໖. ລາຠສກ຺ກາຣສໍຍຸຕ຺ຕໍ

໑. ປຐມວຄ຺ໂຄ

໑. ທາຣຸຓສຸຕ຺ຕວຓ຺ຓນາ

໑໕໗. ຖທ຺ໂຘຕິ ກກ຺ຂໂຬ ອນິຏ຺ຐສ຺ສ ປທານໂຕ. ຈຕຸປຈ຺ຈຍລາໂຠຕິ ຈຕຸນ຺ນໍ ປຈ຺ຈຍານໍ ປຏິລາໂຠ. ສກ຺ກາໂຣຕິ ເຕຫິເຍວ ປຈ຺ຈເຍຫິ ສຸສງ຺ຂເຕຫິ ປູຊນາ, ໂສ ປນ ອຕ຺ຖໂຕ ສມ຺ປຕ຺ຕິເຍວາຕິ ອາຫ ‘‘ເຕສໍເຍວ…ເປ… ລາໂຠ’’ຕິ. ວຓ຺ຓໂຆໂສຕິ ຄຸຓກິຕ຺ຕນາ. ອນ຺ຕຣາຍສ຺ສ ອນຕິວຕ຺ຕນໂຕ ອນ຺ຕຣາຍິໂກ ອນຕ຺ຖາວຫຕ຺ຕາ.

ທາຣຸຓສຸຕ຺ຕວຓ຺ຓນາ ນິຏ຺ຐິຕາ.

໒. ພຬິສສຸຕ຺ຕວຓ຺ຓນາ

໑໕໘. ພຬິເສນ ຈຣຕິ, ເຕນ ວາ ຊີວຕີຕິ ພາຬິສິໂກ. ເຕນາຫ ‘‘ພຬິສໍ ຄເຫຕ຺ວາ ຈຣມາໂນ’’ຕິ. ອາມິສຄຕນ຺ຕິ ອາມິສູປຄຕໍ ອາມິສປຕິຕໍ. ເຕນາຫ ‘‘ອາມິສມກ຺ຂິຕ’’ນ຺ຕິ. ຠິນ຺ນາຘິກຣຓານມ຺ປິ ພາຫິຣຕ຺ຖສມາໂສ ໂຫເຕວາຕິ ອາຫ ‘‘ອາມິເສ ຈກ຺ຂຸທສ຺ສນ’’ນ຺ຕິ. ອໂຍ ວຸຈ຺ຈຕິ ສຸຂໍ, ຕພ຺ພິຘຸຣຕາຍ ອນໂຍ, ທຸກ຺ຂນ຺ຕິ ອາຫ ‘‘ທຸກ຺ຂໍ ປຕ຺ໂຕ’’ຕິ. ອສ຺ສາຕິ ເອເຕນ. ກຕ຺ຕຸອຕ຺ເຖ ຫິ ເອຕໍ ສາມິວຈນໍ. ຍຖາ ກິເລສາ ວຕ຺ຕນ຺ຕິ, ເອວໍ ປວຕ຺ຕມາໂນ ປຸຄ຺ຄໂລ ກິເລສວິປ຺ປໂຍໂຄ ນ ໂຫຕີຕິ ວຸຕ຺ຕໍ ‘‘ຍຖາ ກິເລສມາຣສ຺ສ ກາໂມ, ເອວໍ ກຕ຺ຕພ຺ໂພ’’ຕິ.

ພຬິສສຸຕ຺ຕວຓ຺ຓນາ ນິຏ຺ຐິຕາ.

໓-໔. ກຸມ຺ມສຸຕ຺ຕາທິວຓ຺ຓນາ

໑໕໙-໑໖໐. ອຏ຺ຐິກຈ຺ຉປາ ວຸຈ຺ຈນ຺ຕິ ເຍສໍ ກປາລມຕ຺ຖເກ ຕິຂິຓາ ອຏ຺ຐິໂກຏິ ໂຫຕິ, ເຕສໍ ສມູໂຫ ອຏ຺ຐິກຈ຺ຉປກຸລໍ. ມຈ຺ຉກຈ຺ຉປາທີນໍ ສຣີເຣ ລມ຺ພນ຺ຕີ ປປຕຕີຕິ ປປຕາ, ວຸຈ຺ຈມານາກາໂຣ ອຍກຓ຺ຏໂກ. ອຍໂກສເກຕິ ອໂຍມຍໂກສເກ. ກຓ຺ຓິກສລ຺ລສຓ຺ຐາໂນຕິ ອຕ຺ຕນິກາປນສລ຺ລສຓ຺ຐາໂນ. ອຍກຓ຺ຏໂກຕິ ອໂຍມຍວງ຺ກກຓ຺ຏໂກ. ນິກ຺ຂມຕິ ເອຕ຺ຖ ອຖາວຣໂຕ. ປເວສິຕມຕ຺ໂຕ ຫິ ໂສ. ອິທານິ ຕ຺ວໍ ‘‘ອມ຺ຫາກ’’ນ຺ຕິ ນ ວຕ຺ຕພ຺ໂພ. ອິໂຕ ອນນ຺ຕຣສຸຕ຺ເຕຕິ ຈຕຸຕ຺ຖສຸຕ຺ຕມາຫ.

