໙. ວຊ຺ຊິປຸຕ຺ຕສຸຕ຺ຕວຓ຺ຓນາ

໒໒໙. ວຊ຺ຊິຣຏ຺ເຐ ຣາຊປຸຕ຺ໂຕຕິ ວຊ຺ຊິຣຏ຺ເຐ ຊາຕສໍວທ຺ໂຘ ວຊ຺ຊິຣາຊປຸຕ຺ໂຕ. ສພ຺ພຣຕ຺ຕິຈາໂຣຕິ ຉຓສມ຺ປຕ຺ຕິຍາ ອິໂຕ ຈິໂຕ ຈຣນ຺ເຕຫິ ອນຸຠວິຕພ຺ພນກ຺ຂຕ຺ຕມໂຫ. ເຕນາຫ ‘‘ກຕ຺ຕິກນກ຺ຂຕ຺ຕໍ ໂຆເສຕ຺ວາ’’ ຕິອາທິ. ເອກາພທ຺ຘໍ ໂຫຕີຕິ ຍສ຺ມາ ຈາຕຸມຫາຣາຊິກເທວາ ຕສ຺ມິໍ ທິວເສ ນກ຺ຂຕ຺ຕໍ ໂຆເສຕ຺ວາ ອຕ຺ຕໂນ ປຸຎ຺ຎານຸຠາວສິທ຺ຘາຍ ທິພ຺ພສມ຺ປຕ຺ຕິຍາ ມຫນ຺ຕໍ ນກ຺ຂຕ຺ຕກີຬາສຸຂໍ ອນຸຠວນ຺ຕິ, ຕສ຺ມາ ຕໍ ເຕຫິ ເອກາພທ຺ຘໍ ວິຍ ໂຫຕິ. ເຠຣິອາທິຕູຣິຍານນ຺ຕິ ເຠຣິມຸທິງ຺ຄສງ຺ຂປຓວວີຓາທິຕູຣິຍານໍ. ຕາຬິຕານນ຺ຕິ ອາຣທ຺ຘລຍານຸຣູປໍ ປຫຏານໍ. ວີຓາທີນນ຺ຕິ ວີຓາເວຓຸໂຄມຸຂີອາທີນໍ. ວາທິຕານນ຺ຕິ ຍຖາຣທ຺ຘມຸຈ຺ຉນານຸຣູປໍ ສງ຺ຆຏ຺ຏິຕານໍ. ອຠາສີຕິ ເຕນ ສທ຺ເທນ ອາກຑ຺ຒິຍມານຫທໂຍ ອໂຍນິໂສ ອຸມ຺ມຸຊ຺ຊິຕ຺ວາ ‘‘ມຫຕີ ວຕ ເມ ຊານີ’’ຕິ ອນຸຕ຺ຖຸນນ຺ໂຕ ອຠາສິ. ຉຑ຺ຑິຕທາຣຸກໍ ວິຍາຕິ ວເນ ຉຑ຺ຑິຕນິຣຕ຺ຖກກຬິງ຺ຄຣໍ ວິຍ. ລາມກຕໂຣຕິ ນິຫີນຕໂຣ. ເທວຕາ ປຐມປ຺ປິຕໍ ອາຓິໍ ປຏາຓິຍາ ນີຫຣນ຺ຕີ ວິຍ ເຕນ ຠິກ຺ຂຸນາ ວຸຕ຺ຕມຕ຺ຖໍ ອປເນນ຺ຕີ ‘‘ຕສ຺ສ ເຕ ພຫຸກາ ປິຫຍນ຺ຕີ’’ຕິ ອໂວຈາຕິ ວຸຕ຺ຕນ຺ຕິ ທສ຺ເສນ຺ໂຕ ‘‘ເຖໂຣ’’ຕິອາທິມາຫ. ສຄ຺ຄໍ ຄຈ຺ຉນ຺ຕານໍ ຍຖາ ເນຣຍິກາ ປິຫຍນ຺ຕິ, ເອວໍ ສມ຺ມາປຏິປນ຺ນສ຺ສ ຕຸຍ຺ຫໍ ພຫູ ປິຫຍນ຺ຕິ, ຕສ຺ມາ ຕ຺ວໍ ‘‘ປາປິໂຍ’’ຕິ ອຕ຺ຕານໍ ມາ ມຎ຺ຎິຕ຺ຖາຕິ ອຘິປ຺ປາໂຍ.

ວຊ຺ຊິປຸຕ຺ຕສຸຕ຺ຕວຓ຺ຓນາ ນິຏ຺ຐິຕາ.