໙. ວນສໍຍຸຕ຺ຕໍ

໑. ວິເວກສຸຕ຺ຕວຓ຺ຓນາ

໒໒໑. ສໍເວເຊຕຸກາມາຕິ ອຕ຺ຖໂຕ ສໍເວຄໍ ອຸປ຺ປາເທຕຸກາມາ. ຕຖາຠູຕາ ນໍ ກິເລສສງ຺ຄຓິກາທິໂຕ ວິເວເຈຕຸກາມາ ນາມ ໂຫຕີຕິ ວຸຕ຺ຕໍ ‘‘ວິເວກໍ ປຏິປຊ຺ຊາເປຕຸກາມາ’’ຕິ. ພາຫິເຣສູຕິ ໂຄຈຣຊ຺ຌຕ຺ຕໂຕ ພຫິຠູເຕສຸ. ປຸຖຸຕ຺ຕາຣມ຺ມເຓສູຕິ ຣູປາທິນານາຣມ຺ມເຓສຸ. ຈຣຕີຕິ ປວຕ຺ຕຕິ. ຕ຺ວໍ ຊໂນຕິ ຕ຺ວໍ ອຕ຺ຕໂນ ກິເລເສຫິ ຊນນໂຕ ວິສຸໍ ຊາໂຕ ຕາທິເສ ເອວ ອຎ຺ຎສ຺ມິໍ ຊເນ ອິມໍ ອໂຍນິໂສມນສິກາຣວເສນ ປວຕ຺ຕມານໍ ຉນ຺ທຣາຄໍ ວິນຍສ຺ສຸ ວິໂນເທຫິ. ສຕໍ ຕໍ ສາຣຍາມເສຕິ ນິຍ຺ຍານິກສາສເນ ປພ຺ພຊິຕ຺ວາ ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ອຣຎ຺ຎວາເສນ ຈ ສຕິມນ຺ຕໍ ປຓ຺ຑິຕໍ ຕໍ ມຍມ຺ປິ ຍຖາອຸປ຺ປນ຺ນໍ ວິຕກ຺ກໍ ວິໂນທນາຍ ສາຣຍາມ, ສຕໍ ວາ ສປ຺ປຸຣິສານໍ ກິເລສວິຄມນຘມ຺ມໍ ປຏິປຊ຺ຊິຕ຺ວາ ວສນ຺ຕໍ ຕໍ ສາຣຍາມ ວຏ຺ຏທຸກ຺ຂໍ. ປາຕາລນ຺ຕິ ໂມຫປາຕາລໍ ກິເລສຣໂຊ, ຕເທວ ‘‘ປາຕາລ’’ນ຺ຕິ ວຸຕ຺ຕໍ. ມາ ອວຫຣີຕິ ເຫຏ຺ຐາ ທຸຄ຺ຄຕິໂສຕໍ ມາ ອຸປເນສິ. ສິຕນ຺ຕິ ສມ຺ພນ຺ຘໍ. ເຕນາຫ ‘‘ສຣີຣລຄ຺ຄ’’ນ຺ຕິ. ວິເວກມາປນ຺ໂນຕິ ກິເລສວິເວກໍ ສມຖວິປສ຺ສນາຠາວນມາປນ຺ໂນ. ອຸຕ຺ຕມວີຣິຍນ຺ຕິ ອຸສ຺ໂສຬ຺ຫິລກ຺ຂຓປ຺ປຕ຺ຕໍ ວີຣິຍໍ, ຈຕຸພ຺ພິຘໍ ສມປ຺ປຘານວີຣິຍໍ ວາ ສມ຺ປຕ຺ຕໍ. ປຄ຺ຄຍ຺ຫາຕິ ອາໂຣເປຕ຺ວາ. ປຣມວິເວກນ຺ຕິ ປຣມໍ ສມຸຈ຺ເຉທວິເວກໍ.

ວິເວກສຸຕ຺ຕວຓ຺ຓນາ ນິຏ຺ຐິຕາ.

໒. ອຸປຏ຺ຐານສຸຕ຺ຕວຓ຺ຓນາ

໒໒໒. ກາຍທຣໂຖ ໂຫຕິເຍວ ນິຍເມນ, ນ ຈິຕ຺ຕທຣໂຖ ຕສ຺ສ ມຄ຺ເຄເນວ ສມຸຄ຺ຆາຏິຕຕ຺ຕາ.

ຊຣາຕຸໂຣຕິ ຊຣາຠິຠວເນນ ອາຕຸໂຣເຍວ. ປທທ຺ວເຍປິ ເອເສວ ນໂຍ. ອຸປຣິຏ຺ຐຕາຍ ປຣິໂຕ ທີຆປຸຖຸລຕາຍ ອຕິວິຍ ວິຊ຺ຌຕີຕິ ສຕ຺ຕິສລ຺ລຄ຺ຄຫຓໍ. ເອວໍ ຫິສ຺ສ ຕຓ຺ຫາສລ຺ລສ຺ສ ສທິສຕາ. ອວິຊ຺ຊາຍ ປນ ສມ຺ໂມຫາປາທເນນ ທຸກ຺ຂາປາທເນນ ຈ ວິສສທິສຕາ. ຣຸປ຺ປໂຕຕິ ວິກາຣໍ ອາປາທິຍມານສ຺ສ ປີຬິຍມານສ຺ສາຕິ ອຕ຺ໂຖຕິ ອາຫ ‘‘ຆຏ຺ຏິຍມານສ຺ສາ’’ຕິ.