ກຸມ຺ມສຸຕ຺ຕາທິວຓ຺ຓນາ ນິຏ຺ຐິຕາ.

໕. ມີຬ຺ຫກສຸຕ຺ຕວຓ຺ຓນາ

໑໖໑. ມີຬ຺ຫກາຕິ ເອວໍ ອິຕ຺ຖິລິງ຺ຄວເສນ ວຸຈ຺ຈມານາ. ຄູຖປາຓກາຕິ ຄູຖຠກ຺ຂປາຓກາ. ອນ຺ໂຕຕິ ກຸຈ຺ຉິຍໍ.

ມີຬ຺ຫກສຸຕ຺ຕວຓ຺ຓນາ ນິຏ຺ຐິຕາ.

໖. ອສນິສຸຕ຺ຕວຓ຺ຓນາ

໑໖໒. ‘‘ອິເມ ລາຠສກ຺ກາຣໍ ອນາຫຣນ຺ຕາ ຊິຆຈ຺ຉາທິທຸກ຺ຂໍ ປາປຸຓນ຺ຕູ’’ຕິ ເອວໍ ນ ສຕ຺ຕານໍ ທຸກ຺ຂກາມຕາຍ ເອວມາຫາຕິ ອາເນຕ຺ວາ ສມ຺ພນ຺ໂຘ. ອນນ຺ຕທຸກ຺ຂໍ ອນຸໂຠຕິ ອປຣາປຣໍ ອຸປ຺ປຊ຺ຊນກອກຸສລຈິຕ຺ຕານໍ ພຫຸຠາວໂຕ.

ອສນິສຸຕ຺ຕວຓ຺ຓນາ ນິຏ຺ຐິຕາ.

໗. ທິທ຺ຘສຸຕ຺ຕວຓ຺ຓນາ

໑໖໓. ອຈ຺ຉວິສຍຸຕ຺ຕາຕິ ວາ ທິທ຺ເຘ ຄເຕນ ຄຕທິທ຺ເຘນ. ເຕນາຫ ‘‘ວິສມກ຺ຂິເຕນາ’’ຕິ.

ທິທ຺ຘສຸຕ຺ຕວຓ຺ຓນາ ນິຏ຺ຐິຕາ.

໘. ສິງ຺ຄາລສຸຕ຺ຕວຓ຺ຓນາ

໑໖໔. ຊຣສິງ຺ຄາໂລຕ຺ເວວ ວຸຈ຺ຈຕິ ສຣີຣໂສຠາຍ ອຠາວໂຕ. ສຣີຣສ຺ສ ອຸຄ຺ຄຕກຓ຺ຏກຕ຺ຕາ ອຸກ຺ກຓ຺ຏເກນ ນາມ. ຜຸຏຕີຕິ ຜລຕິ ຠິຊ຺ຊຕິ.

ສິງ຺ຄາລສຸຕ຺ຕວຓ຺ຓນາ ນິຏ຺ຐິຕາ.

໙. ເວຣມ຺ຠສຸຕ຺ຕວຓ຺ຓນາ

໑໖໕. ກາຍໍ ນ ຣກ຺ຂຕິ ນາມ ຉພ຺ພີສຕິຍາ ສາຣຸປ຺ປານໍ ປຣິຈ຺ຈຊນໂຕ. ວາຈໍ ນ ຣກ຺ຂຕິ ນາມ ຣາຄສາມນ຺ຕາ ຈ ໂກຘສາມນ຺ຕາ ຈ ຍາວ ນິຈ຺ຉາຣຓໂຕ.

ເວຣມ຺ຠສຸຕ຺ຕວຓ຺ຓນາ ນິຏ຺ຐິຕາ.

