໓. ຍມກສຸຕ຺ຕວຓ຺ຓນາ

໘໕. ທິຏ຺ຐິ ເອວ ທິຏ຺ຐິຄຕໍ ‘‘ຄູຖຄຕໍ ມຸຕ຺ຕຄຕ’’ນ຺ຕິ (ມ. ນິ. ໒.໑໑໙; ອ. ນິ. ໙.໑໑) ຍຖາ. ທິຏ຺ຐິຄຕໍ ນາມ ຊາຕໍ ຂນ຺ຘວິນິມຸຕ຺ຕສ຺ສ ສຕ຺ຕສ຺ສ ຄຫິຕຕ຺ຕາ.

ກຸປິເຕຕິ ທິຏ຺ຐິສງ຺ຂາຕໂຣເຄນ ກຸປິເຕ. ປຄ຺ຄຍ຺ຫາຕິ ເຕສໍ ຠິກ຺ຂູນໍ ສນ຺ຕິເກ ວິຍ ເຖຣສ຺ສ ສາຣິປຸຕ຺ຕສ຺ສ ສມ຺ມຸຂາ ອຕ຺ຕໂນ ລທ຺ຘິໍ ປຄ຺ຄຍ຺ຫ ‘‘ເອວໍ ຂ຺ວາຫ’’ນ຺ຕິ ເອວໍ ນິຈ຺ຉເຍນ ວຕ຺ຕຸໍ ອສກ຺ໂກນ຺ໂຕ.

ອນຸໂຍຄວຕ຺ຕໍ ນາມ ເຍນ ຍຸຕ຺ໂຕ, ຕສ຺ສ ອຕ຺ຕໂນ ຄາຫໍ ນິຊ຺ຌານກ຺ຂນ຺ຕິຍາວ ຍາຖາວໂຕ ປເວທນໍ. ເຖຣສ຺ສ ອນຸໂຍເຄ ຠຸມ຺ມນ຺ຕິ ‘‘ຕໍ ກິໍ ມຎ຺ຎສິ, ອາວຸໂສ ຍມກາ’’ຕິອາທິນາ ເຖເຣນ ກຖິຕປຸຈ຺ຉາຍ ຠຸມ຺ມນິທ຺ເທໂສ. ສເຈ ຕໍ ອາວຸໂສຕິ ອິທນ຺ຕິ ‘‘ສເຈ ຕໍ, ອາວຸໂສ’’ຕິ ເອວມາທິກໍ ອິທໍ ວຈນໍ. ເອຕນ຺ຕິ ຍມກຕ຺ເຖຣໍ. ອຎ຺ຎນ຺ຕິ ອຣຫຕ຺ຕໍ. ວຕ຺ຕພ຺ພາກາເຣນ ວທນ຺ໂຕ ອຕ຺ຖໂຕ ອຣຫຕ຺ຕໍ ພ຺ຍາກໂຣນ຺ໂຕ ນາມ ໂຫຕີຕິ ອຘິປ຺ປາເຍນ ວທຕິ.

ເອຕສ຺ສ ປຐມມຄ຺ຄສ຺ສາຕິ ເອຕສ຺ສ ອິທານິເຍວ ຕິປຣິວຏ຺ຏເທສນາວສາເນ ຕຍາ ອຘິຄຕສ຺ສ ປຐມມຄ຺ຄສ຺ສ. ຈຕູຫິ ໂຍເຄຫີຕິ ອຕ຺ຕໂຕ ປິຍໂຕ ອຸທາສິນໂຕ ເວຣິໂຕຕິ ຈຕູຫິປິ ອຸປ຺ປຊ຺ຊນອນຕ຺ຖໂຍເຄຫິ.

ອຸເປຕີຕິ ຕຓ຺ຫຸປຍທິຏ຺ຐຸປເຍຫິ ອຸປາທິຍຕິ ຕຓ຺ຫາທິຏ຺ຐິວຕ຺ຖຸໍ ປປ຺ໂປຕິ. ອຸປາທິຍຕີຕິ ທຬ຺ຫຄ຺ຄາຫໍ ຄຓ຺ຫາຕິ. ອຘິຕິຏ຺ຐຕີຕິ ອຠິນິວິສ຺ສ ຕິຏ຺ຐຕິ. ກິນ຺ຕິ? ‘‘ອຕ຺ຕາ ເມ’’ຕິ. ປຈ຺ຈຕ຺ຖິກາ ເມ ເອເຕຕິ ເອເຕ ຣູປເວທນາທໂຍ ປຎ຺ຈຸປາທານກ຺ຂນ຺ຘາ ມຍ຺ຫໍ ປຈ຺ຈຕ຺ຖິກາ ອນຕ຺ຖາວຫຕ຺ຕາຕິ ວິປສ຺ສນາຎາເຓນ ຎຕ຺ວາ. ວິປສ຺ສນາຍ ໂຍເຊຕ຺ວາຕິ ວິປສ຺ສນາຍ ຂນ຺ເຘ ໂຍເຊຕ຺ວາ.

ຍມກສຸຕ຺ຕວຓ຺ຓນາ ນິຏ຺ຐິຕາ.