໑໒. ຘມ຺ມກຖິກວຄ຺ໂຄ

໑-໒. ອວິຊ຺ຊາສຸຕ຺ຕາທິວຓ຺ຓນາ

໑໑໓-໑໑໔. ຍາວຕາຕິ ຍສ຺ມາ. ອິມາຍ…ເປ… ສມນ຺ນາຄໂຕຕິ ‘‘ອິທໍ ທຸກ຺ຂນ຺ຕິ ຍຖາຠູຕໍ ນປ຺ປຊານາຕີ’’ຕິອາທິນາ ນເຍນ ວຸຕ຺ຕາຍ ຈຕູສຸ ອຣິຍສຈ຺ເຈສຸ ອຎ຺ຎາຓສຠາວາຍ ອວິຊ຺ຊາຍ ສມ຺ໂມເຫນ ສມນ຺ນາຄໂຕ. ເອຕ຺ຕາວຕາຕິ ເອຕ຺ຕເກນ ກາຣເຓນ ອວິຊ຺ຊາຄໂຕ ສມງ຺ຄີຠູເຕນ ອຸປຄໂຕ, ອວິຊ຺ຊາຍ ວາ ອຸເປໂຕ ນາມ ໂຫຕິ.

ທຸຕິເຍປີຕິ ວິຊ຺ຊາສຸຕ຺ເຕ. ‘‘ວິຊ຺ຊາວເສນ ເທສນາ’’ຕິ ອຍເມວ ວິເສໂສຕິ ອາຫ ‘‘ເອເສວ ນໂຍ’’ຕິ.

ອວິຊ຺ຊາສຸຕ຺ຕາທິວຓ຺ຓນາ ນິຏ຺ຐິຕາ.

໓. ຘມ຺ມກຖິກສຸຕ຺ຕວຓ຺ຓນາ

໑໑໕. ປຐເມນ ຘມ຺ມກຖິໂກ ກຖິໂຕ ‘‘ຘມ຺ມໍ ເທເສຕີ’’ຕິ ວຸຕ຺ຕຕ຺ຕາ. ທຸຕິເຍນ ເສຂຠູມິ ກຖິຕາ ‘‘ປຏິປນ຺ໂນ ໂຫຕີ’’ຕິ ວຸຕ຺ຕຕ຺ຕາ, ຕຕິເຍນ ອເສຂຠູມິ ກຖິຕາ ‘‘ອນຸປາທາວິມຸຕ຺ໂຕ ໂຫຕີ’’ຕິ ວຸຕ຺ຕຕ຺ຕາ. ຘມ຺ມກຖິກໍ ປຸຈ຺ຉິເຕນ ຠຄວຕາ. ວິເສເສຕ຺ວາຕິ ຘມ຺ມກຖິກຠາວໂຕ ວິເສເສຕ຺ວາ ອຸກ຺ກໍເສຕ຺ວາ. ທ຺ເວ ຠູມິໂຍຕິ ເສກ຺ຂາເສກ຺ຂຠູມິໂຍ.

ຘມ຺ມກຖິກສຸຕ຺ຕວຓ຺ຓນາ ນິຏ຺ຐິຕາ.

໔. ທຸຕິຍຘມ຺ມກຖິກສຸຕ຺ຕວຓ຺ຓນາ

໑໑໖. ຕີຓິ ວິສ຺ສຊ຺ຊນານີຕິ ຍຖາປຸຈ຺ຉໍ ຕີຓິ ວິສ຺ສຊ຺ຊນານິ.

ທຸຕິຍຘມ຺ມກຖິກສຸຕ຺ຕວຓ຺ຓນາ ນິຏ຺ຐິຕາ.

໕-໙. ພນ຺ຘນສຸຕ຺ຕາທິວຓ຺ຓນາ

໑໑໗-໑໒໑. ຕີຣໍ ວຸຈ຺ຈຕິ ວຏ຺ຏໍ ໂອຣິມຕີຣນ຺ຕິ ກຕ຺ວາ. ເຕນາຫ ‘‘ອຖາຍໍ ອິຕຣາ ປຊາ, ຕີຣເມວານຸຘາວຕີ’’ຕິ (ຘ. ປ. ໘໕). ປາຣໍ ວຸຈ຺ຈຕິ ນິພ຺ພານໍ ສໍສາຣສ຺ສ ປາຣິມນ຺ຕິ ກຕ຺ວາ. ພທ຺ໂຘຕິ ອນຸສຍປ຺ປຫານສ຺ສ ອກຕຕ຺ຕາ ກິເລສພນ຺ຘເນນ ພທ຺ໂຘ, ສຸກ຺ກປກ຺ເຂປິ ທິຏ຺ຐິສມນຸປສ຺ສນາຍ ຣູປາທິພນ຺ຘນສ຺ສ ປຏິກ຺ເຂປມຕ຺ຕເມວ ວຸຕ຺ຕໍ, ນ ວິໂມກ຺ຂນ຺ຕິ ອຘິປ຺ປາໂຍ. ອິມສ຺ມິໍ ສຸຕ຺ເຕ ວຏ຺ຏທຸກ຺ຂໍ ກຖິຕນ຺ຕິ ‘‘ຕີຣທສ຺ສີ ປາຣທສ຺ສີ, ປຣິມຸຕ຺ໂຕ ໂສ ທຸກ຺ຂສ຺ມາຕິ ວທາມີ’’ຕິ ອາຄຕຕ຺ຕາ ວຏ຺ຏວິວຏ຺ຏໍ ກຖິກນ຺ຕິ ວຕ຺ຕຸໍ ສກ຺ກາ.