໑໐. ສຄາຖກສຸຕ຺ຕວຓ຺ຓນາ

໑໖໖. ‘‘ຍສ຺ສ ສກ຺ກຣິຍມານສ຺ສາ’’ຕິ ເອຕ຺ຖ ອສກ຺ກາເຣນ ຈູຠຍນ຺ຕິ ອສກ຺ກາເຣນ ຈ ອຸຠຍຎ຺ຈ, ກທາຈິ ສກ຺ກາເຣນ, ກທາຈິ ອສກ຺ກາເຣນ ກທາຈິ ອຸຠເຍນາຕິ ອຕ຺ໂຖ. ເຕນາຫ ‘‘ອສກ຺ກາເຣນາ’’ຕິອາທິ. ສຕຕວິຫາຣານໍ ສມ຺ປຕ຺ຕິຍາ ສາຕຕິໂກຕິ ອາຫ ‘‘ອຣຫຕ຺ຕ…ເປ… ສຸຂຸມທິຏ຺ຐີ’’ຕິອາທິ. ຕຖາ ຫິ ສາ ‘‘ວຊິຣູປມຎາຓ’’ນ຺ຕິ ວຸຈ຺ຈຕິ. ອາຄຕຕ຺ຕາຕິ ຜລສມາປຕ຺ຕິໍ ສມາປຊ຺ຊິຕຸໍ ຕສ຺ສາ ປຸພ຺ພປຣິກມ຺ມໍ ອຸປຄຕຕ຺ຕາ.

ສຄາຖກສຸຕ຺ຕວຓ຺ຓນາ ນິຏ຺ຐິຕາ.

ປຐມວຄ຺ຄວຓ຺ຓນາ ນິຏ຺ຐິຕາ.

໒. ທຸຕິຍວຄ຺ໂຄ

໑-໒. ສຸວຓ຺ຓປາຕິສຸຕ຺ຕາທິວຓ຺ຓນາ

໑໖໗-໑໖໘. ຈາເລຕຸໍ ນ ສກ຺ໂກຕິ ສີລປພ຺ພຕສນ຺ນິສ຺ສິຕຕ຺ຕາ. ອຎ຺ຎໍ ວາ ກິຈ຺ຈໍ ກໂຣຕິ ປເຄວ ສີລສ຺ສ ຉຑ຺ຑິຕຕ຺ຕາ. ຕຕິຍາທີສຸ ອປຸພ຺ພໍ ນຕ຺ຖິ.

ສຸວຓ຺ຓປາຕິສຸຕ຺ຕາທິວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.

໓. ຕຕິຍວຄ຺ໂຄ

໑. ມາຕຸຄາມສຸຕ຺ຕວຓ຺ຓນາ

໑໗໐. ຍໍ ວິສຠາຄວຕ຺ຖຸ ປຸຣິສສ຺ສ ຈິຕ຺ຕໍ ປຣິຍາທາຍ ຐາຕຸໍ ສກ຺ໂກຕີຕິ ວຸຈ຺ຈຕິ, ຕໂຕ ວິເສສໂຕ ລາຠສກ຺ກາໂຣວ ສຕ຺ຕານໍ ຈິຕ຺ຕໍ ປຣິຍາທາຍ ຐາຕຸໍ ສກ຺ໂກຕີຕິ ທສ຺ເສນ຺ໂຕ ຠຄວາ ‘‘ນ ຕສ຺ສ, ຠິກ຺ຂເວ’’ຕິອາທິມໂວຈາຕິ ທສ຺ເສນ຺ໂຕ ‘‘ນ ຕສ຺ສາ’’ຕິອາທິມາຫ.

ມາຕຸຄາມສຸຕ຺ຕວຓ຺ຓນາ ນິຏ຺ຐິຕາ.

໒. ກລ຺ຍາຓີສຸຕ຺ຕວຓ຺ຓນາ

໑໗໑. ທຸຕິຍໍ ອຸຕ຺ຕານເມວ, ຕສ຺ເສວ ອຕ຺ຖສ຺ສ ເກວລໍ ຊນປທກລ຺ຍາຓີວເສນ ວຸຕ຺ຕໍ.

ກລ຺ຍາຓີສຸຕ຺ຕວຓ຺ຓນາ ນິຏ຺ຐິຕາ.

໓-໖. ເອກປຸຕ຺ຕກສຸຕ຺ຕາທິວຓ຺ຓນາ

໑໗໒-໑໗໕. ສທ຺ຘາຕິ ອຣິຍມຄ຺ເຄນ ອາຄຕສທ຺ຘາ ອຘິປ຺ເປຕາຕິ ອາຫ ‘‘ໂສຕາປນ຺ນາ’’ຕິ.