ປພ຺ພຊິຕນ຺ຕິ ສສນ຺ຕານໂຕ ປພ຺ພຊິຕໍ ວາ ຣາຄາທິມລໂຕ ປພ຺ພຊິຕໍ ວາ. ຕສ຺ມາຕິ ຍສ຺ມາ ເຖຣສ຺ເສເວຕໍ ວຈນໍ, ຕສ຺ມາ ອຍໍ ອິທານິ ວຸຈ຺ຈມາໂນ ເອຕ຺ຖ ຄາຖາຍ ອຕ຺ໂຖ. ເທວຕາຍ ຫີຕິອາທິ ວຸຕ຺ຕສ຺ເສວ ອຕ຺ຖສ຺ສ ປາກຏກຣຓໍ. ເອຕ຺ຖາຕິ ເສສຄາຖາສຸ. ອຕ຺ຖສ຺ສ ວຸຕ຺ຕນຍຕ຺ຕາ ‘‘ອນຸຕ຺ຕານປທວຓ຺ຓນາ’’ຕິ ອາຫ. ວິນຍາຕິ ເຫຕຸມ຺ຫິ ນິສ຺ສກ຺ກວຈນນ຺ຕິ ຕສ຺ສ ເຫຕຸມ຺ຫິ ກຣຓວຈເນນ ອຕ຺ຖມາຫ ‘‘ວິນເຍນາ’’ຕິ. ຕຖາ ‘‘ສມຕິກ຺ກມາ’’ຕິ ເອຕ຺ຖາປິ. ປຣມປຣິສຸທ຺ຘໍ ສໍກິເລສສມຸຈ຺ຉິນ຺ທນໂຕ. ອາຣທ຺ຘວີຣິຍນ຺ຕິ ສມ຺ຠາວິຕວີຣິຍໍ. ສມ຺ຠາວນຎ຺ຈສ຺ສ ປຄ຺ຄຓ຺ຫນໍ ປຣິປູຣຓຎ຺ຈາຕິ ອາຫ ‘‘ປຄ຺ຄຫິຕວີຣິຍໍ ປຣິປຸຓ຺ຓວີຣິຍ’’ນ຺ຕິ.

ອຸປຏ຺ຐານສຸຕ຺ຕວຓ຺ຓນາ ນິຏ຺ຐິຕາ.

໓. ກສ຺ສປໂຄຕ຺ຕສຸຕ຺ຕວຓ຺ຓນາ

໒໒໓. ເຉຕນ຺ຕິ ມິຄານໍ ຊີວິຕໍ ເຉຕໍ. ເຕນາຫ ‘‘ມິຄລຸທ຺ທກ’’ນ຺ຕິ. ໂຣຫິຕມິຄນ຺ຕິ ໂລຫິຕວຓ຺ຓໍ ຂຸທ຺ທກມິຄໍ, ‘‘ມຫາໂຣຫິຕມິຄ’’ນ຺ຕິ ເກຈິ. ສຕ຺ຖຸ ສນ຺ຕິເກ ກມ຺ມຏ຺ຐານໍ ຄເຫຕ຺ວາ ຕສ຺ສ ຊນປທສ຺ສ ສຸລຠຠິກ຺ຂຕາຍ ຕຕ຺ຖ ຄນ຺ຕ຺ວາ ວິຫຣຕີຕິ ອິມມຕ຺ຖໍ ສນ຺ຘາຍ ‘‘ປຐມສຸຕ຺ເຕ ວຸຕ຺ຕນເຍເນວາ’’ຕິ ວຸຕ຺ຕໍ. ອຍໍ ປນ ເຖໂຣ ປຎ຺ຈາຠິຎ຺ໂຎ ວິປສ຺ສນາກມ຺ມິໂກ. ຐຕ຺ວາຕິ ປທານຸພນ຺ຘນວເສນ ຄມນໍ ອຸປຈ຺ຉິນ຺ທິຕ຺ວາ ເຖຣສ຺ສ ອາສນ຺ນຏ຺ຐາເນ ຐຕ຺ວາ. ຕສ຺ສ ວຈນໍ ໂສຕຸໍ ອາຣທ຺ໂຘ. ອງ຺ຄຸຏ຺ຐກໍ ຊາລາເປສີຕິ ອຘິຏ຺ຐານພເລນ ທຓ຺ຑທີປິກໍ ວິຍ ອຕ຺ຕໂນ ອງ຺ຄຸຏ຺ຐກໍ ຊາລາເປສິ. ອກ຺ຂີຫິປິ ປສ຺ສຕິ ອງ຺ຄຸຏ຺ຐກໍ ຊາລມານໍ. ກຓ຺ເຓຫິປິ ສຸຓາຕິ ເຕນ ວຸຈ຺ຈມານໍ ຘມ຺ມໍ ເອກເທເສນ. ຈິຕ຺ຕໍ ປນສ຺ສ ຘາວຕີຕິ ສມ຺ພນ຺ໂຘ. ເອຕສ຺ສປີຕິ ລຸທ຺ທກສ຺ສປິ.

ອປ຺ປປຎ຺ຎນ຺ຕິ ເອຕ຺ຖ ອປ຺ປ-ສທ຺ໂທ ‘‘ອປ຺ປຫຣິເຕ’’ຕິອາທີສຸ ວິຍ ອຠາວຕ຺ໂຖຕິ ອາຫ ‘‘ນິປ຺ປຎ຺ຎ’’ນ຺ຕິ. ກາຣຓຊານນສມຕ຺ເຖນາຕິ ອິມິນາ ກາຣເຓນ ສຕ຺ຕານໍ ສຸຂໍ, ອິມິນາ ທຸກ຺ຂນ຺ຕິ ເອວໍ ສມາຈຣມາເນນ ກາຣຓໍ ຊານິຕຸໍ ສມຕ຺ເຖນ ກມ຺ມສ຺ສກຕຎາຓສມ຺ປຍຸຕ຺ຕຈິຕ຺ເຕນາຕິ ອຕ຺ໂຖ. ສຸຓາຕີຕິ ເກວລໍ ສວນມຕ຺ຕວເສນ ສຸຓາຕິ, ນ ຕທຕ຺ຖວເສນ. ເຕນາຫ ‘‘ອຕ຺ຖມສ຺ສ ນ ຊານາຕີ’’ຕິ. ກາຣຓຣູປານີຕິ ສຠາວກາຣຓານິ. ກິໍ ເມ ອິມິນາຕິ? ‘‘ອິທໍ ປປຎ຺ຈ’’ນ຺ຕິ ປຫາຍ. ວີຣິຍໍ ປຄ຺ຄຍ຺ຫາຕິ ຈຕຸພ຺ພິຘໍ ສມ຺ມປ຺ປຘານໍ ວີຣິຍໍ ປຄ຺ຄຓ຺ຫິຕ຺ວາ.

