໕. ປຣິນິພ຺ພານສຸຕ຺ຕວຓ຺ຓນາ

໑໘໖. ເອວໍ ຕໍ ກຸສິນາຣາຍ ໂຫຕີຕິ ຍຖາ ອນຸໂຣຘປຸຣສ຺ສ ຖູປາຣາໂມ ທກ຺ຂິຓປຈ຺ຉິມທິສາຍໍ, ເອວໍ ຕໍ ອຸຍ຺ຍານໍ ກຸສິນາຣາຍ ທກ຺ຂິຓປຈ຺ຉິມທິສາຍໍ ໂຫຕິ. ຕສ຺ມາຕິ ຍສ຺ມາ ນຄຣໍ ປວິສິຕຸກາມາ ອຸຍ຺ຍານໂຕ ອຸເປຈ຺ຈ ວຕ຺ຕນ຺ຕິ ຄຈ຺ຉນ຺ຕິ ເອເຕນາຕິ ອຸປວຕ຺ຕນນ຺ຕິ ວຸຈ຺ຈຕິ, ຕສ຺ມາ. ຕນ຺ຕິ ສາລປນ຺ຕິຠາເວນ ຐິຕໍ ສາລວນໍ. ອນ຺ຕເຣນາຕິ ເວມຊ຺ເຌ. ອປ຺ປມຊ຺ຊນໍ ອປ຺ປມາໂທ, ໂສ ປນ ອຕ຺ຖໂຕ ຎາຓູປສໍຫິຕາ ສຕິ. ຍສ຺ມາ ຕຕ຺ຖ ສຕິຍາ ພ຺ຍາປາໂຣ ສາຕິສໂຍ, ຕສ຺ມາ ‘‘ສຕິອວິປ຺ປວາເສນາ’’ຕິ ວຸຕ຺ຕໍ. ອປ຺ປມາທປເທເຍວ ປກ຺ຂິປິຕ຺ວາ ອຠາສິ ອຕ຺ຖໂຕ ຕສ຺ສ ສກລສ຺ສ ພຸທ຺ຘວຈນສ຺ສ ສງ຺ຄຓ຺ຫນໂຕ.

ຌານາທີສຸ ຈິຕ຺ເຕ ຈ ປຣມຸກ຺ກໍສຄຕວສີຠາວຕາຍ ‘‘ເອຕ຺ຕເກ ກາເລ ເອຕ຺ຕກາ ສມາປຕ຺ຕິໂຍ ສມາປຊ຺ຊິຕ຺ວາ ປຣິນິພ຺ພາຍິສ຺ສາມີ’’ຕິ ກາລປຣິຈ຺ເຉທໍ ກຕ຺ວາ ສມາປຕ຺ຕິສມາປຊ຺ຊນໍ ປຣິນິພ຺ພານປຣິກມ຺ມນ຺ຕິ ອຘິປ຺ເປຕໍ. ເຖໂຣຕິ ອນຸຣຸທ຺ຘຕ຺ເຖໂຣ.