ເອກປຸຕ຺ຕກສຸຕ຺ຕາທິວຓ຺ຓນາ ນິຏ຺ຐິຕາ.

໗. ຕຕິຍສມຓພ຺ຣາຫ຺ມຓສຸຕ຺ຕວຓ຺ຓນາ

໑໗໖. ເອວມາທີຕິ ອາທິ-ສທ຺ເທນ ພາຫຸສຈ຺ຈສໍວຣສີລາທີນໍ ສງ຺ຄໂຫ ທຏ຺ຐພ຺ໂພ. ລາຠສກ຺ກາຣສ຺ສ ສມຸທຍໍ ອຸປ຺ປຕ຺ຕິກາຣຓໍ ສມຸທຍສຈ຺ຈວເສນ ທຸກ຺ຂສຈ຺ຈສ຺ສ ອຸປ຺ປຕ຺ຕິເຫຕຸຕາວເສນ.

ຕຕິຍສມຓພ຺ຣາຫ຺ມຓສຸຕ຺ຕວຓ຺ຓນາ ນິຏ຺ຐິຕາ.

໘. ຉວິສຸຕ຺ຕວຓ຺ຓນາ

໑໗໗. ລາຠສກ຺ກາຣສິໂລໂກ ນຣກາທີສຸ ນິພ຺ພຕ຺ເຕນ຺ໂຕຕິ ອິທໍ ຕນ຺ນິສ຺ສຍໍ ກິເລສຄຓໍ ສນ຺ຘາຍາຫ. ນິພ຺ພຕ຺ເຕນ຺ໂຕຕິ ນິພ຺ພຕ຺ຕາເປນ຺ໂຕ. ອິມໍ ມນຸສ຺ສອຕ຺ຕຠາວໍ ນາເສຕິ ມນຸສ຺ສຕ຺ຕໍ ປຸນ ນິພ຺ພຕ຺ຕິຕຸໍ ອປ຺ປທານວເສນ. ຕສ຺ມາຕິ ທຸຄ຺ຄຕິນິພ຺ພຕ຺ຕາປນໂຕ ອິຘ ມຣຓທຸກ຺ຂາວຫນໂຕ ຈ.

ຉວິສຸຕ຺ຕວຓ຺ຓນາ ນິຏ຺ຐິຕາ.

໙. ຣຊ຺ຊຸສຸຕ຺ຕວຓ຺ຓນາ

໑໗໘. ຂຣາ ຜຣຸສາ ຉວິອາທີນິ ຉິນ຺ທເນ ສມຕ຺ຖາ.

ຣຊ຺ຊຸສຸຕ຺ຕວຓ຺ຓນາ ນິຏ຺ຐິຕາ.

໑໐. ຠິກ຺ຂຸສຸຕ຺ຕວຓ຺ຓນາ

໑໗໙. ຕໍ ສນ຺ຘາຍາຕິ ທິຏ຺ຐຘມ຺ມສຸຂວິຫາຣສ຺ສ ໂອກາສາຠາວໍ ສນ຺ຘາຍ.

ຠິກ຺ຂຸສຸຕ຺ຕວຓ຺ຓນາ ນິຏ຺ຐິຕາ.

ຕຕິຍວຄ຺ຄວຓ຺ຓນາ ນິຏ຺ຐິຕາ.