ກສ຺ສປໂຄຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໔. ສມ຺ພຫຸລສຸຕ຺ຕວຓ຺ຓນາ

໒໒໔. ສມ຺ພຫຸລາຕິ ສຸຕ຺ຕນ຺ຕນເຍນ ສມ຺ພຫຸລາ. ສຸຕ຺ຕນ຺ເຕ ສຊ຺ຌາຍິໍສູຕິ ສຸຕ຺ຕນ຺ຕິກາ. ວິນຍໍ ຘາເຣນ຺ຕີຕິ ວິນຍຘຣາ. ຍຸຎ຺ຊນ຺ຕີຕິ ວາສຘຸເຣ ໂຍຄໍ ກໂຣນ຺ຕິ. ຆເຏນ຺ຕີຕິ ຕຕ຺ຖ ວາຍາມໍ ກໂຣນ຺ຕິ. ກໂຣນ຺ຕານໍເຍວ ອຣຸໂຓ ອຸຄ຺ຄຈ຺ຉຕີຕິ ສມ຺ພນ຺ໂຘ.

ໂກເມຕິ ກິໍ ອິເມ? ເຕນາຫ ‘‘ກຫໍ ອິເມ’’ຕິ? ວຊ຺ຊິຠູມິໍ ວຊ຺ຊິຣຏ຺ຐໍ ຄຕາຕິ ວຊ຺ຊິຠູມິຍາ. ເຕນາຫ ‘‘ວຊ຺ຊິຣຏ຺ຐາຠິມຸຂາ ຄຕາ’’ຕິ. ນຕ຺ຖິ ເອເຕສໍ ນິເກຠໍ ນິພທ຺ຘນິວາສຏ຺ຐານນ຺ຕິ ອນິເກຕາ ເຕນາຫ ‘‘ອເຄຫາ’’ຕິ. ອຸຕຸ ເອວ ສປ຺ປາຍໍ, ອຸຕຸວເສນ ວາ ກາຍຈິຕ຺ຕານໍ ກລ຺ລຕ຺ຕາ ສປ຺ປາຍໍ. ເອສ ນໂຍ ເສເສສຸປິ.

ສມ຺ພຫຸລສຸຕ຺ຕວຓ຺ຓນາ ນິຏ຺ຐິຕາ.

໕. ອານນ຺ທສຸຕ຺ຕວຓ຺ຓນາ

໒໒໕. ອຕິເວລນ຺ຕິ ອຕິພຫຸກາລໍ. ຠິກ຺ຂຸນາ ນາມ ອຸປຄຕານໍ ອຸປນິສິນ຺ນກຖາມຕ຺ຕໍ ວຕ຺ວາ ຄນ຺ຖຘຸເຣຫິ ວາສຘຸເຣຫິ ວາ ຍຸຕ຺ຕປຍຸຕ຺ຕຈິຕ຺ເຕນ ຠວິຕພ຺ພໍ, ນາຕິເວລໍ ເຕສໍ ສຎ຺ຎຕ຺ຕິພຫຸເລນ. ເຖໂຣ ປນ ຕທາ ເກນຈິ ກາຣເຓນ ພຫຸເວລໍ ຄິຫິສຎ຺ຎຕ຺ຕິພຫຸໂລ ອໂຫສິ, ຕໍ ສນ຺ຘາຍ ວຸຕ຺ຕໍ ‘‘ອຕິເວລ’’ນ຺ຕິອາທິ. ອິທານິ ຕມຕ຺ຖໍ ວິຠາເວຕຸໍ ‘‘ຠຄວຕີ’’ຕິອາທິ ວຸຕ຺ຕໍ. ຕນ຺ຕິ ຕໍ ຕາທິສໍ ສຎ຺ຎາປນໍ ສນ຺ຘາຍ ເອຕໍ ‘‘ອຕິເວລໍ ຄິຫິສຎ຺ຎຕ຺ຕິພຫຸໂລ’’ຕິ ວຈນໍ ວຸຕ຺ຕໍ. ຠິກ຺ຂຸສງ຺ຆສ຺ສ ກຖໍ ສຸຕ຺ວາຕິ ສງ຺ຆສ຺ສ ມຊ຺ເຌ ນິສີທິຕ຺ວາ ເຖເຣນ ກຖິຕຕ຺ຕາ ວຸຕ຺ຕໍ. ສຕ຺ຖຸສາສນນ຺ຕິ ປິຏກຕ຺ຕຍໍ ວທຕິ.

ປສກ຺ກິຍາຕິ ອຸປສກ຺ກິຕ຺ວາ ຄນ຺ຕ຺ວາ. ຕໍ ປນ ຕຕ຺ຖ ອຊ຺ໂຌຄາຫນໍ ໂຫຕີຕິ ອາຫ ‘‘ປວິສິຕ຺ວາ’’ຕິ. ສງ຺ຂາຣທຸກ຺ຂໂຕ ນິພ຺ພິນ຺ນຫທຍສ຺ສ ສພ຺ພສງ຺ຂາຣວິນິສ຺ສຏໍ ນິພ຺ພານໍ ຍາຖາວໂຕ ປຈ຺ຈເວກ຺ຂນ຺ຕສ຺ສ ສມ຺ມເທວ ສມສ຺ສາສກຣໍ ຫຸຕ຺ວາ ອຸປຏ຺ຐຫນ຺ຕໍ ຕໍ ອຸປຣິ ອຘິຄມາຍ ອຸສ຺ສຸກ຺ກໍ ກໂຣນ຺ໂຕ ນິພ຺ພານໍ ຫທເຍ ນິກ຺ຂິປຕິ ນາມາຕິ ອາຫ – ‘‘ນິພ຺ພານໍ…ເປ… ໂອເປຕິ ນາມາ’’ຕິ. ນິພ຺ພານໍ…ເປ… ອາຣມ຺ມຓໂຕ ໂອເປຕິ ນາມາຕິ ອາເນຕ຺ວາ ສມ຺ພນ຺ໂຘ. ອຕ຺ຖວິຣຫິຕາ ‘‘ພິຬິພິຬີ’’ຕິ ປວຕ຺ຕກິຣິຍາ ພິຬິກາ, ອຍໍ ປນ ຄິຫິສຎ຺ຎຕ຺ຕິກຖາ ເຖຣສ຺ສ ອຕ຺ຕໂນ ສາມຎ຺ຎຕ຺ຖອສາຘນໂຕ ເທວຕາຍ ພິຬິກາ ວິຍາຕິ ພິຬິພິຬິກາຕິ ວຸຕ຺ຕາ.

ອານນ຺ທສຸຕ຺ຕວຓ຺ຓນາ ນິຏ຺ຐິຕາ.