ອຍມ຺ປິ ຈາຕິ ຍຖາວຸຕ຺ຕປຎ຺ຈສຏ຺ຐິຍາ ຌານານໍ ສມາປນ຺ນກຖາປິ ສງ຺ເຂປກຖາ ເອວ. ກສ຺ມາ? ຍສ຺ມາ ຠຄວາ ຕທາ ເທວສິກໍ ວຬຎ຺ຊນສມາປຕ຺ຕິໂຍ ສພ຺ພາປິ ອປຣິຫາເປຕ຺ວາ ສມາປຊ຺ຊິ ເອວາຕິ ທສ຺ເສນ຺ໂຕ ‘‘ນິພ຺ພານປຸຣໍ ປວິສນ຺ໂຕ’’ຕິອາທິມາຫ. ຈຕຸວີສຕິ…ເປ… ປວິສິຕ຺ວາຕິ ເອຕ຺ຖ ເກຈິ ຕາວ ອາຫຸ ‘‘ຠຄວາ ເທວສິກໍ ທ຺ວາທສໂກຏິສຕສຫສ຺ສກ຺ຂຕ຺ຕຸໍ ມຫາກຣຸຓາສມາປຕ຺ຕິໍ ສມາປຊ຺ຊຕິ, ທ຺ວາທສໂກຏິສຕສຫສ຺ສກ຺ຂຕ຺ຕຸເມວ ຜລສມາປຕ຺ຕິໍ ສມາປຊ຺ຊຕິ, ຕສ຺ມາ ຕທາປິ ຈຕຸວີສຕິໂກຏິສຕສຫສ຺ສສງ຺ຂາ ສມາປຕ຺ຕິໂຍ ສມາປຊ຺ຊຕິ. ວຸຕ຺ຕຎ຺ເຫຕໍ ຠຄວຕາ ‘ຕຖາຄຕໍ, ຠິກ຺ຂເວ, ອຣຫນ຺ຕໍ ສມ຺ມາສມ຺ພຸທ຺ຘໍ ທ຺ເວ ວິຕກ຺ກາ ພຫຸລໍ ສມຸທາຈຣນ຺ຕິ ເຂໂມ ຈ ວິຕກ຺ໂກ ປວິເວໂກ ຈ ວິຕກ຺ໂກ’ຕິ (ອິຕິວຸ. ໓໘). ເຂໂມ ຫິ ວິຕກ຺ໂກ ຠຄວໂຕ ມຫາກຣຸຓາສມາປຕ຺ຕິໍ ປູເຣຕ຺ວາ ຐິໂຕ, ປວິເວກວິຕກ຺ໂກ ອຣຫຕ຺ຕຜລສມາປຕ຺ຕິໍ. ພຸທ຺ຘານໍ ຫິ ຠວງ຺ຄປຣິວາໂສ ລຫຸໂກ ມຕ຺ຖກປ຺ປຕ຺ໂຕ ສມາປຕ຺ຕີສຸ ວສີຠາໂວ, ຕສ຺ມາ ສມາປຊ຺ຊນວຸຏ຺ຐານານິ ກຕິປຍຈິຕ຺ຕກ຺ຂເຓເຫວ ອິຊ຺ຌນ຺ຕິ. ປຎ຺ຈ ຣູປາວຈຣສມາປຕ຺ຕິໂຍ ຈຕສ຺ໂສ ອຣູປສມາປຕ຺ຕິໂຍ ອປ຺ປມຎ຺ຎາສມາປຕ຺ຕິຍາ ສທ຺ຘິໍ ນິໂຣຘສມາປຕ຺ຕິ ອຣຫຕ຺ຕຜລສມາປຕ຺ຕິ ຈາຕິ ທ຺ວາທເສຕາ ສມາປຕ຺ຕິໂຍ ຠຄວາ ປຈ຺ເຈກໍ ທິວເສ ທິວເສ ໂກຏິສຕສຫສ຺ສກ຺ຂຕ຺ຕຸໍ ປຸເຣຠຕ຺ຕໍ ສມາປຊ຺ຊຕິ, ຕຖາ ປຈ຺ຉາຠຕ຺ຕນ຺ຕິ ເອວໍ ຈຕຸວີສຕິໂກຏິສຕສຫສ຺ສສງ຺ຂາ ເທວສິກໍ ວຬຎ຺ຊນກກສິຓສມາປຕ຺ຕິໂຍ’’ຕິ.

ອປເຣ ປນາຫຸ ‘‘ຍໍ ຕໍ ຠຄວຕາ ອຠິສມ຺ໂພຘິທິວເສ ປຈ຺ຉິມຍາເມ ປຏິຈ຺ຈສມຸປ຺ປາທງ຺ຄມຸເຂນ ປຏິໂລມນເຍນ ຊຣາມຣຓໂຕ ປຏ຺ຐາຍ ຎາຓໍ ໂອຕາເຣຕ຺ວາ ອນຸປທຘມ຺ມວິປສ຺ສນໍ ອາຣຠນ຺ເຕນ ຍຖາ ນາມ ປຸຣິໂສ ສຸວິທຸຄ຺ຄໍ ມຫາຄຫນໍ ມຫາວນໍ ຉິນ຺ທນ຺ໂຕ ອນ຺ຕຣນ຺ຕຣາ ນິສານສິລາຍໍ ຜຣສຸໍ ນິສິຕໍ ກໂຣຕິ, ເອວເມວໍ ນິສານສິລາສທິສິໂຍ ສມາປຕ຺ຕິໂຍ ອນ຺ຕຣນ຺ຕຣາ ສມາປຊ຺ຊິຕ຺ວາ ຎາຓສ຺ສ ຕິກ຺ຂວິສທຠາວໍ ສມ຺ປາເທຕຸໍ ອນຸໂລມປຏິໂລມໂຕ ປຈ຺ເຈກໍ ປຏິຈ຺ຈສມຸປ຺ປາທງ຺ເຄສຸ ລກ຺ຂໂກຏິສມາປຕ຺ຕິສມາປຊ຺ຊນວເສນ ສມ຺ມສນຎາຓໍ ປວຕ຺ເຕຕິ, ຕທນຸສາເຣນ ຠຄວາ ພຸທ຺ຘຠູໂຕປິ ອນຸໂລມປຏິໂລມໂຕ ປຏິຈ຺ຈສມຸປ຺ປາທງ຺ຄມຸເຂນ ວິປສ຺ສນາວເສນ ທິວເສ ທິວເສ ລກ຺ຂໂກຏິຜລສມາປຕ຺ຕິໂຍ ສມາປຊ຺ຊຕິ, ຕໍ ສນ຺ຘາຍ ວຸຕ຺ຕໍ, ‘ຈຕຸວີສຕິໂກຏິສຕສຫສ຺ສສງ຺ຂາ ສມາປຕ຺ຕິໂຍ ປວິສິຕ຺ວາ’’’ຕິ.

