕຕິ – ‘‘ອໂຘມຸໂຂ ຠຸຎ຺ຊສີ’’ຕິ ປຣິພ຺ພາຊິກາຍ ວຸຕ຺ຕວຈເນ – ‘‘ນ ຂ຺ວາຫໍ ຠຄິນີ’’ຕິ ປຏິກ຺ຂິຕ຺ເຕ. ວາທນ຺ຕິ ໂທສໍ. ອຸພ຺ຠມຸໂຂຕິ ອຸປຣິມຸໂຂ. ປຸຣຕ຺ຖິມາທິກາ ຈຕສ຺ໂສ ທິສາ. ທກ຺ຂິຓປຸຣຕ຺ຖິມາທິກາ ຈຕສ຺ໂສ ວິທິສາ.

ອາຣາມອາຣາມວຕ຺ຖຸອາທີສຸ ຠູມິປຣິກມ຺ມພີຊາຠິສງ຺ຂຣຓາທິປຏິສໍຍຸຕ຺ຕາ ວິຊ຺ຊາ ວຕ຺ຖຸວິຊ຺ຊາ, ຕສ຺ສາ ປນ ມິຈ຺ຉາຊີວຠາວໍ ທສ຺ເສຕຸໍ ‘‘ເຕສ’’ນ຺ຕິອາທິ ວຸຕ຺ຕໍ. ເຕສໍ ເຕສໍ ອຕ຺ຕໂນ ປຈ຺ຈຍທາຍການໍ. ຕຕ຺ຖ ຕຕ຺ຖ ຄມນນ຺ຕິ ເຕສໍ ສາສນຫຣຓວເສນ ຕໍ ຕໍ ຄາມນ຺ຕຣເທສນ຺ຕຣໍ. ເອວມາໂຣເຈສີຕິ ອຕ຺ຕຸກ຺ກໍສນປຣວມ຺ຠນຣຫິຕໍ ກຓ຺ຓສຸຂໍ ເປມນີຍໍ ຫທຍງ຺ຄມໍ ເຖຣສ຺ສ ຘມ຺ມກຖໍ ສຸຕ຺ວາ ປສນ຺ນມານສາ ເອວໍ ‘‘ຘມ຺ມິກໍ ສມຓາ ສກ຺ຍປຸຕ຺ຕິຍາ’’ຕິອາທິນາ ສາສນສ຺ສ ຄຸຓສໍກິຕ຺ຕນວາຈໍ ກຸລານໍ ອາໂຣເຈສິ.

ສູຈິມຸຂີສຸຕ຺ຕວຓ຺ຓນາ ນິຏ຺ຐິຕາ.

ສາຣິປຸຕ຺ຕສໍຍຸຕ຺ຕວຓ຺ຓນາ ນິຏ຺ຐິຕາ.