໖. ອນຸຣຸທ຺ຘສຸຕ຺ຕວຓ຺ຓນາ

໒໒໖. ອນນ຺ຕເຣ ອຕ຺ຕຠາເວຕິ ອຕີຕານນ຺ຕເຣ ເທວຕ຺ຕຠາເວ. ເຖໂຣ ຫິ ຕາວຕິໍສເທວໂລກາ ຈວິຕ຺ວາ ອິຘູປປນ຺ໂນ. ອຄ຺ຄມເຫສີຕິ ກາຈິ ປຣິຈາຣິກາ ເທວຘີຕາ ຈິຕ຺ຕປຓິຘານມຕ຺ເຕນ ອິທານິປິ ເທວກາເຍ ຠວິສ຺ສຕິ ອຸປຈິຕກຸສລຘມ຺ມຕ຺ຕາຕິ ມຎ຺ຎມານາ ຕສ຺ມິໍ ວຕ຺ຕມານໍ ວິຍ ກເຖນ຺ຕີ ‘‘ໂສຠສີ’’ຕິ ອາຫ. ເອວໍ ອຕີຕມ຺ປິສ຺ສ ທິພ຺ພໂສຕໍ ປຈ຺ຈຸປ຺ປນ຺ນໍ ວິຍ ມຎ຺ເຎຍ຺ຍ ນາຕິຈິຣກາລຕ຺ຕາຕິ ທສ຺ເສນ຺ໂຕ ‘‘ປຸພ຺ເພປິ ໂສຠສີ’’ຕິ ອາຫ. ສຸຄຕິນິຣຍາທິທຸຄ຺ຄຕິຍາ ວເສນ ທຸຄ຺ຄຕາ ເອຕຣຫີຕິ ອຘິປ຺ປາໂຍ. ປຏິປຕ຺ຕິທຸຄ຺ຄຕິຍາ ກາເມສຸ ສມ຺ມຸຈ຺ຉິຕຠາວໂຕ.

ປຕິຏ຺ຐຫນ຺ໂຕຕິ ນິວິສນ຺ໂຕ. ອຏ຺ຐຫິ ກາຣເຓຫີຕິ ຈິຣກາລປຣິຠາວນາຍ ວິຣຸຬ຺ຫມູເລຫິ ອໂຍນິໂສມນສິກາຣາທິປຈ຺ຈຍມູລເກຫິ ວຸຈ຺ຈມາເນຫິ ອຏ຺ຐຫິ ກາຣເຓຫິ. ຣຕ຺ໂຕ ຣາຄວເສນາຕິ ສຠາວໂຕ ສງ຺ກປ຺ປໂຕ ຈ ຍຖາສມີຫິເຕ ອິຏ຺ຐາກາເຣ ສກ຺ກາເຍ ສຎ຺ຊາຕຣາຄວສາ ຣຕ຺ໂຕ ຄິທ຺ໂຘ ຄຘິໂຕ. ປຕິຏ຺ຐາຕີຕິ ໂອຣຸຍ຺ຫ ຕິຏ຺ຐຕິ. ທຸຏ຺ໂຐ ໂທສວເສນາຕິ ສຠາວໂຕ ສງ຺ກປ຺ປໂຕ ຈ ຍຖາສມີຫິເຕ ອນິຏ຺ຐາກາເຣ ສກ຺ກາເຍ ສຎ຺ຊາຕໂທສວເສນ ທຸຏ຺ໂຐ ຣຸປິຕຈິຕ຺ໂຕ. ມູຬ຺ໂຫ ໂມຫວເສນາຕິ ອສມເປກ຺ຂເນນ ມູຬ຺ໂຫ ມຸຍ຺ຫນວເສນ. ວິນິພທ຺ໂຘຕິ ອຫໍກາເຣນ ວິເສສໂຕ ນິພນ຺ຘນໂຕ ມານວຕ຺ຖຸສ຺ມິໍ ພນ຺ຘິໂຕ. ມານວເສນາຕິ ເຕນ ເຕນ ມຎ຺ຎນາກາເຣນ. ປຣາມຏ຺ໂຐຕິ ຘມ຺ມສຠາວໍ ນິຈ຺ຈາທິວເສນ ປຣໂຕ ອາມຏ຺ໂຐ. ທິຏ຺ຐິວເສນາຕິ ມິຈ຺ຉາທສ຺ສນວເສນ. ຖາມຄໂຕຕິ ຣາຄາທິກິເລສວເສນ ຖາມໍ ຖິຣຠາວໍ ອຸປຄໂຕ. ອນຸສຍວເສນາຕິ ມຄ຺ເຄນ ອປ຺ປຫີນຕາຍ ອນຸ ອນຸ ສນ຺ຕາເນ ສຍນວເສນ. ອປ຺ປຫີນຏ຺ໂຐ ຫິ ເຕສໍ ອນຸສຍຏ຺ໂຐ. ອນິຏ຺ຐງ຺ຄໂຕຕິ ສໍສຍິໂຕ. ວິກ຺ເຂປຄໂຕຕິ ວິກ຺ຂິຕ຺ຕຠາວໍ ອຸປຄໂຕ. ອຸທ຺ຘຈ຺ຈວເສນາຕິ ຈິຕ຺ຕສ຺ສ ອຸທ຺ຘຕຠາວວເສນ. ຕາປີຕິ ຕາປິ ເທວກຎ຺ຎາໂຍ. ເອວໍ ປຕິຏ຺ຐິຕາວາຕິ ຍຖາວຸຕ຺ຕນເຍນ ຣຕ຺ຕຠາວາທິນາ ສກ຺ກາຍສ຺ມິໍ ປຕິຏ຺ຐິຕາ ເອວ. ນຣເທວານນ຺ຕິ ປຸຣິສຠູຕເທວານໍ.