ອິມານິ ທ຺ເວປິ ສມນນ຺ຕຣາເນວ ປຈ຺ຈເວກ຺ຂຓາຍປິ ເຍຠຸຍ຺ເຍນ ນານນ຺ຕຣິຍກຕາຍ ຌານປກ຺ຂິກຠາວໂຕ. ຍສ຺ມາ ສພ຺ພປຈ຺ຉິມໍ ຠວງ຺ຄຈິຕ຺ຕໍ ຕໂຕ ຕໂຕ ຈວນໂຕ ‘‘ຈຸຕີ’’ຕິ ວຸຈ຺ຈຕິ, ຕສ຺ມາ ນ ເກວລໍ ອຍເມວ ຠຄວາ, ອຖ ໂຂ ສພ຺ເພປິ ສຕ຺ຕາ ຠວງ຺ຄຈິຕ຺ເຕເນວ ຈວນ຺ຕີຕິ ທສ຺ເສຕຸໍ ‘‘ເຍ ຫິ ເກຈີ’’ຕິອາທິ ວຸຕ຺ຕໍ. ທຸກ຺ຂສຈ຺ເຈນາຕິ ທຸກ຺ຂສຈ຺ຈປຣິຍາປນ຺ເນນ ຈຸຕິຈິຕ຺ເຕນ ກາລໍ ກາລກິຣິຍໍ ກໂຣນ຺ຕິ ປາປຸຓນ຺ຕິ, ກາລຄມນໂຕ ວາ ກໂຣນ຺ຕິ ເປຈ຺ຈາຕິ.

ປຏິຠາຄປຸຄ຺ຄລວິຣຫິໂຕ ສີລາທິຄຸເຓຫິ ອສທິສຕາຍ ສທິສປຸຄ຺ຄລຣຫິໂຕ. ສງ຺ຂາຣາ ວູປສມ຺ມນ຺ຕິ ເອຕ຺ຖາຕິ ວູປສໂມຕິ ເອວໍ ສງ຺ຂາຕໍ ຎາຕໍ ກຖິຕໍ ນິພ຺ພານເມວ ສຸຂນ຺ຕິ. ໂລມຫໍສນໂກຕິ ໂລມານໍ ຫຏ຺ຐຠາວາປາທໂນ. ຠິໍສນໂກຕິ ອວີຕຣາຄານໍ ຠຍຊນໂກ ອາສິ ອໂຫສິ. ສພ຺ພາກາຣວຣຄຸຓູເປເຕຕິ ສພ຺ເພຫິ ອາກາຣວເຣຫິ ອຸຕ຺ຕມກາຣເຓຫິ ສີລາທິຄຸເຓຫິ ສມນ຺ນາຄເຕ. ອສງ຺ກຸຏິເຕນາຕິ ອກຸຏິເຕນ ວິປ຺ຜາຣິກາຠາວໂຕ. ສຸວິກສິເຕເນວາຕິ ປີຕິໂສມນສ຺ສໂຍຄໂຕ ສຸຏ຺ຐຸ ວິກສິເຕນ. ເວທນໍ ອຘິວາເສສິ ສຠາວສມຸທຍາທິໂຕ ສຸຏ຺ຐຸ ປຎ຺ຎາຕຕ຺ຕາ. ອນາວຣຓວິໂມກ຺ໂຂ ສພ຺ພໂສ ນິພ຺ພິທຠາໂວ. ເຕນາຫ ‘‘ອປຎ຺ຎຕ຺ຕິຠາວູປຄໂມ’’ຕິ. ປຊ຺ໂຊຕນິພ຺ພານສທິໂສຕິ ປທີປສ຺ສ ນິພ຺ພານສທິໂສ ຕຕ຺ຖ ວິລີຍິຕ຺ວາ ອວຏ຺ຐານາຠາວໂຕ.

ປຣິນິພ຺ພານສຸຕ຺ຕວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.

ສາຣຕ຺ຖປ຺ປກາສິນິຍາ ສໍຍຸຕ຺ຕນິກາຍ-ອຏ຺ຐກຖາຍ

ພ຺ຣຫ຺ມສໍຍຸຕ຺ຕວຓ຺ຓນາຍ ລີນຕ຺ຖປ຺ປກາສນາ ສມຕ຺ຕາ.