ຉຏ຺ຐາທີນິ ອຸຕ຺ຕານຕ຺ຖາເນວ ເຫຏ຺ຐາ ວຸຕ຺ຕນຍຕ຺ຕາ.

ພນ຺ຘນສຸຕ຺ຕາທິວຓ຺ຓນາ ນິຏ຺ຐິຕາ.

໑໐. ສີລວນ຺ຕສຸຕ຺ຕວຓ຺ຓນາ

໑໒໒. ອາພາຘຏ຺ເຐນາຕິ ອາທິໂຕ ອຸປ຺ປຕ຺ຕິໂຕ ປຏ຺ຐາຍ ພາຘນຏ຺ເຐນ ຣຸຊນຏ຺ເຐນ. ອນ຺ໂຕໂທສຏ຺ເຐນາຕິ ອພ຺ຠນ຺ຕເຣ ເອວ ທຸສ຺ສນຏ຺ເຐນ ກຸປ຺ປນຏ຺ເຐນ. ຂຓນຏ຺ເຐນາຕິ ສສນຏ຺ເຐນ. ທຸກ຺ຂຏ຺ເຐນາຕິ ທຸກ຺ຂມຕ຺ຕາ ທຸກ຺ຂຠາເວນ. ທຸກ຺ຂຎ຺ຫິ ໂລເກ ‘‘ອຆ’’ນ຺ຕິ ວຸຈ຺ຈຕິ ອຕິວິຍ ຫນນໂຕ. ວິສຠາຄໍ …ເປ… ປຈ຺ຈຍຏ຺ເຐນາຕິ ຍຖາປວຕ຺ຕມານານໍ ຘາຕາທີນໍ ວິສຠາຄຠູຕມຫາຠູຕສມຸຏ຺ຐານສ຺ສ ອາພາຘສ຺ສ ປຈ຺ຈຍຠາເວນ. ອສກຏ຺ເຐນາຕິ ອນຕ຺ຕນິຍໂຕ. ປລຸຊ຺ຊນຏ຺ເຐນາຕິ ປກາຣໂຕ ຠິຊ຺ຊນຏ຺ເຐນ. ສຕ຺ຕສຸຎ຺ຎຕຏ຺ເຐນາຕິ ສຕ຺ຕສງ຺ຂາຕອຕ຺ຕສຸຎ຺ຎຕຏ຺ເຐນ. ອຕ຺ຕາຠາເວນາຕິ ທິຏ຺ຐິຄຕິກປຣິກປ຺ປິຕສ຺ສ ອຕ຺ຕໂນ ອຠາເວນ. ສຸຎ຺ຎໂຕ ອນຕ຺ຕໂຕຕິ ເອຕ຺ຖ ‘‘ປຣໂຕ’’ຕິ ປທສ຺ສ ສງ຺ຄໂຫ ກາຕພ຺ໂພ, ຕສ຺ມາ ‘‘ທ຺ວີຫິ ອນຕ຺ຕມນສິກາໂຣ’’ຕິ ວຕ຺ຕພ຺ພໍ.

ສີລວນ຺ຕສຸຕ຺ຕວຓ຺ຓນາ ນິຏ຺ຐິຕາ.

໑໑. ສຸຕວນ຺ຕສຸຕ຺ຕວຓ຺ຓນາ

໑໒໓. ຕຖາ ເອກາທສເມຕິ ເອຕ຺ຖ ຕຖາ-ສທ຺ເທນ ‘‘ອຸຕ຺ຕານເມວາ’’ຕິ ອິທໍ ອາກຑ຺ຒຕິ. ອິຘາຕິ ເອກາທສເມ. ກມ຺ມຏ຺ຐານສ຺ສ ອຸຄ຺ຄຫຘາຣຓປຣິຈຍມນສິກາຣວເສນ ປວຕ຺ຕຎາຓໍ ກມ຺ມຏ຺ຐານສຸຕວເສນ ນິປ຺ຜຊ຺ຊນໂຕ ‘‘ສຸຕ’’ນ຺ຕິ ວຸຕ຺ຕໍ.

ສຸຕວນ຺ຕສຸຕ຺ຕວຓ຺ຓນາ ນິຏ຺ຐິຕາ.

໑໒-໑໓. ກປ຺ປສຸຕ຺ຕາທິວຓ຺ຓນາ

໑໒໔-໑໒໕. ຣາຫຸໂລວາທສທິສານີຕິ ຣາຫຸໂລວາທສຸຕ຺ເຕ (ມ. ນິ. ໒.໑໑໓ ອາທໂຍ) ອາຄຕສຸຕ຺ຕສທິສານິ.

ກປ຺ປສຸຕ຺ຕາທິວຓ຺ຓນາ ນິຏ຺ຐິຕາ.

ຘມ຺ມກຖິກວຄ຺ຄວຓ຺ຓນາ ນິຏ຺ຐິຕາ.