ປຏິຄນ຺ຕຸນ຺ຕິ ອເປກ຺ຂາວເສນ ຕໂຕ ອປຄນ຺ຕຸໍ ອເປກ຺ຂໍ ວິສ຺ສຊ຺ເຊຕຸໍ. ທຸສ຺ສນ຺ຕນ຺ຕິ ທສນ຺ຕໍ, ‘‘ວຕ຺ຖ’’ນ຺ຕິ ເກຈິ. ສູຈິໍ ໂຍເຊຕ຺ວາຕິ ສິພ຺ພນສຸຕ຺ເຕນ ສູຈິໍ ໂຍເຊຕ຺ວາ ປາເສ ຈ ປເວເສຕ຺ວາ. ມນາປກາເຍ ເທວນິກາເຍ ຊາຕາ ມນາປກາຍິກາ. ເຕສໍ ປຠາວໍ ທສ຺ເສຕຸໍ ‘‘ມນສາ’’ຕິອາທິ ວຸຕ຺ຕໍ. ສມຊ຺ຊນ຺ຕິ ສໍຫິຕໍ. ຄມນຠາວນ຺ຕິ ຄມນຊ຺ຌາສຍໍ. ວິກ຺ຂີໂຓຕິ ວິຈ຺ຉິນ຺ທນວເສນ ຂີໂຓ. ເທວຕານໍ ອຸຕ຺ຕຣິມນຸສ຺ສຘມ຺ມາໂຣຈເນ ໂທໂສ ນຕ຺ຖີຕິ ຕາສໍ ປຸນ ອນາຄມນຕ຺ຖໍ ອຣຫຕ຺ຕໍ ພ຺ຍາກາສິ.

ອນຸຣຸທ຺ຘສຸຕ຺ຕວຓ຺ຓນາ ນິຏ຺ຐິຕາ.

໗. ນາຄທຕ຺ຕສຸຕ຺ຕວຓ຺ຓນາ

໒໒໗. ອຕິກາເລນາຕິ ອຕິວິຍ ປຸພ຺ພຓ຺ຫກາເລນ, ກາລສ຺ເສວາຕິ ອຕ຺ໂຖ. ໂກຏິສມ຺ມຸຎ຺ຊນິຍາຕິ ສມ຺ມຸຎ຺ຊນິໂກຏິຍາ, ສມ຺ມຸຎ຺ຊນິຍາ ເອກເທເສເນວາຕິ ອຕ຺ໂຖ. ອິມິນາ ສມ຺ມຊ຺ຊເນ ອມນາປກາຣິຕໍ ທສ຺ເສຕິ. ມຊ຺ຌນ຺ຫິເກ ວີຕິວຕ຺ເຕຕິ ຄິຫິສໍສຄ຺ຄວເສນ ກາລໍ ວີຕິນາເມນ຺ໂຕ ມຊ຺ຌນ຺ເຫ ພຫຸວີຕິວຕ຺ເຕ. ອຎ຺ເຎຫິ ຠິກ຺ຂູຫີຕິ ນາຕິກາລໍ ປວິຏ຺ເຐຫິ. ນິສ຺ສກ຺ກວຈນຎ຺ເຈຕໍ. ຠາຍາມິ ນາຄທຕ຺ຕນ຺ຕິ ຕສ຺ສ ປຏິປຕ຺ຕິໍ ຠາຍິຕພ຺ພໍ ກຕ຺ວາ ເທວຕາ ວທນ຺ຕີ ປຏິປຕ຺ຕິຍໍ ນິໂຍເຊຕິ. ສຸປ຺ປຄພ຺ຠນ຺ຕິ ກາຍປາຄພ຺ພິຍາທີຫິ ອຕິວິຍ ສມນ຺ນາຄຕໍ.

ນາຄທຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໘. ກຸລຆຣຓີສຸຕ຺ຕວຓ຺ຓນາ

໒໒໘. ໂອຄາຫປ຺ປຕ຺ໂຕຕິ ວິສ຺ສາສວເສນ ອນຸປ຺ປເວສໍ ປຕ຺ໂຕ. ອຎ຺ຎຕຣໍ ກຸລນ຺ຕິ ຕສ຺ມິໍ ກຸເລ ຊາຍມ຺ປຕິໍ ສນ຺ຘາຍ ວທຕິ. ‘‘ພຫູປກາຣໍ ເມ ເອຕໍ ກຸລໍ ຈິຣໍ ສປ຺ປາຍາຫາຣທານາທິນາ; ຕສ຺ມາ ອິຘາຫໍ ອຄ຺ຄທກ຺ຂິເຓຍ຺ໂຍ ຊາໂຕ; ອິເມສໍເຍວ ເທຍ຺ຍຘມ຺ມປຏິຄ຺ຄຓ຺ຫເນນ ປຸຎ຺ຎໍ ວຑ຺ເຒສ຺ສາມີ’’ຕິ ຈິນ຺ເຕສິ. ເຕນາຫ ‘‘ອຎ຺ຎຕ຺ຖ ຄນ຺ຕ຺ວາ ກິໍ ກຣິສ຺ສາມີ’’ຕິອາທິ. ສາຕິ ເທວຕາ. ອຸໂຠເປເຕຕິ ຕໍ ຠິກ຺ຂຸຎ຺ຈ ຆຣຓິຎ຺ຈ ສນ຺ຘາຍ ວທຕິ. ປຏິຄາຘປ຺ປຕ຺ຕາຕິ ປຏິຄາຘໍ ປຕ຺ຕາ ອຎ຺ຎມຎ຺ຎສ຺ມິໍ ປຕິຏ຺ຐິຕວິສ຺ສາເສນ.

ວິສ຺ສມປ຺ປຕ຺ຕິວເສນ ສນ຺ຕິຏ຺ຐນ຺ຕິ ເອຕ຺ຖາຕິ ສຓ຺ຐານໍ, ວິສ຺ສມນຏ຺ຐານໍ. ສມາຄນ຺ຕ຺ວາຕິ ສນ຺ນິປຕິຕ຺ວາ. ປຏິຎ຺ຎູທາຫຣເຓຫິ ມນ຺ຕຍຕີຕິ ມນ຺ຕນໍ, ຎາປກໍ ກາຣຓໍ. ປຏິໂລມສທ຺ທາຕິ ປຏິໂລມຠາເວນ ປຕິຕຕ຺ຕາ ອສຈ຺ຈວິຠາວນາ ປຏິກູລສທ຺ທາ. ເຕນ ກາຣເຓນາຕິ ເຕນ ກາຣຓປຏິຣູປເກນ ມິຈ຺ຉາວຈເນນ. ນ ມງ຺ກຸໂຫຕພ຺ພໍ ອກາຣກຠາວໂຕ. ສທ຺ເທນ ປຣິຕສ຺ສຕີຕິ ປເຣຫິ ອຕ຺ຕນິ ປຍຸຕ຺ຕມິຈ຺ຉາສທ຺ທມຕ຺ເຕນ ປຣິຕສ຺ສນສີໂລ. ວຕໍ ນ ສມ຺ປຊ຺ຊຕີຕິ ຍຖາສມາທິນ຺ນວຕໍ ລຫຸຈິຕ຺ຕຕາຍ ນ ປາຣິປູຣິໍ ຄຈ຺ຉຕິ. ສມ຺ປນ຺ນວໂຕຕິ ປຣິປຸຓ຺ຓສີລາທິວຕຄຸໂຓ

ກຸລຆຣຓີສຸຕ຺ຕວຓ຺ຓນາ ນິຏ຺ຐິຕາ.