໔. ຈຕຸຕ຺ຖວຄ຺ໂຄ

໑-໔. ຠິນ຺ທິສຸຕ຺ຕາທິວຓ຺ຓນາ

໑໘໐-໑໘໓. ເທວທຕ຺ໂຕ ສຄ຺ເຄ ວາ ນິພ຺ພຕ຺ເຕຍ຺ຍາຕິອາທິ ປຣິກປ຺ປວຈນໍ. ນ ຫິ ປຈ຺ເຈກໂພຘິຍໍ ນິຍຕຄຕິໂກ ອນ຺ຕຣາ ມຄ຺ຄຜລານິ ອຘິຄນ຺ຕຸໍ ຠພ຺ໂພຕິ. ໂສຕິ ອນວຊ຺ຊຘມ຺ໂມ. ອສ຺ສາຕິ ເທວທຕ຺ຕສ຺ສ. ສມຸຈ຺ເຉທມຄມາ ກຕູປຈິຕສ຺ສ ມຫໂຕ ປາປຘມ຺ມສ຺ສ ພເລນ ຕສ຺ມິໍ ອຕ຺ຕຠາເວ ສມຸຈ຺ເຉທຠາວໂຕ, ນ ອຈ຺ຈນ຺ຕາຍ. ອກຸສລໍ ນາເມຕໍ ອພລໍ, ກຸສລໍ ວິຍ ນ ມຫາພລໍ, ຕສ຺ມາ ຕສ຺ມິໍເຍວ ອຕ຺ຕຠາເວ ຕາທິສານໍ ປຸຄ຺ຄລານໍ ອເຕກິຈ຺ຉຕາ, ອຎ຺ຎຖາ ສມ຺ມຕ຺ຕນິຍາໂມ ວິຍ ມິຈ຺ຉຕ຺ຕນິຍາໂມ ອຈ຺ຈນ຺ຕິໂກ ສິຍາ. ຍທິ ເອວໍ ວຏ຺ຏຂາຓຸກໂຊຕນາ ກຖນ຺ຕິ? ອາເສວນາວເສນ, ຕສ຺ມາ ຍຖາ ‘‘ສກິໍ ນິມຸຄ຺ໂຄ ນິມຸຄ຺ໂຄ ເອວ ພາໂລ’’ຕິ ວຸຕ຺ຕໍ, ເອວໍ ວຏ຺ຏຂາຓຸກໂຊຕນາ. ຍາທິເສ ຫິ ປຈ຺ຈເຍ ປຏິຈ຺ຈ ປຸຄ຺ຄໂລ ຕໍ ທສ຺ສນໍ ຄຓ຺ຫິ, ຕຖາ ຈ ປຏິປນ຺ໂນ, ປຸນ ອຈິນ຺ຕປ຺ປຕິວຕ຺ເຕ ປຈ຺ຈເຍ ປຕິຕໂຕ ສີສຸກ຺ຂິປນມສ຺ສ ນ ໂຫຕີຕິ ນ ວຕ຺ຕພ຺ພໍ.

ຠິນ຺ທິສຸຕ຺ຕາທິວຓ຺ຓນາ ນິຏ຺ຐິຕາ.

໕. ອຈິຣປກ຺ກນ຺ຕສຸຕ຺ຕວຓ຺ຓນາ

໑໘໔. ກາເລ ສມ຺ປຕ຺ເຕຕິ ຄພ຺ຠສ຺ສ ປຣິປາກຄຕຕ຺ຕາ ວິຊາຍນກາເລ ສມ຺ປຕ຺ເຕ. ໂປຕນ຺ຕິ ອສ຺ສຕຣິຍາ ປຸຕ຺ຕໍ. ເອຕນ຺ຕິ ‘‘ຄພ຺ໂຠ ອສ຺ສຕຣິໍ ຍຖາ’’ຕິ ເອຕໍ ວຈນໍ.

ອຈິຣປກ຺ກນ຺ຕສຸຕ຺ຕວຓ຺ຓນາ ນິຏ຺ຐິຕາ.

໖. ປຎ຺ຈຣຖສຕສຸຕ຺ຕວຓ຺ຓນາ

໑໘໕. ອຠິຫຣີຍຕີຕິ ອຠິຫາໂຣ, ຠຕ຺ຕໍເຍວ ອຠິຫາໂຣ ຠຕ຺ຕາຠິຫາໂຣຕິ ອາຫ ‘‘ອຠິຫຣິຕພ຺ພໍ ຠຕ຺ຕ’’ນ຺ຕິ. ມຈ຺ຉປິຕ຺ຕນ຺ຕິ ວາຬມຈ຺ຉປິຕ຺ຕໍ. ປກ຺ຂິເປຍ຺ຍຸນ຺ຕິ ອຸຣຄາທິນາ ໂອສິຎ຺ເຈຍ຺ຍຸໍ.

ປຎ຺ຈຣຖສຕສຸຕ຺ຕວຓ຺ຓນາ ນິຏ຺ຐິຕາ.

໗-໑໓. ມາຕຸສຸຕ຺ຕາທິວຓ຺ຓນາ

໑໘໖-໑໘໗. ມາຕຸປິ ເຫຕູຕິ ອຕ຺ຕໂນ ມາຕຸຍາ ອຸປ຺ປນ຺ນອນຕ຺ຖາວຫສ຺ສ ປຫານເຫຕຸປິ. ອິໂຕ ປເຣສູຕິ ‘‘ປິຕຸປິ ເຫຕູ’’ຕິ ເອວມາທີສຸ.

ມາຕຸສຸຕ຺ຕາທິວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ລາຠສກ຺ກາຣສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.