໑-໘. ຈກ຺ຂຸສຸຕ຺ຕາທິວຓ຺ຓນາ

໑໘໘-໑໙໕. ເອກວິຫາຣີຕິ ຈຕູສຸປິ ອິຣິຍາປເຖສຸ ເອກາກີ ຫຸຕ຺ວາ ວິຫຣນ຺ໂຕ. ວິເວກຏ຺ໂຐຕິ ວິວິຕ຺ຕຏ຺ໂຐ, ເຕນາຫ ‘‘ນິສ຺ສທ຺ໂທ’’ຕິ. ສຕິຍາ ອວິປ຺ປວສນ຺ໂຕຕິ ສຕິຍາ ອວິປ຺ປວາເສນ ຐິໂຕ, ສພ຺ພທາ ອວິຊຫນວເສນ ປວຕ຺ໂຕ. ອາຕາປີຕິ ວີຣິຍສມ຺ປນ຺ໂນຕິ ສພ຺ພໂສ ກິເລສານໍ ອາຕາປນປຣິຕາປນວເສນ ປວຕ຺ຕວີຣິຍສມງ຺ຄີຠູໂຕ. ປຫິຕຕ຺ໂຕຕິ ຕສ຺ມິໍ ວິເສສາຘິຄເມ ເປສິຕຈິຕ຺ໂຕ, ຕຕ຺ຖ ນິນ຺ໂນ ຕປ຺ປພ຺ຠາໂຣຕິ ອຕ຺ໂຖ. ຫຸຕ຺ວາ ອຠາວາກາເຣນາຕິ ອຸປ຺ປຕ຺ຕິໂຕ ປຸພ຺ເພ ອວິຊ຺ຊມາໂນ ປຈ຺ຈຍສມວາເຍນ ຫຸຕ຺ວາ ອຸປ຺ປຊ຺ຊິຕ຺ວາ ຠງ຺ຄຸປຣມສງ຺ຂາເຕນ ອຠາວາກາເຣນ. ອນິຈ຺ຈນ຺ຕິ ນິຈ຺ຈຘຸວຕາຠາວໂຕ. ອຸປ຺ປາທວຍວນ຺ຕຕາຍາຕິ ຂເຓ ຂເຓ ອຸປ຺ປຊ຺ຊິຕ຺ວາ ນິຣຸຊ຺ຌນໂຕ. ຕາວກາລິກຕາຍາຕິ ຕງ຺ຂຓິກຕາຍ. ວິປຣິຓາມໂກຏິຍາຕິ ວິປຣິຓາມວນ຺ຕຕາຍ. ຈກ຺ຂຸຎ຺ຫິ ອຸປາທາຍ ວິກາຣາປຊ຺ຊເນນ ວິປຣິຓມນ຺ຕໍ ວິນາສໍ ປຏິປີຬໍ ປາປຸຓາຕິ. ນິຈ຺ຈປຏິກ຺ເຂປໂຕຕິ ນິຈ຺ຈຕາຍ ປຏິກ຺ຂິປິຕພ຺ພໂຕ ເລສມຕ຺ຕສ຺ສປິ ອນຸປລພ຺ຠນໂຕ. ທຸກ຺ຂມນຏ຺ເຐນາຕິ ນິຣນ຺ຕຣທຸກ຺ຂຕາຍ ທຸກ຺ເຂນ ຂມິຕພ຺ພໂຕ. ທຸກ຺ຂວຕ຺ຖຸກຏ຺ເຐນາຕິ ນານປ຺ປກາຣທຸກ຺ຂາຘິຏ຺ຐານໂຕ. ສຕຕສມ຺ປີຬນຏ຺ເຐນາຕິ ອຠິຓ຺ຫຕາປສຠາວໂຕ. ສຸຂປຏິກ຺ເຂເປນາຕິ ສຸຂຠາວສ຺ສ ປຏິກ຺ຂິປິຕພ຺ພໂຕ. ຕຓ຺ຫາຄາໂຫ ມມໍກາຣຠາວໂຕ. ມານຄາໂຫ ອຫໍກາຣຠາວໂຕ. ທິຏ຺ຐິຄາໂຫ ‘‘ອຕ຺ຕາ ເມ’’ຕິ ວິປລ຺ລາສຠາວໂຕ. ວິຣາຄວເສນາຕິ ວິຣາຄຄ຺ຄຫເຓນ. ຕຖາ ວິມຸຕ຺ຕິວເສນາຕິ ວິມຸຕ຺ຕິຄ຺ຄຫເຓນ.

ປສາທາວ ຄຫິຕາ ທ຺ວາຣຠາວປ຺ປຕ຺ຕສ຺ສ ອຘິປ຺ເປຕຕ຺ຕາ. ສມ຺ມສນຈາຣຈິຕ຺ຕໍ ທ຺ວາຣຠູຕມໂນຕິ ອຘິປ຺ປາໂຍ.

ຉຏ຺ເຐ ອາຣມ຺ມເຓ ເຕຠູມກຘມ຺ມາ ສມ຺ມສນຈາຣສ຺ສ ອຘິປ຺ເປຕຕ຺ຕາ. ຍຖາ ປຐມສຸຕ຺ເຕ ປຎ຺ຈ ປສາທາ ຄຫິຕາ, ນ ສສມ຺ຠາຣຈກ຺ຂຸອາທໂຍ, ເອວໍ ຕຕິຍສຸຕ຺ເຕ ນ ປສາທວຕ຺ຖຸກຈິຕ຺ຕເມວ ຄຫິຕໍ. ນ ຕໍສມ຺ປຍຸຕ຺ຕາ ຘມ຺ມາ. ເອວຎ຺ຫິ ອວຘາຣຓໍ ສາຕ຺ຖກໍ ໂຫຕິ ອຎ຺ຎຖາ ເຕນ ອປເນຕພ຺ພສ຺ສ ອຠາວໂຕ. ສພ຺ພຕ຺ຖາຕິ ສພ຺ເພສຸ ຈຕຸຕ຺ຖສຸຕ຺ຕາທີສຸ. ຊວນປ຺ປຕ຺ຕາຕິ ຊວນຈິຕ຺ຕສໍຍຸຕ຺ຕາ.

ຈກ຺ຂຸສຸຕ຺ຕາທິວຓ຺ຓນາ ນິຏ຺ຐິຕາ.