໙. ວຊ຺ຊິປຸຕ຺ຕສຸຕ຺ຕວຓ຺ຓນາ

໒໒໙. ວຊ຺ຊິຣຏ຺ເຐ ຣາຊປຸຕ຺ໂຕຕິ ວຊ຺ຊິຣຏ຺ເຐ ຊາຕສໍວທ຺ໂຘ ວຊ຺ຊິຣາຊປຸຕ຺ໂຕ. ສພ຺ພຣຕ຺ຕິຈາໂຣຕິ ຉຓສມ຺ປຕ຺ຕິຍາ ອິໂຕ ຈິໂຕ ຈຣນ຺ເຕຫິ ອນຸຠວິຕພ຺ພນກ຺ຂຕ຺ຕມໂຫ. ເຕນາຫ ‘‘ກຕ຺ຕິກນກ຺ຂຕ຺ຕໍ ໂຆເສຕ຺ວາ’’ ຕິອາທິ. ເອກາພທ຺ຘໍ ໂຫຕີຕິ ຍສ຺ມາ ຈາຕຸມຫາຣາຊິກເທວາ ຕສ຺ມິໍ ທິວເສ ນກ຺ຂຕ຺ຕໍ ໂຆເສຕ຺ວາ ອຕ຺ຕໂນ ປຸຎ຺ຎານຸຠາວສິທ຺ຘາຍ ທິພ຺ພສມ຺ປຕ຺ຕິຍາ ມຫນ຺ຕໍ ນກ຺ຂຕ຺ຕກີຬາສຸຂໍ ອນຸຠວນ຺ຕິ, ຕສ຺ມາ ຕໍ ເຕຫິ ເອກາພທ຺ຘໍ ວິຍ ໂຫຕິ. ເຠຣິອາທິຕູຣິຍານນ຺ຕິ ເຠຣິມຸທິງ຺ຄສງ຺ຂປຓວວີຓາທິຕູຣິຍານໍ. ຕາຬິຕານນ຺ຕິ ອາຣທ຺ຘລຍານຸຣູປໍ ປຫຏານໍ. ວີຓາທີນນ຺ຕິ ວີຓາເວຓຸໂຄມຸຂີອາທີນໍ. ວາທິຕານນ຺ຕິ ຍຖາຣທ຺ຘມຸຈ຺ຉນານຸຣູປໍ ສງ຺ຆຏ຺ຏິຕານໍ. ອຠາສີຕິ ເຕນ ສທ຺ເທນ ອາກຑ຺ຒິຍມານຫທໂຍ ອໂຍນິໂສ ອຸມ຺ມຸຊ຺ຊິຕ຺ວາ ‘‘ມຫຕີ ວຕ ເມ ຊານີ’’ຕິ ອນຸຕ຺ຖຸນນ຺ໂຕ ອຠາສິ. ຉຑ຺ຑິຕທາຣຸກໍ ວິຍາຕິ ວເນ ຉຑ຺ຑິຕນິຣຕ຺ຖກກຬິງ຺ຄຣໍ ວິຍ. ລາມກຕໂຣຕິ ນິຫີນຕໂຣ. ເທວຕາ ປຐມປ຺ປິຕໍ ອາຓິໍ ປຏາຓິຍາ ນີຫຣນ຺ຕີ ວິຍ ເຕນ ຠິກ຺ຂຸນາ ວຸຕ຺ຕມຕ຺ຖໍ ອປເນນ຺ຕີ ‘‘ຕສ຺ສ ເຕ ພຫຸກາ ປິຫຍນ຺ຕີ’’ຕິ ອໂວຈາຕິ ວຸຕ຺ຕນ຺ຕິ ທສ຺ເສນ຺ໂຕ ‘‘ເຖໂຣ’’ຕິອາທິມາຫ. ສຄ຺ຄໍ ຄຈ຺ຉນ຺ຕານໍ ຍຖາ ເນຣຍິກາ ປິຫຍນ຺ຕິ, ເອວໍ ສມ຺ມາປຏິປນ຺ນສ຺ສ ຕຸຍ຺ຫໍ ພຫູ ປິຫຍນ຺ຕິ, ຕສ຺ມາ ຕ຺ວໍ ‘‘ປາປິໂຍ’’ຕິ ອຕ຺ຕານໍ ມາ ມຎ຺ຎິຕ຺ຖາຕິ ອຘິປ຺ປາໂຍ.

ວຊ຺ຊິປຸຕ຺ຕສຸຕ຺ຕວຓ຺ຓນາ ນິຏ຺ຐິຕາ.

໑໐. ສຊ຺ຌາຍສຸຕ຺ຕວຓ຺ຓນາ

໒໓໐. ນິສ຺ສຣຓປຣິຍຕ຺ຕິວເສນາຕິ ອທ຺ຘາ ອິມໍ ປຣິຍຕ຺ຕິໍ ນິສ຺ສາຍ ວຏ຺ຏທຸກ຺ຂໂຕ ນິສ຺ສຣິຕຸໍ ລພ຺ຠາຕິ ເອວໍ ນິສ຺ສຣຓປຣິຍຕ຺ຕິວເສນ. ສຊ຺ຌາຍນໂຕຕິ ວິມຸຕ຺ຕາຍຕນສີເສ ຐຕ຺ວາ ສຊ຺ຌາຍນໂຕ. ອິທານິ ຕສ຺ສ ນິສ຺ສຣຓປຣິຍຕ຺ຕິວເສນ ສຊ຺ຌາຍນກຣຓໍ, ປຏິປຕ຺ຕິວເສນ ວຕ຺ຕປຏິວຕ຺ຕກຣຓໍ, ວິປສ຺ສນາຠາວນຎ຺ຈ ທສ຺ເສຕຸໍ ‘‘ໂສ ກິຣາ’’ຕິອາທິ ວຸຕ຺ຕໍ. ອຣຫຕ຺ຕໍ ປຕ຺ຕທິວເສ ປຏິປຕ຺ຕິກິຕ຺ຕນາຍ ປຸຣິມທິວເສສຸປິ ຕຖາ ປຏິປຊ຺ຊິ, ວິປສ຺ສນໍ ປນ ອຸສ຺ສຸກ຺ກາເປຕຸໍ ນາສກ຺ຂີຕິ ທສ຺ເສຕິ. ກາລໍ ອຕິວຕ຺ເຕຕີຕິ ອິທໍ ‘‘ສງ຺ກສາຍຕີ’’ຕິ ປທສ຺ສ ອຕ຺ຖວຈນໍ. ເຖຣສ຺ສາຕິ ສຊ຺ຌາຍກຕ຺ເຖຣສ຺ສ.

ຘມ຺ມປທານີຕິ ສີລາທິຘມ຺ມກ຺ຂນ຺ຘທີປການິ ປທານິ. ເຕນາຫ ‘‘ສພ຺ພມ຺ປິ ພຸທ຺ຘວຈນໍ ອຘິປ຺ເປຕ’’ນ຺ຕິ. ນ ຄຓ຺ຫາສິ ອຸທ຺ເທສນ຺ຕິ ອຘິປ຺ປາໂຍ. ປາຬິຍໍ ‘‘ຠິກ຺ຂູຫິ ສໍວສນ຺ໂຕ’’ຕິ ອິມິນາ ເຕສໍ ຘມ຺ມສ຺ສວນຕ຺ຖາຍປິ ຘມ຺ໂມ ປຣິຍາປຸຓິຕພ຺ໂພຕິ ທສ຺ເສຕິ. ວິຣຊ຺ຊຕິ ເອເຕນາຕິ ວິຣາໂຄ, ອຣິຍມຄ຺ໂຄ. ຊານິຕ຺ວາຕິ ປຣິຎ຺ຎາຠິສມຍວເສນ ທິຏ຺ຐສຸຕາທິໍ ຍາຖາວໂຕ ຊານິຕ຺ວາ ປຏິວິຊ຺ຌິຕ຺ວາ. ວິສ຺ສຊ຺ຊນນ຺ຕິ ປຫານໍ. ນ ພຸທ຺ຘວຈນສ຺ສ ວິສ຺ສຊ຺ຊນໍ. ຠຓ຺ຑາຄາຣິກປຣິຍຕ຺ຕິຍາປິ ອນຸຎ຺ຎາຕຕ຺ຕາ ປເຄວ ນິສ຺ສຣຓຕ຺ຖາຍ, ຕຕ຺ຖ ປນ ມຕ຺ຕາ ຊານິຕພ຺ພາຕິ ທສ຺ເສນ຺ໂຕ ‘‘ເອຕ຺ຕາວຕາ’’ຕິອາທິມາຫ.

ສຊ຺ຌາຍສຸຕ຺ຕວຓ຺ຓນາ ນິຏ຺ຐິຕາ.

໑໑. ອກຸສລວິຕກ຺ກສຸຕ຺ຕວຓ຺ຓນາ

໒໓໑. ອກຸສເລ ວິຕກ຺ເກຕິ ອໂກສລ຺ລສມ຺ຠູຕຏ຺ເຐນ ອກຸສເລ ມິຈ຺ຉາວິຕກ຺ເກ. ໂຍນິ ວຸຈ຺ຈຕິ ອຸປາໂຍ, ຕສ຺ມາ ອສຸຠາທິເກ ສຸຠາທິວເສນ ມນສິກາໂຣ ອໂຍນິໂສມນສິກາໂຣຕິ ອາຫ ‘‘ອນຸປາຍມນສິກາເຣນາ’’ຕິ. ປາສາທິກກມ຺ມຏ຺ຐານນ຺ຕິ ປສາທາວຫໍ ພຸທ຺ຘານຸສ຺ສຕິອາທິກມ຺ມຏ຺ຐານໍ. ພລວປີຕິຎ຺ຈ ສຸຂຎ຺ຈາຕິ ນີວຣຓວິກ຺ຂມ຺ຠນໂຕ ພລວນ຺ຕໍ ອຸປຈາຣຊ຺ຌານສຫຄຕໍ ປີຕິຎ຺ຈ ສຸຂຎ຺ຈ.

ອກຸສລວິຕກ຺ກສຸຕ຺ຕວຓ຺ຓນາ ນິຏ຺ຐິຕາ.

໑໒. ມຊ຺ຌນ຺ຫິກສຸຕ຺ຕວຓ຺ຓນາ

໒໓໒. ນນ຺ທນວຄ຺ເຄຕິ ນນ຺ທນວຄ຺ຄວຓ຺ຓນາຍໍ ຕຕ຺ຖ ອິຘາປິ ຄາຖາຍ ວິເສສາຠາວໂຕ. ຍທິ ເອວໍ ກສ຺ມາ ຕຕ຺ຖ ສງ຺ຄີຕໍ ອິຘ ຄຫິຕນ຺ຕິ? ເທວຕາປຏິສໍຍຸຕ຺ຕຕໍ ອຸປາທາຍ ເທວຕາສໍຍຸຕ຺ເຕ ສງ຺ຄຫິຕມ຺ປິ ອຏ຺ຐຸປ຺ປຕ຺ຕິຍາ ປຏິສໍຍຸຕ຺ຕຕ຺ຕາ ອິຘ ຄຫິຕໍ.

ມຊ຺ຌນ຺ຫິກສຸຕ຺ຕວຓ຺ຓນາ ນິຏ຺ຐິຕາ.

໑໓. ປາກຕິນ຺ທ຺ຣິຍສຸຕ຺ຕວຓ຺ຓນາ

໒໓໓. ເຕຣສເມ ຍໍ ວຕ຺ຕພ຺ພໍ, ຕໍ ວິຕ຺ຖາຣິຕເມວາຕິ ໂຍຊນາ. ຊນ຺ຕຸເທວປຸຕ຺ຕສຸຕ຺ເຕຕິ ຊນ຺ຕຸເທວປຸຕ຺ຕສຸຕ຺ຕສໍວຓ຺ຓນາຍ. ‘‘ຕຕ຺ຖ ສງ຺ຄີຕໍ ອິຘາປີ’’ຕິອາທິ ອນນ຺ຕຣສຸຕ຺ຕວຓ຺ຓນາຍໍ ວຸຕ຺ຕນຍເມວ.

ປາກຕິນ຺ທ຺ຣິຍສຸຕ຺ຕວຓ຺ຓນາ ນິຏ຺ຐິຕາ.

໑໔. ຄນ຺ຘຕ຺ເຖນສຸຕ຺ຕວຓ຺ຓນາ

໒໓໔. ຄນ຺ຘາຣມ຺ມຓໍ ອຸປນິຊ຺ຌາຍຕີຕິ ຄນ຺ຘສງ຺ຂາຕໍ ອາຣມ຺ມຓໍ ອຸເປຈ຺ຈ ນິຊ຺ຌາຍຕິ, ຣູປາຣມ຺ມເຓນ ວິຍ ວິຎ຺ຎາເຓນ ຣູປໍ, ຄນ຺ຘາຣມ຺ມເຓນ ຕໍ ອຸເປຈ຺ຈ ນິຊ຺ຌາຍຕິ ປຈ຺ຈກ຺ຂໂຕ, ຍາຖາວໂຕ ສຠາວໂຕ ປຏິວິຊ຺ຌຕີຕິ ອຕ຺ໂຖ. ອຸປສິງ຺ຆິສ຺ສຕີຕິ ຕຓ຺ຫາວເສນ ອຸປຄນ຺ຕ຺ວາ ສິງ຺ຆິສ຺ສຕິ.

ເອກງ຺ຄເມຕໍ ເຖຍ຺ຍານນ຺ຕິ ອາຣມ຺ມຓວເສນ ເຖຍ຺ຍວຕ຺ຖູສຸ ວິຠຊິຍມາເນສຸ ເອກມງ຺ຄເມຕໍ ຄນ຺ຘາຣມ຺ມຓນ຺ຕິ ອາຫ ‘‘ເຖນິຕພ຺ພານ’’ນ຺ຕິອາທິ. ໂອຊາເປກ຺ຂາຍ ເຖຍ຺ຍາຍ ປວຕ຺ຕມານາຍ ຘມ຺ມາຣມ຺ມຓຕາປິ ຕສ຺ສາ ສິຍາ, ສາ ປນ ນ ມຘຸຣາ ເຖຍ຺ຍກຕາ ຈາຕິ ‘‘ປຎ຺ຈໂກຏ຺ຐາສານ’’ນ຺ຕິ ວຸຕ຺ຕໍ. ກາມຎ຺ຈ ຕໍ ຄນ຺ຘາຣມ຺ມຓໍ ເກນຈິ ປຣິຄ຺ຄຫິຕໍ ນ ໂຫຕີຕິ ອາທິຍິຕຸໍ ສກ຺ກາ, ສຕ຺ຖາຣາ ປນ ອນນຸຎ຺ຎາຕຕ຺ຕາ ນ ຍຸຕ຺ໂຕ ຕສ຺ສ ປຣິໂຠໂຄ. ຍໍ ປນ ເຕນ ຠິກ຺ຂຸນາ ວຸຕ຺ຕໍ ‘‘ນ ຫຣາມິ ນ ຠຎ຺ຊາມີ’’ຕິ, ຕສ຺ສປິ ອຍເມວ ປຣິຫາໂຣ. ວຓ຺ຓີຍຕິ ຜລໍ ເອເຕນາຕິ ວຓ຺ຓໍ, ກາຣຓນ຺ຕິ ວຸຕ຺ຕໍ ‘‘ວຓ຺ເຓນາຕິ ກາຣເຓນາ’’ຕິ.

ຕສ຺ມິນ຺ຕິ ຕສ຺ມິໍ ຠິກ຺ຂຸສ຺ມິໍ. ອາກິຓ຺ຓກມ຺ມນ຺ໂຕຕິ ຕຓ຺ຫາທິຏ຺ຐິອາທິວເສນ ອກຸສລກມ຺ມນ຺ໂຕ ທິຏ຺ຐິໂມຫຕຓ຺ຫາທິວເສນ ອາທິໂຕ ປຏ຺ຐາຍ ກຸສລກມ຺ມານໍ ປຏິກ຺ເຂປນໂຕ. ທິຏ຺ຐິວເສນ ຈ ກຖິນກກ຺ຂຬຂຣິຄຕຕ຺ຕາ ‘‘ອຂີຓກມ຺ມນ຺ໂຕ ກກ຺ຂຬກມ຺ມນ຺ໂຕ’’ຕິ ວຸຕ຺ຕໍ.

ອາກິຓ຺ຓລຸທ຺ໂທຕິ ອາກິຓ຺ໂຓ ຫຸຕ຺ວາ ກກ຺ຂໂຬ. ເຕນາຫ ‘‘ພຫຸປາໂປ’’ຕິອາທິ. ມກ຺ຂິໂຕຕິ ລິຕ຺ໂຕ. ຕນ຺ຕິ ເທວຕາໂຈທນໍ. ຕສ຺ມາຕິ ອຕິກ຺ກມ຺ມ ຐິຕຕ຺ຕາ‘‘ຕ຺ວຎ຺ຈາຣຫາມິ ວຕ຺ຕເວ’’ຕິ ເອວມາຫ.

ຄເວສນ຺ຕສ຺ສ ອຕ຺ຕໂນ ສນ຺ຕາເນ ອຸປ຺ປາທນວເສນ ປຣິເຍສນ຺ຕສ຺ສ. ອເນກໂຍຊນາຍາມວິຕ຺ຖາຣໍ ຄຄນຕລໍ ພ຺ຍາເປຕ຺ວາ ອຸປ຺ປນ຺ນວລາຫກກູຏປ຺ປມາຓໍ ວິຍ. ສຸທ຺ໂຘຕິ ສີເລນ ປຣິສຸທ຺ໂຘ ອຍນ຺ຕິ ຊານາສິ. ສຸຄຕິນ຺ຕິ ສຸນ຺ທຣນິພ຺ພຕ຺ຕິໍ. ເຕນ ນິພ຺ພານສ຺ສປິ ສງ຺ຄໂຫ ສິທ຺ໂຘ.

ຄນ຺ຘຕ຺ເຖນສຸຕ຺ຕວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ວນສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.